Hi Nga Yentxa Yini Loko Hi Kuma Vhanu Lava ‘Kombisaka Leswaku Va Swi Djula’?

1. Xana vhanu va nga ha yangulisa kuyini loko va twa madzrungula lamanene? (Mintizro 13:47, 48; 16:14, 15)

A DZANENI dzra ku sungula, vhanu vanyingi va yamukele ntiyiso loko va twe madzrungula lamanene. (Dondzra Mintizro 13:47, 48; 16:14, 15.) Swi hi lani ku fanaka ni namunhla, vhanu van’wana va nyonxa loko va yingela madzrungula lamanene hi khambi dzra ku sungula. Van’wana ku sunguleni a va kombisi ku nyonxela kambe hi ku famba ka nkama va dzri yamukela dzrungula dzra Mfumu. I yini leswi hi nga swi yentxaka loko hi kuma vhanu lava ‘kombisaka leswaku va swi djula’ ku yingiseta madzrungula lamanene?

2. Ha yini hi nga fanisaka ntizro wa ku yentxa vadondzrisiwa ni wa mudzrimi?

² Yanakanya hi xikombiso lexi. A ntizro wezru wa ku yentxa vadondzrisiwa wu fana ngopfu ni wa mudzrimi. Loko a xiya leswaku kutani mihandzru ya kukazri yi wupfile, a hamba malulamiselo ya leswaku a sungula ku tsrhovela nambileswi a ha tamaka a dzrima kumbe a vonelela swibewu swimbeni leswi kalaka swi nga si na wupfa. Hi lani ku fanaka, loko hi kuma mhunu lweyi a nyonxelaka dzrungula dzrezru hi fanela ku kahlula hi mu pfuna akuva a va mulandzreli wa Kriste. Kambe hi nkama wu li wun’we hi fanela ku pfuna vambeni akuva va vona leswaku ha yini swi li swa lisima ku va va dondzra mayelanu na Xikwembu Nkulukumba ka Bibele. (Yoh. 4:35, 36) Loko hi kota ku xiya leswaku mhunu wa kukazri awa dzri nyonxela dzrungula dzrezru kumbe im-him swi ta hi nabyalela ku mu pfuna. Ka xidondzro lexi, hi ta vona leswi hi fanelaka ku swi yentxa ka liyendzro dzra ku sungula akuva hi kota ku pfuna lava hi yingisetaka. Hi ta tlhela hi vona leswi hi fanelaka ku swi yentxa akuva hi va pfuna ku tama va yentxa nhluvuku.

HI NGA MU PFUNISA KUYINI MHUNU LWEYI A NYONXELAKA MADZRUNGULA LAMANENE?

3. Hi fanela ku yentxa yini loko hi kuma mhunu lweyi a nyonxelaka a nsin’wini? (1 Vakorinte 9:26)

³ Loko hi kuma mhunu lweyi a nyonxelaka a nsin’wini, hi djula ku mu pfuna leswaku a dondzra ha Yehovha ni ku tlhela a va ni wuxaka bya le kusuhi na yene. Xileswo ka liyendzro dzra ku sungula, hi fanela ku tekela ku mu kombela ku mu fambisela xidondzro xa Bibele ni ku tlhela hi mu zramba kuva a ya mintlhanganwini.—Dondzra 1 Vakorinte 9:26.

4. Dzrungula mfambu wa mhunu lweyi a a lulamele ku sungula ku dondzra Bibele.

⁴ Mu kombeli ku mu fambisela xidondzro xa Bibele. Van’we ka lava hi bulaka na vone nsin’wini va tiyimisele ku tekela ku pfumela ku fambiseliwa xidondzro xa Bibele. Hi xikombiso, n’hwanyana wa kukazri a Canadá a tsrhindzrekelele xikarinyana xa mabuku hi Wawumune a va a teka broxura ledzri liki: Hanya Hi Ku Nyonxa! Makwezru lweyi a a li ka xikarinyana a mu tlhamuxele leswaku a broxura ledzriyani a dzri tizriseliwa ku fambisa swidondzro swa Bibele swa mahala. N’hwanyana lwiyani a swi nyonxelile leswi makwezru a nga swi hlaya a va a mu nyika numeru yake ya telefoni. Hi siku dzroledzro, n’hwanyana lweyo a zrumele mensaji ka makwezru lwiyani a mu vutisa mayelanu ni xidondzro. Loko makwezru wa xisati a mu tlhelisele mensaji a mu vutise leswaku, xana swi nga koteka ku va va dondzra a ku heleni ka vhiki? N’hwanyana lwiyani a te: “Swi ngo yini hi vhela hi dondzra mundzruku? Ni ni nkama.” Hi Wawuntlhanu wa kone va sungule xidondzro. A n’hwanyana lwiyani a ye mintlhanganwini a ku heleni ka vhiki dzroledzro nakone a hambe nhluvuku hi ku kahlula.

