Pfumela Leswaku Yehovha Awa Ku Zrandzra

1. Ha yini u tinyiketele ka Yehovha? (Tlhela u vona ni mufoto.)

XANA wa ha dzrimuka loko u tinyiketele ka Yehovha? U teke xiboho xa ku tinyiketela kwake hikusa a u mu tiva nakone u sungule ku mu zrandzra. U mu dumbise leswaku a u ta zrangisa ku yentxa ku zrandzra kwake a wuton’wini byaku ni leswaku a u ta tama u mu zrandzra hi mbilu yaku hinkwayu, hi wutomi byaku hinkwabyu, hi miyanakanyu yaku hinkwayu ni hi ntamu waku hinkwawu. (Mar. 12:30) Ku sukela kolanu, a lizrandzru dzraku ha yene dzri ye dzri tiya. Kutani, u nga hlamulisa kuyini loko mhunu o ku vutisa a ku: “Xana wa mu zrandzra Yehovha hakakunene?” Handle ka ku ganaganeka a u ta ku: “Ni mu zrandzra ngopfu ku tlula mhunu mun’wana ni mun’wana kumbe ntxhumu wun’wana ni wun’wana!”

2-3. Xana Yehovha a djula hi tiyiseka ha yini nakone hi ta vona yini ka nhlokomhaka leyi? (Yeremiya 31:3)

² Kambe, u nga hlamulisa kuyini loko mhunu o ku vutisa a ku: “Xana wa tiyiseka leswaku Yehovha awa ku zrandzra?” Xana a u ta ganaganeka ku hlamula, kumbexana hi ku yanakanya leswaku a u faneliwi hi lizrandzru dzra Yehovha? Makwezru wa xisati lweyi a a titwa na a nga zrandzriwi na a ha li ntsrongo, a te: “Na swi tiva leswaku na mu zrandzra Yehovha, a ni ganaganeki hi leswo. Kambe lexi ni ganaganekaka ha xone minkama yin’wana hi leswaku ‘xana Yehovha awa ni zrandzra?’” Kutani, i yini lexi nga ku pfunaka ku tiva ndlela leyi Yehovha a titwaka ha yone ha wene?

³ Yehovha a djula leswaku u tiyiseka hi ku helela leswaku awa ku zrandzra. (Dondzra Yeremiya 31:3.) Ntiyiso hi leswaku Yehovha a ku kokele kwake nakone loko u tinyiketelile u tlhela u babatisiwa u yamukele ntxhumu wa lisima ngopfu swinene ku nga lizrandzru dzrake dzra ku dumbeka. Leswo swi tlhamuxela leswaku Yehovha a ku zrandzra ngopfu swinene nakone a nge ti txhuka a ku tsrhikile. Leswo swi mu yentxa a vona malandzra yake ya ku dumbeka ku patsra na wene swanga vhanu va “ku hlawuleka”. (Mal. 3:17) Yehovha a djula kuva u titwa ku fana na mupostola Pawulo lweyi a tsraliki hi ku tiyiseka a ku: “Na kholwa leswaku nambi ku li lifu, kumbe wutomi, kumbe tintsrumi, kumbe mimfumu, kumbe mintxhumu leyi nga kone swoswi, kumbe mintxhumu leyi ya ha taka, kumbe mintamu kumbe ku tlakuka, kumbe ku yenta, kumbe ntxhumu wun’wana lowu tumbuluxiwiki, a swi nge swi koti ku hi hambanisa ni lizrandzru dzra Xikwembu Nkulukumba.” (Rom. 8:38, 39) Ka nhlokomhaka leyi, hi ta vona leswaku ha yini swi li swa lisima ku tiyisa ndlela leyi hi pfumelaka ha yone leswaku Yehovha awa hi zrandzra ni leswi nga hi pfunaka ku yentxa leswo.

HA YINI SWI LI SWA LISIMA KU PFUMELA LESWAKU YEHOVHA AWA KU ZRANDZRA?

