Ku dondzra kwaku Bibele ni Timboni ta Yehovha ku ku yentxe u tiva ntiyiso. Handle ka ku ganaganeka, leswi u swi dondzriki swi ku pfune ku va ni wuxaka lebyinene na Xikwembu Nkulukumba nakone swi ku nyike dumbo dzra ku hanya a nkameni lowu taka ni ku tovokisiwa a misaveni leyi nga paradeyisi a hansi ka Mfumu wa Xikwembu Nkulukumba. Lipfumelo dzraku a Zritwini dzra Xikwembu Nkulukumba dzri tiyisiwile, nakone u vone matovoko manyingi hi kola ka ku titlhanganisa ni bandla dzra wukriste. U sungule ku tlangela ndlela leyi Yehovha a tizrisanaka ni vhanu vakwe ha yone namunhla.​—Zk 8:23.

Leswi swoswi u tilulamiselaka ku babatisiwa, u ta pfuneka loko vakulu va bandla va kambisisa na wene tindondzro ta masungulo leti vakriste va ti kholwaka. (Hb 6:1-3) Ingiki Yehovha a nga tovokisa ku tikazrata hinkwaku loku u ku yentxiki leswaku u mu tiva, a tlhela a ku nyika leswi a ku dumbisiki.​—Yh 17:3.

1. Ha yini u djula ku babatisiwa?

2. I mani Yehovha?

• ‘Yehovha i Xikwembu Nkulukumba [wa ntiyiso, NM] tilweni a henhla, ni le misaveni a hansi; a ku na mumbeni.’​—Dt 4:39.

• ‘Wene, lweyi a vito dzraku a nga Yehovha, u Tlakukile henhla ka misava hinkwayu.’​—Ps 83:18.

3. Ha yini swi ni lisima kuva u tizrisa vito dzra Xikwembu Nkulukumba?

• ‘N’wine ke, khongotisani xiswoleswo: Tatana wezru lweyi a nga matilweni. A vito dzraku a dzri hlawuliwe.’​—Mt 6:9.

• “Mun’wana ni mun’wana lweyi a vitanaka vito dzra Yehovha a ta huluxiwa.”​—Ro 10:13, NM.

4. He tini tindlela timbeni leti Yehovha a vitaniwaka ha tone a Bibeleni?

• ‘Yehovha i Xikwembu Nkulukumba lweyi wa ku ka a nga heli, Mutumbuluxi wa magamu ya misava.’​—Eza 40:28.

• ‘Tatana wezru lweyi a nga matilweni.’​—Mt 6:9.

• ‘Xikwembu Nkulukumba i lizrandzru.’​—1Yh 4:8.

5. Xana u nga mu yentxela yini Yehovha Xikwembu Nkulukumba?

• ‘U ta zrandzra Yehovha Xikwembu Nkulukumba waku, hi mbilu yaku hinkwayu, ni hi moya waku hinkwawu, ni hi ku yanakanya kwaku hinkwaku, ni hi ntamu waku hinkwawu.’​—Mr 12:30.

• “U fanela ku gandzrela Yehovha Xikwembu Nkulukumba waku, nakone u fanela ku yentxela yene ntsena ntizro lowu xwengiki.”​—Lk 4:8, NM.

6. Ha yini u djula ku dumbeka ka Yehovha?

• ‘N’wananga, tlhazriha, u tsrhavisa mbilu yanga, ni ta kuma zritu [dzra] ku yangula lava ni zrukaka.’​—Pr 27:11.

7. Xana u khongota ka mani nakone hi vito dzra mani?

• ‘Ni hlayelamfuzri ni li ku n’wine: hinkwaswu leswi n’wi taka kombela ku Tatana hi vito dzranga [dzra Yesu], a ta n’wi nyika.’​—Yh 16:23.

8. Xana i yini leswi u nga khongotaka ha swone?

• ‘N’wine ke, khongotisani xiswoleswo: Tatana wezru lweyi a nga matilwini. A vito dzraku a dzri hlawuliwe. A wu te Mfumu waku. A ku zrandzra kwaku a ku yentxiwe a misaveni, swanga hi le tilwini. Hi hanane namunhla swakuda swezru swa siku dzrin’wana ni dzrin’wana. Hi dzrivaleli milandzru yezru, swanga hi leswi na hine hi dzrivalelaka van’wana lava nga ni milandzru ku hine. U nga ve hi yisa mindzringweni, kambe u hi lwela ku lwemfani.’​—Mt 6:9-13.

