Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru

3-9 KA JANERU

WUKOSI BYI NGA BIBELENI | ABAṬEMI 15-16

“Ku Wonga I Xiyentxo Xa Ku Biha Ngopfu!”

Sentinela 15/04/2012 pp. 8-9 § 4

Wukanganyisi I Xiyenge Xa Xikombiso Xa Masiku Ya Wugamu!

⁴ Xikombiso xa ku sungula i xa Dalila lweyi a a li ni wukanganyisi, nakone a a zrandzrana na muyavanyisi Samisoni. Samisoni a a djula ku lwa ni Vafilista na a lwela vhanu va Xikwembu Nkulukumba. Swi nga yentxeka na tihosi leta ntlhanu ta Vafilista a ti swi tiva leswaku Dalila a a nga mu zrandzri hi mbilu hinkwayu Samisoni. Tihosi leti ti dumbise Dalila leswaku ti ta mu nyika mali yinyingi loko a gungula leswaku Samisoni a a wu kuma kwini ntamu lowukulu akuva ti ta kota ku mu dlaya. Leswi Dalila a a li ni makwanga, a pfumelile ku wonga Samisoni, kambe minzamu yake ya ku gungula lomu ntamu wake wu pfaka kone yi hlulekile ku dzringana makhambi mazrazru. Kutani a tame ‘a mu sindzrisa masiku hinkwawu hi mazritu yake, a mu tinga’. Hi wugamu, ‘a hika dzra [Samisoni] dzri kazrala, ni ku yisa ku feni’. Kutani a mu byele leswaku misisi yake a yi si tsrhama yi tsremiwa nakone loko yo tsremiwa a ta heleliwa hi ntamu. Leswi Dalila kutani a a tiva mhaka leyi, a vitane mhunu wa kukazri akuva a ta ta tsrema misisi ya Samisoni loko a ha yetlelile a matsrolweni yake, kutani a mu nyiketa ka valala vake akuva va yentxa xin’wana ni xin’wana lexi va xi djulaka ha yene. (Abaṭ 16:4, 5, 15-21) Nakunene leswi va swi yentxiki a swi bihe ngopfu! Leswi Dalila a a ni makwanga a wonge wanuna lweyi a a mu zrandzra.

Sentinela 15/01/2005 p. 27 § 5

Nkatsrakanyu Wa Buku Dzra Abaṭemi

14:16, 17; 16:16. Ku sindzrisa mhunu mumbeni hi ku mu dzrilela ni ku mu tinga swi nga ha hona wuxaka.—Amaproverbia 19:13; 21:19.

Sentinela 15/04/2012 pp. 11-12 §§ 15-16

Wukanganyisi I Xiyenge Xa Xikombiso Xa Masiku Ya Wugamu!

¹⁵ Vhanu lava txhatiki va nga tsrhama na va dumbekile ka vakatavu hi ndlela yini? Zritu dzra Xikwembu Nkulukumba dzri li: ‘Tsrhavela nsati [kumbe nuna] wa wumpswha byaku’ nakone ‘hanya swinene ni nsati [kumbe nuna] lwe u mu zrandzraka.’ (Pr 5:18; Ekl 9:9) Loko vatekani va ya va kula, va fanela ku yentxa hinkwaswu leswi va nga swi kotaka akuva wuxaka byavu byi tama byi tiya, hi tlhelo dzra nyama ni mintlhaveko. Leswi hlayaka leswaku va fanela ku kombisana lizrandzru va zron’weka hi swivileleko swavu nakone va heta nkama na va li xikan’we. Va fanela ku tikazratela ku sizrelela wukati byavu ni wuxaka byavu na Yehovha. Akuva leswo swi koteka, va fanela ku dondzra Bibele xikan’we, va famba xikan’we sin’wini nkama ni nkama nakone va khongota xikan’we va kombela matovoko ya Yehovha.

TSRHAMA NA U DUMBEKILE KA YEHOVHA

¹⁶ Ku ni swizro swa bandla leswi samiki swi hamba swidoho leswikulu kutani ‘swi soliwe ngopfu, akuva swi tlhela swi va vatomi a ku pfumeleni’. (Tito 1:13) Kambe swimbeni swi ve swi susiwa ni le bandleni hi kola ka mahanyela ya swone. Nambitanu, xilayu xi pfune swizro swa bandla leswi ‘dondzisiwiki’ akuva swi lulamisa wuxaka bya swone na Yehovha. (Hb 12:11) Hi nga ku yini loko hi li ni xaka kumbe munghanu lwenkulu lweyi a susiwiki bandleni? Leswi u taka swi yentxa a mhakeni leyi swi ta kombisa leswaku u dumbekile ka mhunu lweyo kumbe ka Xikwembu Nkulukumba. Yehovha awa hi lavisa ku vona loko hi ta yingiseta xileleto xake lexi hlayaka leswaku a hi fanelanga kuva hi titlhanganisa ni mhunu wini ni wini lweyi a susiwiki bandleni.—Dondzra 1 Ba-le-Korinte 5:11-13.

Tindzralama Ta Moya

Sentinela 15/03/2005 p. 27 § 6

Samisoni A Nyikiwe Ntamu Wa Ku Hlula Hi Yehovha!

