‘Tilangelani Lwe N’wi Taka Tizrela Yene’

1. Hi fanela ku yentxa yini akuva hi kuma ku nyonxa ka hakakunene nakone ha yini? (Ezaya 48:17, 18)

PAPAYI wezru wa le matilweni, a hi zrandzra ngopfu swinene nakone a djula leswaku hi tikholisa hi wutomi swoswi ni le nkameni lowu taka. (Ekles. 3:12, 13) Yehovha a hi vumbe na hi ni wuswikoti bya ku hlamalisa, nambitanu a nga hi nyikanga wuswikoti bya ku tifuma kumbe mfanelo ya ku tibekela milawu ya leswi nga swinene kumbe leswi bihiki. (Ekles. 8:9; Yer. 10:23) Yehovha awa swi tiva leswaku akuva hi nyonxa swi djula hi mu tizrela ni ku hanya hi leswi mu nyonxisaka.—Dondzra Ezaya 48:17, 18.

2. Sathana a djula ku hi kholwisa yini nakone Yehovha a ma hlamulise kuyini madzrimi ya Sathana?

² Sathana a djula ku hi kholwisa leswaku hi nga nyonxa nambiloko hi nga tizreli Yehovha, ni leswaku vhanu swi nga va fambela ha hombe nambiloko va tifuma. (Gen. 3:4, 5) Akuva a kombisa leswaku Sathana i muhembi, Yehovha a pfumelele vhanu leswaku va tifuma ku dzringana nkama wa kukazri. Swi nabyalile ku vona leswaku vhanu va hluleka ku tifuma. Hi hala tlhelo, a Bibele dzri ni swikombiso swinyingi swa vavanuna ni vavasati lava hlawuliki ku tizrela Yehovha. Xikombiso lexikulu ka hinkwaswu i xa Yesu Kriste. Ku sungula, hi ta vona swivangelo leswi yentxiki Yesu a hlawula ku tizrela Yehovha, hi ku landzrela hi ta vona leswaku ha yini Papayi wezru wa le matilweni a faneliwa hi ku gandzreliwa. Hi wugamu, hi ta vona swivangelo leswi hi yentxaka hi gandzrela Yehovha.

HA YINI YESU A HLAWULE KU TIZRELA YEHOVHA

3. I yini leswi Sathana a djuliki ku nyika Yesu nakone Yesu a hlawule ku yentxa yini?

³ Na a li lani misaveni, Yesu a a fanela ku hlawula lweyi a a ta mu tizrela. Ntsrhaku ka ku va a babatisiwile, Sathana a mu kombe mimfumu hinkwayu leyi a a li na yone a va a mu dumbisa ku mu nyika yone loko a o khinsama a va a mu gandzrela. Yesu a mu hlamule leswi: “Suka, Sathana! Hikusa ku tsraliwe leswi: ‘U fanela ku gandzrela Yehovha Xikwembu Nkulukumba waku, u tizrela yene ntsena.’” (Mat. 4:8-10) Ha yini Yesu a hlawule ku tizrela Yehovha? Kambisisa swivangelo swi nga li swingani.

4-5. He swini swin’we swa swivangelo leswi yentxiki Yesu a hlawula ku tizrela Yehovha?

⁴ Xivangelo lexikulu lexi yentxiki Yesu a hlawula ku tizrela Yehovha i lizrandzru. Yesu a mu zrandzra ngopfu Papayi wake nakone lizrandzru ledzri a nga na dzrone ha yene a dzri heli. (Yoh. 14:31) Yesu a tizrela Yehovha hikusa awa swi tiva leswaku hi wone ntxhumu wa lisima lowu a fanelaka ku wu yentxa. (Yoh. 8:28, 29; Mpful. 4:11) Yene awa swi tiva leswaku Yehovha i xihlovo xa wutomi, awa dumbeka nakone awa hanana. (Amaps. 33:4; 36:9; Yak. 1:17) Minkama hinkwayu Yehovha a a mu byela ntiyiso Yesu nakone hinkwaswu leswi Yesu a nga na swone a nyikiwe hi Papayi wake. (Yoh. 1:14) Sathana a hambanile na Yehovha, a yentxe leswaku vhanu va doha va tlhela va fa. Sathana i muhembi lweyi a susumeteliwaka hi makwanga ni hi wutiyanakanyi. (Yoh. 8:44) Hi ku tiva leswo, Yesu a nga zanga a pimisa hi ku yetisela Sathana hi ku va a pfukela Yehovha.—Filp. 2:5-8.

