Pfumela Leswaku Yehovha A Ku Dzrivalelile

1-2. I yini leswi Yehovha a swi yentxaka loko hi tisola ka swidoho swezru? (Tlhela u vona ni mufoto ka kapa.)

HOSI Davhida a a yi tiva ha hombe ndlela leyi swi vavisaka ha yone ku titwa nandzru hi kola ka swidoho leswi mhunu a swi yentxiki khale. (Amaps. 40:12; 51:3) Davhida a hambe swin’we swa swidoho leswikulu a wuton’wini byake. Xileswo, a kombise ku tisola loku sukelaka mbilwini, kutani Yehovha a mu dzrivalelile. (2 Sam. 12: 13) Swanga mabindzru, Davhida a titwe na a zrulile hi ku va a dzrivaleliwe ha Yehovha.—Amaps. 32:1.

² Ku fana na Davhida, hi nga kuma ku zrula loko hi kombisiwa timpswalu ha Yehovha. Swa hi txhavelela ku tiva leswaku Yehovha a lulamele ku hi dzrivalela swidoho, nambi leswikulu kambe a to yentxa leswo loko hi tihlaya swidoho swezru na swi sukela mbilwini, ni ku yentxa hinkwaswu leswi hi nga swi kotaka akuva hi nga ha swi phindhi. (Amapr. 28:13; Mint. 26:20; 1 Yoh. 1:9) Ha nyonxa hi ku tiva leswaku Yehovha a hi dzrivalela swidoho swezru hi ku helela swi fana ni loko hi ngi ngi sama hi doha!—Ezek. 33:16.

3-4. Xana Jennifer a titwise kuyini ntsrhaku ka loko a babatisiwile nakone hi ta vona yini ka nhlokomhaka leyi?

³ Vambeni minkama yin’wana swa va kazratela ku pfumela leswaku Yehovha a va dzrivalelile. Vona xikombiso xa Jennifer lweyi a kulisiwiki hi vapswele lava nga Timboni ta Yehovha. Loko a tlhase ka ntanga ya wun’hwanyana a sungule ku va ni mahanyela ya ku biha nakone a a tlhotela vapswele vake. Kambe ka malembe lawa ma landzreliki Jennifer a txintxile a va a tinyiketela ka Yehovha a tlhela a babatisiwa. Yene a li: “A khale minkama yinyingi a ni yentxa swa ku biha hi tlhelo dzra tinkuku, ni nwa ku tlula mpimu, a ni tsrhama na ni hlundzrukile nakone ku kuma mali hi swone leswi a swi li swa lisima a wuton’wini byanga. A ni swi tiva leswaku Bibele dzri hlaya leswaku hi kola ka gandzrelo dzra Kriste, Yehovha a nga hi dzrivalela swidoho swezru. Kambe he mbilwini a ni nga kholwi leswaku Yehovha a ni dzrivalelile.”

⁴ Xana minkama yin’wana u yanakanya leswaku Yehovha a ha ku kwatelile hi swidoho leswi u swi yentxiki khale? Loko u titwa hi ndlela leyo, dzrimuka ndlela leyi Davhida a titwiki ha yone mayelanu ni timpswalu ta Yehovha. Davhida a a tiyiseka leswaku Yehovha a mu dzrivalelile hikusa a ni timpswalu letikulu. Yehovha a djula leswaku na wene u titwa hi ndlela leyo. Ka xidondzro lexi, hi ta vona leswaku ha yini hi fanela ku pfumela leswaku Yehovha a hi dzrivalelile ni leswi nga hi pfunaka ku yentxa leswo.

HA YINI HI FANELA KU PFUMELA LESWAKU YEHOVHA A HI DZRIVALELILE?

