Pfuna Swidondzro Swa Bibele Akuva Swi Yimelela Ntiyiso

1-2. a) Ha yini swidondzro swin’wana swa Bibele swi ganaganeka ku teka xiboho xa ku yimelela ntiyiso? b) Hi ta kambisisa yini ka xidondzro lexi?

XANA ku ve ni ntxhumu wa kukazri lowu a wu ku ganaganekisa ku va Mboni ya Yehovha? Swi nga yentxeka a u txhava leswaku vatizrikuloni, vanghanu kumbe maxaka a va ta ku kaneta. Kumbexana a u yanakanya leswaku a u nge swi koti ku hanya hi milawu ya Xikwembu Nkulukumba. Loko swi li hi ndlela leyo, wa swi tiva leswi swidondzro swa Bibele swi titwisaka xiswone ni leswi yentxaka swi kazrata akuva swi teka xiboho xa ku va Timboni ta Yehovha.

² Yesu a a swi tiva leswaku ku txhava ku nga yentxa mhunu a nga kuli hi tlhelo dzra moya. (Mat. 13:20-22) Kambe Yesu a nga tsrhikanga ku pfuna lava a va ganaganeka ku mu landzrela. A matsrhan’wini ya leswo, a pfune vadondzrisiwa vake akuva 1) va tiva leswi a swi yentxa swi va kazratela ku hlawula ku tizrela Yehovha, 2) ku va va mu zrandzra ngopfu Yehovha, 3) ku va pfuna ku zrangisa Yehovha a wuton’wini byavu ni 4) leswi va nga swi yentxaka loko va kanetiwa. Xana hi nga swi tizrisa hi ndlela yini leswi Yesu a swi byeliki vadondzrisiwa vake loko hi fambisa swidondzro swa Bibele hi buku ledzri liki Hanya Hi Ku Nyonxa Hi La Ku Nga Helikiki! akuva hi pfuna swidondzro swa Bibele leswaku swi yimelela ntiyiso?

PFUNA XIDONDZRO XAKU XA BIBELE AKUVA XI TIVA LESWI SWI XI SIVELAKA KU YENTXA NHLUVUKU

3. Xana i yini leswi nga ha vaka swi sivele Nikodema leswaku a va mudondzrisiwa wa Yesu?

³ Nikodema a a li muzrangeli wa lisima wa Vayuda, kambe ku ni leswi yentxiki swi mu kazratela ku va mudondzrisiwa. Ntsena loko ku khalute 6 wa tihweti na Yesu a sungule ntizro wake, Nikodema a swi xiyile leswaku Yesu a a li muyimeli wa Xikwembu Nkulukumba. (Yoh. 3:1, 2) Nambitanu, Nikodema a vone swi yampswa ku yela Yesu a xihundleni hi ku “txhava Vayuda”. (Yoh. 7:13; 12:42) Swi nga yentxeka a yanakanye leswaku a a ta luza xikhundla xake loko a va mudondzrisiwa wa Yesu.a

4. Xana Yesu a mu pfunise kuyini Nikodema akuva a twisisa leswi Xikwembu Nkulukumba a a swi yimela kwake?

⁴ Nikodema a a wu tiva ha hombe Nawu wa Moxe, kambe a a vilela mpfunu akuva a tiva leswi Yehovha a a swi yimela kwake. Xana Yesu a mu pfunise kuyini? Yesu a tinyike nkama wa ku bula na Nikodema nambileswi a a li wusiku nakone Yesu a mu byele leswi a a fanela ku swi yentxa akuva a va mudondzrisiwa wake. A a fanela ku tisola ka swidoho swake, ku babatisiwa ni ku kombisa lipfumelo ka N’wana wa Xikwembu Nkulukumba.—Yoh. 3:5, 14-21.

5. Hi nga va pfunisa kuyini lava hi dondzraka na vone Bibele leswaku va tiva leswi swi va sivelaka ku hamba nhluvuku?

⁵ Nambiloko xidondzro xa Bibele xi ma tiva ha hombe Matsralwa, xi vilela mpfunu akuva xi tiva leswi swi xi sivelaka ku hamba nhluvuku. Hi xikombiso, swi nga yentxeka ntizro lowu xi wu yentxaka wu xi tekela nkama wunyingi kumbe maxaka ma nga swi djuli leswaku xi va Mboni ya Yehovha. Xileswo, ku fana na Yesu tinyike nkama akuva u pfuna xidondzro xaku. U nga yentxa leswo hi ku va u xi zramba leswaku mi ya khweva txana kumbe mi famba mi beliwa hi moya. Ka swiyimu leswo xi ta titwa na xi ntsrhunxekile akuva xi ku byela swikazratu leswi xi kumanaka na swone a wuton’wini. Kutxa xidondzro xaku akuva xi hamba ku txintxa loku vilelekaka ku nge leswaku xi ku nyonxisa, kambe akuva xi kombisa lizrandzru ledzri xi nga na dzrone ha Yehovha.