• ‘A ku dumba loku hi nga naku ku yene hi loku, leswaku loko hi kombela ntxhumu hi ku zrandzra kwakwe, a hi yingela.’​—1Yh 5:14.

9. I yini swi nga ha yentxaka leswaku Yehovha a nga xi yingiseti xikhongoto xa mhunu?

• ‘Va ta huwelela ku Yehovha, kambe a nga va yingiseti . . . hi nkonta ya swiyentxo swavu leswimfani.’​—Mik 3:4

• “Hikusa a mahlo ya Yehovha ma le henhla ka lava ku lulama, ni tindleve takwe ti yingiseta swikombelo swavu, kambe a liso dzra Yehovha dzri venga lava yentxaka leswa ku biha.”​—1Pe 3:12, NM.

10. I mani Yesu Kriste?

• ‘Simoni Petros a yangula, a ku: U Kriste, N’wana wa Xikwembu Nkulukumba lweyi a hanyaka.’​—Mt 16:16.

11. Ha yini Yesu a te misaveni?

• ‘Swanga ha N’wana wa mhunu a nga telangakiki ku tizreliwa, kambe ku nga ku tizrela ni ku nyiketa wutomi byakwe xi va xitizrulo ku lava ku tala.’​—Mt 20:28.

• ‘[Mine Yesu] ku djuleka ndzri zrezra evhangeli dzra Mfumu wa Xikwembu Nkulukumba ni le mitini yin’wanyana, hikusa ndzri zrumeliwe swone.’​—Lk 4:43.

12. Xana u nga swi kombisa hi ndlela yini leswaku wa xi tlangela xitizrulo xa Yesu?

• ‘Mfuzri a feli hinkwavu, akuva lava hanyaka va nga ha tihanyeli, va ku hanyela lweyi a nga fa, a tlhela a pfuka, hi nkonta yavu.’​—2Ko 5:15.

13. Xana Yesu a ni wuhosi muni?

• ‘Ndzri nyikiwe wuhosi hinkwabyu, a tilwini ni le misaveni.’​—Mt 28:18.

• ‘Xikwembu Nkulukumba a mu tlakuxile a henhla-henhla ngopfu, a mu nyika ni vito ledzri nga henhla ka mavito hinkwawu.’​—Flp 2:9.

14. Xana wa kholwa leswaku a Huvo Leyi Zrangelaka ya Timboni ta Yehovha i ‘nandzra lwe wa ku dumbeka ni ku tlhazriha’ lweyi a bekiwiki ha Yesu?

• ‘Hi mani ke a nandzra lwe wa ku dumbeka ni ku tlhazriha, lweyi a hosi yakwe yi mu bekiki henhla ka ndangu wakwe akuva a wu yavela swakuda hi la ku fanekelaka na?’​—Mt 24:45.

15. Xana a moya wa ku xwenga i mhunu?

• ‘A xizrun’wa xi yangula xi ku ku yene: A moya lo wa ku xwenga wu ta ta henhla kwaku, ni ntamu wa Lweyi a nga henhla-henhla wu ta ku fukumeta; hi leswo ke leswi swa ku xwenga swi taka belekiwa swi ta txhuliwa N’wana wa Xikwembu Nkulukumba.’​—Lk 1:35.

• ‘Imbosi n’wine n’wi nga lava mfani, n’wi swi kotaka ku hanana vanenu leswinene, a ngopfu tatana lwe wa le tilwini a ta nyika moya lowa ku xwenga ku lava kombelaka ku yene!’​—Lk 11:13.

16. Xana Yehovha a wu tizrisa hi ndlela yini moya wakwe lowa ku xwenga?

• ‘A matilu ma yentxiwe hi zritu dzra Yehovha ni yimpi hinkwayu ya wone, hi hika dzra nomu wakwe.’​—Ps 33:6.

• ‘N’wi ta nyikiwa ntamu, loko moya lowa ku xwenga wu ta va wu xikeli ku n’wine; kutani n’wi ta va timboni tanga . . . ku ya tlhasa a wugan’wini bya misava.’​—Min 1:8.

• ‘A ku na wuprofeta bya tsralwa lebyi nga ni ku tlhamuxeliwa ka vhanu. Hikusa a wuprofeta a bya vanga byi tisiwa ha ku zrandzra ka mhunu, kambe a vhanu va Xikwembu Nkulukumba ve ku khanela na va susumetiwa hi moya lowa ku xwenga.’​—2Pe 1:20, 21.