5. I yini leswi Sathana a djulaka kuva hi pfumela ka swone? Nyikela xikombiso.

⁵ Loko hi pfumela leswaku Yehovha a hi dzrivalelile, hi nga ha fambela kule ka yin’we ya mintlhamu ya Sathana. Dzrimuka leswaku Sathana a ta yentxa hinkwaswu leswi a nga swi kotaka akuva a hi sivela ku gandzrela Yehovha. Akuva a tlhaselela nkongometo wake, Sathana a nga ha hi yentxa hi kholwa leswaku swidoho swezru a swi nge dzrivaleliwi. Vona leswi humeleliki wanuna wa kukazri wa le Korinte lweyi a susiwiki bandleni hi leswi a yentxiki swa ku biha hi tlhelo dzra tinkuku. (1 Kor. 5:1, 5, 13) Hi ku famba ka nkama, wanuna lweyo a tisolile kambe Sathana a a djula leswaku swizro swa bandla swi nga mu dzrivaleli. Nakone hi nkama wu li wun’we, Sathana a a djula leswaku wanuna lweyo a titwa na a nga dzrivaleliwanga ‘akuva a vaviseka ngopfu’ lakakuva a tsrhika ku tizrela Yehovha. Sathana a nga txintxanga, nkongometo wake wa ha li wolowu wa wun’we. Kambe hine “ha ma tiva mazrengu yake”.—2 Kor. 2:5-11.

6. I yini lexi nga hi pfunaka kuva hi nga titwi nandzru?

⁶ Loko hi pfumela leswaku Yehovha a hi dzrivalelile, hi nga ha titwa na hi zrule ntsrhwalu wa ku titwa nandzru. Hi ntumbuluku, loko hi doha hi titwa nandzru. (Amaps. 51:17) Ku titwa hi ndlela leyo i swinene. Lipfalu dzrezru dzri nga hi susumetela ku yentxa mintxhumu leyinene akuva hi lulamisa mayanakanyela yezru. (2 Kor. 7:10, 11) Kambe loko hi tama hi yanakanya leswaku Yehovha a nga hi dzrivalelanga swi nga yentxeka hi titwa nandzru lakakuva hi nga ha mu tizreli. Kambe loko hakunene hi pfumela leswaku Yehovha a hi dzrivalelile, hi ta tsrhika ku titwa nandzru. Kutani hi nga ha tizrela Yehovha na hi ni lipfalu ledzri basiki ni ku nyonxa lokukulu. (Kol. 1:10, 11; 2 Tim. 1:3) Kambe hi nga tiyisekisa mbilu yezru leswaku Yehovha a hi dzrivalelile hi ndlela yini?

I YINI LEXI NGA HI PFUNAKA KU PFUMELA LESWAKU YEHOVHA A HI DZRIVALELILE?

7-8. I yini leswi Yehovha a swi byeliki Moxe nakone leswo swi hi tiyisekisa yini? (Eksoda 34:6, 7)

⁷ Yanakanya hi ndlela leyi Yehovha a titlhamuxelaka ha yone. Hi xikombiso, xiya leswi Yehovha a swi byeliki Moxe a Nhaveni ya Sinayi.a (Dondzra Eksoda 34:6, 7.) Nambileswi Yehovha a nga ni matsrhamela manyingi ya ku xonga, a vone swi yampswa ku byela Moxe leswaku yene i “Xikwembu Nkulukumba lweyi a nga ni wunene ni timpswalu”. Xana Xikwembu Nkulukumba wa matsrhamela lawo a nga yala ku dzrivalela mugandzreli wake lweyi a tisoliki ka xidoho xake na swi sukela mbilwini? Nikutsrongo! Loko Yehovha o kala a nga mu dzrivaleli mhunu lweyo swi nga kombisa leswaku a ni nsele nakone a nga na timpswalu. Yehovha a nge vi na wone matsrhamela lawo!

⁸ Hi nga tiyiseka leswaku loko Yehovha a ku a ni timpswalu, a hlaya ntiyiso hikusa a nga hembi. (Amaps. 31:5) Xileswo, hi nga dumba leswi a swi hlayaka. Kutani loko swi ku kazratela ku tsrhika ku titwa nandzru hi kola ka swidoho leswi u swi yentxiki khale, tivutisi leswi: ‘Xana na kholwa leswaku nakunene Yehovha a ni timpswalu, a lehisa mbilu nakone a nge yali ku dzrivalela mudohi ni mun’we lweyi a tisoliki?’ Kutani ha yini mine ni nga pfumeli leswaku a ni dzrivalelile?

