Ku Seketela Ntizro Wa Mfumu A Mugangeni Ni Le Misaveni Hinkwayu

SWANGA ndlela ya ku hetisisa wuprofeta bya Yesu mayelanu ni masiku ya wugamu, a Timboni ta Yehovha ti yentxa ntizro wa ku zrezra madzrungula lamanene ‘ku ya tlhasa wugan’wini bya misava’. (Min 1:8; Mt 24:14) Akuva ti kota ku yentxa leswo, ti nyikela hi nkama ni ntamu wa tone hi ku swi zrandzra leswaku ti nyika van’wana mintxhumu ya moya. Ti ya mahlweni ti zrangisa Mfumu wa Xikwembu Nkulukumba na ti dumba leswaku Yehovha a ta ti nyika leswi djulekaka. (Mt 6:25-34; 1Ko 3:5-9) Mihandzru leyi kumekaka i xikombiso xa le livaleni xa ku yamukeliwa ni ku tovokisiwa ha Yehovha.

KU BEKISA SWIVILELEKO SWA MFUMU A MISAVENI HINKWAYU

² Loko vambeni va vona ndlela leyi hi zrezraka ha yone ni leyi hi nyikelaka mabibele ni mabuku lama seketeliwiki a Bibeleni handle ka ku va hakelisa mali, va tivutisa leswi: “Xana swi kotekisa kuyini leswi hinkwaswu?” I ntiyiso leswaku ku hamba ni ku gandlisa mabibele ni mabuku lama seketeliwiki a Bibeleni swi djula mali. Ku yaka ni ku bekisa miti ya Betele leswaku vatizreli va gandlisa mabuku, va lavisela ntizro wa ku zrezra, ni ku tizrela kone hi tindlela timbeni leti yisaka mahlweni a madzrungula lamanene na swone swi djula mali. Handle ka leswo, valaviseli va miganga, vazrumiwa, maphayona ya ku hlawuleka ni vambeni lava nga ka ntizro wa ku hlawuleka wa nkama hinkwawu va nyikiwa swimalana leswi va pfunaka ku tama va tizra. Swi le livaleni leswaku a ntizro wa ku zrezra madzrungula lamanene a masikwini yezru, ku nga ha va a mugangeni wezru kumbe a misaveni hinkwayu, wu djula timali ta ku tala. Xana mali leyo hinkwayu yi huma kwini?

³ Vanyingi lava tlangelaka ntizro wa Timboni ta Yehovha wa ku dondzrisa Bibele va nyonxela ku seketela ntizro wa misava hinkwayu hi swihanano. Nambitanu, ntizro wezru wu seketeliwa ngopfu-ngopfu hi Timboni ta Yehovha. Ti kombisa moya wa ku swi zrandzra, wa ku fana ni lowu kombisiwiki hi vatizreli va khale va Xikwembu Nkulukumba, lava hi mbilu ya ku basa va seketeliki ku yakiwa ka mbangu wa ku gandzrela Yehovha. (Eks 35:20-29; 1Mk 29:9) Swihanano swimbeni swi nyikeliwa hi ndlela ya ku tsrala papela leswaku nhundzru yi sala ni nhlengeletanu loko mhunu a file, kasi swimbeni swi nyikeliwa hi vhanu hi ku kongoma, mabandla ni miganga, nakone swi kotisa ku nyikeliwa hi mintsrengo yitsrongo. Loko swi patsrinyetiwa, swihanano leswo swi vumba mali leyi fambisaka ntizro.