17. I yini Mfumu wa Xikwembu Nkulukumba?

• ‘A masikwini ya tihosi leti Xikwembu Nkulukumba wa tilu a ta pfuxa mfumu lowu nga tiki honeka ni siku ni dzrin’we; a wuhosi bya wone byi ngaka byi nga hundzri byi ya ku tiko dzrin’wana; kambe wu ta tsrhova ni ku helisa mimfumu leyi hinkwayu, wu ta va kone hinkwayu minkama.’​—Dn 2:44.

18. Xana Mfumu wa Xikwembu Nkulukumba wu ta ku pfunisa kuyini?

• ‘A ta hlangula minyembeti hinkwayu a mahlweni yavu; ni ku fa ku nga ha vi kone; ku nga ha vi na nkosi, ni ku bongosa, ni ku vaviseka; hikusa swa ku sungula swi hundzrile.’​—Mpf 21:4.

19. U swi tivisa kuyini leswaku a matovoko ya Mfumu ma ta tlhasa ku nga li khale?

• ‘A vadondzrisiwa va ta ku yene, na ve swavu, va ku ku yene: Hi byele a nkama lowu swi taka humelela ha wone, u hi tivisa ni xikombiso xa ku buya kwaku, ni xa ku hela ka misava. Yesu a va yangula, a ku ku vone: . . . A tiko dzrin’wana dzri ta pfukela dzrin’wana tiko, ni mfumu wun’we wu ta pfukela mfumu wun’wanyana a ntamu; ku ta va ni tindlala ni swimbeta ku min’wana mimbangu. Kutani a evhangeli ledzri dzra Mfumu dzri ta zrezriwa misaveni hinkwayu, byi va wumboni ku hinkwawu matiko: hi kone kutani ku taka tlhasa vugamu.’​—Mt 24:3, 4, 7, 14.

• ‘A masikwini ya vugamu, ku ta tlhasa minkama lemimfani. Hikusa vhanu va ta va vatizrandzri, a vazrandzri va mali, lava tidumbaka, lava tikulisaka, a vasandzri, lava ku ka va nga yingiseti vapswele vavu, lava nga tivikiki ku tlangela, lava ngeke na ku khongota, lava pfumalaka lizrandzru, lava nga dumbekiki, lava ku lumbeta, lava nga tivikiki ku tikhoma, lava ku lebya, lava nga zrandzrikiki lavanene, a vawongi, a vahlundzruki, lava tikukumuxaka, lava zrandzraka ku titsrhavisa va nga zrandzri Xikwembu Nkulukumba, va ka ku va ni xiyimu xa vukhongoti, kasi va landzruli ntamu wa byone.’​—2Tm 3:1-5.

20. U swi kombisisa kuyini leswaku a Mfumu i wa lisima kwaku?

• ‘Zrangani n’wi djula Mfumu wa Xikwembu Nkulukumba ni ku lulama kwakwe.’​—Mt 6:33.

• “Yesu a byela vadondzrisiwa vakwe a ku: “Loko mhunu a djula ku ni landzrela, a a tiyale, a zrwala mhandzri yakwe ya nxanisa a ni landzrela minkama hinkwayu.”​—Mt 16:24, NM.

21. Xana Sathana ni mademona yakwe i vamani?

• ‘N’wine n’wi pfa ku tatana wenu a nga Diyavulosi. . . . Lweyo i mudlayi wa vhanu ku sukela ku sunguleni.’​—Yh 8:44.

• ‘Ka ku txukumetiwa Dragona ledzrikulu, a nyoka ya khale, ledzri txhuliwaka Diyavulosi na Sathana, ledzri kanganyisaka misava hinkwayu; dzra ku txukumeteliwa misaveni, ni tintsrumi ta dzrone, ti txukumetiwa kun’we na dzrone.’​—Mpf 12:9.

22. Xana Sathana a mu hehlise kuyini Yehovha ni vagandzreli Vakwe?

• ‘A wansati a ku ku nyoka: Hi nga da a mihandzru ya mizri ya xizramba: kambe a mihandzru ya muzri lowu nga makazri ka xizramba yone Xikwembu Nkulukumba a te: N’wi nga ve da, n’wi nga ve yi khumba, suka n’wi fa. A nyoka yi ku ku wansati: N’wi nga fe ni kutsrongo: Swa ku va leswi Xikwembu Nkulukumba a tivaka leswaku a siku ledzri n’wi daka, a mahlo yenu ma ta pfuleka, n’wi ta fana ni Xikwembu Nkulukumba, n’wi tiva leswa hombe ni leswa ku biha.’​—Gn 3:2-5.

