Mintlhamuxelo Ya Xibukwana Xa Ntlhanganu Wa Wutomi Ni Wutizreli Byezru
2-8 KA MAYU
WUKOSI BYI NGA BIBELENI | 1 SAMUEL 27-29
“Davhida Ni Makungu Yake A Nyimpini”
Perspicaz vol-1 p. 164 § 8
Akixi
Ku dzringana makhambi mabidzri loko Davhida a tsrutsruma hi ku txhava Sawulo a ye kuma wutumbelo ka Hosi Akixi. Ka khambi dzra ku sungula, loko va pimise leswaku a a li nala, Davhida a tiyentxe ingiki a a vabya hi nhloko, nakone Akixi a mu tsrhike a famba na a pimisa leswaku a a li nhlanyi leyi kalaka yi nge na nandzru. (1Sa 21:10-15; Ps 34:Mazritu ya le henhla; 56:Mazritu ya le henhla) Ka khambi dzra wubidzri, Davhida a a ni 600 wa masotxha ni mindangu yavu, kutani Akixi a va nyike mbangu a Ziklagi akuva va tsrhama ka wone. Ku dzringana lembe ni 4 wa tihweti lani va viki mugangeni luwani, Akixi a a pimisa leswaku ntlawa wa Davhida a wu hlasela madoropa ya le Yudeya, na kasi Davhida a a phanga mintxhumu ya Vagexuri, Vagirizi ni va-Amaleki. (1Sa 27:1-12) Davhida a swi kote ha hombe ku kanganyisa Akixi lakakuva a mu hlawule akuva a va muzrindzri wake, nakone Davhida ni vavanuna vake va tlhelisiwe va ya Ziklagi na va li kusuhi ni ku hlasela hi ku sindzrisa ka tihosi tin’wana ta Vafilista loko Vafilista va djule ku hlasela Hosi Sawulo. (1Sa 28:2; 29:1-11) Loko Davhida a ve Hosi a va a hlasela Gadi, swi tikomba na Akixi a nga dlayiwanga. Akixi a tame a hanya ku ya tlhasa ku fumeni ka Solomoni.—1Th 2:39-41; Vona GADE.
Xihondzro Xa Ku Zrindzra 03/2021 p. 4 § 8
Madjaha—Xana Mi Nga Yentxa Yini Akuva Vambeni Va Mi Dumba?
8 Vona xikazratu ximbeni lexi Davhida a kumaniki na xone. Loko Davhida a totiwile swanga hosi, a sindzriseke ku yima malembe manyingi akuva a sungula ku fuma a Yuda. (1Sa 16:13; 2Sa 2:3, 4) I yini lexi mu pfuniki ku va a lehisa mbilu? A matsrhan’wini ya ku hetiwa ntamu hi swisolo, Davhida a tizrise nkama lowo akuva a yentxa leswi a nga swi kotaka. Hi xikombiso, na a ha tumbela a tikweni dzra Vafilista, Davhida a londzrovote mukhandlu lowo akuva a lwa ni valala va Israyele. Hi ku yentxa leswo, a kote ku sizrelela mindzrilakana ya tiko dzra Yuda.—1Sa 27:1-12.
Perspicaz vol-2 p. 354 § 6
Madzrimi
Nambi leswi madzrimi ma soliwaka hi ku helela a Bibeleni, a swi hlayi swone leswaku mhunu a sindzriseka ku hlaya mintxhumu ka vhanu lava kalaka va nge na mfanelo ya ku yi tiva. Yesu Kriste a hi tsratsriye leswi: “Mi nga nyiki timbyana mintxhumu ya ku xwenga nambi ku teka maperola yenu mi nyika tinguluve, hikusa ti ta ma pswanyetela ti tlhela ti ndzruluka ti mi hahlulela.” (Mt 7:6) Hi leswi swi yentxiki Yesu a nga nyikeli madzrungula kumbe tinhlamulo leti kongomiki ta swivutiso swa kukazri loko leswo a swi ta tisa timhaka. (Mt 15:1-6; 21:23-27; Yh 7:3-10) Swi tikomba na hi fanela ku swi vona hi ndlela leyi fanaka leswi Abrahamu, Izaki, Rahabi na Elixa va swi yentxiki, swa ku va va nga hlayi ntxhumu kumbe va tlhota madzrungula ya kukazri ka lava kalaka va nga mu gandzreli Yehovha.—Gn 12:10-19; ndzr. 20; 26:1-10; Yš 2:1-6; Yk 2:25; 2Th 6:11-23.
Tindzralama Ta Moya
Sentinela 01/01/2010 p. 20 §§ 5-6
Xana Vafi Va Nga Va Pfuna Lava Hanyaka?
Pimisa hi yone mhaka leyi. Bibele dzri hlaya leswaku loko mhunu a fa ‘a buyela misaveni yakwe’ ni leswaku ‘a makungu yakwe ma hela’. (Amapsalma 146:4) Sawulo na Samuwele a va swi tiva leswaku Xikwembu Nkulukumba a nga swi djuli leswaku vhanu va titlhanganisa ni vangoma. A ku sunguleni, Sawulo hi yene lweyi a a zrangela loko ku helisiwa matiko lawa a ma tizrisa wungoma!—Levitika 19:31.
kutani yanakanyisisa ha hombe hi mhaka leyi. Loko ku li leswaku Samuwele hakunene a a hanya a mbangwini wa kukazri lomu mimoya yi yaka tsrhama kone, xana a a ta tlula nawu wa Xikwembu Nkulukumba kutani a ya humelela ka mungoma leswaku a ta tlhangana na Sawulo? Yehovha a yalile ku vulavula na Sawulo. Kutani, xana mungoma a a ta sindzrisa Xikwembu Nkulukumba wa Ntamu hinkwawu leswaku a vulavula na Sawulo hi ku tizrisa Samuwele, lweyi a fiki? Leswo a swi twali ni kutsrongo. Swi le livaleni leswaku Samuwele yelweyo, a ku nga li yene muprofeta wa Xikwembu Nkulukumba wa ku dumbeka. A ku li demona ledzri a dzri djula ku tihamba Samuwele.
