Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru

1-7 KA JUNYU

WUKOSI BYI NGA BIBELENI | GENESIS 44-45

“Yosefa A Dzrivalele Vamakwavu”

Sentinela 01/05/2015 pp. 14-15

“Xana Ndzri Le Wutsrhan’wini Bya Xikwembu Nkulukumba?”

Hiloko Yosefa a yandlala mhaka. A zrumele leswaku vamakwavu va petiwa djele, a tlhela a va lumbeta ku yiva xinwelo. Loko va gungule leswaku xinwelo lexo xi kumeke ka nkwama wa Benjamim, hinkwavu va ye titivisa ka Yosefa. Swoswi kutani, a ve ni mukhandlu wa ku vona loko vamakwavu va txintxile. Yuda a ve muvulavuleli wavu. A va kombelele dzrivalelo, a tlhela a hlaya leswaku hinkwavu va nga va swikazrawa a Egipta. Kambe Yosefa a hlaye leswaku a ku fanela ku sala Benjamim ntsena a va xikazrawa.​—Genesis 44:2-17.

Yuda a yangule na a khumbeke swinene. A hlaye leswi: ‘Ke ku sala yene swakwe ku vana va mamana wakwe, a tatana wakwe a wa mu zrandzra.’ Mazritu lawa ma mu khumbe swinene Yosefa hikusa afa a li mativula ya Rakele, lwa afaka a li nsati wa ku zrandzreka swinene ka Yakobe, nakone a fiki loko a pswala Benjamim. Kutani hi lana afaka swi li hakone ka tatana wakwe Yosefa afa a mu dzrimuka Rakele. Yosefa afa a mu zrandzra ngopfu Benjamim, kumbexana hi leswi afaka va li va mamana mun’we.​—Genesis 35:18-20; 44:20.

Yuda a ye mahlweni a kombela kuva Yosefa a nga yentxi leswaku Benjamim a va xikazrawa. Phela a ze a kombela kuva yene a va xikazrawa matsrhan’wini ya Benjamim. A va a gamisa hi ku mu tsratsriya a ku: ‘Hikusa ndzri ta tlhantukelisa kuyini ku tatana, na ndzrisanyana ndzri nge na ye? Suka ndzri vona khombo ledzri taka wela tatana.’ (Genesis 44:18-34) Swoswi kutani Yuda afa a txintxile. Phela a nge txintxa ntsena kambe swoswi afa a ni ntwela wusiwana, wunene, a va a nga pimiseli yene ntsena.

Yosefa a nga ha swi kotanga ku tikhoma. A swi djula a kombisa ndlela leyi afaka a titwa hayone. A lelete leswaku malandzra yakwe ma huma kutani a dzrila lakakuva swi ya twala ni le ndlwini ya Faro. Kutani a tihlaya leswaku hi yene mani: ‘Hi mine Yosefa makwenu.’ Kutani a va xingazra, kutani hi lizrandzru a va dzrivalela leswi va mu yentxeliki swone. (Genesis 45:1-15) Hi ku yentxa leswo, a yetisele Yehovha lwa dzrivalelaka na a ntsrhunxekile. (Amapsalma 86:5) Xana na hine hi yentxa leswi fanaka?

Djulisisa Tindzralama Ta Moya

Perspicaz vol-3 p. 381 §§ 1-2

Ku Handzrula Swiyambalu

A switolovelekile kuva Vayuda, ni vambeni, va handzrula swiyambalu loko va feliwa hi xaka dzra le kusuhi. Makhambi manyingi afa va handzrula ntsena nkolo wa xiyambalu ku dzringana lani ku nga vonekaka xifuva. Leswi liki afa swi nga vileleki kuva va handzrula xiyambalu hinkwaxu lakakuva xi nga ha faneleki ku yambaliwa.

Xihena lexi xi kombisiwa dzra ku sungula a Bibeleni na xi hambiwa hi Rubeni, mativula ya Yakobe. Loko a ya pfumala Yosefa lani afaka va mu peti kone, a handzrule swiyambalu swakwe, aku: ‘A n’wana a nga kone; mine, ndzri ta ya kwini xana?’ Swanga mativula, Rubeni afa a ni ntsrhwalu wa mfanelo wa ku vonelela makwavu lwentsrongo. Loko Yakobe a byeliwe leswaku Yosefa a file a handzrule swiyambalo swakwe a va a yambala masaka, ku kombisa xidzrilo. (Gn 37:29, 30, 34) Ni le Egipta vamakwavu va kombise ku tisola hi ku handzrula swiyambalu loko Yosefa a lumbete Benjamim ku yiva.​—Gn 44:13.