⁴ Timboni ta Yehovha ti swi vona na ku li tovoko ku tizrisa mali ya tone ni tindlela timbeni leswaku ti yisa mahlweni ntizro wa ku zrezra. Yesu ni vadondzrisiwa vakwe a va ni bokisi dzra mali ledzri a va susa mali ku dzrone leswaku va hakela swivileleko. (Yh 13:29) Bibele dzri hi byela hi ta vavasati lava tizreliki Yesu ni vadondzrisiwa vakwe. (Mr 15:40, 41; Lk 8:3) Mupostola Pawulo a pfumele hi ku khensa xipfuno xa lizrandzru xa mintxhumu ya nyama leyi a a nyikiwa hi lava a va djula ku yisa madzrungula lamanene mahlweni va tlhela va navela ku seketela ntizro wakwe. (Flp 4:14-16; 1Te 2:9) Timboni ta Yehovha ta ha landzrela tindlela leti ta khale ta ku hisekela ntizro ni ku hanana hi mbilu. Hi ndlela leyo, swa koteka kuva vhanu va timbilu letinene a mimbangwini hinkwayu va hananiwa ‘mati ya wutomi’ hi mahala.​—Mpf 22:17.

KU BEKISA SWIVILELEKO SWA BANDLA DZRAKU

⁵ A swivileleko swa bandla na swone swi hakeliwa hi swihanano swa ku tizrandzrela. A ku fambisiwi xiparatwana xa minhlengo; a ku tsremiwi mali leyi mhunu a fanelaka ku yi humexa nakone a ku kombeliwi mali. Ku bekiwa mabokisi ya swihanano a mimbangwini ya mintlhanganu leswaku mun’wana ni mun’wana a kota ku nyikela ‘swanga hi leswi a pimisisiki xiswone a mbilwini yakwe’.​—2Ko 9:7.

⁶ A mali leyi humexiwaka yi tizriseliwa ngopfu-ngopfu ku hakela leswi djulekaka akuva a Yindlu ya Mfumu yi tama yi hlayiseka. A huvo ya vakulu yi nga ha boha leswaku mali yimbeni yi zrumeliwa a hofisini dzra zrwavi dzra Timboni ta Yehovha dzra le mugangeni akuva yi pfunisa ka ntizro wa misava hinkwayu. A ntsrengo lowu nga zrumeliwaka wu nga tsrimbiwa hi bandla. Hi ndlela leyo, hweti ni hweti mabandla manyingi ma zrumela swihanano a ntizrweni wa misava hinkwayu. Loko hinkwavu a bandleni va tiva swivileleko leswi kotisaka ku va kone, a swi nge vileleki kuva va tsrhamela ku dzrimuxiwa hi ta swihanano.

NDLELA YA KU KHOMA SWIHANANO

⁷ A ntsrhaku ka ntlhanganu wini na wini, vamakwezru vabidzri va humexa mali hinkwayu leyi petiwiki mabokisini ya swihanano va va va yi tsrala. (2Th 12:9, 10; 2Ko 8:20) Huvo ya vakulu yi hamba malulamiselo lama djulekaka leswaku mali leyo yi hlayiseka yi za yi zrumeliwa a hofisini dzra zrwavi kumbe yi tizriseliwa ka swivileleko swa bandla. Makwezru lweyi a laviselaka a tinkonta ta bandla a lulamisela papela ledzri hlayaka xiyimu xa timali leswaku a tivisa bandla, nakone minkama hinkwayu loko ku za ku khaluta tihweti tizrazru a mutlhanganisi wa huvo ya vakulu a hamba malulamiselo leswaku ku kambisisiwa mali ya bandla.

SWIVILELEKO SWA MUGANGA

⁸ Mintxumu leyi djulaka ku hakeliwa a tinhlengeletanwini, ku patsra ni swivileleko swa muganga, swi hakeliwa hi swihanano swa Timboni leti vumbaka muganga lowo. Ku bekiwa mabokisi ya swihanano a mimbangwini ya tinhlengeletanu leswaku ku nyikeliwa swihanano leswi taka tizrela muganga. Handle ka leswo, akuva ku hakeliwa swivileleko swa nkama ni nkama, mabandla ma nga ha nyikela swihanano minkama yimbeni.