5. Ka swiyimu swin’wana, i yini leswi hi fanelaka ku swi yentxa na hi nge si na sungula xidondzro xa Bibele? (Tlhela u vona ni mifoto.)

⁵ I ntiyiso leswaku a hi vhanu hinkwavu lava taka yangula ku fana ni n’hwanyana lwiyani va va va pfumela xidondzro xa Bibele hi ku kahlula. Van’wana va nga ha djula nkama lowu yengetelekiki akuva va kombisa ku nyonxela dzrungula ledzri hi va zrezrelaka dzrone. Hi nga yentxa leswo hi ku va hi khanela hi mhaka leyi yi va nyonxisaka. Loko hi tama hi va ni vonela ledzrinene ni ku tama hi kombisa leswaku ha zron’weka ha vone, hi nkamanyana wutsrongo hi ta swi kota ku va hi sungula xidondzro xa Bibele. I yini leswi hi nga swi hlayaka loko hi djula ku sungula xidondzro xa Bibele? Hi hambe xivutiso lexo ka vamakwezru va ku siyanasiyana lava swi va nabyalelaka ku sungula xidondzro xa Bibele. A hi voneni swidzringanyeto leswi va swi nyikeliki.

6. I yini leswi hi nga swi hlayaka akuva mhunu a tama a nyonxela ku bula na hine?

⁶ Vamakwezru lava va hlaye leswaku ka mimbangu yimbeni loko u vulavula hi ku sungula xidondzro xa Bibele, swa yampswa ku tivonela ku hlaya leswaku “xidondzro”, “xidondzro xa Bibele” kumbe “ni ta ku dondzrisa”. A matsrhan’wini ya leswo, vone va twisise leswaku mavulavulela lawa ma tizraka hi lawa: “Mabulu”, “ku bulisana” ni ku “twisisa Bibele”. Akuva mhunu a nyonxela ku tama mi bula, u nga ha hlaya leswi: “Ya hlamalisa ndlela leyi Bibele dzri hlamulaka swivutiso swa lisima a wuton’wini ha yone.” Kumbe u ku: “A Bibele a dzro pfuna ntsena lava lumbaka wukhongoti bya kukazri, kambe dzri pfuna hinkwezru ka wutomi byezru bya siku ni siku.” Nakone hi nga ha hlaya leswi: “Swi nge ti ku tekela nkama wunyingi, ntsena hi 10 kumbe 15 wa maminutu swa koteka ku va hi dondzra hi mintxhumu leyi nga yampswisaka wutomi byezru.” Akuva mhunu hi nga mu heti ntamu, i swinene ku va hi nga ma tizrisi mazritu lawa ma liki: “Swo sindzrisa” kumbe “vhiki ni vhiki”.

7. Xana van’we va xiye leswaku a va dondzra ntiyiso loko swi te yini? (1 Vakorinte 14:23-25)

⁷ Mu zrambi a mintlhanganwini. A masikwini ya mupostola Pawulo swi tikomba na van’we va xiye leswaku a va dondzra ntiyiso loko va ye mintlhanganwini. (Dondzra 1 Vakorinte 14:23-25.) Hi ntolovelo hi leswi yentxekaka ni namunhla. Ntalu wa swidondzro swa Bibele swi hamba nhluvuku loko swi sungula ku ya a mintlhanganwini. He wini nkama lowunene wa ku zramba mhunu lweyi a nyonxelaka akuva a ya mintlhanganwini? A buku ledzri liki Hanya Hi Ku Nyonxa Hi La Ku Nga Helikiki! dzri ni xizrambu ka dondzro 10, kambe a swi yimeli ku va mi tlhasa ka dondzro leyo akuva u mu zramba. Nambi ka mabulu yenu ya ku sungula u nga mu zramba mhunu akuva a ya hlalela mintlhanganu ya ku hela ka vhiki. Kumbexana u nga ha mu byela nhlokomhaka ya wukaneli bya le livaleni kumbe ya Xihondzro Xa Ku Zrindzra xa Xidondzro.