Sentinela 15/08/2004 p. 15 § 15

Ku Vengiwa Handle Ka Xivangelo

I yini lexi nga hi pfunaka kuva hi nga va hlundzrukeli lava hi vengaka ku nge na xivangelo? Dzrimuka leswaku valala vezru lavakulu i Sathana ni mademona yakwe. (Ba-le-Efesa 6:12) Nambi loko van’wana va hi xanisa hi vomu, ntalo wa lava lwaka ni vhanu va Xikwembu Nkulukumba a va yentxi hi vomu kumbe hi ku kutxeteliwa hi vambeni. (Daniel 6:4-16; 1 Timoteo 1:12, 13) Yehovha a zrandzra leswaku ‘vhanu hinkwavu’ va nyikiwa nkama wa ku ‘huluxiwa, va tlhasa ku tiveni ka Xihlayelamfuzri’. (1 Timoteo 2:4) Phela, van’wana va lava lwaka na hine va ndzruluke vamakwezru lava nga vakriste hi kola ka ku xiya mahanyela yezru lamanene. (1 Petros 2:12) Tlhantakubidzri, hi nga dondzra swa kukazri ka xikombiso xa Yosefa n’wana Yakobe. Nambileswi vamakwavu va Yosefa, hi tlhelo dzra tatana, va mu xanisiki ngopfu, a nga va bekelanga xiviti. Ha yini? Hikusa a swi vonile leswaku Yehovha a tlhanteke voko ka ndlela leyi timhaka ti yentxekiki ha yone akuva a hetisisa nkongometo Wakwe. (Genesis 45:4-8) Hi lani ku fanaka, Yehovha a nga yentxa leswaku ku xanisiwa kwezru ku dzrumisa vito dzrakwe.​—1 Petros 4:16.

8-14 KA JUNYU

WUKOSI BYI NGA BIBELENI | GENESIS 46-47

“Ku Ntsrhunxiwa A Ndlaleni”

Sentinela 01/05/1987 p. 15 § 2

Ku Hlayisa Wutomi Hi Nkama Wa Ndlala

7 wa malembe ya ndzralo ma helile kutani ku sungula ndlala hi lani Yehovha a profetiki hakone. Ndlala leyo yi ve kone ‘misaveni hinkwayu’, ku nga li Egipta ntsena. Loko vhanu lava sikaka hi ndlala va sungula ku dzrilela Faro a te ku vone: ‘Yanani ku Yosefa, n’wi yentxa leswi a taka n’wi byela swone.’ Yosefa a xavisele Vaegipta swakuda ku ko va heleliwa hi mali. Kutani va sungule ku hakela hi swifuyu swavu. Hi wugamu vhanu va ye ka Yosefa va ku: ‘Hi xave, hine ni masimu yezru hi swakuda, hi ta va swikazrawa swa Faro.’ Kutani Yosefa a xavela Faro tiko hinkwadzru dzra Egipta.​—Genesis 41:53-57; 47:13-20.

O Reino de Deus já Governa! pp. 234-235 §§ 11-12

Mfumu Wu Hetisisa Ku Zrandzra Ka Xikwembu Nkulukumba A Misaveni

Ndzralo. Misava yi ni ndlala hi tlhelo dzra moya. Bibele dzri te: ‘Lavisani, a masiku ma ta’, ku hla Hosi Yehovha, ‘lawa ndzri taka zruma ndlala tikweni, yi nge ndlala ya kati, ni tozra dzra mati, ya ku va ndlala ya ku yingela mazritu ya Yehovha.’ (Amos 8:11) Xana vahanyitiko va Mfumu wa Xikwembu Nkulukumba na vone va ni ndlala? Yehovha a profete leswaku a ku ta va ni ku hambana makazri ka vhanu vakwe ni valala vakwe: ‘Malandzra yanga ma ta da, kambe n’wine n’wi ta va ni ndlala; Lavisani, malandzra yanga ma ta nwa, kambe n’wine n’wi ta va ni tozra; Lavisani, malandzra yanga ma ta tsrhava, kambe n’wine n’wi ta va ni tingana.’ (Eza 65:13) Xana wa ku vona ku hetiseka ka mazritu lawo?

