Tama U Famba Hi Lipfumelo

1. Ha yini mupostola Pawulo a titwe na a nyonxile loko a yanakanyisise hi ndlela leyi a a hanya ha yone?

HI NDLELA ya kukazri, mupostola Pawulo a a swi tiva leswaku ku nga li khale a a ta dlayiwa. Kambe loko a yanakanyisise hi ndlela leyi a a hanya ha yone, a a nyonxa ngopfu swinene lakakuva a tibyela leswi: “Ni tsrutsrume mpalisanu ku ya tlhasa wugamu, ni hlayise lipfumelo.” (2 Tim. 4:6-8) Pawulo a teke swiboho swa wutlhazri a wutizrelini byake bya wukriste, nakone a a tiyiseka leswaku Yehovha a a nyonxa ngopfu ha yene. Na hine hi djula ku teka swiboho leswi Yehovha a taka swi nyonxela. Hi nga swi yentxisa kuyini?

2. Swi tlhamuxela yini ku famba hi lipfumelo?

² Pawulo a hlaye leswi mayelanu na yene kun’we ni vakriste van’wana va ku dumbeka: “Hi famba hi lipfumelo, ku nga li hi ku vona.” (2 Kor. 5:7) Xana Pawulo a a djula ku hlaya yini? A Bibeleni, zritu ledzri liki “ku famba”, minkama yin’wana dzri hlaya ndlela leyi mhunu a hlawulaka ku hanya ha yone. Loko mhunu a famba hi ku vona, a teka swiboho leswi seketeliwiki ntsena ka leswi a swi vonaka, a swi yingelaka ni ka matitwela yake. Kambe mhunu lweyi a fambaka hi lipfumelo a teka swiboho leswi seketeliwiki ka ndlela leyi a dumbaka Yehovha Xikwembu Nkulukumba ha yone. Ndlela leyi a yentxaka mintxhumu ha yone yi kombisa leswaku awa dumba leswaku Xikwembu Nkulukumba a ta mu hakela ni leswaku a ta pfuneka loko a landzra switsratsriyo swa Yehovha leswi kumekaka Bibeleni.—Amaps. 119:66; Heb. 11:6.

3. Xana hi pfuneka hi ndlela yini loko hi famba hi lipfumelo? (2 Vakorinte 4:18)

³ I ntiyiso leswaku hinkwezru hi pfa hi teka swiboho leswi seketeliwiki ntsena ka leswi hi swi vonaka, hi swi yingelaka ni hi ku ya hi matitwela yezru. Kambe loko hi tiseketela ka leswo ntsena hi ta kumana ni swikazratu. Ha yini? Hikusa minkama yin’wana matitwela yezru ma nga ha hi kanganyisa. Handle ka leswo, loko hi teka swiboho hi ku ya hi leswi hi swi vonaka, leswi hi swi yingelaka kumbe hi matitwela yezru hi nga ha yentxa ntxhumu lowu taka khunguvanyisa Yehovha. (Ekles. 11:9; Mat. 24:37-39) Kambe loko hi kongomisiwa hi lipfumelo hi ta teka swiboho “leswi nyonxisaka Hosi”. (Efe. 5:10) Loko hi landzra swilayu swa Xikwembu Nkulukumba hi ta va ni ku zrula nakone leswo swi ta hi yentxa hi va ni ku nyonxa ka hakakunene. (Amaps. 16:8, 9; Eza. 48:17, 18) Nakone loko hi tama hi famba hi lipfumelo, hi ta hanya hi lani ku nga helikiki.—Dondzra 2 Vakorinte 4:18.

4. Xana mhunu a nga swi tivisa kuyini leswaku a famba hi lipfumelo kumbe a famba hi ku vona?

⁴ Hinkwezru hi nga ha tivutisa leswi: I yini lexi ni kongomisaka loko ni teka swiboho? Xana ni tiseketela ka leswi ni swi vonaka ntsena kumbe ni tiseketela ka swilayu swa Yehovha? A hi kambisiseni ndlela leyi hi nga tamaka hi famba hi lipfumelo ha yone ka swiyimu swizrazru a wuton’wini byezru: Loko hi hlawula ntizro, lweyi hi taka txhata na yene ni loko hi yamukela nkongomiso wa nhlengeletanu. Ka xiyimu ha xin’we, hi ta vona leswi hi fanelaka ku swi kambisisa akuva hi teka swiboho leswinene.