Samisoni a a tiyimisele ku hetisisa nkongometo wake wa ku lwa ni Vafilista. A tsrhame ndlwini ya ngwhavana leyi a Gaza hi nkongometo wa ku lwa ni valala va Xikwembu Nkulukumba. Samisoni a a ya djula mbangu wa ku yetlela a tikweni dzra valala kutani a ya kuma mbangu a ndlwini ya ngwhavana. Samisoni a nga yanga hi nkongometo wa ku ya yetlela ni wansati lwiyani wa ngwhavana. A makazri ka wusiku a humile a kaya ka wansati lweyo, a khoma swipfalu swa nyangwa ni timhandzri tibidzri ta le matlhelweni a swi gula a swi yisa henhla ka nhava leyi nga kusuhi ni Hebroni, lani a ku ni mpfhuka wa kolomu ka 60 kilometro. A swi kotile ku yentxa leswo hikusa a a nyonxeliwa hi Xikwembu Nkulukumba nakone a tlhele a mu nyika ntamu.—Abaṭemi 16:1-3.

10-16 KA JANERU

WUKOSI BYI NGA BIBELENI | ABAṬEMI 17-19

“Ku Kala Ku Yingiseta Milawu Ya Xikwembu Nkulukumba Swi Tisa Swikazratu”

Perspicaz vol-2 p. 369 § 7

Mika

1. Wanuna wa mu-Efrayimi. Mika a yivele mamana wake 1.100 wa mamuweda ya prata, hi ku yentxa leswo a tluli nawu wa wu 8 ka leyi ya 10 va nyikiwiki yone. (Eks 20:15) Loko a hlayile leswaku hi yene a nga teka a va a tlhelisa, mamana wake a te: ‘Hi voko dzranga, ndzri hlawulele Yehovha a mali leyo hi nkonta ya n’wananga, akuva ku ta yentxiwa ha yone a xithombe xa ku vatliwa, ni xithombe xa ku txhululiwa; hi leswo ke ndzri ta yi tlhelisela ku wene.’ Kutani mamana wake a teka 200 wa mamuweda ya prata a ma yisa ka muvatli lani a hambiki ‘xithombe xa ku vatliwa ni xithombe xa ku txhululiwa’, leswi hi wugamu swi yiki tsrhama kaya ka Mika. Mika, a a ni ‘yindlu ya swikwembu’, a ku tihambela a efode ni terafimi, kutani a beka mun’we wa vanake a va muprista wake. Nambi leswi xiyentxo lexi a xi tikomba ingiki xi hambeliwe ku gandzrela Yehovha, a xi nga faneleki, hikusa a xi lwisana ni nawu lowu a wu yilisa ku gandzrela swithombe. (Eks 20:4-6) Nakone a xi dzrela tabernakele dzra Yehovha, ni vaprista vake. (Abaṭ 17:1-6; Dt 12:1-14) Hi ku famba ka nkama, Mika a teke Yonatani, wa lixaka dzra Gerixoni, n’wana Moxe akuva a ta va muprista wake a kaya kwake. (Abaṭ 18:4, 30) Mika a titwe na a nyonxile hi xiyentxo lexo lakakuva a hlaya mazritu lama liki: ‘Swoswi ndzra swi tiva leswaku Yehovha a ta ndzri yentxa leswinene.’ (Abaṭ 17:7-13) Kambe, Yonatani a a nga li wa lixaka dzra Aroni nakone a a nga na mfanelo ya ku tizra swanga muprista. Hi ku yentxa leswo e tiyengetelela swidoho.—Tin 3:10.

Perspicaz vol-2 p. 369 § 9

Mika

Ntsrhakunyana ka leswo, Mika ni vavanuna van’wana va hlongolise vavanuna va lixaka dzra Dani. Loko va va kumile, vavanuna lavayani va lixaka dzra Dani va va vutisile leswaku ha yini va va hlongolisile, Mika a hlamule a ku: ‘Mi teki swikwembu nkulukumba swanga, leswi ndzri swi hambiki, ni muprista, mi famba, xana ku mine ku sali yini swoswi?’ Xileswo a vana va Dani va dumbise ku hlasela Mika loko a ha tama a va landzrelela ni ku va holovela. Loko Mika a vone leswaku vavanuna va Dani i vanyingi nakone va ni ntamu ku tlula vavanuna vake, a vone swi yampswa ku tlhela. (Abaṭ 18:22-26) Ntsrhaku ka leswo, vavanuna va Dani va hlasele ni ku hisa muti wa Layixi, va tiyakela kone doropa dzra Dani. Yonatani ni vana vake va ve vaprista va vana va lixaka dzra Dani, ‘ve ku tiyimisela xithombe lexi vatliwiki xa Mika, lexi a xi hambiki, minkama hinkwayu leyi a yindlu ya Xikwembu Nkulukumba [tabernakele] yi nga tsrhama le Xilo ha yone’.—Abaṭ 18:27-31.

