DONDZRO 7

Ku Ba Kone Ni Ku Kholwisa Vayingiseti

Luka 1:3

NKATSRAKANYU: Tizrisa wumboni lebyi dumbekaka kuva u pfuna vayingiseti vaku leswaku va tlhasela wugamu lebyinene.

Djulisisa dzrungula ledzri dumbekaka. Seketela leswi u swi hlayaka hi Zritu dzra Xikwembu Nkulukumba, hi ku dondzra Bibele hi ku kongoma loko swi koteka. Loko u khanela hi mhaka ya kukazri ya siyensiya, madzrungula ya radiyu, televhizawu kumbe jornali, ntxhumu lowu samiki wu humelela, kumbe wumboni byin’wana bya ku seketela mazritu yaku, zranga hi ku kambisisa leswaku mhaka yoleyo ya dumbeka kumbe a yi txintxanga.
Tizrisa leswi seketelaka mhaka yaku hi ndlela leyinene. Tlhamuxela tindzrimana hi ku twanana ni mongo wa tone, dzrungula hinkwadzru dzra Bibele ni mabuku ya ‘nandzra wa ku dumbeka ni wutlhazri’. (Mt 24:45) Loko u tizrisa swihlovo leswi nga khanelikiki hi Bibele, u nga txintxe leswi vatsrali va swone a va djula ku hlaya swone.

U nga tatise kumbe u hundzrisa timhaka ni tinhlayu. Tivonele leswaku u nga txintxi mhaka leyi liki “vhanu van’wana” kutani u ku “vhanu vanyingi”, “hi minkama yin’wana” u ku “nkama ni nkama” ni “swi nga yentxeka” u ku “swi ta yentxeka”.
Vonisana ni vayingiseti hi wumboni lebyi nga kone. Ntsrhaku ka loko u dondzre tsralwa kumbe u tsrahe xihlovo xa kukazri, hamba swivutiso swa wutlhazri kumbe u khanyisa mhaka leswaku u pfuna vayingiseti ku tlhasela wugamu lebyinene bya mhaka.