Loti a a tsrhama ni malume wake Abrahamu a tikweni dzra Kanana. Hi ku famba ka malembe, Abrahamu na Loti va va ni swifuyu swa swinyingi lakakuva swi nga ha yaneli ka mbangu lowu a va tsrhama ka wone. Xileswo Abrahamu a byela Loti a ku: ‘Swi nge he koteki kuva hi tsrhama xikan’we. U nga tilangela. U djula ku ya tsrhama ka tlhelo dzrini? Loko u hlawula ku ya tsrhama a xineneni mine ni ta ya a ximatsrini.’ Abrahamu a tsrhike Loti a va wa ku sungula ku langa. Hi ndlela leyo, Abrahamu a kombise lizrandzru!

Kutani Loti a vona tlhelo dzra kukazri dzra Kanana ledzri dzri xongiki ngopfu swinene, kusuhi ni doropa dzra Sodoma. A ku li mbangu lowu a wu ni mati ya manyingi ni byanyi bya byinyingi. Hiloko a hlawula ku ya tsrhama kone ni ndangu wake.

Kambe vhanu va le Sodoma a va ni swiyentxo swa ku biha ngopfu swinene ku fana ni vhanu va doropa dzra Gomora ledzri a dzri le kusuhi ni dzra Sodoma. Ku hlaya ntiyiso, a swiyentxo swavu a swi bihile ngopfu swinene lakakuva Yehovha a teka xiboho xa ku helisa madoropa ha mabidzri. Kambe Yehovha a a djula ku huluxa ndangu wa Loti. Xileswo, a zrumela tintsrumi tibidzri akuva ti ya va byela leswi: ‘Kahlulani mi huma hikusa Yehovha a djula ku helisa doropa ledzri.’

Kambe Loti a nga tekelanga ku huma, yene ni ndangu wake va tame va hamba mihoni. Xileswo, a tintsrumi ti khoma Loti, nkatake ni vanake ti va humesa a handle ka doropa hi ku kahlula ti tlhela ti va byela leswi: ‘Tsrutsrumani, huluxani wutomi byenu. Mi nga ndzruluki mi lavisa ntsrhaku hikusa loko mo ndzruluka, mi ta fa.’

Loko Loti ni ndangu wake va tlhasa a doropeni dzra Zowari, Yehovha a xikisa ndzrilo wu yentxa ingiki i mpfula, wu hisa doropa dzra Sodoma ni dzra Gomora. A madoropa ha mabidzri ma helisiwa hi ku helela. Kambe a nsati wa Loti a nga mu yingiseti Yehovha, a ndzruluka a lavisa ntsrhaku. Wa swi tiva leswaku ku yentxeke yini? A txintxe a va zruka dzra munyu! Loti ni vanake a va nyonxanga hi leswi yentxekiki. Kambe a va nyonxile hi leswi va yingisetiki milawu ya Yehovha.

Abrahamu a dondzrise n’wanake Izaki ku zrandzra ni ku kholwa swidumbiso hinkwaswu swa Yehovha. Kambe a nkama lowu Izaki a a ni kolomu ka 25 wa malembe, Yehovha a kombele Abrahamu leswaku a hamba ntxhumu wa ku kazrata ngopfu swinene. A mu kombele yini?

Xikwembu Nkulukumba a byele Abrahamu a ku: ‘Na ku kombela, teka n’wanaku u famba na yene ka nhava leyi nga ka tiko dzra Moriya, leswaku u ta ni hambela gandzrelo hi yene.’ Abrahamu a a nga swi twisisi leswaku ha yini Yehovha a mu kombele kuva a yentxa leswo. Nambitanu a mu yingisetile.

Ka mixo wa siku ledzri landzreliki, Abrahamu a teka Izaki ni malandzra yake mabidzri va ya nhaveni ya Moriya. Ntsrhaku ka loko va hete masiku mazrazru na va yendzra, va vona nhava na va ha li kulenyana. Kolanu, Abrahamu a byela malandzra yake a ku: ‘Yimani kola, mine na Izaki ha ha tlhantuka hi ya nhaveni hi ya hambela Yehovha magandzrelo.’ Abrahamu a teka tihunyi a zrwexa Izaki kutani yene a khoma mukwa. Izaki a vutisa papayi wake a ku: ‘Papayi xi kwini xihazri lexi hi taka hamba gandzrelo ha xone?’ Abrahamu a hlamula a ku: ‘U nga kazrateki n’wananga, Yehovha a ta hi nyika xone.’

Kutani loko va tlhasa a henhla ka nhava ya Moriya, va hamba a altari. Abrahamu a gama a tsrimba mavoko ni milenge ya Izaki a va a mu tlhanteka ka altari.

Abrahamu a gama a khoma mukwa. Kolanu ku humelela ntsrumi ya Yehovha yi ku: ‘Abrahamu! U nga dlayi n’wanaku, u nga mu vavisi! Swoswi na swi tiva leswaku wene u ni lipfumelo ka Xikwembu Nkulukumba hikusa a u tiyimisele ku nyikela n’wanaku.’ Kutani Abrahamu a vona hamba ya yitsrongo leyi a yi khwekele hi timhondzro ka xinsinyana. Hi ku kahlula a tlhantlha Izaki, a va a hamba gandzrelo hi hamba leyo.

Ku sukela ka siku dzroledzro ku ya a mahlweni, Yehovha a sungula ku vitana Abrahamu swanga munghanu wake. Wa swi tiva leswaku ha yini a mu vitane hi ndlela leyo? Hikusa Abrahamu a yentxe hinkwaswu leswi Yehovha a a djula leswaku a swi yentxa, nambiloko a nga swi twisisi leswaku ha yini Yehovha a mu kombela kuva a yentxa leswo.

Yehovha a tlhele a phindha xidumbiso xake ka Abrahamu a ku: ‘Ni ta ku tovokisa, wene u ta va ni ndangu wa wukulu ngopfu swinene. Ni ta tizrisa ndangu waku akuva ni yentxela vhanu hinkwavu leswinene a misaveni hinkwayu.’