Tindzralama Ta Moya

Sentinela 15/12/2015 p. 10 § 6

Bibele Ledzri Twisisekaka Hi Ku Nabyala

⁶ Namunhla ku ni wumboni byinyingi lebyi kombisaka leswaku hi fanela ku tizrisa vito dzra Yehovha. Bibele ledzri pfuxetiwiki dzra 2013 dzra Wundzruluteli Bya Misava Leyimpswha dzri tizrisa vito dzra Xikwembu Nkulukumba kolomu ka 7.216 wa makhambi, nakone ku yengeteleke 6 wa makhambi loko hi dzringanisa ni Bibele ledzri dzri humexiwiki hi 1984. Ku yengeteleka loku ku ve kone hi leswi vito dzra Xikwembu Nkulukumba dzri humelelaka ka matsralwa ya khale lama ha ku gunguliwaka ka lwandle ledzri fiki. Ka Bibele ledzri pfuxetiwiki (Tradução do Novo Mundo) ku yengeteleka loku ka vito dzra Xikwembu Nkulukumba ku kumeka ka 1 Samuel 2:25; 6:3; 10:26; 23:14, 16 ni Abaṭemi 19:18. Ka buku dzra Abaṭemi, dzri yengeteleke hi leswi ku hambiwiki wukambisisi ka matsralwa ya khale lama tsraliwiki hi voko ya Bibele.

17-23 KA JANERU

WUKOSI BYI NGA BIBELENI | ABAṬEMI 20-21

“Tama U Djula Mpfunu Wa Yehovha”

Sentinela 15/09/2011 p. 32 § 2

Xana U Nga Yetisela Finiyasi Loko U Kumana Ni Swikazratu Hi Ndlela Yini?

Ntsrhaku ka loko va pfinye ni ku dlaya nsati lwentsrongo wa Mulevhi hi vavanuna va Gibiya lava humaka ka lixaka dzra Benjamini, tinxaka hinkwatu ti tilulamiseli ku ya lwa ni lixaka dzra Benjamini. (Abaṭ 20:1-11) Ti khongotile ti kombela mpfunu wa Yehovha na ti nga si na ya ku lweni, kambe ti hluliwe kabidzri hi ndlela ya ku vavisa ngopfu. (Abaṭ 20:14-25) Xana a ti ta hlaya leswaku swikhongoto swa tone a swi nga pfuni ntxhumu? Xana Yehovha a a swi djula hakunene leswaku ti tidzrihisela?

Sentinela 15/01/2005 p. 27 § 7

Nkatsrakanyu Wa Buku Dzra Abaṭemi

20:17-48—Ha yini Yehovha a pfumeleli lixaka dzra Benjamini dzri hlula tinxaka letin’wana kabidzri, nambi leswi a lixaka dzra Benjamini a dzri fanela ku khatisiwa? Yehovha a dzringe ku tiyimisela ka tinxaka letin’wana akuva a susa wubihi a Israyele hi kuva a pfumelela leswaku tinxaka letin’wana ta ku dumbeka ti zranga ti hluliwa ngopfu a yimpini.

Sentinela 15/09/2011 p. 32 § 4

Xana U Nga Yetisela Finiyasi Loko U Kumana Ni Swikazratu Hi Ndlela Yini?

Hi nga dondzra yini ka mhaka leyi? Swikazratu swin’wana swi nga ha tama swi va kone bandleni nambi loko vakulu va yentxe minzamu hinkwayu nakone va kombele mpfunu ka Xikwembu Nkulukumba. Loko swi va hi ndlela leyo, a vakulu va fanela ku dzrimuka mazritu ya Yesu lama liki: “Yanani mahlweni mi kombela [kumbe mi khongota] kutani mi ta nyikiwa; yanani mahlweni mi djuletela, kutani mi ta swi kuma; yanani mahlweni mi gongondzra, kutani mi ta pfuleliwa.” (Luka 11:9, TNM) Nambiloko swikhongoto swa vakulu swi tikomba ingiki swi hlwela ku hlamuliwa, va nga tiyiseka leswaku Yehovha a ta swi hlamula hi nkama wa kone.

Tindzralama Ta Moya

Sentinela 01/05/2014 p. 11 §§ 4-6

A Wu Swi Tiva?

Xana Swibalakatsra A Swi Tizrisiwa Hi Ndlela Yini A Yimpini Nkameni Wa Khale?

Xibalakatsra hi lexi Davhida a dzri tizrisiki kuva a dlaya Goliyati lwe wa xihotlovila ha dzrone. Swi nga yentxeka na Davhida a dondzre ku xi tizrisa na a ha li djaha loko a li ku byiseni ka ntlhambi.—1 Samuel 17:40-50.

Mifoto ya swibalakatsra yi kumeka ka swifaniso swa ku vatliwa swa le Egipta ni swa le Asiriya a minkameni ya ku tsraliwa ka Bibele. A xi hambiwe hi xikhumba kumbe kapulana ledzri tsrindzriki ledzri a dzri hukiwa hi tingoti tibidzri. Akuva a kota ku txopa ha xone a mhunu a a fanela ku beka zribye ka xikhumba dzra ku dzringananyana ni laranja ledzri a dzri peza kolomu ka 250 wa magrama (250g). A a fanela ku ndzrulutela xibalakatsra kutani a tsrhiketela ngoti yin’we akuva zribye dzri kota ku famba hi ku tsrutsruma dzri kongoma lomu a djulaka leswaku dzri ya kone.

Vayembuli va Médio Oriente va kume mazribye manyingi lawa a ma tizrisiwa ka swibalakatsra a tiyimpini ta khale. Swi nga yentxeka na masotxha lama nga ni wuswikoti a ma txukumetela mazribye kolomu ka 160 ku ya ka 240 wa makilometro hi wora. Swidondzri a swi pfumelelani na yone mhaka ya leswaku a xibalakatsra a xi ni nghozi leyi fanaka ni wugubu kambe lexi tiyiki hi leswaku a xibalakatsra xa dlaya.—Abaṭemi 20:16.