Malulamiselo lawa hi nga nawone ya swakuda swa moya ma fana ni nambu lowu yentiki swinene. Swipaluxiwa swezru leswi seketeliwiki Bibeleni, ma-áudio, ma-vídeo, mintlhanganu, tinhlengeletanu ni hinkwaswu swi kumekaka ka jw.org swi hamba xiyenge xa ndzralo ya swakuda swa moya hi nga naswone a misaveni leyi leyi sikaka hi ndlala. (Ezk 47:1-12; Yl 3:18) Xana a swi ku nyonxisi ku vona ku hetiseka ka swidumbiso swinyingi swa Yehovha a wuton’wini byaku? Xana wa tinyika nkama wa ku tiwundla nkama ni nkama a tafuleni dzra Yehovha?

Djulisisa Tindzralama Ta Moya

Perspicaz vol-1 p. 272 § 4

Mayimela Ni Matxhukatxhukisela Ya Mizri

Ku pfala mahlo ya mufi hi voko. Mazritu lawa Yehovha a ma byeliki Yakobe: ‘Yosefa a ta beka voko dzrakwe henhla ka mahlo yaku’ (Gn 46:4), afa ku li ndlela ya ku hlaya leswaku Yosefa afa a ta pfala mahlo ya Yakobe loko a fa, leswi a swi fanela ku yentxiwa hi mativula. Swi tikomba na Yehovha a lelete Yakobe leswaku mfanelo ya ku va mativula afa yi li ya Yosefa.​—1Mk 5:2.

Ntlhamuxelo Wa Bíblia De Estudo Ka Min 7:14

75 wa vhanu: Swi nga yentxeka Stefanu afa a nga vulavuli hi ndzrimana ya kukazri ya Matsralwa Ya Xiheberu loko a hlaya leswaku ku nghene 75 wa swizro swa ndangu wa Yakobe a Egipta. Leyi a hi yone nhlayu ku vulavuliwaka hayone ka matsralwa ya Massorético ya Xiheberu. Ka Genesis 46:26 hi kuma leswi: ‘Hinkwavu vhanu lava tiki na Yakobe a Egipta, lava ku huma mazrumbyini yakwe, a handle ka vankata va vana va Yakobe, hinkwavu afa ve ntlhanu wa makume na khume dzrin’we dzra vhanu na ntlhanu na mun’we [66].’ Ndzrimana 27 yi ya malhweni yi ku: ‘A vana va Yosefa lava a nga belekeliwa vone Egipta, afa ve vhanu vabidzri: hinkwavu vhanu va yindlu ya Yakobe, lava tiki Egipta, afa ve ntlhanu wa makume na makume mabidzri ya vhanu [70].’ Lani vhanu va kontiwa hi tindlela tibidzri, a nhlayu ya ku sungula yi patsra ntsena vanakwe kasi ya wubidzri yi patsra vhanu hinkwavu lava buyiki Egipta. A nhlayu ya vana va Yakobe ku vulavuliwa hayone nakambe ka Eks 1:5 ni Dt 10:22, lani ku hlayiwaka leswaku a ve ‘ntlhanu wa makume na makume mabidzri [70]’. Kutani lani swi tikomba na Stefanu a konta hi ndlela yimbeni ya wuzrazru, leyi patsraka ndangu wa Yakobe hinkwawu ka wone. Van’we va hlaya leswaku swi patsra vana ni vatukulu va Manassi na Efrayimi lava ku vulavuliwaka ha vone ka wundzruluteli bya Septuaginta ka Genesis 46:20. Kasi vambeni va pfumela leswaku swi patsra vasati va vana va Yakobe, a nga lava Genesis 46:26 yi nga va patsrikiki. Swi nga yentxa ‘ntlhanu wa makume na makume mabidzri [70]’ ku li nhlayu yavu hinkwavu ka vone. Nambitasu swi nga yentxa nhlayu leyi yi tizrisiwe na swi sukela ka matsralwa ya Xiheberu lawa afaka ma kumeka dzaneni dzra ku sungula M.N.Y. Hi malembe manyingi swidondzri swi buye na swi tiva leswaku 75 a ve nhlayu ku vulavuliwiki hayone ka Gn 46:27 ni Eks 1:5 ka Septuaginta dzra Xigriki. Tlhantakubidzri, a dzaneni dzra wu-20, ku kumiwe switlephu swibidzri swa tsralwa dzra Eks 1:5 hi xiheberu swa Mar Morto, ka swone ku tizrisiwe nhlayu ya ‘ntlhanu wa makume na makume mabidzri [70]’. Swinga yentxeka nhlayu leyi Stefanu a yi tizrisiki yi seketeliwe ka matsralwa ya khale. Swi nge na mhaka leswaku he swini leswi nga swone, Stefanu a tizrise ntsena ndlela yimbeni ya ku konta vana va Yakobe.