9-15 KA MAYU
WUKOSI BYI NGA BIBELENI | 1 SAMUEL 30-31
“Titiyise Hi Yehovha Xikwembu Nkulukumba Waku”
Sentinela 01/08/2006 p. 28 § 12
Txhava Yehovha U Nyonxa
12 Akuva Davhida a txhava Yehovha a swi mu sizrelelanga kuva a nga yentxi mintxhumu ya ku biha ntsena. Swi mu pfunile leswaku a tiyimisela ku hamba mintxhumu hi wutlhazri loko a kumana ni swikazratu. Ku dzringana lembe ni 4 wa tihweti, Davhida ni vavanuna vake va tsrutsrume Sawulo va ya a Ziklagi, a tikweni dzra Vafilista. (1 Samuel 27:5-7) Khambi dzrimbeni, loko vavanuna va sukile, vavanuna va-Amaleki, va hlaseli lomu Davhida ni vavanuna vake a va li kone va teka vasati vavu, vanavu ni tihamba tavu. Loko va buyile va vona leswi humeleliki, Davhida ni vavanuna vake va dzrilile. Ku dzrila kwavu ku ndzruluke livengo lakakuva va djula ni ku peveta Davhida hi mazribye, nambi leswi a a vavisekile, Davhida a nga helanga ntamu. (Amaproverbia 24:10) Akuva Davhida a txhave Xikwembu Nkulukumba swi mu yentxe a dumba Yehovha ni ‘ku titiyisa hi Yehovha Xikwembu Nkulukumba wake’. Hi ku pfuniwa hi Yehovha Davhida ni vavanuna vake va hlule va-Amaleke va tlhela va teka mintxhumu hinkwayu leyi a va va yivelile.—1 Samuel 30:1-20.
Sentinela 15/04/2012 p. 30 § 14
Yehovha Awa Hi Sizrelela
14 Davhida a langusane ni swikazratu swinyingi a wuton’wini byake. (1Sa 30:3-6) Mazritu yake lama huhutiwiki ma komba leswaku Yehovha a a ma tiva matitwela yake. (Dondzra Amapsalma 34:18; 56:8.) Xikwembu Nkulukumba a ma tiva ha hombe matitwela yezru. Loko hi ‘tsroveke mbilu’ kumbe loko ‘hi ni moya lowu tsrongahatiwiki’ Yehovha a le ku suhi na hine. Leswo swi hi nyika ntxhavelelo wukulu swanga hi lani swi txhaveleliki Davhida ha kone, lwa hlayiki leswi: ‘Ndzri ta tsrhava ndzri titsrhavela a lizrezreni laku, hi kuva u voni nhlomulo wanga, u tive ku kamiwa ka mbilu yanga.’ (Ps 31:7) Kambe Yehovha a ngo tiva ku xaniseka kwezru ntsena, kambe awa hi tiyisa a tlhela a hi nyika ntxhavelelo. Yin’we ya tindlela ta ku yentxa leswo i ku va ni mintlhanganu ya wukriste.
Tindzralama Ta Moya
Sentinela 15/03/2005 p. 24 § 8
Nkatsrakanyu Wa Buku Dzra Samuel Wa Ku Sungula
30:23, 24. Xiboho lexi seketeliwiki ka buku dzra Atinhlayo 31:27, xi kombisa leswaku Yehovha a nyika lisima lava seketelaka bandla. Xileswo, hinkwaswu leswi hi swi yentxaka, ‘a hi swi yentxeni hi mbilu swanga hi loko hi yentxela Hosi hi nga yentxeli vhanu’.—Ba-le-Kolosa 3:23.
16-22 KA MAYU
WUKOSI BYI NGA BIBELENI | 2 SAMUEL 1-3
“Hi Dondzra Yini Ka Lisimu Dzra ‘Xitlhamungwana’?”
Sentinela 15/06/2000 p. 13 § 9
Hlonipha Lava Ku Zrangelaka
9 Xana Davhida a kazratekile loko a xanisiwa? Davhida a dzrile ka Yehovha a ku: ‘A vhanu lava lebyaka va djule wutomi byanga.’ (Amapsalma 54:3) Davhida a pfule xifuva xake ka Yehovha a ku: ‘Ndzri tizrule ku valala vanga we Xikwembu Nkulukumba wanga a vhanu va mahlundzru va ndzri hlengeletanile, Yehovha, nambi dzri nga yentxanga xidoho kumbe xihono nambi ndzri nge na nadzru, va ku tsrutsruma na va tlhomile, pfuka, u ta ku mine, u langusa.’ (Amapsalma 59:1-4) Xana u sama u titwa hi ndlela leyi, mhunu lwa nga ni wulawuli a ku khoma hi ndlela ya ku biha nambi u nga mu yentxelanga ntxhumu wa ku biha? Davhida a tame a kombisa xitxhavu ka Sawulo. Ntsrhaku ka lifu dzra Sawulo, matsrhan’wini ya kuva Davhida a nyonxa, Davhida a hambe lisimu dzra xidzrilo a ku: ‘Sawulo na Yonatani, vazrandzriwa lava pfaka va tsrhavisa a ku hanyeni kwavu, . . . va ve ni matsrambu ku tlula magama, va ve ni ntamu ku tlula tindzrawu. N’wine van’whanyana va israyele dzrilelani Sawulo.’ (2 Samuel 1:23, 24) Nambi leswi Sawulo a yentxeliki Davhida wubihi, Davhida i xikombiso lexinene xa lwe a kombisiki xitxhavu ka mutotiwa wa Yehovha!