LOKO HI HLAWULA NTIZRO

5. I yini leswi hi fanelaka ku yanakanya ha swone loko hi hlawula ntizro?

⁵ Hinkwezru hi djula ku yanelisa swivileleko swezru ni swa ndangu wezru. (Ekles. 7:12; 1 Tim. 5:8) Tikomponi tin’wana ti holelana mali yinyingi. Ka mintizro yin’wana, mutizri a nga ha kuma mali yinyingi akuva a yanelisa swivileleko swa ndangu wake a tlhela a beka yin’wana hi tlhelo akuva yi ta mu pfuna a nkameni lowu taka. Kasi tikomponi tin’wana ti holelana mali yitsrongo leyi yo ko yanela ntsena ku yanelisa swivileleko swa lisima ndangwini swa ku fana ni swakuda, mbangu wa ku tsrhama ka wone ni mpahla. Loko hi hlawula ntizro, hi djula ni ku tiva leswaku hi ta hola mali muni. Kambe loko a li leswaku ho pimisa hi leswo ntsena, hi va na hi nga fambi hi lipfumelo.

6. Hi nga kombisa leswaku hi famba hi lipfumelo loko hi hlawula ntizro hi ndlela yini? (Vaheberu 13:5)

⁶ Loko hi famba hi lipfumelo, hi ta djula ku kambisisa leswaku ntizro wezru wu byi khumba hi ndlela yini wuxaka byezru na Yehovha. Hi nga ha tivutisa leswi: ‘Xana ntizro lowu wu ta sindzrisa kuva ni patsreka ka mintxhumu leyi Yehovha a yi nyenyaka?’ (Amapr. 6:16-19) ‘Xana ntizro lowu wu ta ni sivela kuva ni va kone mintlhanganwini ni ku va kule ni ndangu wanga hi nkama wa ku leha?’ (Filp. 1:10) Loko tinhlamulo ta swivutiso leswo a li ina, ku ta va wutlhazri kuva u nga wu pfumeli ntizro lowo nambiloko swi kazrata ku kuma ntizro. Leswi hi fambaka hi lipfumelo, hi teka swiboho leswi kombisaka leswaku hi dumba leswaku Yehovha a ta hi nyika leswi hi swi vilelaka.—Mat. 6:33; dondzra Vaheberu 13:5.

7-8. Xana makwezru wa xinuna lweyi a tsrhamaka a América do Sul a kombise leswaku a famba hi lipfumelo hi ndlela yini? (Tlhela u vona ni mufoto.)

⁷ Xiya ndlela leyi Javier,a makwezru lweyi a tsrhamaka a América do Sul a voniki xivileleko xa ku famba hi lipfumelo ha yone. Yene a li: “A ni titsralise ka ntizro lowu a wu ta ni nyika lisima ni tlhela ni kuma mali yinyingi ku tlula mali leyi a ni yi kuma ka ntizro wa ku sungula nakone i ntizro lowu a ni ta wu zrandzra.” Kambe Javier a a swi nyonxela ngopfu ku va phayona. Loko a ya mahlweni a li: “Ni vitaniwile akuva ni hambiwa swivutiso mayelanu ni ntizro lowo. Na ni nga si kambeliwa, ni khongotile ni kombela mpfunu na ni tiyiseka leswaku Yehovha a a swi tiva leswi a swi li swinene kwanga. A ni wu djula ntizro ni ku va ni mali yinyingi kambe a ni nga wu djuli ntizro lowu a wu ta ni yentxa ni nga ma tlhaseleli makungu yanga ya moya.”

⁸ Javier a li: “Lweyi a a ni hamba swivutiso, a ni byele leswaku a ni ta tizra nkama lowu yengetelekiki siku ni siku. Hi ndlela ya lizrandzru ni mu byele leswaku ni nge te swi kota hi kola ka ntizro lowu ni wu yentxelaka Yehovha.” Hi ndlela leyo, Javier a nga wu pfumelanga ntizro lowo. Ntsrhaku ka mavhiki mabidzri, a sungule ku tizra swanga phayona. Nakone hi ku famba nkama ka lembe dzroledzro, a kume ntizro lowu a wu mu nyika ni nkama wa ku tizra swanga phayona. A hi byela leswi: “Yehovha a yingele swikhongoto swanga nakone a ni pfune ku kuma ntizro lowu a wu fambisana ni xiyimiso xanga swanga phayona. Ni nyonxe ngopfu hi leswi ni kumiki ntizro lowu ni pfumelelaka ku yentxa leswi yengetelekiki a ntizrweni wa Yehovha ni tlhela ni pfuna vamakwezru.”