9. Swi tlhamuxela yini ku va hi dzrivaleliwe swidoho swezru? (Amapsalma 32:5)

⁹ Yanakanya hi leswi Yehovha a hi dondzrisaka swone a Bibeleni mayelanu ni ndlela leyi a hi dzrivalelaka ha yone. Hi xikombiso, yanakanya ndlela leyi Hosi Davhida mutsrali wa Bibele, a tlhamuxelaka ha yone lidzrivalelo dzra Yehovha. (Dondzra Amapsalma 32:5.) Davhida a te: ‘Wene u dzrivalele nandzru wa xidoho xanga.’ A zritu dzra Xiheberu ledzri ndzruluteliwiki ledzri liki “lidzrivalelo” dzri nga ha tlhamuxela “ku tlakula”, ku “susa” kumbe ku “zrwala”. Loko Yehovha a dzrivalele Davhida, swi hlaye kuva a zrwala swidoho swake hi ndlela ya kukazri a famba na swone. Hi ndlela leyo, Davhida a titwe na a ntsrhunxekile kumbe a nyonxile hi leswi Yehovha a dzrivaleliki xidoho xake. (Amaps. 32:2-4, BX) Na hine hi nga kuma ku nyonxa loku fanaka. Loko hi tisola ka swidoho swezru na swi sukela mbilwini, a swa ha djuli kuva hi tama hi zrwala ntsrhwalu wa swidoho leswi Yehovha a swi tlakuliki kumbe a hi suseliki swone.

10-11. Xana mazritu lawa ma liki ‘lwe a dzrivalelaka’ ma hi byela yini mayelanu na Yehovha? (Amapsalma 86:5)

¹⁰ Dondzra Amapsalma 86:5. Davhida a hlaya leswaku Yehovha hi ‘lwe a dzrivalelaka’. Leswo swi tlhamuxela leswaku Yehovha a nga hi bekeli xiviti loko hi yentxa swihoxo, nakone minkama hinkwayu a djula ku dzrivalela lava tisolaka na swi sukela mbilwini. Ha yini a tsrhamisise xileswo? Loko ndzrimana yi ya mahlweni yi tlhamuxela yi li: ‘U ni vunyingi bya lizrezre ku hinkwavu lava ku vitanaka.’ Ka nhlokomhaka leyi khalutiki hi dondzre leswaku Yehovha a dumbisa ku va kombisa ntwelawusiwana lava mu zrandzraka ni ku va a nga va tsrhiki. Hi ku susumetiwa hi ntwelawusiwana lowu a nga na wone a ‘dzrivalela ku nge ha mpimu’ hinkwavu lava dohaka kambe va gama va tisola. (Eza. 55:7) Loko swi ku kazratela ku pfumela leswaku Yehovha awa dzrivalela, tivutisi leswi: ‘Xana na pfumela leswaku Yehovha awa va dzrivalela hinkwavu lava tisolaka va tlhela va djula ntwelawusiwana kwake? Kutani ha yini mine ni nga pfumeli leswaku a ni dzrivalelile loko ni mu kombele lidzrivalelo?’

¹¹ Bibele dzri hlaya leswaku Yehovha a yi twisisa hi ku helela ndlela leyi hi hambiwiki ha yone ni leswaku a hi hetisekanga. (Amaps. 139:1, 2) A hi voneni leswi Davhida a swi hlayiki ka psalma dzrin’wana ni ndlela leyi leswo swi nga hi pfunaka ha yone ku pfumela leswaku Yehovha a djula ku hi dzrivalela.

LESWI YEHOVHA A SWI DZRIMUKAKA HA HINE

12-13. Hi ku ya hi Amapsalma 103:14, i yini leswi Yehovha a swi dzrimukaka ha hine nakone leswo swi hi kutxa ku yentxa yini?

¹² Dondzra Amapsalma 103:14. Davhida a hlaya leswaku Yehovha ‘iwa dzrimuka leswaku hi ntsrhuzri’. Hi mazritu lawo, Davhida a tlhamuxela xin’we xa swivangelo lexi yentxaka Yehovha a dzrivalela vagandzreli vake lava tisolaka. Leswi liki minkama hinkwayu awa dzrimuka leswaku a hi hetisekanga. Akuva hi ma twisisa ha hombe mazritu lawo, a hi yanakanyisiseni hi leswi Davhida a swi hlayiki ni leswaku swi tlhamuxela yini.