8. I yini leswi hi nga swi byelaka mhunu lweyi hi mu zrambaka ku ya mintlhanganwini yezru? (Ezaya 54:13)

⁸ Loko u zramba mhunu lweyi a nyonxelaka, mu tlhamuxeli ndlela leyi mintlhanganu yezru yi hambaniki ha yone ni leswi kumbexana a nga vaka na a swi vonile ka wukhongoti byin’wana. Xidondzro xa kukazri xa Bibele lexi hlaleliki Dondzro ya Xihondzro Xa Ku Zrindzra hi khambi dzra ku sungula xi vutise lweyi xi dondzraka na yene Bibele xi ku: “A mufambisi wa Xihondzro awa mativa mavito ya vhanu hinkwavu lava?” Makwezru wa xisati a hlamule leswaku ku fana ni leswi hi tivaka mavito ya maxaka yezru, hine hi tikazratela ku tiva mavito ya vamakwezru. A xidondzro xa makwezru lweyo xi game xi ku a swi nga li hi ndlela leyo lomu a xi khongela kone. Nakone hi nga tlhela hi tlhamuxela lweyi a nyonxelaka ku hambana ka wukhongoti byezru ni wukhongoti byin’wana. (Dondzra Ezaya 54:13.) Hine hi tlhangana akuva hi gandzrela Yehovha, hi dondzra mayelanu na yene ni kuva hi tiyisana. (Heb. 2:12; 10:24, 25) Hi leswi yentxaka mintlhanganu yezru yi lulamiseliwa hi nkongometo wa kuva hi dondzra ku nga li kuva hi phindaphinda mintxhumu leyi nga swihena. (1 Kor. 14:40) Handle ka leswo, Tiyindlu tezru ta Wugandzreli ti lulamiseliwe hi ndlela ya leswaku swi hi nabyalela kuva hi dondzra. Leswi hi nga ni wukalatlhelo a hi seketeli ntlawa ni wun’we wa politika nakone a hi patsreki ka timholova leti patsraka mavonela ya vhanu. Ntxhumu wun’wana lowu u nga wu yentxaka i ku komba lweyi u dondzraka na yene Bibele vhidiyu ledzri liki: “Ku Yentxeka Yini Andlwini Ya Nfumu?” Hi ndlela leyo, xidondzro xaku xi ta va ni muvono wa leswi swi yentxekaka na xi nge si na ya mintlhanganwini.

9-10. I yini leswi hi nga swi byelaka mhunu lweyi swi nga yentxekaka a txhava ku ya a mintlhanganwini yezru? (Tlhela u vona ni mufoto.)

⁹ Van’wana va txhava ku ya a mintlhanganwini yezru hi ku yanakanya leswaku swi ta sindzrisa leswaku va va “Timboni ta Yehovha”. Xileswo, swi beki livaleni leswaku ha swi zrandzra ku yamukela vayeni nakone a hi sindzrisi mhunu leswaku a hlaya kumbe ku yentxa ntxhumu na ntlhanganu wu famba kumbe ku va a va Mboni ya Yehovha. Hinkwavu a ndangwini va zrambiwa ku patsra ni vatsrongwana. A mintlhanganwini yezru, a vatsrongwana ni lava kuliki va tsrhama mbangu wun’we. Xileswo, vapswele ni vana va tsrhama mbangu wun’we akuva va dondzra. Kutani vapswele va swi tiva leswaku vanavu va na vamani ni leswaku va dondzra yini. (Det. 31:12) A ku fambisiwi xiparatwana nakone a ku na minhlengo. Hine hi landzra leswi Yesu a swi hlayiki loko a te: “Mi yamukeli hi mahala, nyikani hi mahala.” (Mat. 10:8) U nga tlhela u va byela leswaku a swi sindzrisi ku va mhunu a va ni mpahla ya ku dula akuva a nghena mintlhanganwini. Yehovha a nga lavisisi ndlela leyi hi nga yambala ha yone kambe a lavisisa timbilu tezru.—1 Sam. 16:7.

¹⁰ Loko mhunu lweyi u mu zrambiki a ta mintlhanganwini, yentxa hinkwaswu leswi u nga swi kotaka akuva a titwa na a ntsrhunxekile, mu kombi vakulu ni vamakwezru van’wana. Loko a titwa na a ntsrhunxekile swi nga yentxeka a nyonxela ku tlhela a buya. Loko a nge na Bibele dondzrani xikan’we tindzrimana ka Bibele dzraku, handle ka leswo mu pfuni akuva a longoloka ni wukaneli u tlhela u mu komba ndlela leyi a nga bekisaka leswi a swi dondzraka ha yone.

HI NGA MU VONISA KUYINI MHUNU LWEYI A SUNGULAKA KU DONDZRA BIBELE?