6. Xana u nga xi pfunisa kuyini xidondzro xaku xa Bibele leswaku xi va ni xixixi xa ku tizrisa leswi xi swi dondzraka? (1 Vakorinte 16:13)

⁶ Loko xidondzro xaku xa Bibele xi tiyiseka leswaku Yehovha a ta xi pfuna akuva xi hanya hi minsinya ya milawu ya Bibele, xi ta kuma xixixi xa ku tizrisa leswi xi swi dondzraka. (Dondzra 1 Vakorinte 16:13.) Leswi u swi yentxaka swanga mudondzrisi swi nga fanisiwa ni leswi yentxiwaka hi prisori. Loko u yanakanya hi nkama lowu awa ha ya xikole, he wini prisori lweyi a u mu zrandzra ngopfu? Handle ka ku ganaganeka, swi nga yentxeka ku li prisori lweyi a ku pfuniki ku dumba wuswikoti byaku. Hi lani ku fanaka, mudondzrisi lwenene wa Bibele a nga dondzrisi ntsena leswi Xikwembu Nkulukumba a djulaka leswaku hi swi yentxa, kambe a tiyisekisa xidondzro xake xa Bibele leswaku hi mpfunu wa Yehovha xi nga swi kota ku yentxa ku txintxa loku vilelekaka a wuton’wini. U nga swi yentxisa kuyini leswo?

PFUNA XIDONDZRO XAKU XA BIBELE ESWAKU XI YENGESELA NDLELA LEYI XI ZRANDZRAKA YEHOVHA HA YONE

7. Xana Yesu a va pfunise kuyini lava a va mu yingiseta kuva va yengesela ndlela leyi a va zrandzra Yehovha ya yone?

⁷ Yesu a a swi tiva leswaku ku zrandzra Xikwembu Nkulukumba a swi ta susumetela vadondzrisiwa vake akuva va tizrisa leswi a va swi dondzrile. Makhambi manyingi Yesu a a va dondzrisa mintxhumu leyi a yi ta va pfuna ku kulisa lizrandzru dzravu hi Papayi wavu wa le matilweni. Yesu a fananise Yehovha ni papayi lweyi a nyikaka mintxhumu leyinene vanake. (Mat. 7:9-11) Van’we ka lava a va na Yesu, swi nga yentxeka a va nga li na yene papayi lweyi a a va kombisa lizrandzru. Yanakanya ndlela leyi va titwiki ha yone loko Yesu a vulavule hi Papayi lweyi a nga ni ntwelawusiwana a yamukeliki n’wanake lweyi a hlawuliki ku hanya hi ndlela ya ku biha. Yesu a va pfune ku vona leswaku Yehovha a va zrandzra ngopfu swinene nakone a djula ku va pfuna.—Luk. 15:20-24.

8. Xana u nga xi pfunisa kuyini xidondzro xa Bibele kuva xi yengesela ndlela leyi xi zrandzraka Yehovha ha yone?

⁸ Ku fana na Yesu, na wene u nga pfuna lweyi u dondzraka na yene Bibele akuva a kulisa lizrandzru ledzri a nga na dzrone ha Yehovha hi ku va u vulavula hi matsrhamela ya Xikwembu Nkulukumba a ku dondzriseni kwaku. Ka xidondzro xin’wana ni xin’wana, pfuna lweyi u dondzraka na yene akuva a twisisa leswaku leswi a swi dondzraka swi swi kombisa hi ndlela yini leswaku Yehovha awa hi zrandzra. Loko mi bula mayelanu ni xitizrulo, pfuna lweyi u dondzraka na yene Bibele akuva a twisisa leswaku Yehovha a nga nyikelanga N’wanake ntsena hi leswi a zrandzraka vhanu hinkwavu, kambe a yentxe leswo ni hi leswi a mu zrandzraka hi ku kongoma. (Rom. 5:8; 1 Yoh. 4:10) Loko lweyi u dondzraka na yene Bibele a twisisa ndlela leyi Yehovha a mu zrandzraka ha yone hi ku kongoma, leswo swi ta mu pfuna kuva a ya a mu zrandzra ngopfu swinene Yehovha.—Gal. 2:20.