24-30 KA JANERU

WUKOSI BYI NGA BIBELENI | RUTH 1-2

“Kombisa Lizrandzru Dzra Ku Dumbeka”

Sentinela 02/2016 p. 14 § 5

Yetisela Vanghanu Lavakulu Va Yehovha

⁵ A maxaka ya Ruti a ma tsrhama Mowabu. A swi ta koteka kuva a tlhelela kone nakone a va ta mu hlayisa. A a tiva vhanu, lidzrimi, ni ntumbuluku wa Mowabu. Nawomi a a nga ti swi kota ku yentxela Ruti mintxhumu leyi hinkwayu a Betlehema. Kambe lexi a xi vilelisa Nawomi hi leswaku a a nga ti swi kota ku kumela Ruti nuna kumbe muti. Kutani Nawomi a byele Ruti leswaku a a tlheleli ka likwavu a Mowabu. Hi lani hi dondzriki ha kone, Orpa ‘a tlheleli ka valikwavu ni le ka swikwembu swake’. (Ruth 1:9-15) Ruti a titekeli xiboho xa ku ka a nga tlheleli ka likwavu ni ka swikwembu swavu swa madzrimi.

Sentinela 02/2016 p. 14 § 6

Yetisela Vanghanu Lavakulu Va Yehovha

⁶ Swi tikomba ingiki Ruti a dondzre hi Yehovha ka nuna wake kumbe ka Nawomi. A dondzre leswaku Yehovha a nga fani ni swikwembu swa Vamowabu. Ruti a a zrandzra Yehovha nakone a a swi tiva leswaku a fanela ku mu gandzrela. Kutani Ruti a hambe xiboho xa wutlhazri. A byele Nawomi a ku ‘a tiko dzraku i tiko dzranga a Xikwembu Nkulukumba waku i Xikwembu Nkulukumba wanga’. (Ruth 1:16) Ha kutxeka loko hi yanakanyisisa hi ndlela leyi Ruti a a mu zrandzra ha yone Nawomi. Kambe lexi kutxanaka ngopfu i ndlela leyi Ruti a a zrandzra Yehovha ha yone. Leswi swi tlhele swi nyonxisa na Bowasi, lweyi hi ku famba ka nkama a kulungeliki Ruti hi leswi ‘a tiki ku ta tumbela a timpapeni’ ta Yehovha. (Dondzra Ruth 2:12.) Mazritu lawa Bowasi a ma tizrisiki ma nga hi dzrimuxa ndlela leyi a pfinyana dzri kumaka nsizrelelo hansi ka timpapa ta mpswele wa dzrone. (Ps 36:7; 91:1-4) Hi la ku fanaka, Yehovha a sizrelele Ruti hi ndlela ya lizrandzru ni ku tlhela a mu tovokisa hi kola ka lipfumelo dzrake. Ruti a nga tisolanga hi kola ka xiboho lexi a xi tekiki.

Tindzralama Ta Moya

Sentinela 01/03/2005 p. 27 § 2

Nkatsrakanyu Wa Buku Dzra Ruth

1:13, 21—Xana hi Yehovha lweyi a yentxiki leswaku Nawomi a twa ku vavisa ni ku tlhela a mu vangela makhombo? Im-him, nakone Nawomi a nga lumbetanga Xikwembu Nkulukumba ha ntxhumu. Kambe a a vona leswaku Yehovha a lwa na yene, loko a yanakanya hi mintxhumu hinkwayu leyi mu humeleliki. A a pfilunganyekile a nga swi twisisi leswaku ku yentxeka yini. Tlhantakubidzri, a nkameni wolowo ku va ni n’wana a swi tekiwa swanga tovoko ledzri pfaka ka Xikwembu Nkulukumba, hi hala tlhelo ku nga vi ni vana a swi tekiwa swanga xizruku. Leswi a a nge na vatukulu, ni leswi a feliwiki hi vana vake vabidzri va madjaha, Nawomi a nga ha va a vone xiyimu lexo swanga ku tsrongahatiwa ha Yehovha.

31 KA JANERU–6 KA FEVHERERU

WUKOSI BYI NGA BIBELENI | RUTH 3-4

“Tiyimiseli Ku Tama U Va Ni Mahanyela Lamanene”

Sentinela 01/10/2012 p. 22 § 5

“Wansati Lwenene”