11. Xana u nga kombisa leswaku wa wu hlonipha nkama ni xiyimiso xa xidondzro xaku hi ndlela yini?

¹¹ Loko hi fambisela mhunu xidondzro xa Bibele, i yini leswi hi fanelaka ku va na swone a miyanakanywini? Hlonipha nkama ni xiyimiso xake. Hi xikombiso, loko mi bule kuva mi dondzra hi nkama wa kukazri, tlhasa hi nkama wolowo nambiloko van’wana a mugangeni waku va ni xihena xa ku xwela. Handle ka leswo, kumbexana swi nga va swinene ku va xidondzro xenu xa ku sungula xi nga teki nkama wunyingi. Vazrezri van’wana lava nga ni mfambu va hlaya leswaku i swinene ku kahlula mi gama xidondzro nambiloko lweyi u mu dondzrelaka a ha swi djula ku dondzra. Tivoneli kuva u nga khaneli ngopfu, yentxa xidondzro xaku xi ntsrhunxeka akuva xi hlaya ndlela leyi xi titwaka ha yone.—Amapr. 10:19.

12. He wini nkongometo lowu hi fanelaka hi va na wone loko hi sungula xidondzro xa Bibele?

¹² Ku sukela ku sunguleni, nkongometo i kuva u pfuna xidondzro xaku leswaku xi tiva Yehovha na Yesu ni kuva xi kulisa ndlela leyi xi va zrandzraka ha yone. Akuva hi yentxa leswo, i swinene kuva hi mu dondzrisa leswi Bibele dzri hlayaka swone ku nga li leswi hi swi yanakanyaka kumbe ku swi tiva. (Mint. 10:25, 26) A mhakeni leyi, mupostola Pawulo a ve xikombiso lexinene. Loko a dondzrisa vhanu a a beka miyanakanyu yake ka Yesu Kriste, ku nga lweyi a tiki lani misaveni akuva a pfuna vhanu leswaku va tiva ni ku zrandzra Yehovha. (1 Kor. 2:1, 2) Pawulo a tlhele a dzri beka livaleni lisima dzra ku vona xivileleko xa ku pfuna vadondzrisiwa lavampshwa ku txutxela matsrhamela lamanene lawa ma nga fanisiwaka ni woru, prata ni mazribye ya lisima. (1 Kor. 3:11-15) A matsrhamela lawo ma patsra lipfumelo, wutlhazri, ku twisisa ni ku txhava Yehovha. (Amaps. 19:9, 10; Amapr. 3:13-15; 1 Pet. 1:7) Yetisela ndlela leyi Pawulo a a dondzrisa ha yone nakone pfuna swidondzro swaku akuva swi txutxela ku va ni lipfumelo ledzri tiyiki ni ku va ni wuxaka bya le kusuhi ni Papayi wezru wa lizrandzru wa le matilweni.—2 Kor. 1:24.

13. Xana hi nga lehisa mbilu ni ku twisisa xidondzro xa Bibele hi ndlela yini? (2 Vakorinte 10:4, 5) (Tlhela u vona ni mufoto.)

¹³ Loko u dondzrisa, yetisela xikombiso xa Yesu hi ku va u lehisa mbilu ni ku va lweyi a twisisaka. Tivoneli akuva u nga hambi swivutiso leswi taka yentxa lweyi u dondzraka na yene a nga ntsrhunxeki. Loko xidondzro xi swi kazratela ku twisisa yinhla ya kukazri, u nga godoli kambe yana mahlweni ni dondzro nakone yimela nkama wun’wana akuva u tlhela u vulavula ha swone. A matsrhan’wini ya ku sindzrisa xidondzro akuva xi pfumela dondzro ya kukazri, xi nyiki nkama wa kuva xi yanakanyisisa ni ku txintxa mayanakanyela ya xone. (Yoh. 16:12; Kol. 2:6, 7) A Bibele dzri fananisa tidondzro ta madzrimi ni ‘mintxhumu leyi dzimiki timitsru’ leyi fanelaka ku “tsruvuliwa” ni xihondzro lexi fanelaka ku hohlotiwa. (Dondzra 2 Vakorinte 10:4, 5.) Swi nga yentxeka lweyi hi dondzraka na yene Bibele swi nga mu nabyaleli ku tsrhika ku kholwa mintxhumu leyi a buyaka na a yi kholwa ku dzringana nkama wa ku leha. Xileswo, hi fanela ku mu pfuna ku sungula ku yaka xihondzro leximpshwa, leswi tlhamuxelaka ku mu pfuna ku dumba Yehovha. Kutani leswo swi ta yentxa leswaku swi mu nabyalela ku tsrhika tidondzro ta khale.—Amaps. 91:9.