⁵ Ntxhumu wun’wana lowu yentxiki leswaku Yesu a hlawula ku tizrela Yehovha, a ve ku yanakanya hi leswi ntizro wake a wu ta kota ku swi yentxa. (Heb. 12:2) Yesu a a swi tiva leswaku loko a tsrhama na a dumbekile a a ta xwengisa vito dzra Papayi wake a tlhela a yentxa leswaku xidoho ni lifu swi nga ha vi kone.

HA YINI YEHOVHA A FANELIWA HI KUVA HI MU GANDZRELA?

6-7. Ha yini vhanu vanyingi namunhla va nga mu tizreli Yehovha, kambe ha yini a faneliwa hi kuva hi mu gandzrela?

⁶ Vhanu vanyingi namunhla a va mu tizreli Yehovha hikusa a va ma tivi matsrhamela yake lamanene ni hinkwaswu leswi a va yentxeliki swone. Vhanu lava va fana ni lava Pawulo a va zrezreliki a Atena, a va nga mu tivi Xikwembu Nkulukumba.—Mint. 17:19, 20, 30, 34.

⁷ Pawulo a tlhamuxele vhanu va le Atena leswaku Xikwembu Nkulukumba hi yene “a nyikaka vhanu hinkwavu wutomi, ku hefemula ni hinkwaswu”. A tlhele a ku: “Hi kola kwake hi ni wutomi, ha fambafamba nakone hi kone.” Xikwembu Nkulukumba i Muvumbi hikusa “hi mhunu mun’we a hambe vhanu va tinxaka hinkwatu” kutani swa mu fanela kuva hi mu gandzrela.—Mint. 17:25, 26, 28.

8. I yini leswi Yehovha a taka kala a nga swi yentxi? Tlhamuxela.

⁸ Swanga Muvumbi ni Hosi ya wuyaku hinkwabyu, Yehovha a a ta hi sindzrisa kuva hi mu tizrela. Nambitanu, Yehovha a nge ti txhuka a swi yentxa leswo. A matsrhan’wini ya leswo, Yehovha a hi nyike swikombiso swinyingi leswi kombisaka leswaku a kone nakone a zrandzra mun’wana ni mun’wana wezru. Yehovha a djula leswaku vhanu vanyingi va va vanghanu vake hi lani ku nga helikiki. (1 Tim. 2:3, 4) Xileswo Yehovha a hi wupfisa leswaku hi dondzrisa van’wana hi mintxhumu ya ku xonga leyi a taka yi yentxa a nkameni lowu taka ni ndlela leyi a taka yi yentxa ha yone. (Mat. 10:11-13; 28:19, 20) A hi hlele hi mabandla a tlhela a hi nyika vakulu lava zrandzrekaka akuva va hi pfuna.—Mint. 20:28.

9. Xana lizrandzru dzra Yehovha dzri xiyeka hi ndlela yini?

⁹ Lizrandzru dzra Yehovha dzri tlhela dzri xiyeka ka ndlela leyi a va khomaka ha yone vhanu lava nga pfumeliki leswaku yene a kone. Ku dzringana malembe manyingi ntalu wa vhanu va hlawula ku yentxa leswi bihiki a matsrhan’wini ya ku va va yingiseta Yehovha. Nambitanu hi kola ka wunene byake, Yehovha a va nyika leswi va swi vilelaka akuva va tama va hanya va tlhela va tikholisa hi wutomi. (Mat. 5:44, 45; Mint. 14:16, 17) Yehovha a va nyike wuswikoti bya ku va ni mindangu, bya ku hamba vanghanu ni bya ku tikholisa hi mabindzru ya mintizro yavu. (Amaps. 127:3; Ekles. 2:24) A mintxhumu leyi hinkwayu yi kombisa leswaku Papayi wezru wa le matilweni awa va zrandzra vhanu hinkwavu. (Eks. 34:6) Swoswi a hi voneni swivangelo swi nga li swingani leswi hi yentxaka hi hlawula ku tizrela Yehovha ni ndlela leyi Yehovha a va tovokisaka ha yone lava hlawulaka ku mu tizrela.