Sentinela 15/04/2012 p. 10 § 8
Wukanganyisi—Xikombiso xa ku biha ku sukela khale
8 Bibele dzri vulavula hi vhanu vanyingi va ku dumbeka. A hi voneni swikombiso swibidzri, nakone hi tlhela hi vona leswaku hi nga dondzra yini ka swone, hi ta sungula hi wanuna lweyi a a dumbekile ka Davhida. I Yonatani, n’wana wa mativula wa Hosi Sawulo, lweyi a a ni mfanelo ya ku siva Papayi wake a wuhosini bya Israyele, kambe a swi va nga tanu. Yehovha a hlawule Davhida leswaku a va hosi a Israyele akuva a siva hosi Sawulo, nakone Yonatani a xi hloniphile xiboho lexo xa Xikwembu Nkulukumba, Yonatani a nga mu vondzrokanga Davhida nambi ku mu vona swanga nala. Matsrhan’wini ya leswo, ‘a hika dzra Yonatani dzra ku namazrela ku hika dzra Davhida’ swanga xitiyisekiso xa leswaku a ta dumbeka ku yene nakone Yonatani a nyike Davhida swiyambalu, xipada, xitlhamungwana ni bandi a mu tiyisekisa leswaku a ta va hosi. (1Sa 18:1-4) Yonatani a yentxe hinkwaswu leswi a swi le ntan’wini wake akuva ‘a tiyisa mavoko ya Davhida’ lakakuva a peta wutomi byake nghozini leswaku a sizrelela Davhida ka Sawulo. Yonatani a dumbise Davhida leswaku: ‘Wene u tava hosi ya Israyele, mine ni ta va ntsrhaku kwaku.’ (1Sa 20:30-34; 23:16, 17) A swi hlamalisi leswi Davhida a hambiki lisimu dzra xidzrilo ntsrhaku ka ku fa ka Yonatani akuva a kombisa lizrandzru ledzri a nga na dzrone ha Yonatani.—2Sa 1:17, 26.
Tindzralama Ta Moya
Perspicaz vol-1 p. 1248 § 1
Makwavu
Xiga lexi liki “makwavu” xa tizra ni le ka vhanu lava va tlhanganaka ka mhaka ya kukazri kumbe hi nkongometo lowu fanaka. Hi xikombiso, Hosi Hiramu wa le Tiro a te makwezru loko a vitana hosi Solomoni ku nga li hi leswi a va li ka xikhundla lexi fanaka ntsena kambe, kumbexana hi leswi a va ni nkongometo wun’we wa ku ya tsrema mapulangu ni swin’wana akuva va ta yaka tempele. (1Th 9:13; 5:1-12) Davhida a tsrale leswi: ‘Lavisani, a hi ku xonga ka swone, a hi ku nandzrika ka swone, loko vamakwavu va tsrhama kun’we ve van’we.’ Leswo swi hi yentxa hi twisisa leswaku a hi vamakwavu lava humaka ka nyimba yin’we ntsena lava nga yentxaka leswaku ku va ni ku zrula ni wumun’we. (Ps 133:1) Davhida a vitana Yonatani swanga Makwavu, ku nga li hi leswaku a va li maxaka kambe a va ni lizrandzru ni minkongometo leyi fanaka. (2Sa 1:26) Ku vani xinghanu ni mhunu lweyi mi nga ni makungu lama fanaka, nambi ma nge manene, va vitaniwa vamakwavu.—Pr 18:9.
23-29 KA MAYU
WUKOSI BYI NGA BIBELENI | 2 SAMUEL 4-6
“Txhava Ku Khunguvanyisa Yehovha”
Sentinela 15/05/2005 p. 17 § 8
Nkatsrakanyu Wa Buku Dzra Samuwele Wa Wubidzri
6:1-7. Nambi leswi Davhida a a ni nkongometo lowunene, kambe minzamu yake ya ku zruzrisa Areka hi q’olo yi honise nawu wa Xikwembu Nkulukumba nakone a swi fambanga ha hombe. (Eksoda 25:13, 14; Atinhlayo 4:15, 19; 7:7-9) Minzamu ya Uza ya ku khoma a Areka yi hi dondzrisa leswaku minkongometo leyinene a yi txintxi milawu ya Xikwembu Nkulukumba.
Sentinela 01/02/2005 p. 27 § 20
Yehovha Minkama Hinkwayu A Yentxa Leswi Lulamiki
20 Hi fanela ku dzrimuka leswaku Uza a a swi tiva leswaku a a nga fanelanga ku khoma a areka. A areka a dzri yimela wukone bya Yehovha. A nawu a wu hlaya leswaku lweyi a kalaka a nge na mpfumelelo a a nga fanelanga ku khoma a areka. A wu swi beka livaleni leswaku lweyi a wu tlulaka nawu lowo a a ni xikhatiso xa lifu. (Atinhlayo 4:18-20; 7:89) Xileswo ku zruzrisiwa ka areka ledzri dzra ku hlawuleka a ku nga fanelanga ku tekiwa swanga ntxhumu lowu kalaka wu nge na lisima. Swi le livaleni leswaku Uza a a li mulevhi (kambe a a nga li muprista), xileswo a swi fanela ku nha a wu tiva Nawu. Matsrhan’wini ya leswo a areka dzri heti malembe manyingi na dzri li kaya ka papayi wa Uza kuva dzri sizreleleka. (1 Samuel 6:20–7:1) Dzri tsrhame kone ku dzringana 70 wa malembe, ku ko Davhida a vona swi yampswa ku dzri zruzrisa. Xileswo swi nga yentxeka leswaku ku sukela a wutsrongwanini Uza a a wu tiva nawu mayelanu ni Areka.