15-21 KA JUNYU

WUKOSI BYI NGA BIBELENI | GENESIS 48-50

“Hi Nga Dondzra Swinyingi Ka Lava Kuliki”

Perspicaz vol-2 p. 468 § 5

Yakobe

Loko Yakobe a li kusuhi ni ku fa, a tovokise vatukulu vakwe, vana va Yosefa, nakone hi ku nkongomisiwa hi moya a beke lwe ntsrongo Efrayimi mahlweni ka lwenkulu Manasi. Kutani a hlaye leswaku Yosefa afa a ta yamukela pfindla dzra wunhondzrwa hi la ku phindiwiki kabidzri: ‘Nangweso ndzri ku nyike dzrin’we yavelo ku tlula ya vamakwenu, ledzri ndzri nga dzri teka mandleni ya va Amori hi lipanga langa ni hi xitlhamungwana xanga.’ (Gn 48:1-22; 1Mk 5:1) Swanga hi leswi Yakobe a xaviki nsimu ka vana va Amori kusuhi na Xikem (Gn 33:19, 20), ku mu hanana nsimu leyi afa ku li xikombiso xa lipfumelo dzra Yakobe, lani afa a profeta mayelanu ni ku hluliwa ka tiko dzra Kanana hi vatukulu vakwe, swanga hi loko kutani a swi hetisisile hi ku tizrisa lipanga ni xitlhamungwana. (vona AMORREU.) A pfindla dzra Yosefa ledzri phindiwiki kabidzri afa dzri patsra swiyenge swibidzri leswi nyikiwiki vana va Efrayimi ni va Manasi swa tiko ledzri hluliwiki.

Perspicaz vol-3 p. 750 § 12

Masiku Ya Wugamu

Wuprofeta Lebyi Yakobe A Byi Hlayiki Na Ali Kusuhi Ni Ku Fa. Loko Yakobe a hlaye leswi ka vanakwe: ‘Hlengeletanani, akuva ndzri ta n’wi byela leswi taka n’wi humelela masikwini lama taka’, afa a vulavula hi nkama lowu mazritu yakwe a ma ta sungula ku hetiseka. (Gn 49:1) Na ka ha sale 200 wa malembe, Yehovha a byele Abramu (Abrahamu), kokwana wa Yakobe leswaku vatukulu vakwe afa va ta xanisiwa ku dzringana 400 wa malembe. (Gn 15:13) Xileswo, nkama lowu Yakobe a vulavuliki ha wone swanga ‘masiku lama taka’ a wu ta sungula ntsena loko ku khalute 400 wa malembe ya ku xanisiwa. (Akuva u dondzra leswi yengetelekiki mayelanu ni dzrima 49 ya Genesis, vona dzrungula dzri vulavulaka hi vana va Yakobe, ka mavito yavu hi ku kongoma.) Nakone a ku ta yimeliwa ku hetiseka ka wuprofeta lebyo a nkameni lowu taka, lebyi a byi ta patsra ‘Israyele wa Xikwembu Nkulukumba’ wa moya.​—Ga 6:16; Ro 9:6.

Sentinela 01/06/2007 p. 28 § 10

Swiduwhati I Tovoko Ku Lavampshwa

Swiduwhati swi nga va kuntxetelo lowunene ni le ka vagandzreli kulobye. Loko a duwhalile, Yosefa n’wana Yakobe a hambe xiyentxo xa lipfumelo lexi khumbiki vagandzreli vanyingi va Yehovha lava hanyiki ntsrhaku ka lifu dzrakwe. Yosefa afa a li ni 100 wa malembe loko a va ‘leleta mhaka ya mazrambu yakwe’, ka leswaku loko Vaisrayele hi wugamu va huma a Egipta, va fanela ku famba ni mazrambu yakwe. (Ba-Heberu 11:22; Genesis 50:25) Xileleto lexo xi nyike Vaisrayele dumbo ledzrikulu loko va xanisiwa hi malembe manyingi ntsrhaku ka lifu dzra Yosefa, na va tiyiseka leswaku afa va ta ntsrhuxiwa hakakunene.