9. U dondzra yini ka mfambu wa Trésor?

⁹ Hi nga yentxa yini loko hi vona leswaku ntizro lowu hi wu yentxaka swoswi wu hi tsrhindzreta kule na Yehovha? Kambisisa mfambu wa Trésor wa le Congo. A dzrungula leswi: “Ntizro lowu a ni wu kumile hi lowu a ni buya na ni wu djula hi khale. A ni hola mali leyi a yi yi tlula kazrazru mali leyi a ni yi hola ka ntizro wa ku sungula nakone a ni hloniphiwa ngopfu.” Kambe Trésor a a talisa ku lovha a mintlhanganwini hi kola ka ntizro wake. Nakone a vatizrikulobye a va mu kutxetela kuva a hembela vhanu akuva va fihla wukanganyisi lebyi a va byi yentxa. Trésor a a swi djula ku wu tsrhika ntizro lowo kambe a a kazrateka hi ku tiva leswaku a a ta tsrhama na a nga tizri. I yini leswi mu pfuniki? A li: “Habakuki 3:17-19 yi ni pfune ku twisisa leswaku nambiloko no luzekeliwa hi ntizro, Yehovha a a ta tama a ni hlayisa hi ndlela ya kukazri. Xileswo ni wu tsrhikile ntizro lowo.” A tlhela a ku: “Vatholi vanyingi va pimisa leswaku loko mhunu o va ni ntizro lowu nyikanaka mali yinyingi, a nga yentxa xin’wana ni xin’wana leswaku a tama a va na wone nambiloko swi mu yentxa a va kule ni ndangu wake a tlhela a nga ha yi hisekeli mintizro ya moya. Na nyonxa hi leswi ni nga ni wuxaka lebyinene na Yehovha kun’we ni ndangu wanga. Ntsrhaku ka lembe na ni yime ku tizra, Yehovha a ni pfune ku kuma ntizro lowu ni pfunaka kuva ni yaneliseka hi leswi ni nga na swone wu tlhela wu ni nyika nkama wa kuva ni tizrela Yehovha. Nambiloko hi lwisana ni swikazratu swa timali, loko hi zrangisa Yehovha, yene a ta hi hlayisa.” Nakunene, loko hi dumba swilayu ni swidumbiso swa Yehovha hi ta tama hi famba hi lipfumelo nakone yene a ta hi tovokisa.

LOKO HI HLAWULA LWEYI HI TAKA TXHATA NA YENE

10. He yini mintxhumu ya lisima leyi hi fanelaka ku yanakanyisisa ha yone loko hi hlawula lweyi hi taka txhata na yene nakone hi fanela ku tivonela ka yini?

¹⁰ A mutxhatu i nyiko leyi pfaka hi ka Yehovha nakone i swa ntumbuluku ku djula ku txhata. Loko makwezru wa kukazri wa xisati a djula ku txhata a nga ha langusa ndlela leyi makwezru wa xinuna a langutekaka ha yone, ndlela leyi a yentxaka mintxhumu ha yone, ndlela leyi van’wana va mu vonaka ha yone, ndlela leyi a yi tizrisaka ha yone mali, kumbexana a ni wutiyanguleli bya kukazri a ndangwini ni ndlela leyi a mu khomaka ha yone makwezru yelweyo wa xisati.b I swinene ku yanakanya hi mintxhumu leyo. Kambe loko a kambisisa mintxhumu leyo ntsena a ta va na a famba hi ku vona.

11. Hi nga kombisa leswaku hi famba hi lipfumelo loko hi hlawula lweyi hi taka txhata na yene hi ndlela yini? (1 Vakorinte 7:39)

¹¹ Yehovha a tikhuza ngopfu swinene hi vamakwezru va xisati ni va xinuna loko va hlawula lweyi va taka txhata na yene! Va xi tekela nhlokweni xilayu xa kuva va txhata loko kutani va “wupfile hi le mizrini ni le miyanakanywini”. (1 Kor. 7:36) Va tiyiseka hi ku helela leswaku lweyi va taka txhata na yene a na wone matsrhamela lawa Yehovha a ma yimelaka ka wanuna ni wansati. (Amapr. 31:10-13, 26-28; Efe. 5:33; 1 Tim. 5:8) Loko mhunu lweyi a kalaka a nga li Mboni ya Yehovha a djula ku txhata na vone, va landzra xilayu lexi liki: “txhata . . . ntsena a Hosini” lexi nga ka 1 Vakorinte 7:39 (Dondzra.) Va tama va famba hi lipfumelo na va dumba leswaku Yehovha awa ma twisisa matitwela yavu nakone a nga kone lweyi a taka va pfuna ku tlula ndlela leyi Yehovha a taka va pfuna ha yone.—Amaps. 55:22.