4. He wani madzrimi lawa Sathana a djulaka leswaku hi kholwa ka wone nakone hi nga ma yalisa kuyini madzrimi wolawo?

⁴ Loko hi pfumela leswaku Yehovha awa hi zrandzra, hi nga lwisana ni man’we ya “mazrengu” ya Sathana. (Efe. 6:11) Sathana a ta yentxa hinkwaswu leswi a swi kotaka akuva a hi sivela ku tizrela Yehovha. Yin’we ya tindlela leti Sathana a hi kanganyisaka ha tone i madzrimi ya leswaku Yehovha a nga hi zrandzri. Kambe u nga dzrivali leswaku Sathana o londzrovota ntsena mikhandlu leyi yi mu pfulekelaka. Hakanyingi a hi hlasela loko hi hele ntamu, hi hlatiyela hi mintxhumu leyi khalutiki kumbe hi mintxhumu leyi ya ha ka ku humelela kumbe ku va hi kazrateka hi wumundzruku. (Amapr. 24:10) Sathana a fana ni nghonyama leyi djulaka ku hlasela xihazri lexi yi xi hlotaka. Loko Sathana a hi vona na hi nga nyonxanga, a londzrovota mukhandlu lowo akuva a hi tsranisa. Kambe loko hi tama hi tiyisa ku pfumela kwezru ka leswaku Yehovha awa hi zrandzra, hi ta va na hi lulamele ku ‘kaneta’ Sathana kun’we ni mazrengu yake ya wukanganyisi.—1 Pet. 5:8, 9; Yak. 4:7.

5. Ha yini swi li swa lisima ku pfumela leswaku Yehovha awa hi zrandzra ni leswaku hi va lisima kwake?

⁵ Loko hi pfumela kumbe loko hi tiyiseka leswaku Yehovha awa hi zrandzra, wuxaka byezru na yene byi ta ya byi tiya. Vona leswaku ha yini hi hlaya leswo. Yehovha a tumbuluxe vhanu na va ni ku navela ka ku kombisa van’wana lizrandzru ni ku tlhela va djula ku titwa na va zrandzriwa. Hi ntumbuluku loko hi kombisiwa lizrandzru na hine hi kombisa lizrandzru van’wana. Xileswo, loko hi titwa na hi zrandzriwa ni ku tlhela hi voniwa na hi li va lisima ka Yehovha, lizrandzru dzrezru ha yene dzri ta ya dzri kula. (1 Yoh. 4:19) Loko hi ya hi kulisa lizrandzru dzrezru ha Yehovha, a lizrandzru dzrake ha hine na dzrone dzra kula. A Bibele dzri hi byela hi ku kongoma dzri ku: “Tsrhindzrekelani ka Xikwembu Nkulukumba, kutani na yene a ta mi tsrhindzrekelela.” (Yak. 4:8) Kambe, xana hi nga tiyisa ku pfumela kwezru ka leswaku Yehovha awa hi zrandzra hi ndlela yini?

I YINI LEXI NGA HI PFUNAKA KU PFUMELA LESWAKU YEHOVHA AWA HI ZRANDZRA?

6. Xana u nga yentxa yini loko u nga tiyiseki leswaku Yehovha awa ku zrandzra?

⁶ Tama u khongota ka Yehovha u kombela kuva a ku pfuna ku twisisa leswaku ha yini a ku zrandzra. (Luk. 18:1; Rom. 12:12) Kombela Yehovha hi ku phindhaphindha akuva a ku pfuna kuva u tivona hi ndlela leyi yene a ku vonaka ha yone. Loko u tsrhamela ku titwa nandzru swi nga ha ku kazratela ku pfumela leswaku Yehovha awa ku zrandzra. Kambe dzrimuka leswaku Yehovha i mukulu ku tlula mbilu yaku. (1 Yoh. 3:19, 20) Yehovha a ku tiva ku yampswa ku tlula leswi wene n’winyi u ti tivisaka xiswone nakone a kota ku vona leswi wene u hlulekaka ku swi vona. (1 Sam. 16:7; 2 Makr. 6:30) Xileswo, u nga ganaganeki ku mu “byela” ndlela leyi u titwaka ha yone nakone mu kombele kuva a ku pfuna ku pfumela leswaku awa ku zrandzra. (Amaps. 62:8) Ntsrhaku ka loko u khongotile, i swa lisima ku va u yentxa mintxhumu leyi hi taka yi vona ka mayava lawa ma landzrelaka.