HI NGA MU PFUNISA KUYINI LWEYI A SUNGULAKA KU HLALELA MINTLHANGANU?

14. Xana hi fanela ku va khoma hi ndlela yini lava vo ho ko sungula ku hlalela mintlhanganu?

¹⁴ Yehovha a djula leswaku hi nga vi ni xihlawuhlawu nakone a djula kuva hi kombisa wunene vhanu hinkwavu swi nge na mhaka mahanyela yezru, xiyimu xezru xa timali kumbe ntumbuluku wezru. (Yak. 2:1-4, 9) Kutani, hi nga dzri kombisa hi ndlela yini lizrandzru ka lava vo ho ko sungula ku hlalela mintlhanganu?

15-16. Hi nga va pfunisa kuyini lava yaka mintlhanganwini hi khambi dzra ku sungula leswaku va titwa na va ntsrhunxekile?

¹⁵ Vhanu van’wana va ya mintlhanganwini yezru ntsena hi ku djula ku vona leswaku ku yentxeka yini kumbe hi leswi va zrambiwiki hi mhunu wa bandla dzrin’wana. Loko u vona muyeni a Ndlwini Ya Wugandzreli, mu hoyozeli nakone bula na yene. Kombisa xinghanu, kambe tivoneli akuva u mu yentxa a titwa na a nga ntsrhunxekanga hi ku va u nyonxa ku tlula mpimu. Mu zrambi kuva a tsrhama tlhelweni kwaku nakone longoloka na yene loko ku dondzriwa Bibele, mabuku man’wana kumbe ku va u mu djulela mabuku yake. Handle ka leswo, zama ku twisisa matitwela yake. Wanuna wa kukazri lweyi a yendzreliki Yindlu Ya Wugandzreli, a byele makwezru lweyi a mu yamukeliki leswaku a a ni tingana hi leswi a a yambale hi ndlela leyi hambaniki ni leyi vamakwezru van’wana a va yambale ha yone. Makwezru a pfune wanuna lweyo leswaku a titwa na a ntsrhunxekile nakone a mu tlhamuxele leswaku hine Timboni ta Yehovha hi vhanu lava tolovelekiki. Hi ku famba ka nkama, wanuna lwiyani a babatisiwile kambe a nga zanga a yi dzrivala nhlamulo ya makwezru lweyi a mu yamukeliki. Loko mintlhanganu ya ha sungula ni loko yi gamile, loko u bula ni lweyi o ho ko sungula ku ta mintlhanganwini, minkama hinkwayu vana ni leswi miyanakanywini: Hi djula ku kombisa leswaku ha zron’weka ha yene kambe na hi nga tingheniseli ka wutomi byake.—1 Pet. 4:15.

¹⁶ Ku ni ndlela yin’wana leyi hi nga pfunaka vayeni leswaku va titwa na va ntsrhunxekile a mintlhanganwini. Ka mabulu yaku, tinhlamulo ni ka swiyenge leswi u taka swi nyikela, loko u vulavula hi lava kalaka va nga mu tizreli Yehovha, minkama hinkwayu kombisa xihlonipho. Tivoneli kuva u nga hlayi ntxhumu lowu taka khunguvanyisa mhunu kumbe ku mu yentxa a nga ha swi djuli ku tlhela a ta mintlhanganwini. (Tit. 2:8; 3:2) Hi xikombiso, hi nge ti vulavula ku biha hi mintxhumu leyi vhanu van’wana va kholwaka ka yone. (2 Kor. 6:3) Vamakwezru lava bekaka wukaneli hi vone lava fanelaka ku tivonela ngopfu a mhakeni leyo. Vamakwezru lava va kombisa ku yanakanyela hi ku va va tlhamuxela mazritu ha hombe ni leswi kumbexana vayeni va kalaka va nga swi twisisi.

17. I yini leswi hi fanelaka ku swi yentxa loko hi kuma vhanu lava kombisaka “leswaku va swi djula ku kuma wutomi lebyi nga helikiki”?

¹⁷ Nkama lowu masiku ma yaka ma famba, ntizro wa ku yentxa vadondzrisiwa wu ya wu va wa xihantla. Nakone hi ta tama hi kuma vhanu lava kombisaka “leswaku va swi djula ku kuma wutomi lebyi nga helikiki”. (Mint. 13:48) Loko leswo swi yentxeka, a hi fanelanga ha ha da nkama wa ku va fambisela xidondzro xa Bibele kumbe ku va zramba mintlhanganwini. Hi ku yentxa leswo, hi ta va pfuna kuva va famba ka ndlela “leyi yisaka wuton’wini”.—Mat. 7:14.