Ndlela Ya Ku Tizrisa Swipapelana Akuva U Sungula Mabulu

Ku sukela hi Janeru wa 2018, ka kapa dzra Xibukwana xa Ntlhanganu Wa Wutomi Ni Wutizreli ku kombisiwa swikombiso swa ndlela leyi hi nga sungulaka mabulu ha yone a nsin’wini. Swikombiso leswo swi hi pfuna ku bula ni vhanu, ku nga li ku va siyela mabuku ntsena. A ma-vídeo ya swikombiso swa ku bula hi Bibele ma kombisa ndlela leyi nga pfunaka vazrezri ku sungula bulu hi ku tizrisa Bibele ntsena. Kutani, xana leswi swi djula ku hlaya leswaku a hi fanelanga hi tizrisa mabuku nsin’wini? Im-him, hi nga ma tizrisa. Hi xikombiso, swipapelana swezru i swinene ku sungula mabulu ha swone. Hi nga tizrisa xin’wana ni xin’wana hi ndlela leyi landzrelaka:

1. Hamba xivutiso xi nga ka kapa dzra xipapelana.

2. Komba nhlamulo ya Bibele hi ku tizrisa tsralwa dzri nga ndzreni ka xipapelana. Loko mhunu wa kone a ni nkama, u nga dondzra ni ku bula hi timhaka leti nga ka xipapelana.

3. Nyika n’winyi wa muti xipapelana, u mu kutxa leswaku a dondzra dzrungula ledzri saliki hi wumbeni nkama.

4. Na u nga si na famba, mu kombe xivutiso xi nga ka mhaka leyi liki “Xivutiso Xa Ku Yanakanyisisa Ha Xone”, kutani u hlaya siku ledzri u taka ta ha dzrone u ta mu komba nhlamulo ya Bibele.

Ka mpinda, komba nhlamulo u gama u siya xivutiso xin’wana lexi u taka xi hlamula khambi dzri landzrelaka. U nga ha hamba xivutiso xi nga ka página dzra jw.org kumbe lexi nga ka buku ledzri nga kone ka tluka dzra wugamu dzra xipapelana. Loko u ni mukhandlu, kombisa a xibukwana lexi liki Madzrungula Lamanene Ya Xikwembu Nkulukumba! kumbe buku dzrin’wana dzri nga ka Switizro Swa Ku Dondzrisa Ha Swone.