7-8. Xana Amapsalma ma hi pfunisa kuyini akuva hi tiyiseka leswaku Yehovha awa hi zrandzra?

⁷ Dumba zritu dzra Yehovha. Yehovha a huhutele vatsrali va Bibele akuva va tlhamuxela matsrhamela yake. Vona ndlela leyi mupsalma Davhida a mu tlhamuxeliki ha yone Yehovha. ‘Yehovha a le kusuhi ni lava nga ni mbilu leya ku tsrhoveka, a huluxa lava nga ni moya lowu titsrongohataka.’ (Amaps. 34:18.) Loko u hela ntamu u titwa na u li wuswaku, Yehovha a dumbisa leswaku a ta va kusuhi na wene hikusa awa swi vona leswaku u vilela mpfunu wake ku tlula nkama wini na wini. Hi tlhelo dzrin’wana, Davhida a tsrale a ku: ‘A minyembeti yanga mi hlengeletiwi khuwaneni dzraku.’ (Amaps. 56:8) Yehovha awa ku vona loko u xukuvalile nakone a twa ku vavisa loku u ku twaka. Yehovha a zron’weka ngopfu ha wene nakone a twa ku vavisa loku u ku twaka a mbilwini yaku. Hi mahlayela man’wana, a hlengeleta minyembeti yezru nakone a yi nyika lisima ku fana ni mati lawa ma nga khuwaneni dzra mhunu lweyi a yendzraka. Amapsalma 139:3 yi li: ‘[Yehovha] u tivisisa tindlela tanga hinkwatu.’ Yehovha a vona hinkwaswu leswi u swi yentxaka, kambe a beka miyanakanyu yake ka mintxhumu leyinene leyi u yi yentxaka. (Heb. 6:10) Ha yini? Hikusa a ku nyika lisima ku tikazrata kun’wana ni kun’wana loku u ku yentxaka akuva u mu nyonxisa.a

⁸ Hi ku tizrisa matsralwa lawa ma huhuteliwiki ma nga Bibeleni, Yehovha a va na a hi byela leswi: “Tivani leswaku ni mi zrandzra ngopfu swinene nakone mi va lisima kwanga.” Kambe hi lani hi swi voniki ha kone ka mayava lawa ma khalutiki, Sathana a hangalasa madzrimi ya leswaku Yehovha a nga hi zrandzri. Xileswo, loko minkama yin’wana u pfa u ganaganeka leswaku Yehovha awa ku zrandzra kumbe im-him, yimanyana u tivutisa leswi: ‘Xana ni ta kholwa ka mani? Ka “papayi wa madzrimi” kumbe ka ‘Xikwembu Nkulukumba wa ku dumbeka’?’—Yoh. 8:44; Amaps. 31:5.