A ku na ku ganaganeka ka leswaku ku vulavula ka Bowasi hi ndlela ya ku zrula ni hi mazritu lama txhavelelaka swi zrulise mbilu ya Ruti. A te: ‘N’wananga, a wu tovokisiwe hi Yehovha! A wunene lebyi u byi kombisiki swoswi, byi tlula bya ku sungula, leswi u nga landzrangiki vayisanyana, nambi ve va wukosi, nambi swi swisiwana.’ (Ruth 3:10) Mazritu lama liki ‘bya ku sungula’ ma kombetela ka loko Ruti a kombisi lizrandzru dzra ku dumbeka ka Nawomi hi ku famba na yene va tlhelela a Israyele akuva a ta ya mu hlayisa. Kasi mazritu lama liki ‘swoswi’ ma kombetela a nkameni lowu a va li xikan’we. Bowasi a a swi tiva leswaku wansati lwentsrongo wa ku fana na Ruti swi nga yentxeka leswaku inhaka a kume nuna a makazri ka vavanuna va tintanga take, ku nga li na mhaka leswaku va ganyile kumbe i swisiwana. A matsrhan’wini ya leswo, a a djula ku yentxa wunene ku nga li ka Nawomi ntsena kambe ni le ka nuna wa Nawomi lweyi a a file, akuva a yisa mahlweni xiloso xa nuna wake lweyi a fiki a tikweni dzra Mowabu. Kutani ha swi twisisa leswaku a mfanelo yake ya ku pfumala wutiyanakanyi yi yi khumbe swinene mbilu ya Bowasi.

Sentinela 01/10/2012 p. 23 § 1

“Wansati Lwenene”

Mawaku ndlela leyi swi mu nyonxisiki ha yone Ruti ku yanakanyisisa hi leswi Bowasi a swi hlayiki, leswaku a tiviwa swanga ‘wansati lwenene’! A swi ganaganekisi leswaku ku hiseka kwake ka ku djula ku tiva Yehovha ni ku mu tizrela swi yentxe leswaku a va ni ndhuma leyinene. Nakone a kombise wunene ni ntwela wusiwana ka Nawomi ni maxaka yake, hi ku swi zrandzra a titolovete ni tindlela ni swihena leswi nakunene a a nga swi tolovelanga. Loko hi yetisela lipfumelo dzra Ruti, hi ta tikazratela ku hlonipha van’wana kun’we ni ntumbuluku wavu. Loko hi yentxa leswo, na hine swi ta hi yentxa hi va ni ndhuma leyinene.

Sentinela 01/10/2012 p. 24 § 3

“Wansati Lwenene”

Bowasi a tekane na Ruti. Ha dondzra: ‘Yehovha a mu nyika ku va ni nyimba, a va a beleka n’wana wa wandzrisanyana.’ Vavasati va le Betlehema va tovokise Nawomi ni ku kulungela Ruti hi leswi a nga wa lisima ka Nawomi ku tlula vana va 7. Hi dondzra leswaku hi ku famba ka nkama Ruti a ve kokwana wa Davhida Hosi leyikulu. (Ruth 4:11-22) Hi la ku fanaka, Davhida a ve kokwana wa Yesu kriste.—Matewu 1:1.

Tindzralama Ta Moya

Sentinela 01/03/2005 p. 29 § 3

Nkatsrakanyu Wa Buku Dzra Ruth

4:6—Xana mutizruli a a ta hona pfindla dzrake loko a dzri tizrula hi ndlela yini? Xa ku sungula, loko mhunu lwa nga wusiwanini a xavisa pfindla dzrake dzra nsimu, mutizruli a a fanela ku humesa mali ya ku xava nsimu hi mali leyi bekiwiki hi ku landzra malembe lama saliki akuva ku tlhasa Jubilewu. (Levitika 25:25-27) Leswi a swi ta yentxa leswaku nsimu yi xaviwa hi mali ya le hansi. Tlhantakubidzri, loko Ruti a o va ni n’wana wa djaha, nsimu ya kone a yi ta va pfindla dzra djaha ledzro, ku nga li ya n’wana wa maxaka ya le kusuhi ya mutizruli.

7-13 KA FEVHERERU

WUKOSI BYI NGA BIBELENI | 1 SAMUEL 1-2

“Pfula Mbilu Yaku Hi Ku Khongota Ka Yehovha”

Imite p. 55 § 12

A Txhulule Mbilu Yake Ka Xikwembu Nkulukumba Hi Xikhongoto

¹² Xileswo, Ana a bekele xikombiso lexinene ka malandzra hinkwawu ya Xikwembu Nkulukumba a mhakeni ya ku khongota. Yehovha hi moya wa ku zrula a kombela vhanu leswaku va vulavula na yene na va ntsrhunxekile, na va nga ganaganeki, va mu byela leswi va kazrataka ku fana ni n’wana lwa dumbaka mupswali wake lwa mu zrandzraka. (Dondzra Amapsalma 62:8; 1 Ba-le-Thesalonika 5:17.) Mupostola Petro a huhuteliwe ku hlaya mazritu lama kutxanaka loko a vulavula hi ku khongota ka Yehovha a te: ‘N’wi txukumetela ku hlatiyela kwenu hinkwaku a henhla kwake, hikuva a zron’wa ha n’wine.’—1 Pt 5:7.

Sentinela 15/03/2007 p. 16 § 4

Xana Ana A Ku Kumise Kuyini Ku zrula?

Hi nga dondzra yini ka hinkwaswu leswi? Loko hi khongota ka Yehovha mayelanu ni swikazratu swezru, hi nga mu byela ndlela leyi hi titwaka ha yone kutani hi kombela mpfunu lowu hi wu vilelaka hi mbilu hinkwayu. Loko hi nge he na xa ku xi yentxa akuva hi lulamisa xikazratu lexo, hi fanela ku swi tsrhikela mavokweni ya Yehovha. A ku na ndlela yin’wana leyi hi nga yi landzrelaka.—Amaproverbia 3:5, 6.