Sentinela 01/02/2005 p. 27 § 21
Yehovha Minkama Hinkwayu A Yentxa Leswi Lulamiki
21 Hi lani hi swi voniki ha kone ku sunguleni, Yehovha a nga dondzra timbilu tezru. Leswi zritu dzrake dzri hlayaka leswaku leswi Uza a swi yentxiki ‘i xihoxo’, swi nga yentxeka na Yehovha a voni moya wa makwanga ka wanuna lweyi lowu Bibele dzri kalaka dzri nga wu boxi. Xana Uza a a li wanuna wa ku tikukumuxa lakakuva a za a tlula ni swipimelo? (Amaproverbia 11:2) Xana akuva Uza a fambisa q’olo leyi a yi zrwale a Areka a vhanwini a swi mu yentxa a tivona na a li wa lisima ku tlula vambeni? (Amaproverbia 8:13) Xana lipfumelo dzra Uza a dzri tsranile lakakuva a yanakanya leswaku a voko dzra Yehovha dzri gome ngopfu lakakuva a nge swi koti ku khoma a Areka dzra ku hlawuleka ledzri a dzri yimela wukone byake? A swi na mhaka leswaku xivangelo he xini, lexi hi tiyisekaka ha xone hi leswaku leswi Yehovha a swi yentxiki i swinene. Swi nga yentxeka na Yehovha a voni ntxhumu a mbilwini ya Uza lexi mu susumeteliki kuva a tekela ku mu suvisa.—Amaproverbia 21:2.
Tindzralama Ta Moya
Sentinela 01/04/1996 p. 29 § 1
Lahlela Ku Vilela Kwaku Ka Yehovha
Davhida swanga Hosi a a ni wutiyanguleli mayelanu ni lifu ledzri. Leswi a swi yentxiki swi kombisa leswaku nambi lava nga ni wuxaka lebyinene na Yehovha swi nga yentxeka minkama yimbeni va yentxa mintxhumu leyi nga liki yinene. A ku sunguleni Davhida a hlundzrukile, a gama a txhava. (2 Samuel 6:8, 9) Ku dumbeka kwake ka Yehovha ku dzringiwile hi ndlela ya ku kazrata. Lani swi tikomba na a nga txukumetelanga ku vilela kwake ka Yehovha, loko a nga landzrelelanga swileleto swake. Xana leswi swi nga hi humelela namunhla? Xana hi mu nyika nandzru Yehovha loko hi humeleliwa hi makhombo hikuva hi nga swi landzriseli swileleto swake?—Amaproverbia 19:3.
30 KA MAYU–5 KA JUNYU
WUKOSI BYI NGA BIBELENI | 2 SAMUEL 7-8
“Yehovha A Hamba Xipfumelelanu Na Davhida”
Sentinela 01/04/2010 p. 20 § 3
“Nakunene A Mfumu Waku Wu Ta Tiya”
Yehovha a khumbiwe swinene hi ku navela ka Davhida loku humaka Mbilwini. Loko a hlamula Davhida hi kola ka ku tinyiketela kwake ni hi ku ya hi wuprofeta, Xikwembu Nkulukumba a hambe Xipfumelelanu na Davhida xa ku beka mhunu lweyi a humaka a lixakeni dzra wuhosi bya Davhida lweyi a a ta fuma hi lani ku nga helikiki. Natani a ye byela Davhida xidumbiso xa Xikwembu Nkulukumba lexi tiyiki xa ku: ‘A yindlu yaku ni Mfumu waku swi ta tiyisiwa hi laha ku nga helikiki a mahlweni yaku; a xitsrhamu xaku xa wuhosi xi ta tiya hi laha ku nga helikiki.’ (Ndzrimana 16) A ku li mani madapfindla wa xipfumelelanu lexo—lweyi a a ta fuma hi lani ku nga helikiki?—Amapsalma 89:20, 29, 34-36.
Sentinela 01/04/2010 p. 20 § 4
“Nakunene A Mfumu Waku Wu Ta Tiya”
Yesu wa le Nazareta a a huma a lixakeni dzra Davhida. Loko ntsrumi yi tivisa ku pswaliwa ka Yesu yi te: ‘Hosi Xikwembu Nkulukumba a ta mu nyika xitsrhamu xa wuhosi xa Davhida Tatana wakwe; a ta fuma yindlu ya Yakobe hi minkama hinkwayu; a wuhosi byakwe byi nga vi na wugamu.’ (Luka 1:32, 33) Xileswo, a xipfumelelanu lexi hambiwiki na Davhida xi hetiseke ka Yesu Kriste. Hi ndlela leyo, a nga fumi hi kuva a hlawuliwe hi mhunu wa nyama, kambe hi kola ka xidumbiso xa Xikwembu Nkulukumba lexi mu nyikaka mfanelo ya ku fuma hi la ku nga helikiki. Hi nga txhuki hi dzrivala leswaku a swidumbiso swa Xikwembu Nkulukumba minkama hinkwayu swa hetiseka.—Ezaya 55:10, 11.