12. U dondzra yini ka xikombiso xa Rosa?

¹² Kambisisa mfambu wa makwezru Rosa, phayona dzra le Colômbia. Ntizro wake minkama yinyingi a wu yentxa leswaku a vulavula ni wanuna lweyi a nga liki Mboni ya Yehovha lweyi a a mu nyonxela. Rosa na yene a mu nyonxelile wanuna lweyo. Yene a li: “A a tikomba a li wanuna lwenene nakone a a pfuna vhanu a mugangeni wake a tlhela a va ni mahanyela lamanene. Ni yi nyonxelile ndlela leyi a ni khomiki ha yone. A a ni matsrhamela lawa a ni ma djula ka nuna lweyi a ni mu vilela kambe yene a a nga li Mboni ya Yehovha. Swi ni kazratelile ku mu yala hikusa he mbilwini a ni mu djula. Hi nkama lowo, a ni titwa na ni li wuswanga hikusa a ni swi djula ku txhata kambe a ni nga si kuma mhunu wa ku txhata na yene a nhlengeletanwini ya Yehovha.” Rosa a nga yanakanyisisanga hi leswi a a swi vona ntsena kambe a yanakanyisise hi ndlela leyi xiboho xake a xi ta khumba wuxaka byake na Yehovha ha yone. Rosa a tsrhike hi ku helela ku tama a bula ni wanuna lweyo a va a tsrhama na a khomekile hi mintizro ya moya. Ntsrhakunyana a game a ya dondzra ka Xikole Xa Vazrezri Va Mfumu nakone swoswi a tizra swanga phayona dzra ku hlawuleka. Rosa a li: “Yehovha a ni nyike matovoko manyingi lama ni yentxiki ni nyonxa ngopfu swinene.” A hi minkama hinkwayu leyi swi nabyalaka ku yentxa leswi Yehovha a djulaka leswaku hi swi yentxa ngopfungopfu loko swi khumba matitwela yezru. Kambe loko hi yanakanya hi ndlela leyi Yehovha a yanakanyaka ha yone, minkama hinkwayu ha pfuneka.

LOKO HI YAMUKELA NKONGOMISO WA NHLENGELETANU

13. I yini lexi nga hi yentxaka hi famba hi ku vona loko hi yamukela nkongomiso wa nhlengeletanu?

¹³ Minkama yinyingi vakulu, Betele, mulaviseli wa muganga ni Huvo Leyi Zrangelaka va hi nyika minkongomiso leyi hi pfunaka ku tizrela Yehovha. Kambe swi li yini loko minkama yin’wana hi nga xi twisisi xivangelo xa kuva hi yamukela nkongomiso wa kukazri? Hi nga ha sungula ku yanakanya leswaku nkongomiso lowo a hi wunene, wu ta hi kazratisela mintxhumu nakone hi nga ha sungula ku beka miyanakanyu ka swihoxo swa vamakwezru lava hi zrangelaka.

14. I yini leswi taka hi pfuna ku famba hi lipfumelo loko hi yamukela nkongomiso lowu pfaka hi ka nhlengeletanu ya Yehovha? (Vaheberu 13:17)

¹⁴ Loko hi famba hi lipfumelo, hi dumba leswaku Yehovha hi yene a kongomisaka nhlengeletanu yake nakone a tiva swiyimu swezru. Leswo swi hi yentxa hi hantla hi yingiseta nakone hi swi yentxa hi vonela ledzrinene. (Dondzra Vaheberu 13:17.) Ha swi twisisa leswaku ku yingiseta kwezru ku yentxa leswaku hi va ni wumun’we a bandleni. (Efe. 4:2, 3) Nambileswi vamakwezru lava zrangelaka va kalaka va nga hetisekanga, hi dumba leswaku Yehovha a ta tovokisa ku yingiseta kwezru. (1 Sam. 15:22) Hi nkama wa kone, yene a ta lulamisa ntxhumu wun’wana ni wun’wana lowu vilelaka ku lulamisiwa.—Mik. 7:7.