¹³ Davhida a hlaya leswaku Yehovha ‘a tivisisa vumbiwo dzrezru’. A vumbe Adamu hi ‘ntsrhuzri wa misava’, leswi liki awa yi tiva ndlela leyi vhanu va vumbiwiki ha yone ni leswi va swi vilelaka. Hi xikombiso, va vilela ku da, ku yetlela ni ku hefemula. Nambi vhanu lava hetisekiki va swi vilela ku yentxa leswo. (Gen. 2:7) Kambe loko Adamu na Evha va dohile, ku va ntsrhuzri swi ve ni ntlhamuxelo lowu yengetelekiki. Swanga vana hi pswaliwa na hi ni xidoho lexo, lexi yentxaka leswaku swi nabyala kuva hi yentxa mintxhumu leyi bihiki. Davhida a hlaye leswaku Yehovha a swi tiva ha hombe leswaku hi ntsrhuzri, hi ku hlaya leswo a a tlhamuxela leswaku Yehovha awa dzrimuka leswaku a hi hetisekanga ni leswaku minkama hinkwayu hi djula leswaku a hi kombisa timpswalu. Hi nga songa ntlhamuxelo wa mazritu lawa Davhida a ma hlayiki hi ndlela leyi: Yehovha awa swi twisisa leswaku minkama yimbeni hi ta hoxa kambe loko hi hoxa hi gama hi tisola, yene a hi kombisa ntwelawusiwana ni ku hi dzrivalela.—Amaps. 78:38, 39.

14. a) I yini leswi Davhida a swi hlayiki mayelanu ni ndlela leyi Yehovha a hi dzrivalelaka ha yone? (Amapsalma 103:12) b) Hi nga dondzra yini ka ndlela leyi Yehovha a dzrivaleliki Davhida ha yone? (Vona bokisi ledzri liki: “Ndlela Leyi Yehovha A Dzrivalelaka Ha Yone Ni Ku Tlhela A Dzrivala.”)

¹⁴ I yini swin’wana leswi nga hi pfunaka kuva hi tiyiseka leswaku Yehovha a hi dzrivalelile? (Dondzra Amapsalma 103:12.) Davhida a hlaye leswaku loko Yehovha a hi dzrivalela swi fana ni loko a teka swidoho swezru a ya swi beka kule ‘swanga heswi a vuhuma dambu [a wuxeni] ku tsravukaniki ni le vupeladambu [mpeladambu]’. Hi mahlayela man’wana, lomu dambu dzri humaka kone ni lomu dzri pelaka kone ku tsravukane ngopfu swinene nakone a mimbangu leyi ha yibidzri a yi nge txhuki yi tlhanganile. Kutani leswi swi hi byela yini hi swidoho leswi Yehovha a hi dzrivalelaka? A buku dzrin’wana loko dzri tlhamuxela ndzrimana leyi dzri hlaya leswaku Xikwembu Nkulukumba a teka swidoho swezru a swi yisa kule na hine, ku fana ni ntxhumu lowu a hi wu twa na wu nun’hwa kambe a ku nun’hwa loko ku gama ku nga ha twali nikutsrongo. Xileswo, hi nga tiyiseka leswaku a nge ti txhuka a swi yanakanya kumbe ku tsrhika a hi dzrimuxa hi swidoho leswo.—Ezek. 18:21, 22; Mint. 3:19.

15. Hi fanela ku yentxa yini loko hi tsrhamela ku titwa nandzru hi swidoho leswi hi swi yentxiki khale?

¹⁵ Xana mazritu ya Davhida lawa ma nga ka Amapsalma 103 ma nga hi pfuna hi ndlela yini loko swi nga hi nabyaleli ku pfumela leswaku Yehovha a hi dzrivalelile? Loko u tsrhamela ku titwa nandzru hi swidoho leswi u swi yentxiki khale, yanakanyisisa hi ndlela leyi Yehovha a titwaka ha yone. Awa dzrimuka leswaku a u hetisekanga. Nakone Yehovha a dzrivalela hinkwavu lava tisolaka hi leswi va swi yentxiki va tlhela va yentxa ku txintxa. Ku nga leswi wene u swi yentxiki. Dzrimuka leswaku Yehovha a nga beki miyanakanyu ka swidoho leswi kutani a ku dzrivaleliki. Kutani a nge ti ku nyika nandzru kumbe ku ku khatisa hi kola ka swone. (Amaps. 130:3) Loko hi pfumela leswaku Yehovha a hi dzrivalelile, swi ta hi yentxa hi nga ha titwi nandzru ni ku tama hi tizrela Yehovha na hi nyonxile.