Sentinela 15/10/2014 pp. 10-11 § 14
Vana Ni Lipfumelo Ledzri Tiyiki ka Mfumu Wa Xikwembu Nkulukumba
14 Vona leswi Yehovha a swi dumbisiki Hosi Davhida, wa Israyele wa khale, hi ku tizrisa xipfumelelanu na Davhida. (Dondzra 2 Samuel 7:12, 16.) Yehovha a hambe xipfumelelanu lexi na Davhida a ha fuma a Yerusalema a mu dumbisa leswaku Mesiya a a ta huma a lixakeni dzrake. (Luka 1:30-33) Hi ndlela leyo, Yehovha a tlhele a khanyisela lixaka ledzri ka leswaku mu di wa pfindla a a ta huma ka dzrone, a hlaya leswaku a a ta huma ka Davhida lweyi a a ni mfanelo ya ku tsrhama ka xitshamu xa wuhosi xa Mfumu Wa Wu Mesiya. (Ezk 21:25-27) Hi ku tizrisa Yesu, a wuhosi bya Davhida byi ta tama byi va kone ‘hi la ku nga helikiki’. Nakunene, a xitsrhamu xa lixaka dzra Davhida xi ta tiya hi la ku nga helikiki ‘swanga hi dambu.’ (Ps 89:34-37) Ina, a Mfumu wa Mesiya wu ta kombisa wululami minkama hinkwayu, nakone leswi wu taka swi yentxa swi ta tsrhama hi la ku nga helikiki!
Tindzralama Ta Moya
Perspicaz vol-2 p. 1165 § 1
Masiku Ya Wugamu
Wuprofeta bya Balama. Na ka ha sale nkamanyana akuva va-Israyele va nghena tikweni dzra xidumbiso muprofeta Balama a byele Balaki hosi ya Mowabu, a ku: ‘Tana, ndzri ta ku tivisa leswi vhanu lava [va-Israyele] va taka swi yentxa ku tiko dzraku a masikwini lama taka. . . . A nyeleti yi humelela ku Yakobe, a nhonga ya wuhosi yi huma ku Israyele, yi tlhava matlhelo ya Mowabu. Yi wisa hansi hinkwavu vana va ka Seti.’ (Tin 24:14-17) A ku hetiseka ka ku sungula ka wuprofeta lebyi, ku voniwe leswaku ‘nyeleti’ a ku li hosi Davhida, lweyi a a ta va muyavanyisi wa Vamowabu. (2Sa 8:2) Swi le livaleni, leswaku a ku hetisekeni ka wuprofeta lebyi, lebyi kongomiki, ‘masikwini lama taka’ ma sungule loko Davhida a ve Hosi. Leswi Davhida a a fanekisela Yesu swanga Hosi ya Wumesiya, a wuprofeta lebyi a byi ta tizra ni le ka Yesu loko ku tlasa nkama wa kuva a yavanyisa valala vake.—Eza 9:7; Ps 2:8, 9.
6-12 KA JUNYU
WUKOSI BYI NGA BIBELENI | 2 SAMUEL 9-10
“Davhida A Kombise Lizrandzru Dzra Ku Dumbeka”
Sentinela 15/06/2006 p. 14 § 6
Ina, U Nga Ku Kuma Ku Nyonxa
Davhida a tsrale a ku: ‘A ni ndjombo lweyi a londzrisaka muxaniseki.’ A ye mahlweni a ku: ‘Hi siku dzra khombo, Yehovha a ta mu tizrula.Yehovha a ta mu mpfekela, a ta mu hanyisa; a ta va mhunu wa tindjombo misaveni.’ (Amapsalma 41:1, 2) Ku yanakanyela loku nga ni lizrandzru loku Davhida a ku kombisiki ka Mefiboxeti, n’wana lweyi a limaliki wa Yonatani, munghanu lweyi a zrandzrekaka wa Davhida, i xikombiso lexinene xa ku va ni vonela ledzrinene hi swisiwana.—2 Samuel 9:1-13.
Sentinela 15/05/2005 p. 17 § 11
Nkatsrakanyu Wa Buku Dzra Samuwele Wa Wubidzri
9:1, 6, 7. Davhida a hetisise xidumbiso xake. Na hine hi fanela ku yentxa tanu, hi hetisisa leswi hi swi dumbisiki.
Sentinela 15/02/2002 p. 14 § 10
Va Tiyiselele Mutwa A Nyameni Yavu
10 Ntsrhaku ka malembe ya ku hlawanyana Hosi Davhida a kombise Mefiboxeti timpswalu ta lizrandzru hi kola ka leswi a a mu zrandzra swinene Yonatani. Davhida a nyiki Mefiboxete mbangu lowu a wu li wa Hosi Sawulo, kutani a leleta Ziba, lweyi a a li mutizri wa Hosi Sawulo, akuva a wu hlayisa. Davhida a tlheli a byela Mefiboxeti a ku: ‘U ta da minkama hinkwayu a tafuleni dzranga.’ (2 Samuel 9:6-10) A swi ganaganekisi leswaku a timpswalu ta Davhida a ti mu txhavelela Mefiboxeti nakone ti mu pumbeli swikazratu hi leswi a a limalile. Mawaku dondzro leyinene! Na hine hi fanela ku tikazratela ku kombisa timpswalu ka lava nga ni mutwa nyameni.
Tindzralama Ta Moya
Perspicaz vol-1 p. 291 § 5
Malepfu
Matiko manyingi, ku patsra ni ya le wuxeni, a malepfu a ma nyika wanuna xitsrhuti. Nawu lowu Xikwembu Nkulukumba a wu nyikiki va-Israyele a wu yilisa ‘ku byevula matlhelweni ya malepfu’, a misisi yi nga makazri ka tindleve ni matihlo. (Lv 19:27; 21:5) Leswi a swi yilisiwa hikusa van’we va va hedeni a va swi vona swanga xihena xa wukhongoti.