Djulisisa Tindzralama Ta Moya

Sentinela 01/06/2004 p. 15 §§ 4-5

Va Tovokile Lava Dzrumisaka Xikwembu Nkulukumba

Na va nga se na nghena a tikweni ledzri dumbisiwiki, Vaisrayele va lixaka dzra Gadi va kombele mpfumelelo wa ku tsrhama mimbangwini leyi nga ni swakuda leswinene wuxeni bya Yordani. (Atinhlayo 32:1-5) Hi ku tsrhama ka mbangu lowo afa va ta kumana ni swikazratu leswikulu. A tinxaka leti tsrhamiki a mpeladambu afa ti ta sizreleliwa hi nambu wa Yordani​—lowu hi ntumbuluku afaka wu ta sivela leswaku masotxha ya valala ma hlasela. (Yehošua 3:13-17) Nambitanu, mayelanu ni mimbangu ya le wuxeni, George Adam Smith ka A Geografia Histórica da Terra Santa, a hlaya leswi: “Mimbangu hinkwayu a yi yandlalekile nakone afa ku nge na txhumu lexi afaka xi sivela vhanu ku nhingena kone, swanga heswi a yi li hehla ka hula ledzrikulu dzra Arábia. Xileswo afa va li khombyeni dzra ku hlaseliwa hi vafambafambi lava nga ni ndlala, lani van’wana vavu afaka va ya lembe ni lembe va ya teka swakuda.”

Xana nxaniso lowu phikelelaka ka lixaka dzra Gadi wu va bindzrele hi ndlela yini? Loko ku khalute madzana ya malembe, kokwana wavu Yakobe lwa afaka a li ku suhi ni ku fa a profete a ku: ‘Gadi, a khandzra dzri ta mu wela henhla, yene, a ta dzri wela henhla hi le ntsrhaku.’ (Genesis 49:19) Loko u dondzra mazritu lawa hi khambi dzra ku sungula, ma hetana ntamu. Kambe nakunene, afa a ma byela Vagadi leswaku va tilwela loko va hlaseliwa. Yakobe a va tiyisekisile leswaku loko va yentxa tano, a nyazri a yi ta tlhela hi muhloti wa yone, kutani Vagadi va va hlongolisa hinkwavu.

Perspicaz vol-1 p. 339 § 6

Benjamim

Na a li kusuhi ni ku fa, Yakobe a profete hi wuswikoti bya ku lwa bya lixaka dzra Benjamim. Ka wuprofeta lebyo a hlaye leswi hi n’wanakwe lwa zrandzrekaka: ‘A hava ledzri tlhetlhevulaka: a mixweni a da leswi a khomiki swone, a madambyeni a yava xisangwana.’ (Gn 49:27) A va lixaka dzra Benjamim afa va hlawulekile hi wuswikoti byavu bya ku tizrisa xibalakatsra. Nambi hi voko dzra xinene kumbe dzra ximatsri loko va za va txopa afa va nga phukwi ‘afa va tlhava ni nsinsi’. (Abaṭ 20:16; 1Mk 12:2) Mutsremi Ehudi lwa nga ni ximatsri, mudlayi wa Hosi leyi nga ni nsele Eglomu, afa ali wa lixaka dzra Benjamim. (Abaṭ 3:15-21) Swi nga yentxeka ku ve ‘mixo’ wa ku fuma ka Israyele lani lixaka dzra Benjamim, nambi leswi ku nga ‘lixaka ledzritsrongo’, ku humiki Sawulu hosi ya ku sungula ya Israyele, n’wana Kixi, lwa kombisiki wunhenha byakwe hi ku lwa ni vafilista. (1Sa 9:15-17, 21) Hi lani ku fanaka, a ‘madambyeni’, loko ku vulavuliwa hi tiko dzra Israyele, ka lixaka dzra Benjamim ku ve ni hosi ya xisati ku nga Ester ni holobyenkulu ku nga Mordekai, lava va tizriki kuva va huluxa Vaisrayele ka ku dlayeteliwa hi wuhosi bya Persia.​—Est 2:5-7.

22-28 KA JUNYU

WUKOSI BYI NGA BIBELENI | EKSODA 1-3

“Ni Ta Va Leswi Ni Taka Hlawula Ku Va Swone”

Sentinela 15/03/2013 p. 25 § 4

Kombisa Xihluwa Ka Vito Ledzrikulu Dzra Yehovha

Dondzra Eksoda 3:10-15. Loko Moxe ali ni 80 wa malembe, Xikwembu Nkulukumba a mu nyike xileleto xa lisima a ku: ‘U ya humexa vhanu vanga, a vana va Israyele, a Egipta.’ Moxe a yangule hi xitxhavu a hamba xivutiso lexi nga ni lisima swinene. A vutise a ku: ‘U mani vito dzraku?’ Leswi vhanu va Xikwembu Nkulukumba a va ni nkama wa ku leha na va tiva vito dzrakwe, hayini Moxe a hambe xivutiso lexi? Afa a djula ku tiva swinyingi mayelanu ni wumhunu bya n’winyi wa vito dzrodzro​—ku nga leswi afaka swi ta mu pfuna ku kholwisa vhanu va Xikwembu Nkulukumba leswaku hakakunene afa a ta va ntsrhunxa. Ku vilela ka Moxe a ku twala hikusa Vaisrayele a va ni malembe mayingi va li swikazrawa. Swi nga yentxeka a va ta tivutisa loko hakakunene Xikwembu Nkulukumba wa vakokwana wavu afa a ta swi kota ku va ntsrhunxa. Leswo swa twala hikusa Vaisrayele vambeni afa va sungule ku gandzrela swikwembu swa le Egipta!​—Ezk 20:7, 8.