9. I yini leswi pfuniki Michael akuva a txintxa wutomi byake?

⁹ A hi kambisiseni xikombiso xa Michael wa le Indonésia. Michael a dondzrisiwe ntiyiso hi va ndangu wake kambe a nga zanga a babatisiwa hi nkama lowo. Loko a ve ni 18 wa malembe a ye tizrela handle ka tiko swanga mufambisi wa makamiyawu. Hi ku famba ka nkama a txhatile kambe a a tama a tizrela handle ka tiko a siya nsati wake ni n’wanake wa xisati a Indonésia. A nkameni wolowo, nsati ni n’wana va sale va dondzra Bibele va va va hamba nhluvuku. Ntsrhaku ka loko mamana wake a file, Michael a teke xiboho xa ku tlhelela kaya a ya hlayisa papayi wake nakone a pfumele ku dondzreliwa Bibele. Michael a khumbeke ngopfu swinene loko a kambisisa xiyenge lexi liki “Handzrisisa” ka xidondzro 27 ka buku ledzri liki: Hanya Hi Ku Nyonxa Hi La Ku Nga Helikiki! Loko a yanakanye ndlela leyi Yehovha a titwiki ha yone loko a vona N’wanake na a xanisiwa, Michael a sungule ku dzrila. Loko Michael a twisise ndlela leyi Yehovha na Yesu va mu zrandzraka ha yone, a kombise ku tlangela, a txintxa ndlela leyi a a hanya ha yone a va a babatisiwa.

PFUNA XIDONDZRO XAKU LESWAKU XI ZRANGISA YEHOVHA

10. I yini leswi Yesu a swi yentxiki akuva a pfuna vadondzrisiwa vake leswaku va zrangisa Yehovha? (Luka 5:5-11) (Tlhela u vona ni mufoto.)

¹⁰ Van’we ka lava Yesu a nga va zrezrela va swi twisise hi ku nabyala leswaku a a li Mesiya, kambe a va vilela mpfunu leswaku va twisisa leswaku akuva va tizrela Yehovha a swi djula kuva va zrezra madzrungula lamanene hi ku hiseka. Petro na Andreya kutani a va li vadondzrisiwa va Yesu loko a zrambe lava a va zrezreliki leswaku va mu landzrela. (Mat. 4:18, 19) Petro, Andreya, Yakobe na Yohane a va tizra xikan’we ka ntizro wa ku phasa tihlampfi nakone negosiyu leyi a yi va fambela ha hombe. (Mar. 1:16-20) Loko Petro na Andreya va “tsrhika minkukutu”, swi nga yentxeka va hambe makungu ya leswaku a va ta yi wundlisa kuyini mindangu yavu na va landzrela Yesu. I yini leswi va pfuniki ku zrangisa ntizro wa ku zrezra ku tlula ku zrangisa ku kuma mali yinyingi? Yesu a hambe hlolana leswaku a va komba leswaku Yehovha a ni wuswikoti bya ku va hlayisa, swi nge na mhaka ni leswi a swi ta va humelela. Leswo swi va pfune ku twisisa leswaku Yehovha minkama hinkwayu a a ta va nyika leswi a va swi vilela.—Dondzra Luka 5:5-11.

11. Xana hi nga yi tizrisa hi ndlela yini mimfambu yezru akuva hi tiyisa lipfumelo dzra lweyi hi dondzraka na yene Bibele?

¹¹ A hi nge yentxi mahlolana hi lani Yesu a yentxiki ha kone, kambe hi nga yavelana ni vambeni mimfambu ya ndlela leyi Yehovha a va seketelaka ha yone lava mu zrangisaka a wuton’wini byavu. Hi xikombiso, xana wa yi dzrimuka ndlela leyi Yehovha a ku pfuniki ha yone loko u sungule ku hlalela mintlhanganu? Swi nga yentxeka swi djule kuva u bula ni mutholi waku akuva u mu tlhamuxela leswaku a swi nge ti koteka kuva u tizra mawora lawa ma yengetelekiki loko a swi ta sindzrisa kuva u lovha mintlhanganwini. Loko u tlhamuxela xidondzro mimfambu yaku, xi tlhamuxele ndlela leyi lipfumelo dzraku dzri tiyisiwiki ha yone loko u vone ndlela leyi Yehovha a ku pfuniki ha yone loko u teke xiboho xa ku mu zrangisa a wuton’wini byaku.