16. Nyikela xikombiso lexi tlhamuxelaka leswaku swi ni nghozi ku tsrhamela ku yanakanya hi swidoho leswi Yehovha kutani a hi dzrivaleliki. (Tlhela u vona ni mufoto.)

¹⁶ Yanakanya hi xikombiso lexi. Loko mhunu a li ku fambiseni ka movha, a nga ha lavisa swipelhu akuva a vona leswi taka he ntsrhaku. I swinene kuva minkama yin’wana a langusa ka swipelhu, kambe swi nga va ni khombo loko o beka matihlo yake kumbe ku langusa ntsena ka swipelhu. Akuva a fambisa hi ndlela leyi sizrelelekiki, a fanela ku langusa mahlweni lani a yaka kone. Hi ndlela leyi fanaka, i swinene kuva minkama yin’wana hi dzrimuka swihoxo leswi hi swi yentxiki khale. Leswo swi nga hi pfuna kuva hi nga ha tlheli hi phindha ku yentxa swihoxo leswi fanaka. Kambe loko hi tsrhamela ku beka miyanakanyu yezru ka swihoxo leswi Yehovha kutani a hi dzrivaleliki, swi nga hi yentxa hi nga ha nyonxi ni kuva hi nga ha swi koti ku mu tizrela hi ndlela leyinene ni hi lani hi nga kotaka ha kone. A matsrhan’wini ya leswo, a hi tameni hi tizrela Yehovha na hi yanakanya hi wumundzruku lebyi a byi dumbisiki hikusa a nkameni lowo ‘ku nga ha dzrimukiwi timhaka ta ku sungula’.—Eza. 65:17; Amapr. 4:25.

TAMA U KHOLWISA MBILU YAKU

17. Ha yini hi fanela ku tama hi kholwisa mbilu yezru ka lizrandzru ni lidzrivalelo dzra Yehovha?

¹⁷ Hi fanela ku tiyiseka leswaku Yehovha awa hi zrandzra ni leswaku minkama hinkwayu a lulamele ku hi dzrivalela. (1 Yoh. 3:19) Ha yini? Hikusa Sathana a ha ta ya mahlweni ni ku hi yentxa hi kholwa leswaku Yehovha a nga hi zrandzri nakone a nge hi dzrivaleli. Swi nge na mhaka ni tindlela leti a ti tizrisaka, nkongometo wake i ku hi yentxa hi tsrhika ku tizrela Yehovha. Nakone nkama lowu wugamu byi yaka byi tlhasa, a ta yengesela minzamu yake hikusa awa swi tiva leswaku nkama lowu mu saleliki i wutsrongo. (Mpful. 12:12) Kambe hi fanela ku tama hi lwisana na yene ni ku tizrela Yehovha hi ku dumbeka.

18. U nga yentxa yini akuva u kholwisa mbilu yaku leswaku Yehovha a ni lizrandzru nakone awa dzrivalela?

¹⁸ Nhlokomhaka leyi khalutiki yi kombise leswi u fanelaka ku swi yentxa akuva u tiyiseka leswaku Yehovha awa ku zrandzra. Akuva u kholwisa mbilu yaku leswaku Yehovha a ku dzrivalelile, yanakanyisisa mayelanu ni ndlela leyi Yehovha a titlhamuxelaka ha yone. Tinyiki nkama wa ku yanakanyisisa hi leswi Bibele dzri swi hlayaka mayelanu ni ndlela leyi Yehovha a dzrivalelaka ha yone. U nga dzrivali leswaku Yehovha a swi tiva ha hombe leswaku wene a u hetisekanga nakone a ta ku kombisa timpswalu. U nga dzrivali leswaku loko Yehovha a ku dzrivalela swidoho swaku a nga ha tlheli a swi dzrimuka. Xileswo u ta nyonxa hi ku tiva leswaku Yehovha a ku kombisa timpswalu nakone u ta titwa ku fana na Davhida lweyi a hlayiki leswi: Khanimambu Yehovha hikusa wene u dzrivalele ‘nandzru wa xidoho xanga’.—Amaps. 32:5, BX.