O Reino de Deus já Governa! Bokisi p. 43

NTLHAMUXELO WA VITO DZRA XIKWEMBU NKULUKUMBA

VITO ledzri liki Yehovha dzri pfa ka zritu dzra xiheberu ledzri tlhamuxelaka “ku va”. Swidondzri swimbeni swi kombisa leswaku zritu ledzri dzri kombisa leswaku manyana a yentxe xa kukazri kumbe leswaku mhunu wa ku kazri a yentxe leswi zritu ledzri tlhamuxelaka swone. Xileswo vhanu vanyingi va twisisa leswaku vito dzra Xikwembu Nkulukumba dzri tlhamuxela leswaku yene ‘a yentxa leswaku swi va kone’. Ntlhamuxelo lowu wu fanela Yehovha swanga muvumbi. Yene a yentxe wuyako hinkwabyu ni swivumbiwa hinkwaswu leswi tlhazrihiki nakone a ya mahlweni a yentxa leswaku ku zrandzra kwakwe ni nkongometo wakwe swi hetiseka.

Kutani ke, hi fanela ku yi twisisa hi ndlela yini nhlamulu leyi Yehovha a yi nyikiki Moxe ka Eksoda 3:13, 14? Moxe a vutise a ku: “A hi nge ni ya ka va Israyele ni ku ka vone: ‘Xikwembu Nkulukumba wa vatatana venu a ni zrume ku n’wine’, kutani vone va ku ku mine, ‘I mani vito dzrakwe?’ Ni ta kuyini mine xana?” Yehovha a yangula a ku: “Ni ta va leswi ni taka hlawula ku va swone.’’

Xiya leswaku Moxe afa a nga kombeli kuva Yehovha a hlaya vito dzrakwe, hikusa anha Moxe kun’we ni Vaisrayele va dzri tiva hahombe vito dzra Xikwembu Nkulukumba. Moxe afa a djula leswaku Yehovha a paluxa txhumu lowu a wu ta tiyisa lipfumelo dzravu mayelanu ni leswaku i Xikwembu xa matsrhamela muni, ku nga txhumu lowu afaka wu ta kombisiwa ka tlhamuxelo wa vito dzrakwe. Xileswo, hi ku hlaya leswaku “Ni Ta Va Leswi Ni Taka Hlawula Ku Va Swone’’, Yehovha a kombekise ntxhumu wumbeni wa ku hlamalisa mayelanu ni tsrhamela dzrakwe. A kombise leswaku ka xiyimu xin’wana ni xin’wana a va lexi vilelekaka akuva a hetisisa nkongometo wakwe. Hi xikombiso loko a hanyisana ni va Israyele Yehovha ave muhuluxi, mubeki wa nawu, muwundli ni swimbeni. Xileswo Yehovha habyakwe a hlawule ku va leswi afaka swi vileleka akuva a hetisisa swidumbiso swakwe ka vhanu vakwe. Kambe a ntlhamuxelo wa vito dzra Yehovha a wu gameli ntsena ka ku va yene a va leswi a hlawulaka ku va swone. Swi patsra ni ku va a yentxa leswaku a ntumbuluku wakwe wu hetisisa nkongometo wakwe.

Despertai! 08/04/2004 p. 6 § 5

Xana Moxe A Ve Kone Hakunene?