9. Xana Yehovha a va dumbisa yini lava mu zrandzraka? (Eksoda 20:5, 6)

⁹ Yanakanya hi ndlela leyi Yehovha a titwaka ha yone hi vhanu lava mu zrandzraka. Vona leswi Yehovha a swi byeliki Moxe ni Vaisrayele. (Dondzra Eksoda 20:5, 6.) Yehovha a dumbisa leswaku a ta tama a kombisa lizrandzru dzra ku dumbeka ka lava mu zrandzraka. Swanga hi leswi Yehovha a dumbekaka, hi nga tiyiseka leswaku a nge txhuki a yala ku zrandzra lava mu zrandzraka. (Nehem. 1:5) Xileswo loko minkama yin’wana u djula xitiyisekiso xa leswaku Yehovha awa ku zrandzra tivutisi leswi: ‘Xana mine na mu zrandzra, Yehovha?’ Kutani u yimanyana u yanakanya hi leswi: Loko u mu zrandzra u va u tikazratela ku yentxa leswi u nga swi kotaka akuva u mu nyonxisa, Yehovha a ku tiyisekisa leswaku na yene a ku zrandzra ngopfu swinene. (Dan. 9:4; 1 Kor. 8:3) Hi mahlayela man’wana, loko wene u nga ganaganeki leswaku wa mu zrandzra Yehovha, ha yini u ganaganeka leswaku yene awa ku zrandzra? Tiyiseka hi ku helela leswaku Yehovha a ta tama a ku zrandzra hi lani ku nga helikiki nakone a nge txhuki a ku tsrhikile.

10-11. Xana Yehovha a djula leswaku hi xi vonisa kuyini xitizrulo? (Vagalatiya 2:20)

¹⁰ Yanakanyisisa hi xitizrulo. Yehovha a hi hanane nyiko ya yikulu hi ku hi zrumela N’wanake leswaku a ta ta hi fela. (Yoh. 3:16) Kambe a nga va leswaku a nyiko leyi na wene ya ku lumba hi ku kongoma? Ina! Yanakanya hi leswi yentxekeliki mupostola Pawulo. Dzrimuka leswaku na a nge si va mukriste a yentxe swidoho leswikulu nakone nambiloko kutani a ve mukriste swi djule kuva a tama a lwa ni ku tsrana kwake. (Rom. 7:24, 25; 1 Tim. 1:12-14) Nambitanu, Pawulo a a tiyiseka leswaku Yehovha a nyikele N’wanake hi kola kwake. (Dondzra Vagalatiya 2:20.) Dzrimuka leswaku Yehovha a huhutele Pawulo akuva a tsrala mhaka leyi a Bibeleni nakone dzrimuka leswaku hinkwaswu leswi nga Bibeleni swi tsraleliwe ku pfuna hine. (Rom. 15:4) A mazritu ya Pawulo ma kombisa leswaku Yehovha a djula u swi tiva leswaku a zrumele N’wanake akuva a ta ta fela wene. Loko u yanakanyisisa hi ndlela leyi nyiko leyi yi nga ya lisima ha yone ni leswaku Yehovha a yi nyike wene, u ta ya u tiyiseka leswaku hakakunene Yehovha awa ku zrandzra.

¹¹ Ha mu khensa Yehovha hi ku va a zrumele N’wanake a ta lani misaveni akuva a ta ta hi fela. Kambe xivangelo xin’wana lexi yentxiki Yesu a ta lani misaveni i ku byela vhanu ntiyiso mayelanu na Xikwembu Nkulukumba. (Yoh. 18:37) Ntiyiso lowu wu patsra ndlela leyi Yehovha a titwaka ha yone hi vanake.

NDLELA LEYI YESU A HI PFUNAKA HA YONE KU PFUMELA LESWAKU YEHOVHA AWA HI ZRANDZRA

12. Ha yini hi nga dumbaka ndlela leyi Yesu a ma tlhamuxeliki ha yone matsrhamela ya Yehovha?

¹² Nkama lowu Yesu na a ha li lani misaveni a a swi zrandzra ku tlhamuxela vhanu leswi Yehovha a tsrhamisisiki xiswone. (Luk. 10:22) Hi ni swivangelo swinyingi swa kuva hi dumba ndlela leyi Yesu a tlhamuxeliki ha yone matsrhamela ya Yehovha. Leswo swa twala hikusa Yesu a hanye malembe manyingi na Yehovha a matilweni ku tlula mhunu mun’wana ni mun’wana. (Kol. 1:15) Yesu a swi tive ha hombe leswaku Yehovha a va zrandzra ngopfu vhanu hinkwavu lava dumbekaka kwake. Xana Yesu a va pfunisa kuyini van’wana ku pfumela leswaku Xikwembu Nkulukumba awa va zrandzra?