LESWI HI YENTXAKA HI HLAWULA KU TIZRELA YEHOVHA

10. a) He xini xivangelo lexikulu lexi hi yentxaka hi tizrela Yehovha? (Matewu 22:37) b) Xana u pfuneki hi ndlela yini hi ku lehisa mbilu ka Yehovha? (Amapsalma 103:13, 14)

¹⁰ Ku fana na Yesu, hi hlawula ku tizrela Yehovha hi leswi hi mu zrandzraka ngopfu swinene. (Dondzra Matewu 22:37.) Ku dondzra hi matsrhamela ya ku xonga ya Yehovha swi hi yentxa hi djula ku va kusuhi na yene. Hi xikombiso, hi nkama lowu Vaisrayele a va tsrhike ku mu yingiseta a va tsratsriye a ku: ‘Tlhelani mun’wana ni mun’wana a fambeleni dzrakwe ledzrimfani.’ (Yer. 18:11) Yehovha awa swi tiva leswaku hi vhanu va ku kala ku hetiseka nakone hi ntsrhuzri. (Dondzra Amapsalma 103:13, 14.) Loko u yanakanyisisa hi ku lehisa mbilu ka Yehovha ni matsrhamela man’wana lamanene lawa a nga na wone, xana a u titwi na u susumeteleka ku mu tizrela hi lani ku nga helikiki?

11. He swini swivangelo swin’wana leswi hi yentxaka hi hlawula ku tizrela Papayi wezru wa le matilweni?

¹¹ Hi tlhela hi susumeteleka ku tizrela Yehovha hi leswi hi swi tivaka leswaku i ntxhumu lowunene wa ku wu yentxa. (Mat. 4:10) Handle ka leswo, ha ma tiva mabindzru ya ku dumbeka ka Yehovha. Loko hi tsrhama na hi dumbekile, hi kombisa leswaku Sathana i muhembi nakone swi yentxa leswaku vito dzra Yehovha dzri xwengisiwa hi tlhela hi nyonxisa mbilu yake. Loko hi hlawula ku tizrela Yehovha swoswi, hi ta tlhela hi va ni mukhandlu wa ku mu tizrela hi lani ku nga helikiki!—Yoh. 17:3.

12-13. Xana hi dondzra yini ka mfambu wa Jane na Pam?

¹² Na ha ha li vampshwa, hi nga txutxela lizrandzru ledzri yentiki ha Yehovha nakone lizrandzru ledzri dzri ta tama dzri va kone nambiloko hi duhwala. Vona xikombiso xa vampshwa vabidzri lava vitaniwaka Jane na Pam.a Va sungule ku dondzra Bibele na mun’we wavu a ni 11 kasi lweyi mun’wana a a ni 10 wa malembe. Nambileswi vapswele vavu a va nga dondzri Bibele, va pfumelele Jane na Pam leswaku va dondzra Bibele ni Timboni ta Yehovha ntsena loko va tama va ya a kezrekeni na vone swanga ndangu. Jane a li: “Leswi Timboni ta Yehovha ti nga ni dondzrisa swone mayelanu ni Bibele swi ni pfune ku hlula nkutxetelo wa vadondzrikulozri wa ku yentxa swa tinkuku ni ku dzraha timbangi.”