13-19 KA JUNYU
WUKOSI BYI NGA BIBELENI | 2 SAMUEL 11-12
“U Nga Pfumeleli Ku Navela Ka Ku Biha Ku Lawula Wutomi Byaku”
Xihondzro Xa Ku Zrindzra 06/2021 p. 17 § 10
U Nga Huluka Ka Mintlhamu Ya Sathana!
10 Makwanga ma yentxe Hosi Davhida a dzrivala hinkwaswu leswi Yehovha a mu yentxeliki swone, ku patsra ni wupfundzri, ndhuma ni ku hlula valala vake. Davhida a tlangele Xikwembu Nkulukumba hi matovoko lawa a mu nyikiki wone. A te: ‘A ntalu wa wone ma tlula nhlayu!’ (Ps 40:5) Kambe ku be nkama Davhida a dzrivala leswi Yehovha a a mu nyikile. Nambi leswi Davhida a a ni vasati vanyingi, a sungule ku navela wansati lweyi a a tekiwe hi wanuna mumbeni, ku nga leswi Yehovha a hlayiki leswaku swi bihile. Wansati lweyo a a li Batixeba, nuna wakwe a a li Uriya lwe wa Mukhiti. Davhida a nga zron’wekanga hi matitwela ya vambeni, a yetlele ni wansati lweyo a va a kuma khuzri. A xidoho xa Davhida a xi bihe ngopfu kambe a tlhele a yentxa xidoho lexi tlulisaka, hi ku yentxa leswaku Uriya a dlayiwa! (2Sa 11:2-15) Xana Davhida a a pimisa yini? Xana a nga va a pimise leswaku Yehovha a nge ti swi vona? Nandzra lweyo a samiki a dumbeka ka Yehovha a pfumelele makwanga ma mu nghena a va a hakela ku dula. Nambitanu, lexi nyonxisaka hi ku famba ka nkama Davhida a pfumele xihoxo xake a va a tisola. A nyonxe ngopfu hikuva Yehovha a mu dzrivalelile!—2Sa 12:7-13.
Xihondzro Xa Ku Zrindzra 09/2019 pp. 17-18 § 15
Hatla U Tibeka Hansi Ka Yehovha—Ha Yini Nakone Hi Ndlela Yini?
15 Yehovha a beke Davhida kuva nhloko ya ndangu wake a tlhela a va nhloko ya tiko hinkwadzru dzra Israyele. Swanga hosi, Davhida a a ni ntamu lowukulu. Minkama yin’wana, a tizrise ntamu wake hi ndlela ya ku biha kutani a yentxa swihoxo leswikulu. (2Sa 11:14, 15) Kambe a kombise leswaku a a titsrongahata ka Yehovha hi ku pfumela ku layiwa. A txhulule mbilu yake ka Yehovha hi xikhongoto. Nakone a yentxe hinkwaswu leswi a a swi kota akuva a yingiseta swilayu swa Yehovha. (Ps 51:1-4) Handle ka leswo, a a titsrongahata swinene lakakuva a swi kotile ku yingiseta loko a layiwa, ku nge ntsena hi vavanuna kambe ni hi vavasati. (1Sa 19:11, 12; 25:32, 33) Davhida a dondzre hi swihoxo swake nakone a tizrise wutomi byake ku tizrela Yehovha.
Sentinela 06/2018 pp. 17-18 § 7
Pfumelela Milawu Ni Minsinya Ya Milawu Ya Xikwembu Nkulukumba Yi Dondzrisa Lipfalu Dzraku
7 A hi fanelanga hi zranga hi ku khatisiwa hi kuva hi tlula Milawu ya Xikwembu Nkulukumba akuva hi dondzra ku yingiseta. Hi nga dondzra ka swihoxo swa vambeni lava swidoho swavu swi tsraliwiki Bibeleni. Amaproverbia 1:5 yi li: ‘Lwa tlhazrihiki a ta yingela, a yengetela ku tiva.’ Hi ntiyiso wa kone, hi kuma swidzrimuxo leswinene leswi humaka ka Xikwembu Nkulukumba loko hi dondzra ni ku yanakanyisisa hi wutomi bya vhanu lava kumekaka Bibeleni. Hi xikombiso, yanakanya hi gome ledzri Hosi Davhida a viki na dzrone, loko a hluleki ku yingiseta nawu wa Yehovha kutani a hamba wuwoswi na Batixeba. (2Sa 12:7-14) A nkama lowu hi dondzraka ni ku yanakanyisisa hi dzrungula ledzri, hi nga ha tivutisa leswi: ‘Xana Hosi Davhida a a tava a yi tingawulise kuyini mihandzru ya ku bava leyi tisiwiki hi ku yentxa wuwoswi na Batixeba? Loko no kumana ni ndzringo wa ku fana ni lowu, xana ni nga swi kota ku wu hlula? Xana ni ta wu tsrutsruma ku fana na Yosefa kumbe ni ta tinyikela ku fana na Davhida?’ (Gn 39:11-15) Loko hi yanakanyisisa hi mihandzru ya ku biha leyi tisiwaka hi xidoho, hi ta dondzra ku venga swa ku biha.