13. Xana Yesu a djula leswaku hi twisisa yini mayelanu na Yehovha?

¹³ Yesu a djula leswaku hi tiva ndlela leyi Yehovha a titwaka ha yone ha hine. Ka mabuku ya Tievhangeli Yesu a vitane Yehovha swanga “Papayi” ku tlula 160 wa makhambi. Loko Yesu a vulavula ni vadondzrisiwa vake a tizrise mavitanela ya ku “Papayi wenu” kumbe “Papayi wenu wa le matilweni”. (Mat. 5:16; 6:26) A ntlhamuxelo lowu kumekaka ka Matewu 5:16 hi Xiputukezi wu li: “A malandzra ya Xikwembu Nkulukumba ya le nkameni lowu khalutiki a ma tizrisa mavitanela man’wana lawa ma tlakukiki akuva ma vitana Yehovha ya ku fana ni lawa ma liki wa ‘Ntamu Hinkwawu’, ‘Lweyi a Tlakukiki’, ni ‘Muvumbi Lwenkulu’. Kambe hakanyingi loko Yesu a vitana Yehovha a a ku ‘Papayi’, akuva a khanyisa leswaku Yehovha a djula leswaku malandzra yake ma titwa na ma li kusuhi na yene.” Handle ka ku ganaganeka Yesu a djula leswaku hi vona Yehovha hi lani na yene a mu vonaka ha kone, swanga Papayi wezru wa lizrandzru lweyi vanake va titwaka na va zrandzriwa ha Yene. A hi voneni makhambi mabidzri lani Yesu a hlayiki swa ku “Papayi” na a hlaya Yehovha.

14. Xana Yesu a swi kombise hi ndlela yini leswaku hi va lisima ka Papayi wezru wa le matilweni Yehovha? (Matewu 10:29-31) (Tlhela u vona ni mufoto.)

¹⁴ Ku sungula, a hi kambisiseni mazritu ya Yesu lawa ma kumekaka ka Matewu 10:29-31. (Dondzra.) Yesu a hlaye leswaku Yehovha awa ku tiva lani xinyanyana xin’wana ni xin’wana xi nga kone nambileswi xi kalaka xi nga mu gandzreli kumbe ku mu zrandzra. Loko a li leswaku Yehovha a swi nyika lisima swinyanyana leswitsrongo hi nga tiyiseka hi ku helela leswaku a zron’weka ngopfu ha hine hikusa ha mu gandzrela nakone ha mu zrandzra. Yesu a tlhele a hlaya leswaku: ‘Nambi misisi ya tinhloko tezru yi kontiwile hinkwayu.’ Leswi Yehovha a tivaka nambi mintxhumu ya yitsrongo kwezru, hi nga tiyiseka leswaku a zron’weka ngopfu swinene ha hine. Nakunene, Yesu a djula leswaku hi tiyiseka leswaku mun’wana ni mun’wana wezru i wa lisima a matihlweni ya Papayi wezru wa le matilweni.