¹³ Jane na Pam va ve vazrezri. Hi ku famba ka nkama va nghenele ntizro wa nkama hinkwawu na hi nkama wu li wun’we va hlayisa vapswele vavu lava kutani a va duhwalile. Loko a dzrimuka mfambu wake, Jane a li: “Ni dondzre ka leswi ni humeleliki leswaku Yehovha awa va hlayisa lava nga vanghanu vake hi lani swi kombisiwaka ha kone ka 2 Timotewu 2:19 leyi liki: ‘Yehovha awa va tiva lava nga vake.’” A hi na ku ganaganeka leswaku Yehovha a ni mhaka ni lava hlawulaka ku mu zrandzra ni ku mu tizrela.

14. Xana mazritu ni swiyentxo swezru swi nga pfunisa ku basisa vito dzra Yehovha ka madzrimi ya Sathana yi ndlela yini? (Tlhela u vona ni mifoto.)

¹⁴ Hi djula ku pfunisa ka ku basisa vito dzra Yehovha ka madzrimi hinkwawu. Hi xikombiso, a hi nge u ni munghanu lweyi a nga ni wunene, a hananaka a tlhela a dzrivalela, kambe siku dzrin’wana mhunu wa kukazri a hlaya leswaku munghanu waku a ni tihanyi nakone a nga dumbeki. Xana a u ta yangulisa kuyini? Handle ka ku ganaganeka a u ta mu yimelela. Hi ndlela leyi fanaka, loko Sathana ni vaseketeli vake va zama ku ntxhimisa vito dzra Yehovha hi ku hangalasa madzrimi ha yene, hi tekela ku yimelela vito dzrake hi ku dondzrisa ntiyiso mayelanu na yene. (Amaps. 34:1; Eza. 43:10) Hi kombisa leswaku hi hlawula ku zrandzra Yehovha ni ku mu tizrela hi mazritu ni hi swiyentxo.

15. Xana mupostola Pawulo a pfunekise kuyini hi kuva a txintxe makungu yake? (Vafilipiya 3:7, 8)

¹⁵ Hi tiyimisele ku txintxa makungu yezru a wuton’wini akuva hi kota ku tizrela Yehovha hi ku helela. Hi xikombiso, mupostola Pawulo a tsrhike ku landzra ndhuma yake akuva a va mukriste a tlhela a tizrela Yehovha. (Gal. 1:14) Swanga mabindzru, mupostola Pawulo a ve ni wutomi bya ku nyonxisa a tlhela a va ni ndjombo ya ku fuma na Yesu a matilweni. Pawulo a nga zanga a tisola hi xiboho xa ku tizrela Yehovha. Na hine a hi nge tisoli.—Dondzra Vafilipiya 3:7, 8.

16. Xana hi dondzra yini ka mfambu wa Julia? (Tlhela u vona ni mifoto.)

¹⁶ Loko hi zrangisa ntizro wa Yehovha hi nga kuma ku nyonxa swoswi ni le nkameni lowu taka. Vona leswi yentxekiki hi makwezru mun’wana lweyi a vitaniwaka Julia. Na a ha li mutsrongo na a nge si dondzra ntiyiso, Julia a a yimbelela kezrekeni. Wansati wa kukazri lweyi a a li muyimbeleli lweyi a nga ni mfambu a vone wuswikoti bya Julia a va a mu wupfisa. Na swi nga tekanga nkama wunyingi, Julia a ve muyimbeleli wa ndhuma. Na a ha ya xikole xa wuyimbeleli lexi nga ni ndhuma mun’we ka vadondzrikulobye a mu byele hi ta Xikwembu Nkulukumba ni ku mu tlhamuxela leswaku Xikwembu Nkulukumba a ni vito ku nga Yehovha. Hi nkama wutsrongo, Julia a sungule ku dondzra Bibele kabidzri hi vhiki. Hi ku famba ka nkama, Julia a titekele xiboho xa ku tizrela Yehovha a matsrhan’wini ya ku va muyimbeleli. A swi mu nabyalelanga ku teka xiboho lexo. Julia a li: “Vhanu vanyingi va ni byele leswaku a no tlanga hi wuswikoti byanga, kambe mine a ni tiyimisele ku tizrela Yehovha a wuton’wini byanga hi lani ku heleliki.” Xana Julia a titwisa kuyini hi xiboho lexi a xi tekiki ka 30 wa malembe lawa ma khalutiki? A li: “Ni ni ku zrula ka miyanakanyu nakone na dumba leswaku Yehovha a ta yanelisa ku navela kwanga a nkameni lowu taka.”—Amaps. 145:16.