12. a) Ha yini u fanela ku zramba vamakwezru va ku siyanasiyana loko u ya fambisa xidondzro? b) Xana he yini ndlela leyinene ya ku tizrisa mavhidiyu loko u fambisa xidondzro? Nyikela xikombiso.

¹² Xidondzro xaku xa Bibele xi ta tlhela xi pfuneka hi ku yingiseta mimfambu ya vakriste vambeni lava yentxiki ku txintxa a wuton’wini byavu akuva va zrangisa Yehovha. Xileswo, zramba vamakwezru va ku siyanasiyana akuva va va na wene loko u fambisa xidondzro xa Bibele. Va kombeli leswaku va tlhamuxela xidondzro xaku ndlela leyi va yamukeliki ntiyiso ha yone ni leswi va swi yentxiki akuva va zrangisa ntizro wa Yehovha a wuton’wini byavu. Nakone tinyike nkama wa ku hlalela mavhidiyu ni xidondzro xaku ka xiyenge lexi liki “Kelisisa” ni “Handzrisisa” ka buku ledzri liki Hanya Hi Ku Nyonxa Hi La Ku Nga Helikiki! Hi xikombiso, loko mi li ku kambisiseni ka dondzro 37 u nga mu khanyisela minsinya ya milawu leyi kumekaka ka vhidiyu ledzri liki: Yehovha A Ta Hi Nyika Leswi Hi Swi Vilelaka.

PFUNA XIDONDZRO XAKU XA BIBELE AKUVA XI TIVA LESWI XI NGA SWI YENTXAKA LOKO XI KANETIWA

13. Xana Yesu a va lulamisele hi ndlela yini vadondzrisiwa vake akuva va lavisana ni ku kanetiwa?

¹³ Hi ku phindhaphindha, Yesu a byele valandzreli vake leswaku a va ta kanetiwa hi vambeni nambi hi maxaka ya le kusuhi. (Mat. 5:11; 10:22, 36) Na a li kusuhi ni ku fa, Yesu a byele vadondzrisiwa vake leswaku swi nga yentxeka a va ta dlayiwa hi leswi a va gandzrela Yehovha. (Mat. 24:9; Yoh. 15:20; 16:2) Yesu a va tsratsriye ku va ni wuxiyaxiya loko va li ku zrezreni. Hi xikombiso, a va byele leswaku a va nga fanelanga ku lwisana ni mhunu lweyi a khanelaka ku biha hi leswi va swi kholwaka ni leswaku a va fanela ku tivonela ka leswi va swi hlayaka ni ku swi yentxa akuva va tama va zrezra.

14. Xana hi nga mu pfunisa kuyini lweyi hi dondzraka na yene Bibele akuva a lulamela ku lavisana ni nkaneto? (2 Timotewu 3:12)

¹⁴ Hi lani Yesu a yentxiki ha kone, hi nga tlhamuxela lweyi hi dondzraka na yene Bibele leswi van’we va vadondzrikulobye, vanghanu ni maxaka va nga swi hlayaka kumbe ku swi yentxa hi leswi a dondzraka Bibele. (Dondzra 2 Timotewu 3:12.) Van’we ka vadondzrikulobye va nga mu poyilela kumbe ku mu hleka hi leswi a hanyaka hi leswi Bibele dzri swi dondzrisaka. Van’wana va ku fana ni maxaka ya le kusuhi va nga ha mu kaneta hi kola ka leswi a swi dondzraka Bibeleni. I swinene ku kahlula u byela lweyi u dondzraka na yene leswaku a nga ha kanetiwa. Hi ndlela leyo, swidondzro swezru swa Bibele a swi nge ti hlamala loko leswo swi yentxeka nakone swi ta va na swi lulamele kuva swi tiva xa ku xi hlaya ni xa ku xi yentxa loko swi kanetiwa.