Tindzralama Ta Moya

Sentinela 15/03/2005 p. 21 § 5

Nkatsrakanyu Wa Buku Dzra Samuel Wa Ku Sungula

2:10—Ha yini Ana ka xikhongoto xake a kombele leswaku Yehovha a ‘nyika ntamu hosi yake’ na kula a ku nge na hosi ya la misaveni a makazri ka va-Israyele? Mhaka ya leswaku va-Israyele a va ta va ni hosi ya la misaveni yi hlayiwe khale a Nawini wa Moxe. (Deuteronoma 17:14-18) Ka wuprofeta lebyi Yakobe a byi hlayiki loko a li kusuhi ni ku fa, a te: ‘A nhonga ya wuhosi [xikombiso xa wulawuli bya wuhosi] yi nga ka yi nga suki ku Yuda.’ (Genesis 49:10) Ku tlula kolanu, mayelanu na Sara—kokwana wa xisati wa va-Israyele—Yehovha a te: ‘A tihosi ta matiko ti ta huma ku yene.’ (Genesis 17:16) Xileswo Ana a a khongota hi Hosi ya nkameni lowu taka.

14-20 KA FEVHERERU

WUKOSI BYI NGA BIBELENI | 1 SAMUEL 3-5

“Yehovha Awa Yanakanyelana”

Sentinela 09/2018 p. 24 § 3

Wa Ntamu Hinkwawu Kambe Awa Yanakanyela

³ Samuwele a sungule ku ‘tizrela Yehovha’ a tabernakeleni na a ha li mutsrongo. (1Sa 3:1) Siku dzrimbeni loko Samuwele a ha yetlelile ku humelele ntxhumu loku a wu nga tolovelekanga. (Dondzra 1 Samuel 3:2-10.) A twe zritu dzri mu vitana hi vito. Hi ku yanakanya leswaku a vitaniwa hi muprista lwenkulu Eli, Samuwele a tsrutsrume a ya ka Eli a ku: ‘Hi mi lwe, hikusa u ndzri vitanile.’ Eli a mu byele leswaku a nga mu vitananga. Loko dzri tlhele dzri phindha zritu, Eli a swi xiyile leswaku Samuwele a vitaniwa hi Xikwembu Nkulukumba. Xileswo a byele Samuwele ndlela leyi a a fanela ku yangula ha yone nakone a yingisetile. Ha yini Yehovha a nga humelelanga ka Samuwele hi ku tizrisa ntsrumi? A Bibele a dzri hi byeli hi ku kongoma, kambe xiyentxakalo lexi xi kombisa leswaku Yehovha a a zron’weka ha Samuwele. Hi swi tivisa kuyini?

Sentinela 09/2018 p. 24 § 4

Wa Ntamu Hinkwawu Kambe Awa Yanakanyela

⁴ Dondzra 1 Samuel 3:11-18. Nawu wa Yehovha a wu dondzrisa vana leswaku va hlonipha swiduhwati, ngopfu leswi nga ni wulawuli. (Eks 22:28; Lv 19:32) Hi mahlu ya miyanakanyu xana wa mu vona Samuwele a ya ka Eli ni mixo kutani a mu byela dzrungula dzra wuyavanyisi bya Xikwembu Nkulukumba hi xixixi? Nakunene dzrungula ledzri dzri hi byela leswaku Samuwele ‘a a pfa a txhava ku byela Eli xivoniso’. Nambiswilitanu Yehovha a swi beki livaleni ka Eli leswaku hi yene a a vitana Samuwele. Xileswo Eli a byele Samuwele leswaku a hlaya leswi Xikwembu Nkulukumba a mu zrumiki swone. A te: ‘U nga ni fihleli ntxhumu.’ Samuwele ‘a mu byele hinkwaswu’ leswi Xikwembu Nkulukumba a mu leletiki swone.

Tindzralama Ta Moya

Sentinela 15/03/2005 p. 21 § 6

Nkatsrakanyu Wa Buku Dzra Samuel Wa Ku Sungula

3:3—Xana Samuwele a a yetlela mbangwini wa ku Xwengisisa? Im-him, a a nga yetleli kone. Samuwele a a li Mulevhi wa ndangu wa Vakheyati lava a va nga li vaprista. (1 Makronika 6:33-38) Hi kola ka leswo a a nga pfumeleliwi ku ‘nhingena ku lavisa mintxhumu leya ku hlawuleka’. (Atinhlayo 4:17-20) Xiyenge xa ku hlawuleka lexi Samuwele a a pfumeleliwa ku nhingena ka xone a ku li mbangu lowu a ku ni tabernakele. Swi nga yentxeka a ku li lomu a a yetlela kone. Swi tikomba na naye Eli a a yetlela ka tlhelo dzrin’wana. Xiga lexi liki ‘lomu ku tsrhamaka areka dzra Xikwembu Nkulukumba’ xi tlhamuxela lomu tabernakele a dzri li kone.

21-27 KA FEVHERERU

WUKOSI BYI NGA BIBELENI | 1 SAMUEL 6-8

“I Mani Hosi Yaku?”