TAMA U TIZRELA YEHOVHA

17. Xana ku hanya ka masiku lawa ya wugamu swi va khumbisa kuyini lava hlawuliki ku tizrela Yehovha ni lava kalaka va nga si na hlawula ku mu tizrela?

¹⁷ Hi hanya a masikwini ya wugamu ya xiyimu lexi. Mupostola Pawulo a tsrale leswi: “Hikusa ke salanyana nkama wutsrongo”, “lweyi a taka ata tlhasa nakone a nge ti hlwela”. (Heb. 10: 37) Xana leswi swi ku khumbisa kuyini? A nkama lowu saliki wa leswaku vhanu va hlawula ku tizrela Yehovha i wutsrongo ngopfu swinene. (1 Kor. 7:29) Kutani loko hi teke xiboho xa ku tizrela Xikwembu Nkulukumba ha swi tiva leswaku nambileswi hi taka kumana ni mindzringo yinyingi swi ta va swa “nkama wutsrongo”.

18. Xana Yehovha na Yesu va hi kutxa kuva hi yentxa yini?

¹⁸ Yesu a nga byelanga vadondzrisiwa vake leswaku va sungula ku mu landzrela ntsena, kambe a va byele ni leswaku va tama va mu landzrela. (Mat. 16:24) Kutani loko hi ni malembe manyingi na hi tizrela Yehovha hi djula ku ya mahlweni hi yentxa leswo. Hi djula ku ya mahlweni hi hanya hi ku pfumelelana ni xiboho lexi hi xi tekiki xa ku tizrela Yehovha. Swi nga yentxeka swi nga hi nabyaleli, kambe matovoko lawa hi tikholisaka ha wone na ka ha li swoswi ma nyonxisa!—Amaps. 35:27.

19. Hi dondzra yini ka mfambu wa Gene?

¹⁹ Van’wana va yanakanya leswaku loko u tizrela Yehovha a u nge tikholisi hi wutomi. Loko u li mumpshwa, xana u yanakanya leswaku ku tizrela Yehovha swi ku yentxa u luza swa kukazri? Makwezru lweyi a ha liki mumpshwa lweyi a vitaniwaka Gene a li: “A ni yanakanya leswaku ku va Mboni ya Yehovha a swi ta ni yentxa ni nga tikholisi hi wutomi. Vampshwa vanyingi lava ni kuliki na vone a va zrandzra mintxhumu ya ku fana ni mafexta, ku tlhangana, ku tha mavhidiyugemi lama nga ni tihanyi nakuve mine a ni heta nkama wanga na ni li mintlhanganwini ni le ntizrweni wa ku zrezra.” Xana ku pimisa hi leswo swi mu khumbise kuyini Gene? Yene a li: “Ni sungule ku hanya wutomi byibidzri nakone ni tikholise swa nkamanyana kambe ku nyonxa koloko a ku tlhaveliwanga hi dambu. Ni sungule ku pimisa hi minsinya ya milawu ya Bibele leyi a ni nga ha na mhaka na yone nakone ni tiyimisele ku tizrela Yehovha hi mbilu hinkwayu. Ku sukela kolanu swi tikomba na Yehovha a hlamula xikhongoto xin’wana ni xin’wana lexi ni xi yentxaka.”

20. Xana hi fanela ku tiyimisela ku yentxa yini?

²⁰ Mupsalma mun’wana a yimbelele leswi ha Yehovha: ‘A ni ndjombo, lweyi u mu hlawulaka, lweyi u mu tsrhindzretelaka ku wene, akuva a tiyakela tinxoxeni taku.’ (Amaps. 65:4) A hi tameni hi kombisa ku tiyimisela loku Yoxuwa a ku tlhamuxeliki loko a ku: ‘Loko a li mine ni yindlu yanga hi ta tizrela Yehovha.’—Yehoš. 24:15.