15. I yini leswi nga pfunaka xidondzro xa Bibele akuva xi lwisana ni ku kanetiwa hi maxaka?

¹⁵ Loko xidondzro xaku xa Bibele xi kanetiwa hi va ndangu, xi pfune ku pimisa leswaku ha yini maxaka ya xone ma nga nyonxi hi leswi xi dondzraka Bibele ni Timboni ta Yehovha. Swi nga yentxeka maxaka ma pimisa leswaku Timboni ta Yehovha ti dondzrisa madzrimi kumbe a hi vhanu vanene. Nambi van’we ka ndangu wa Yesu, a va pimisa leswaku awa hlanya. (Mar. 3:21; Yoh. 7:5) Dondzrisa lweyi u dondzraka na yene Bibele kuva a ma lehisela mbilu maxaka yake ni vhanu van’wana.

16. Xana hi nga xi pfunisa kuyini xidondzro xa Bibele ku yavelana ni vambeni leswi xi swi kholwaka hi ndlela leyinene?

¹⁶ Nambiloko maxaka ya lweyi u dondzraka na yene Bibele ma kombisa ku nyonxela leswi a swi dondzraka, i wutlhazri kuva a nga va tlhamuxeli hinkwaswu leswi a swi dondzraka hi nkama wun’we. Hikusa loko o va tlhamuxela hinkwaswu hi nkama wun’we swi nga yentxeka va kazrala ku mu yingiseta nakone va nga ha djuli ku bula na yene mayelanu ni Bibele a nkameni lowu taka. Xileswo, kutxa lweyi u dondzraka na yene Bibele akuva a yavelana ni vambeni leswi a kholwaka ka swone hi ndlela leyi taka yentxa leswaku va tlhela va va ni mabulu a nkameni lowu taka. (Kol. 4:6) Kumbexana a nga ha zramba maxaka leswaku ma yendzrela pajina dzra jw.org. Xileswo, maxaka yake ma nga dondzra mayelanu ni Timboni ta Yehovha nkama hinkwawu lowu ma swi djulaka ni hi ndlela leyi ma swi djulaka ha yone.

17. Xana u nga mu pfunisa kuyini lweyi u dondzraka na yene Bibele akuva a kota ku hlamula swivutiso leswi van’wana va nga ha mu hambaka swone mayelanu ni Timboni ta Yehovha? (Tlhela u vona ni mufoto.)

¹⁷ U nga tizrisa xiyenge lexi liki “Leswi Vhanu Va Talisaka Ku Vutisa” ka pajina dzra jw.org akuva u pfuna xidondzro leswaku xi lulamisela tinhlamulo ta ku nabyala akuva xi hlamula maxaka kun’we ni lava xi tizraka na vone. (2 Tim. 2:24, 25) Handle ka leswo, u nga dzrivali ku tizrisa xiyenge lexi liki “Van’we Va Li” lexi kumekaka ka buku ledzri liki Hanya Hi Ku Nyonxa Hi La Ku Nga Helikiki! a wugan’wini ka dondzro yin’wana ni yin’wana. Kutxa xidondzro xaku xa Bibele akuva xi kota ku tlhamuxela leswi xi swi kholwaka hi ku tizrisa mazritu ya xone n’winyi. Loko swi vileleka, pfuna xidondzro xaku ku kuma ndlela leyi ha yone xi nga tlhamuxelaka ha hombe leswi xi swi kholwaka. Loko u yentxa leswo, u ta kota ku xi pfuna akuva xi kota ku tlhamuxela vambeni leswi xi swi kholwaka.

18. Xana u nga mu pfunisa kuyini lweyi u dondzraka na yene Bibele akuva a sungula ku zrezra ni bandla? (Matewu 10:27)

¹⁸ Yesu a lelete vadondzrisiwa vake leswaku va zrezrela vhanu madzrungula lamanene. (Dondzra Matewu 10:27.) Loko lweyi u dondzraka na yene Bibele a sungula ku zrezra ni bandla a ta vona leswaku Yehovha awa mu pfuna nakone a ta mu dumba. Xana u nga mu pfunisa kuyini lweyi u dondzraka na yene Bibele akuva a tlhaselela kungu dzra ku zrezra ni bandla? Loko ku tivisiwa leswaku ku ta va ni tsima dzra ku zrezra a bandleni, mu kutxe ku pimisa hi leswi a nga swi yentxaka akuva a faneleka ku va muzrezri. Mu tlhamuxeli leswaku ha yini van’wana va vona swi nabyala ku sungula ku zrezra hi nkama wa tsima. Nakone a nga tlhela a titsralisa akuva a beka minkombiso ka ntlhanganu wa xikazri ka vhiki. Loko a lwela ku tlhasela kungu ledzro, a ta dondzra ku tlhamuxela leswi a swi kholwaka hi ku tiyiseka.