Perspicaz vol-2 p. 813 § 1

Mfumu Wa Xikwembu Nkulukumba

Ku Kombeliwa Ka Hosi Ya La Misaveni. Kolomu ka 400 wa malembe ku sukela ka loko va hume a Egipta, ni ku tlula 800 wa malembe ntsrhaku ka loko Xikwembu Nkulukumba a hambe xipfumelelanu na Abrahamu, va-Israyele va kombele leswaku va va ni hosi ya la misaveni akuva yi va kongomisa, ku fana ni leswi matiko man’wana a ma ni tihosi ta la misaveni. Xikombelo xavu a xi kombisa leswaku a va nga ha swi djuli ku kongomisiwa hi Yehovha. (1Sa 8:4-8) I ntiyiso leswaku a tiko a dzri yimela leswaku Xikwembu Nkulukumba a simeka hosi, hi ku ya hi leswi a dumbisiki Abrahamu na Yakobe hi lani hi dondzriki ha kone. A va ni swivangelo leswi yengetelekiki swa ku dumba ka wuprofeta bya Yakobe, leswi a swi hlayiki mayelanu na Yuda loko a li kusuhi ni ku fa (Gn 49:8-10), ka mazritu lawa Yehovha a ma byeliki va-Israyele loko va huma a Egipta (Eks 19:3-6), ka xipfumelelanu xa Nawu (Dt 17:14, 15), ni le ka xiyenge xa mazritu lawa Xikwembu Nkulukumba a huhuteliki muprofeta Balama leswaku a ma hlaya (Tin 24:2-7, 17). Ana, mamana wa Samuwele, wansati wa ku dumbeka, a ku kombisile ku dumba loko ka xikhongoto lexi a xi hambiki. (1Sa 2:7-10) Nambitanu, Yehovha a nga xi paluxanga hi ku helela ‘xihundla xake xa ku xwenga’ mayelanu ni Mfumu, a nga paluxanga leswaku Mfumu lowo a wu ta simekiwa dzrini, hosi ya kone a ku ta va mani ni leswaku i vamani lava a va ta patsreka, kumbe a wu ta va la misaveni kumbe a matilweni. Xileswo a swi nga fanelanga kuva a tiko dzri kombela hosi la misaveni hi nkama wolowo.

Sentinela 01/01/2011 p. 27 § 1

A Tiyiselile Nambileswi A A Pfa A Hetiwa Ntamu

Xiya ndlela leyi Yehovha a yanguliki ha yone loko Samuwele a mu byela mhaka leyi hi xikhongoto: ‘Yingela zritu dzra tiko a timhakeni hinkwatu leti va ku byelaka tone; hikusa a va yali wene, va yala mine, akuva ndzri nga ha va fumi.’ Mazritu lawa ma mu txhaveleli ngopfu Samuwele, kambe ka Xikwembu Nkulukumba wa ntamu hinkwawu a ma li xizruku lexikulu! Yehovha a byele muprofeta wake akuva a dzrimuxa va-Israyele hi makhombo lawa a va ta kumana na wone hikuva va fumiwa hi mhunu wa nyama. Loko Samuwele a va dzrimuxa va-Israyele va sindzrisi va ku: ‘Im-him; hi ta va ni hosi henhla kwezru.’ Leswi Samuwele a a yingiseta Xikwembu Nkulukumba minkama hinkwayu, a tote hosi leyi Yehovha a yi hlawuliki.—1 Samuel 8:7-19.

Sentinela 15/01/2010 p. 30 § 9

Yehovha A Fuma Hi Ndlela Leyinene

⁹ Matimu ma kombise leswaku a xidzrimuxo xa Yehovha a xi li ntiyiso. Ku fumiwa hi hosi leyi nga mhunu swi nga va ni swikazratu leswikulu, ngopfungopfu loko hosi yoleyo yi nga ha dumbeki. Loko hi yanakanya hi xikombiso xa tiko dzra Israyele, a swi hlamalisi leswi mimfumu ya vhanu lava nga mu tivikiki Yehovha yi hlulekaka ku yanelisa swivileleko hinkwaswu swa vhanu. I ntiyiso leswaku vazrangeli van’wana va politika va kombela leswaku Xikwembu Nkulukumba a tovokisa minzamu yavu ya ku tisa ku zrula ni nsizrelelo, kambe xana Xikwembu Nkulukumba a nga va tovokisisa kuyini lava kalaka va nga titsrongahati ka ndlela leyi a fumaka ha yone?—Ps 2:10-12.

Tindzralama Ta Moya

Sentinela 01/04/2002 p. 12 § 13

Ha Yini U Fanela Ku Babatisiwa?