⁹ Loko swi koteka, miganga yi fanela ku kota ku tihakelela swikoxo swini na swini leswi djulekaka, yi va yi zrumela mali leyi salaka ka ntizro wa misava hinkwayu. Loko muganga wu nge na mali leyi dzringanaka leswaku wu hakela leswi djulekaka a nhlengeletanwini kumbe ku hakela swivileleko swa ntshima swa nhlengeletanu leyi landzrelaka, ku fana ni ku pfana ku hakeliwa mbangu lowu taka tizrisiwa, mulaviseli wa muganga a nga ha leleta leswaku mabandla ma tivisiwa leswaku ma ni mukhandlu wa ku seketela hi swihanano. Huvo ha yin’we ya vakulu yi ta bula hi mhaka leyi akuva yi vona leswaku i ntsrengo muni wa swihanano lowu a bandla dzri nga kotaka ku wu zrumela ka nkonta ya muganga. Ntsrhaku, va ta hamba xiboho xa leswaku a bandla dzri ta zrumela mali muni.

¹⁰ Loko ku ni xiyimu xa timali lexi djulaka ku lulamisiwa hi vakulu va muganga, ku ta hambiwa ntlhanganu wa vakulu hi siku dzra nhlengeletanu ya muganga. Swiboho hinkwaswu leswi taka tekiwa, handle ka swivileleko swa muganga leswi tolovelekiki, swi fanela ku tekiwa swanga swiboho swa vakulu. Ku fanela ku tsraliwa ntsrengo wa ku kongoma wa swiboho leswi tekiwiki ku va ku kombeliwa mpfumelelo nkama wini na wini loko ku tizrisiwa mali ya muganga.

¹¹ Nkama ni nkama ku hambiwa malulamiselo leswaku ku kambeliwa tinkonta ta muganga.

KU HLAYISA SWISIWANA

¹² Wun’wana wa minkongometo ya bokisi dzra mali ledzri Yesu ni vadondzrisiwa vakwe a va li nadzru a ku li ku pfuna swisiwana. (Mr 14:3-5; Yh 13:29) Nkongometo lowo wa vakriste wa ha ya mahlweni, hikusa Yesu a te: ‘Hikusa n’wi ni swisiwana hi minkama hinkwayu a makazri kwenu.’ (Mr 14:7) Xana Timboni ta Yehovha ti byi hetisisisa kuyini wutiyanguleli lebyi namunhla wa siku?

¹³ Minkama yimbeni, vhanu va ku dumbeka a bandleni va nga ha djula ku pfuniwa hi tlhelo dzra nyama hi kola ka ku duhwala, mavabyi kumbe swikazratu swimbeni leswi nga liki ntan’wini wavu ku swi lawula. Swizro swa ndangu, maxaka ni vambeni lava va xiyaka ku vilela koloko va nga ha khumbeka, va navela ku pfunisa. Leswo swi twanana ni mazritu lawa ya mupostola Yohane: ‘Kambe loko mhunu a li xipfundzri, kutani a vona makwavu lweyi a pfumalaka, a mu pfalela mbilu yakwe, swi nga kotekisa kuyini leswaku a lizrandzru dzra Xikwembu Nkulukumba dzri nga tsrhama ku yene xana? Vana vanga, hi nga zrandzreni hi mazritu kumbe hi ku vulavula, kambe hi mintizro ni hi xihlayelamfuzri.’ (1Yh 3:17, 18, Bibele dra ku xwenga, BX; 2Te 3:6-12) Wugandzreli bya xihlayelamfuzri byi patsra ku hlayisa lava dumbekiki, lava nga ha vilelaka mpfuno wa mintxhumu ya nyama.​—Yk 1:27; 2:14-17.