15. Xana mazritu lawa ma kumekaka ka Yohane 6:44 ma hlaya yini mayelanu ni Papayi waku wa le matilweni?

¹⁵ Vona xikombiso xa wubidzri lani Yesu a hlayiki swa ku “Papayi”. (Dondzra Yohane 6:44.) Papayi waku wa le matilweni hi lizrandzru a ku kokele ntiyisweni. Ha yini a yentxe leswo? Hikusa a vone matsrhamela lamanene a mbilwini yaku. (Mint. 13:48) Loko Yesu a hlaye mazritu lawa ma nga ka Yohane 6:44, swi nga yentxeka a a hlaya mazritu ya Yehovha lawa ma kumekaka ka Yeremiya 31:3, lani Yehovha a byeliki vhanu vake a ku: ‘Ndzri ku kokile hi lizrezre.’ (Yer. 31:3; dzringanisa ni Hoxeya 11:4.) Yanakanya hi leswi leswo swi tlhamuxelaka swone. Papayi wezru wa lizrandzru wa le matilweni a tama a vona mintxhumu leyinene kwaku leyi swi nga yentxekaka wene u nga yi voni.

16. a) Xana Yesu a hi dondzrise yini nakone ha yini hi fanela ku dumba mazritu yake? b) I yini lexi nga ku pfunaka ku tiyiseka leswaku Yehovha i Papayi lweyi u mu vilelaka? (Vona bokisi ledzri liki: “Papayi Lweyi Hinkwezru Hi Mu Vilelaka.”)

¹⁶ Loko Yesu a tlhamuxela Yehovha swanga Papayi wezru a va na hi ndlela ya kukazri a hi byela leswaku: “Yehovha a hi Papayi wanga ntsena, kambe i Papayi wenu na n’wine nakone na mi tiyisekisa leswaku awa mi zrandzra nakone awa zron’weka hi mun’wana ni mun’wana wenu.” Xileswo, loko minkama yin’wana u nga tiyiseki leswaku Yehovha awa ku zrandzra hakakunene, yimanyana u tivutisa leswi: ‘Xana a ni fanelanga ni dumba mazritu ya N’wana lweyi a mu tivaka ku yampswa Papayi nakone minkama hinkwayu a khanelaka ntiyiso?’—1 Pet. 2:22.

YENTXA HINKWASWU LESWI U NGA SWI KOTAKA AKUVA U TIYISEKA LESWAKU YEHOVHA AWA KU ZRANDZRA

17. Ha yini hi fanela ku yentxa hinkwaswu leswi hi nga swi kotaka akuva hi pfumela leswaku Yehovha awa hi zrandzra?

¹⁷ Hi fanela ku tama hi yentxa hinkwaswu leswi hi nga swi kotaka akuva hi tiyiseka leswaku Yehovha awa hi zrandzra. Dzrimuka leswaku Sathana a yentxa hinkwaswu leswi a nga swi kotaka akuva a hi sivela ku tizrela Yehovha. Sathana a djula ku hi tsranisa, xileswo a ta tama a zama ku hi yentxa hi kholwa leswaku Yehovha a nga hi zrandzri, hine a hi fanelanga hi kholwa madzrimi ya Sathana!—Yb. 27:5.

18. Xana u nga tama u yentxa yini akuva u tiyiseka leswaku Yehovha awa ku zrandzra?

¹⁸ Akuva u tama u tiyisa ku dumba kwaku ka leswaku Yehovha awa ku zrandzra, yana mahlweni u khongota kwake u kombela kuva a ku pfuna ku tivona hi ndlela leyi a ku vonaka ha yone. Yanakanyisisa hi ndlela leyi vatsrali va Bibele lava huhuteliwiki va ma tlhamuxeliki ha yone matsrhamela ya Yehovha. Dzrimuka leswaku minkama hinkwayu Yehovha a zrandzra mhunu lweyi a mu zrandzraka. U nga txhuki u dzrivala leswaku Yehovha a zrumele N’wanake akuva a ta ta fela wene hi ku kongoma. Nakone dumba xitiyisekiso xa Yesu xa leswaku Yehovha i Papayi waku wa le matilweni. Kutani loko mhunu a ku vutisa a ku: “Xana wa tiyiseka leswaku Yehovha awa ku zrandzra?” U ta hlamula hi ku tiyiseka u ku: “Ina, nakone ni yentxa hinkwaswu leswi ni swi kotaka akuva ni kombisa leswaku na mu zrandzra!”