Tindzralama Ta Moya
Perspicaz vol-1 p. 653 § 3
Davhida
Yehovha a a swi vona nakone a paluxe xihoxo lexi xa tingana. Loko Yehovha a e pfumelela leswaku mhaka leyi ya Davhida na Batixeba yi yavanyisiwa hi vhanu, a hansi ka nawu wa Moxe, ha wubidzri byavu inhaka va file, nakone a n’wana lweyi a va ta mu pswala hi kola ka wumbuye byavu na yene a a ta fa. (Dt 5:18; 22:22) Kambe, Yehovha ha byake a tamele mhaka leyi a va a kombisa timpswalu ka Davhida hi mhaka ya Xipfumelelanu xa Mfumu (2Sa 7:11-16), handle ka ku ganaganeka na yene Davhida a a kombisa timpswalu (1Sa 24:4-7; ndzringanisa ni Yk 2:13) ni ku tisola loku Xikwembu Nkulukumba a ku voniki ka vadohi ha vabidzri. (Ps 51:1-4) Kambe va khatisiwile. Hi ku tizrisa Muprofeta Natani, Yehovha a te: ‘Lavisa ndzri ta ku pfuxela khombo hi yindlu yaku hinkwayu hi ntshima.’ —2Sa 12:1-12.
20-26 KA JUNYU
WUKOSI BYI NGA BIBELENI | 2 SAMUEL 13-14
“A Makwanga Ya Aminoni Ma Mu Nghenise Nghozini”
Perspicaz vol-1 p. 31 § 7
Absalomu
Ku dlayiwa ka Aminoni. Tamari makwavu wa Abasalomu a a xonge swinene, lakakuva Aminoni, lweyi va nga vamakwavu hi Papayi, a mu navela. A tiyentxi ingiki awa vabya, kutani a kombela kuva Tamari a famba a ya muhlayisa a mu swekela, kutani Aminoni a mu pfinya. Aminoni a sungule ku mu hambula ngopfu Tamari kutlula lewi a a mu zrandzrisa xiswone, lakakuva a kombele leswaku a humexiwa a ya bekiwa ndleleni. Tamari a handzrule nkhantxu wake lowu a wu yambaliwa hi vana va hosi lava a va nge si tivana ni vavanuna, a titxhela nkuma nhlokweni, a gama a ya kumana na Absalomu. Absalomu hi ku kahlula a kambeli mhaka a va a nyika nandzru Aminoni, a kombisa leswaku i khale na Aminoni a navela makwavu Tamari. Absalomu a byeli makwavu Tamari leswaku a nga buleli mhunu mhaka leyi, a va a mu teka a ya tsrhama na yene a kaya kwake.—2Sa 13:1-20.
Sentinela 09/2017 p. 5 § 11
Dondzra Ku Tikhoma
11 Bibele dzri ni swikombiso swa vhanu lava hlulekiki ku tikhoma loko swi ta mhakeni ya swa timhaka ta tinkuku. Dzri tlhela dzri boxa mihandzru ya ku bava leyi va yi kumiki hi kola ka ku hluleka ku tikhoma. Loko u kumana ni xiyimu xa ku fana ni xa Kim i swa lisima ku yanakanyisisa hi leswi swi humeleliki djaha ledzri ku vulavuliwaka hi dzrone ka Amaproverbia ndzrima 7. Nakone yanakanya hi leswi Aminoni a swi yentxiki ni mihandzru ya ku biha leyi a viki na yone hi kola ka swiyentxo swake. (2Sa 13:1, 2, 10-15, 28-32) Vapswele va nga pfuna vanavu akuva va tiva ku tikhoma ni kuva va va ni wutlhazri loko swi ta mhakeni ya ku zrandzrana hi ku bula na vone hi dzrungula ledzri nga Bibeleni ka wugandzreli byavu bya ndangu.
Perspicaz vol-1 p. 31 § 10
Absalomu
Ku khalute malembe mabidzri. Loko ku tlhase nkama wa kuva ku byevuliwa voya bya tihamba, Absalomu a hambe a fexta a Baal-Hazor ku nga mpfhuka wa kolomu ka 22 wa makilometru a n’walungu wa Yerusalema, lani a zrambiki vana va hosi, ku patsra na Davhida. Loko papayi wake a yalile ku ya fexteni ledzro, Absalomu a mu sindzrise leswaku a zrumela Aminoni n’wanake wa mativula a mbangwini wake. (Pr 10:18) Na va li fexteni, loko Aminoni ‘a tsrhavile hi vuvhinya’, Absalomu a byele malandzra yake leswaku ma dlaya Aminoni. A vana van’wana va hosi va tlhelelile a Yerusalema, kambe Absalomu a tsrutsrumile a ya a wukazraweni ka vhovho wake wa Musiriya, ka mfumu wa Gexure, a wuxeni ka lwandle dzra le Galileya. (2Sa 13:23-38) A ‘lipanga’ ledzri profetiwiki hi Natani kutani a dzri nghenile a ‘mutini’ wa Davhida nakone a dzri ta tama dzri va kone wutomi byake hinkwabyu.—2Sa 12:10.
Tindzralama Ta Moya
Despertai! 22/12/2004 pp. 8-9
Ku Xonga Loku Nga Ka Lisima
Ku hambana ni leswo, xiya xikombiso xa Absalomu mun’we wa vana va Davhida. A a li wa wanuna lweyi a a nga naveliwi, nambi leswi a a xonge swinene. Xiya leswi Bibele dzri swi hlaya ha yene: ‘A makazri ka va-Israyele hinkwavu afa ku nge na mhunu ni mun’we lweyi a khensiwaka swanga hi Absalomu hi ku xonga kwake; a ku suka a nkondzrweni ku ya tlhasa a nhlokweni yake, a mizrini yake afa ku nge na wulema.’ (2 Samuel 14:25) Nambitanu, makwanga ya Absalomu ma yentxe leswaku a pfukela papayi wake a djula ku mu tekela mfumu. Leswo swi yentxe ka leswaku Xikwembu Nkulukumba a mu hlundzrukela a va a va ni lifu dzra ku vavisa.—2 Samuel 15:10-14; 16:13-22; 17:14; 18:9, 15.