¹⁴ Ka papela dzra ku sungula ledzri a tsraleliki Timotewu, Pawulo a tlhamuxele ndlela leyi ha yone mintxhumu ya nyama yi nga nyikiwaka lava fanelekaka. U nga dondzra xilayu xakwe ka 1 Timoteo 5:3-21. I wutiyanguleli bya mukriste mun’wana ni mun’wana ku zrangela a ku hlayiseni ka swivileleko swa ndangu wakwe. Lava kuliki kumbe lava vabyaka va fanela ku hlayisiwa hi vanavu, vatukulu kumbe maxaka ya le kusuhi. Minkama yimbeni, xipfuno xa nyama xi nga ha nyikeliwa hi mfumu kumbe tinhlengeletanu ta xipfuno, xileswo maxaka kumbe vambeni vanga ha pfuna lava vilelaka leswaku va titsralisa akuva va kuma mpfuno lowo. Ku nga ha humelela xiyimu lexi djulaka leswaku bandla hinkwadzru dzri pfuna vamakwezru va kukazri lava pfumalaka, lava buyaka na va dumbeka hi malembe ya ku tala. Loko ku nge na swizro swa ndangu kumbe maxaka lawa ma nga va hlayisaka, nakone a mfumu wu nge na malulamiselo ya ku va hlayisa hi lani swi djulekaka ha kone, a huvo ya vakulu yi nga hlela kuva va pfuniwa hi ndlela ya kukazri. Vakriste va swi teka na ku li tovoko ku yavelana mintxhumu yavu ya nyama ni lava va pfumalaka.

¹⁵ Ku tala ka vamakwezru va nga ha nhingena wusiwanini hi kola ka ku xanisiwa, tiyimpi, ku tsreka-tsreka ka misava, tindhambhi, tindlala ni makhombo mambeni lama tolovelekiki a minkameni leyi ya ku nonon’hwa. (Mt 24:7-9) Mabandla ya le mugangeni ma nga ha pfumala xa ku pfunana ha xone, xileswo a Huvo Leyi Zrangelaka yi kutxa vamakwezru va le mimbangwini yimbeni leswaku va nyikela leswi djulekaka. Leswi swi fana ni ndlela leyi vamakwezru va le Ásia Menor va nyikeliki swakuda ha yone ka vamakwezru va le Yuda hi nkama wa ndlala. (1Ko 16:1-4; 2Ko 9:1-5) Loko hi yetisela xikombiso xavu, hi kombisa leswaku ha va zrandzra vamakwezru hi tlhela hi tikombisa leswaku hi vadondzrisiwa va Yesu va xihlayelamfuzri.​—Yh 13:35.

KU NYIKELIWA KA MABUKU

¹⁶ Mabibele ni mabuku lama seketeliwiki a Bibeleni swi hamba xiyenge xa lisima a ku twaliseni ka dzrungula dzra Mfumu. Hi ntolovelo a huvo ya vakulu yi beka nandzra wa wutizreli leswaku a langusela manyikelela ya mabuku. Vamakwezru lava bekiwiki ku lavisela mabuku va hamba ntizro lowu hi wutiyanguleli byikulu. Va tsrhama na va tsrala tinhlayu ta mabuku lama nga kone akuva ku nge ti pfumaleka mabuku lawa bandla dzri ma tizrisaka.

¹⁷ Swanga vakriste lava tinyiketeliki, hi twisisa leswaku a nkama wezru, wutivi ni ntamu, wuswikoti ni mintxhumu ya nyama, nambi wutomi byezru i swihanano leswi pfaka ku Xikwembu Nkulukumba nakone swi fanela ku tizriseliwa a ntizrweni wakwe. (Lk 17:10; 1Ko 4:7) Loko hi tizrisa mintxhumu yezru hinkwayu hi ndlela leyinene, hi kombisa ndlela leyi lizrandzru dzrezru ha Yehovha dzri yentisiki xiswone. Hi navela ku dzrumisa Yehovha hi mintxhumu yezru ya lisima, na hi tiva leswaku a nyonxisiwa hi xihanano xini na xini lexi a nyikiwaka swanga xikombiso xa ku tinyiketela hi mbilu hinkwayu. (Pr 3:9; Mr 14:3-9; Lk 21:1-4; Kl 3:23, 24) Yesu a te: “N’wi nyikiwe mahala, nyikani mahala.” (Mt 10:8, NM) Loko hi ya hi nyikela wutomi ni mintxhumu yezru a ntizrweni wa Yehovha, hi ya hi nyonxa hi ndlela leyi yengeselekiki.​—Min 20:35.