15-16. I yini leswi pfuniki makwezru wa kukazri wa xinuna akuva famba hi lipfumelo nambileswi a a ni ku ganaganeka hi nkongomiso wa kukazri? (Tlhela u vona ni mufoto.)

¹⁵ Kambisisa mfambu lowu kombisaka mabindzru ya ku famba hi lipfumelo. Nambileswi a Peru a ku vulavuliwa ngopfu a Xipanyoli, vhanu vanyingi a va vulavula tindzrimi ta xintu. Dzrin’we dzra tindzrimi toleto i Xikixuwa. Ku dzringana malembe manyingi, vamakwezru va lidzrimi dzra Xikixuwa va djuletele vhanu lava a va vulavula Xikixuwa a nsin’wini yavu. Akuva va fambisana ni milawu ya wuhosi, ku hambiwe ku txintxa ka ndlela leyi a va zrezra ha yone.(Rom. 13:1) Van’we vavu a va tibyela leswaku yentxela ledzro a dzri nga ti va dzrinene ka nsimu yavu. Kambe loko vamakwezru va yingisete minkongomiso, Yehovha a tovokise minzamu yavu ya ku va va kuma vhanu lava vulavulaka Xikixuwa.

¹⁶ Kevin, nkulu wa bandla dzra Xikixuwa a ve mun’we wa lava kazratekiki loko ku hambiwe ku txintxa loko. Loko a tlhamuxela a li: “Ni tibyele leswi: ‘Hi ta swi kotisa kuyini ku kuma vhanu lava vulavulaka Xikixuwa’?” I yini leswi Kevin a swi yentxiki? A li: “Ni dzrimuke Amaproverbia 3:5 nakone ni pimise ha Moxe. A a fanela ku humesa a Vaisrayele a tikweni dzra Egipta a va fambisa hi mbangu lowu a swi tikomba na va nge na ka ku tsrutsruma va ya kone, leswi a swi ta yentxa leswaku Vaegipta va va hlasela hi ku nabyala. Nambitanu, Moxe a yingisetile nakone Yehovha a tovokise ku yingiseta kwake hi ndlela ya ku hlamalisa.” (Eks. 14:1, 2, 9-11, 21, 22) Kevin a a tiyimisele ku titwananisa ni mazrezrela lamampshwa. Ma ve wani mabindzru ya kone? Kevin a li: “Ni hlamalisiwe ngopfu hi ndlela leyi Yehovha a hi tovokisiki ha yone. Khale, loko hi li ku zrezreni a hi famba ngopfu nakone minkama yin’wana a ho kuma mun’we kumbe vhanu vabidzri lava vulavulaka Xikixuwa. Swoswi hi tizra ka mimbangu leyi ku nga ni vhanu vanyingi lava vulavulaka Xikixuwa. Swanga mabindzru, hi sungula mabulu manyingi, hi hamba timpinda hi tlhela hi fambisa swidondzro swa Bibele. Nakone vhanu vanyingi va hlalela mintlhanganu na hine.” Nakunene loko hi famba hi lipfumelo minkama hinkwayu Yehovha awa hi hakela.

17. U dondzre yini ka nhlokomhaka leyi?

¹⁷ Hi kambisise swiyimu swizrazru lani hi voniki lisima dzra ku teka swiboho leswi yelanaka ni ku zrandzra ka Yehovha. Kambe swi djula kuva hi tama hi famba hi lipfumelo ka swiyimu hinkwaswu a wuton’wini swa ku fana ni ku hlawula leswi hi hungataka ha swone, tidondzro ni ndlela leyi hi kulisaka vanezru ha yone. Swi nge na mhaka ni leswaku he swini swiboho leswi hi djulaka ku swi teka, a hi fanelanga ku kongomisiwa ntsena hi leswi hi swi vonaka kambe ni hi wuxaka byezru na Yehovha, swilayu swake ni xidumbiso xake xa ku hi hlayisa. Loko hi yentxa leswo, hi ta swi kota ku “famba hi vito dzra Yehovha Xikwembu Nkulukumba wezru hi lani ku nga helikiki”.—Mik. 4:5.