Xana swa twala ku pfumela leswaku n’wana wa le wuhosini a sizrelele xibebana lexi? Ina, swa twala hikusa hi ku ya hi wukhongoti bya Vaegipta, swiyentxo swa wunene swa ku fana ni leswi a swi pfulela mhunu mukhandlu wa ku nhingena tilweni. Mutivi wa wuyembuli, Joyce Tyldesley, a vulavula hi ku wundliwa ka mhunu hi lava va nga liki vapswele vakwe. A hlaye leswi: “Vavasati va Vaegipta afa va dzringana ni vavanuna. Hi nawu afa va ni timfanelo tin’we ni ka swa timali, kutani . . . vavasati na vone afa va ta wundla vana lava va ngeke vavu.” Buku dzrimbeni dzra khale ledzri vulavulaka hi ku wundla n’wana lwa ngeke waku dzri vulavula hi wansati wa Muegipta lwa tekiki malandzra yakwe ma va vanakwe. Loko dzri vulavula hi ku tholiwa ka mamana Moxe, Dicionário Bíblico Anchor, dzri li: “Ku hakeliwa ka mamana wa Moxe wa ku mu pswala leswaku a mu nyan’wisa . . . ku hi dzrimuxa lulamiselo ledzri fanaka ni ledzri afaka dzri tizrisiwa Mesopotâmia.”

Sentinela 15/03/2004 p. 24 § 4

Nkatsrakanyu Wa Buku Dzra Eksoda

3:1—Xana Yetro afa ali muprista wa muxaka muni? A nkameni wa vamulumuzana nhloko ya ndangu afa a li muprista a ndangwini wakwe. Swi tikomba ingiki Yetro afa a li muzrangeli tlhelo mulumuzana a makazri ka vamidiyana. Leswi vamidiyana afa va li vatukulu va Abrahamu hi Ketura, kumbexana afa va byi tiva wugandzreli bya Yehovha.​—Genesis 25:1, 2.

29 KA JUNYU–5 KA JULHU

WUKOSI BYI NGA BIBELENI | EKSODA 4-5

“Ni Ta Va Na Wene Loko U Vulavula”

Sentinela 15/10/2010 p. 13 § 5

Xana Yehovha A Ku Vonisa Kuyini Ku Tiyimelela?

“A ni faneleki.” U nga titwa na u nga faneleki ku va muzrezri wa madzrungula lamenene. Man’we ya malandzra ya Yehovha ya ku dumbeka a minkameni ya Bibele ma titwe na ma nga faneleki ku yamukela swiyavelo swi pfaka hi ka Yehovha. Mun’we ka vone a ve Moxe. Loko Yehovha a mu nyike xiyavelo xa kukazri Moxe a te: ‘Yo! We Hosi, a ndzri mhunu wa ku kota ku vulavula swinene, nambi ka ku va tolo, ni tolweni, nambi ka ku va laha u sunguliki ku vulavula ni nadzra waku; hikusa ndzri wa nomu wa ku bindzra, ni lidzrimi lo la ku bindzra.’ Nambileswi Yehovha a mu tiyisiki, Moxe a te: ‘Yo! We Hosi, ndzra ku khongota, zruma hi voko dzra lwe u taka mu zruma.’ (Eks 4:10-13) Xana Yehovha a te yini?

Sentinela 15/04/2014 p. 9 §§ 5-6

Xana Wa Mu Vona ‘Lwa Nga Voniwikiki’?

Na Moxe a nga si na tlhelela Egipta, Nkulukumba a mu dondzrise ndondzro ya lisima, leyi ntsrhakunyana Moxe a vulavuliki ha yone ka buku dzra Yob: ‘A ku txhava hosi hi byo wutlhazri.’ (Yb 28:28) Kuva a pfuna Moxe ku hlula ku txhava kwakwe kutani a kombisa wutlhazri, Yehovha a kombise ku hambana loku ku nga kone xikazri ka mhunu ni Xikwembu Nkulukumba. A vutise leswi: ‘I mani lwa nga hamba nomu wa mhunu? Kumbe i mani lwa nga hamba mbheveve, kumbe lwe wa ku fa tindleve, kumbe lwe wa ku vona, kumbe lwe wa ku fa mahlu? A hi mine Yehovha xana?’​—Eks 4:11.

A ve yini ndondzro? Moxe afa a nga fanelanga ku txhava. Afa a zrumiwe hi Yehovha, lweyi afaka a ta Yentxela Moxe hinkwaswu leswi vilelekaka kuva a tlhasisa dzrungula dzra Yehovha ka Faro. Handle ka leswo Faro afa a nga li wa ntxhumu ka Yehovha. Phela ledzri afa a nge khambi dzra ku sungula na malandzra ya Yehovha ma li khombyeni hansi ka mfumu wa Egipta. Kumbexana Moxe a pimise hi ndlela leyi Yehovha a sizreleliki Abrahamu na Yosefa ha yone. Nakone swi nga yentxeka a pimise ni hi ndlela leyi yene habyakwe a pfuniwiki hi Yehovha. (Gn 12:17-19; 41:14, 39-41; Eks 1:22–2:10) Hi ku dumba Yehovha, ‘Lwa nga voniwikiki’, Moxe hi xixixi a ye ka Faro kutani a mu byela leswi Yehovha a mu zrumiki ku ya hlaya swone.