Xana matimu ya Absalomu ma ku nyonxisa? Swi le livaleni swaku im-him. Hikusa a a li mhunu wa tihanyi a ku xonga kwake ka le handle a ku nga fihli ku tikukumuxa kwake ni ku kala ku dumbeka. Nakone a ku swi sivelanga leswaku a helisiwa. Hi hala tlhelo, ku ni swikombiso swinyingi swa vhanu lava a va ni wutivi ni matsrhamela lamanene, kambe a ku nga vulavuliwi ntxhumu hi wuxongi byavu bya le handle. Swi le livaleni leswaku a wuxongi lebyi a byi li bya lisima a kuli bya le ndzreni ku nga li bya le handle.
27 KA JUNYU–3 KA JULHU
WUKOSI BYI NGA BIBELENI | 2 SAMUEL 15-17
“Absalomu A Xandzrukile Hi Mhaka Ya Ku Tikukumuxa”
Perspicaz vol-2 p. 692 § 7
Mupfuli Wa Ndlela
A swi tolovelekile a wuxeni leswaku vatsrutsrumi va zrangela movha wa hosi akuva va lulamisela ndlela, ku tivisa ku tlhasa ka Hosi ni ku pfunisa lomu swi vilelekaka. Absalomu na Adoniya, hi ku djula ku yetisela mukhuva lowo wa wuhosi, ni ku djula ku titwalisa ni ku khatisa lava a va ta va pfukela, va beki 50 wa vavanuna lava a va ta tsrutsruma mahlweni ka mimovha yavu.—2Sa 15:1; 1Th 1:5; vona BATEDORES.
Sentinela 15/07/2012 p. 13 § 5
Tizrela Xikwembu Nkulukumba Lweyi A Nyikaka Ntsrhunxeko
5 A Bibeleni ku ni swikombiso swa vhanu vanyingi lava kutxeteliki van’wana akuva va yentxa mintxhumu ya ku biha. Mun’we wavu i Absalomu, n’wana wa hosi Davhida. Absalomu a a xonge ngopfu, kambe ku fana na Sathana, hi ku famba ka nkama a pfumelele makwanga ma yaka mbilwini yake lakakuva a sungula ku navela wuhosi bya papayi wake nambileswi a a nga li madapfindla. Kutani hi wukanganyisi a tiyentxi ingiki a djula ku pfuna va-Israyele kulobye, a hlaya hi wusukumbele leswaku vayimeli va hosi a va na mhaka na vone. Ku fana ni leswi Diyavulosi a swi yentxiki a xizrambeni dzra Edeni, Absalomu a tiyentxi ingiki a djula ku pfuna vhanu kambe hi tlhelo dzrin’wana a a hona vito dzra papayi wake.—2Sa 15:1-5.
Perspicaz vol-1 p. 1138 § 1
Hebroni
Ntsrhaku ka malembenyana, Absalomu n’wana Davhida, a tlheleli Hebroni lani a sunguliki makungu yake ya ku tekela papayi wake wuhosi. (2Sa 15:7-10) Absalomu a zrange hi Hebroni akuva a sungula makungu yake ya ku djula ku tekela papayi wake wuhosi, hikusa a ku li ntsindzra wa matimu ya Yuda nakone a ku li doropa ledzri a belekiwiki ku dzrone. Hi ku famba ka nkama, hosi Rohobuwama ntukulu wa Davhida a pfuxeti Hebroni. (2Mk 11:5-10) Ntsrhaku ka loko Yuda a honeteliwile hi Vababilona ni loko va buyile hi le wukazraweni, van’we va Vayuda lava buyiseliwiki a tikweni dzravu va ye tsrhama a Hebroni (Kiriyati-Araba).—Neh 11:25.
Tindzralama Ta Moya
Sentinela 08/2018 p. 6 § 11
Xana U Tiva Wutsrhokotsrhoko Hinkwabyu
11 Na hine, hi nga ha khomiwa hi ndlela ya ku biha hi kola ka leswi ku hangalasiwiki madzrungula ya madzrimi kumbe lawa ma kalaka ma nga na wutsrhokotsrhoko hinkwabyu. Xiya xikombiso xa Hosi Davhida na Mefiboxeti. Davhida a kombise malwandla ni wunene ka Mefiboxeti hi ku mu nyika mbangu hinkwawu wa vhovho wake Sawulo lowu a a wu tekile. (2Sa 9:6, 7) Nambitanu, ntsrhakunyana Davhida a yamukele ndzrava ya ku biha mayelanu na Mefiboxeti. Matsrhan’wini ya ku djula ku kumisisa dzrungula hinkwadzru, Davhida a tekele Mefiboxeti pfindla hinkwadzru. (2Sa 16:1-4) Davhida a xiye leswaku a hambe xihoxo ntsrhaku ka loko a vulavulisane na Mefiboxeti nakone a tlheliseli Mefiboxeti pfindla dzrake hinkwadzru. (2Sa 19:24-29) Wubihi bya ku tanu inhaka byi nga yentxekanga loko Davhida a e sungula hi ku kambisisa mhaka hinkwayu a matsrhan’wini ya ku teka xiboho hi magugu na a nga na wutsrhokotsrhoko hinkwabyu.