KOMBA XIDONDZRO XAKU XA BIBELE LESWAKU WA XI DUMBA

19. Xana Yesu a kombise leswaku awa va dumba vadondzrisiwa vake hi ndlela yini nakone hi nga mu yetiselisa kuyini?

¹⁹ Na a nge si na tlhantuka a ya matilweni, Yesu a byele vadondzrisiwa vake leswaku a va ta tlhela va va xikan’we siku dzrin’wana. Vone a va swi twisisanga leswaku yene a a vulavula mayelanu ni ku tlhantuka kwake a ya matilweni. Nambitanu, Yesu a beke miyanakanyu yake ka ku dumbeka kwavu ku nga li ka leswi a va ganaganeka ha swone. (Yoh. 14:1-5, 8) Yesu a a swi tiva leswaku a va vilela nkama akuva va twisisa mintxhumu yin’wana ya ku fana ni dumbo dzravu dzra ku ya hanya a matilweni. (Yoh. 16:12) Ku fana na Yesu, na hine hi nga komba swidondzro swezru swa Bibele leswaku ha swi dumba leswaku swa swi djula ku nyonxisa Yehovha.

20. Xana makwezru wa kukazri wa xisati wa le Malawi a swi kombise hi ndlela yini leswaku awa xi dumba xidondzro xake xa Bibele?

²⁰ Tiyiseka leswaku xidondzro xaku xa Bibele xi djula ku yentxa mintxhumu leyinene. Vona xikombiso xa makwezru wa xisati lweyi a vitaniwaka Chifundo wa le Malawi. A sungule xidondzro xa Bibele hi buku ledzri liki Hanya Hi Ku Nyonxa Hi La Ku Nga Helikiki! ni n’hwanyana wa kukazri wa Mukatolika lweyi a vitaniwaka Alinafe. Loko va hete dondzro 14, makwezru Chifundo a vutise xidondzro xake leswaku a xi yi vonisa kuyini mhaka ya ku gandzrela swithombe. Na a kwatile Alinafe a hlamule a ku: “Lexo i xiboho xa mun’wana ni mun’wana!” Ntsrhaku ka leswo makwezru Chifundo a pimise leswaku Alinafe a a ta yima ku dondzra. Kambe hi ku lehisa mbilu Chifundo a tame a dondzra na yene na a tiyiseka leswaku hi ku famba ka nkama a a ta swi twisisa leswaku ku gandzrela swithombe swi bihile. Ntsrhaku ka tihwetinyana, na va li ka dondzro 34 a mu vutise leswi: “Xana ku dondzra Bibele ni ku tiva Xikwembu Nkulukumba wa ntiyiso, Yehovha, swi ku pfunise kuyini ku ta tlhasela swoswi?” Loko makwezru Chifundo a tlhamuxela ndlela leyi Alinafe a hlamuliki ha yone a li: “A tlhamuxele tinhla tinyingi ta ku xonga, yin’we ya tone yi nga ya leswaku Timboni ta Yehovha a ti patsreki ka leswi Bibele dzri liki swi bihile.” Ntsrhaku ka leswo, Alinafe a yime ku tizrisa swithombe a va a faneleka ku babatisiwa.

21. Xana hi nga mu kutxa hi ndlela yini lweyi hi dondzraka na yene Bibele akuva a teka xiboho xa ku tizrela Yehovha?

²¹ Nambileswi a nga Yehovha “lweyi a swi kulisaka”, hi ni xiyenge xa ku pfuna lweyi hi dondzraka na yene leswaku a yentxa nhluvuku. (1 Kor. 3:7) Hi yentxa swa ku tlula ku mu dondzrisa leswi Xikwembu Nkulukumba a djulaka leswaku a swi yentxa. Hi mu pfuna kuva a kulisa lizrandzru dzrake ha Yehovha, nakone hi mu kutxa kuva a kombisa lizrandzru dzroledzro hi ku va a zrangisa Yehovha a wuton’wini byake. Hi tlhela hi mu dondzrisa ku dumba Yehovha loko a kumana ni swikazratu. Loko hi komba lweyi hi dondzraka na yene Bibele leswaku ha mu dumba, hi va na hi mu kutxa leswaku a hlawula ku tizrela Yehovha.