Sentinela 15/10/2010 p. 14 § 1

Xana Yehovha A Ku Vonisa Kuyini Ku Tiyimelela?

Yehovha a nga mu tsrikanga Moxe leswaku a nga ha hetisisi xiyavelo xakwe. Nambitanu, Yehovha a zrume Aroni kuva a va mu pfunisi wakwe. (Eks 4:14-17) Tlhantakubidzri, ka malembe lama landzreliki, Yehovha a seketele Moxe nakone a mu nyike hinkwaswu leswi afaka swi djuleka akuva a kota ku hetisisa xiyavelo lexi Xikwembu Nkulukumba a mu nyikiki xone. Ni namunlha u nga tiyiseka leswaku Yehovha a ta susumetela vamakwezru lava nga ni mfambu kuva va ku pfuna ku yentxa ntizro waku wa nsimu. Henhla ka leswo, Zrito dzra Xikwembu Nkulukumba dzra hi tiyisekisa leswaku Yehovha a ta yentxa hi fanelekela ntizro lowu a hi leletiki leswaku hi wu yentxa.​—2Ko 3:5; vona bokisi ledzri liki “Malembe Yo Tsakisa Swinene eVuton’wini Bya Mina.”

Djulisisa Tindzralama Ta Moya

Sentinela 15/03/2004 p. 28 § 4

Swivutiso Swa Vadondzri

Mazritu ya Zipora lama liki ‘u nuna wa ngati, wene, ku mine’ a ma tolovelekanga. Xana ma kombisa yini ha yene? Loko a hetisisa swivileleko swa ntwananu wa ku soka, Zipora a pfumele leswaku a hambe ntwananu na Yehovha. Xipfumelelanu xa Nawu lexi ntsrhaku xi hambiwiki ni Vaisrayele xi kombise leswaku Yehovha afa a nga ha voniwi swanga nuna lwe mun’wana swanga nsati. (Yeremiya 31:32) Hileswo ke, loko a hlaya leswaku Yehovha (hi ku tizrisa xizrun’wa xakwe) i ‘nuna wa ngati’, afa swi tikomba na Zipora a kombisa ku tibeka hansi kwakwe ka swivileleko swa xipfumelelanu lexo. Afa swi fana ni loko a pfumela ku va nsati wa Yehovha Xikwembu ka xipfumelelanu xa ku soka. Xileswo, hikola ka ku tiyimisela ku yingiseta xileleto xa Xikwembu Nkulukumba, wutomi bya n’wanakwe afa byi nga ha li khombyeni.

Perspicaz vol-2 p. 500 § 5

Yehovha

Ku ‘tiva’, a swi hlayi ku tiva ntxhumu kumbe mhunu. Xiphunta Nabal afa a dzri tiva vito dzra Davhida kambe a vutise a ku: ‘I mani Davhida xana?’ na a djula ku hlaya leswaku: ‘o va wa yini Davhida wakone?’ (1Sa 25:9-11; dzringanisa ni 2Sa 8:13.) Kutani hi lani ku fanaka Faro a hlayi leswi ku Moxe: ‘I mani Yehovha, akuva ndzri yingiseta zritu dzrakwe, ndzri tsrika Israyele a famba? A ndzri mu tivi Yehovha; ndzri nga tsriki Israyele a famba.’ (Eks 5:1, 2) Hi mazritu lawa, Faro afa a djula ku hlaya leswaku afa a nga voni Yehovha swanga Xikwembu xa ntiyiso kumbe lwa nga ni wulawuli henhla ka hosi ya Egipta ni timhaka tavu, nambi ku va ni ntamu wa ku hetisisa ku zrandzra kwakwe hi lani Moxe na Aroni va hlayiki hakone. Kambe swoswi, Faro, Vaegipta kun’we ni Vaisrayele afa va ta tiva ntlhamuxelo wa vito ledzro, ni lweyi dzri yimelaka yene. Hi lani Moxe a vonisiwiki hakone hi Yehovha, a swi ta yentxa leswaku nkongometo wa Yehovha hi Vaisrayele wu hetiseka, a va ntsrhunxa, a va nyika Tiko Dzra Xidumbiso, kutani a hetisisa xipfumelelanu a xi yentxeliki vakokwana vavu. Hilani Yehovha a hlayiki hakone: ‘N’wi ta swi tiva leswaku ndzri Yehovha Xikwembu Nkulukumba wenu.’​—Eks 6:4-8; vona TODO-PODEROSO.