¹³ Hi fanela ku zranga hi txintxa na hi nga si na babatisiwa swanga Timboni ta Yehovha. Ku txintxa i xiyentxo xa ku tizrandzrela lexi yentxiwaka hi lweyi a tekiki xiboho lexi humaka mbilwini xa ku landzrela Kriste Yesu. Vhanu va ku tanu va fulazrela mahanyela yavu ya khale lama hoxekiki va va va tiyimisela ku yentxa leswinene a mahlweni ya Xikwembu Nkulukumba. Ka matsralwa, zritu dzra Xiheberu ni dzra Xigriki ledzri tlhamuxelaka ku txintxa dzri hlaya ku ndzruluka, u langusa ntsrhaku. Xiyentxo lexi xi hlaya ku ndzruluka u yentxa ku zrandzra ka Xikwembu Nkulukumba u va u tsrhika mahanyela lama hoxekiki. (1 Tihosi 8:33, 34) Ku txintxa swi djula leswaku u yentxa ‘mintizro leyi kombisaka ku ndzruluka’. (Amintiṛo 26:20, BX) Swi djula leswaku hi fulazrela wugandzreli bya madzrimi, hi yentxa mintxhumu hi ku pfumelelana ni swileleto swa Xikwembu Nkulukumba hi va hi tinyiketela ka Yehovha ntsena. (Deuteronoma 30:2, 8-10; 1 Samuel 7:3) Ku txintxa swi yentxa leswaku hi tsrhika ndlela leyi a hi hanya ha yone, minkongometo yezru ni wumhunu byezru. (Ezekiel 18:31) Loko hi ‘ndzruluka’, mintxhumu leyi nga mu nyonxisikiki Xikwembu Nkulukumba yi siviwa hi wumhunu lebyimpswha.—Amintiṛo 3:19; Ba-le-Efesa 4:20-24; Ba-le-Kolosa 3:5-14.

28 KA FEVHERERU–6 KA MARSU

WUKOSI BYI NGA BIBELENI | 1 SAMUEL 9-11

“Sawulo A A Titsrongahata Nakone A A Tivona Na A Nga Faneleki”

Xihondzro Xa Ku Zrindzra 08/2020 p. 10 § 11

Famba Na Xikwembu Nkulukumba Hi Ku Titsrongahata

¹¹ Yanakanya hi leswi yentxekeliki Hosi Sawulo. A ku sunguleni, na e he mumpswha a a titsrongahata. A a pfumela leswaku a a nga koti ku yentxa hinkwaswu. A ve a ganaganeka ku yamukela swiyavelo leswi yengetelekiki. (1Sa 9:21; 10:20-22) Kambe hi ku famba ka nkama, Sawulo a sungule ku tikulisa. A kombise wumhunu lebyo ntsrhaku ka loko a sungule ku fuma. Siku dzrimbeni, Sawulo a heleliwe hi mbilu lakakuva a vona muprofeta Samuwele na a hlwela. A matsrhan’wini ya ku titsrongahata a dumba leswaku Yehovha a ta pfuna vhanu vake, Sawulo a yentxe leswi a a nga pfumeleliwanga ku swi yentxa. A nyikele magandzrelo ya ku hisiwa ka Yehovha. Yi ve yini mihandzru ya kone? Sawulo a nga ha seketeliwanga ha Yehovha, xileswo a luzekeliwe hi wuhosi. (1Sa 13:8-14) Nakunene, hi fanela ku dondzra swa kukazri ka xikombiso lexi. Hi nga txhuki hi tikulisa ku fana na Sawulo.

Sentinela 15/03/2014 p. 9 § 8

Ndlela Ya Ku Tama Hi Va Ni Moya Wa Ku Tinyiketela

⁸ Hosi Sawulo wa le Israyele i xidzrimuxo ku hine mayelanu ni ndlela leyi wutiyanakanyi byi nga honaka ha yone a ku tinyiketela kwezru. Loko Sawulo a bekiwa swanga hosi a a titsrongahata. (1Sa 9:21) A yalile ku khatisa va-Israyele lava vulavuliki ku biha hi wuhosi byake, nambi leswi a va tlhontlha a wulawuli lebyi Xikwembu Nkulukumba a mu nyikiki byone. (1Sa 10:27) Hosi Sawulo a pfumele ku kongomisiwa hi moya wa Xikwembu Nkulukumba hikuva a zrangela va-Israyele a yimpini leyi va hluliki va-Amoni. Ntsrhaku ka leswo, hi ku titsrongahata a dzrumise Yehovha hi leswi va hluliki.—1Sa 11:6, 11-13.

Sentinela 15/12/1995 p. 10 § 1

Va-Amoni—Vhanu Lava Tlheliseliki Wunene Hi Wubihi

Va-Amoni va tlheli va tlhelisela wunene bya Yehovha hi wubihi. Yehovha a nga xi tsrhikanga xi khaluta xizruku lexo. ‘A moya wa Xikwembu Nkulukumba wu mu khoma Sawulo, loko a yingela mazritu lawo [ya Nahaxi]; a mahlundzru yake ma pfuzra ngopfu.’ Hi ku kongomisiwa hi moya wa Xikwembu Nkulukumba, Sawulo, a vumbe khandzra dzra vavanuna va yimpi lava dzringanaka 330.000 lava hluliki va-Amoni lakakuva ‘ku nga ha sali vabidzri va li kun’we’.—1 Samuel 11:6, 11, BX.

Tindzralama Ta Moya

Sentinela 15/03/2005 p. 22 § 8

Nkatsrakanyu Wa Buku Dzra Samuel Wa Ku Sungula

9:9—I yini lexi nga xa lisima mayelanu ni xiga lexi liki ‘muprofeta wa swoswi khale afa va ku i muvoni’? Mazritu lawa ma nga ha kombisa leswaku leswi vaprofeta a va ni ndhuma swinene a nkameni wa Samuwele ni le nkameni wa tihosi ta le Israyele, xiga lexi liki ‘muvoni’ xi siviwe hi zritu ‘muprofeta’. Samuwele a tekiwa swanga wa ku sungula ka nxaxamelo wa vaprofeta.—Amintiṛo 3:24.