• “Kambe Sathana a yangula Yehovha a ku: ‘Xikhumba hi xikhumba. Hinkwaswu leswi mhunu a nga naswu a ta swi nyikela leswaku a huluxa wutomi byakwe.’ ”​—Yb 2:4, NM.

23. U nga swi kombisisa kuyini leswaku a swihehlo swa Sathana i swa madzrimi?

• “U mu tizrela [Xikwembu Nkulukumba] hi mbilu hinkwayu.”​—1Mk 28:9, NM.

• “Ku kondzra ndzri fa, ndzri ngaka ndzri nga tsrhiki wudumbeki byanga!”​—Yb 27:5, NM.

24. Ha yini vhanu va fa?

• ‘Swanga hi leswi ha mhunu mun’we a xihono xi nga nhingena misaveni, ni hi xo xihono ka nhingene ku fa, hi swoswo a ku fa ku tlulele vhanu hinkwavu hi leswi hinkwavu va nga hona.’​—Ro 5:12.

25. Xana vafi va le ka xiyimu muni?

• ‘Lava hanyaka va swi tiva leswaku va ta fa; kambe a vafi a va tivi ntxhumu.’​—Ekl 9:5.

26. He dzrini dumbo dzra lava fiki?

• ‘Ku ta va ni ku pfuka ka lava ku fa, ni le ku valulami ni le ku lava mfani.’​—Min 24:15.

27. I vhanu vangani va taka ya fuma na Yesu a matilweni?

• ‘Ndzri lavisa: Ka ku voneka hambana yi yime a nhaveni ya Siyoni, kun’we ni lava khume dzra madzana ya madzana na mune wa madzana ya madzana na mune wa makume ya madzana kumbe 144.000, lava faka ve ni vito dzra yone, ni dzra Tatana wa yone, dzri tsraliwe a mimombyeni yavu.’​—Mpf 14:1.

Ka dondzro yaku ya Bibele, u kume wutivi mayelanu ni leswi Yehovha a swi kombelaka kwaku ni ndlela ya ku hanya hi milawu yakwe ya ku lulama. Akuva u hanya hi ku ya hi leswi u swi dondzriki, kumbexana swi djule u txintxa ka swinyingi a mahanyeleni yaku ni ndlela leyi u byi lavisaka ha yone wutomi. Leswi swoswi u tibekiseliki ku hanya hi milawu ya Yehovha ya ku lulama, wa faneleka ku yentxa ntizro lowu yamukelekaka wa ku va muzrezri wa madzrungula lamanene.

Ku kambisisa swivutiso leswi landzrelaka swi ta ku pfuna ku tiva milawu ya Yehovha ya ku lulama hi ndlela leyi khanyaka ni ku dzrimuka mintxhumu yimbeni leyi u nga yi yentxaka akuva u va mutizreli wakwe lweyi a yamukelekaka. Dzrungula ledzri dzri ta ku pfuna ku vona lisima dzra ku yentxa mintxhumu hinkwayu hi lipfalu ledzri basiki ni ku yisa lidzrumu ka Yehovha.​—2Ko 1:12; 1Tm 1:19; 1Pe 3:16, 21.

Leswi dondzro yaku yi ku yentxiki u tlhasa lani, a swi ganaganekisi leswaku u tiyimisele ku titsrongahatela wuhosi bya Yehovha ni ku hamba xiyenge xa nhlengeletanu yakwe. A swivutiso ni Matsralwa lama tsrhahiwiki swi ta ku pfuna ku kambisisa ndlela leyi u ku twisisaka ha yone ku titsrongahatela lulamiselo dzra Yehovha, ku nga ha va a ndzreni ka bandla, a ndangwini, kumbe a hansi ka wulawuli bya politika bya misava leyi. Handle ka ku ganaganeka, u ta ya u kulisa ndlela leyi u tlangelaka ha yone malulamiselo ya Yehovha ya ku dondzrisa vhanu vakwe ni ku va yaka hi tlhelo dzra moya. Malulamiselo lawo ma patsra mintlhanganu ya bandla leyi u taka nyonxela ku kumeka ni ku hlengemela ka yone hi ku hlamula loko swiyimu swi ku pfumelela.

Handle ka leswo, xiyenge lexi xi ta vulavula hi lisima dzra ku hlengemela nkama hinkwawu a ntizrweni wa ku zrezra hi Mfumu, ku pfuna vambeni ku tiva Yehovha ni leswi a swi yentxelaka vhanu swoswi. (Mt 24:14; 28:19, 20) Hi wugamu, xiyenge lexi xi ta ku pfuna ku twisisa leswaku a ku tinyiketela kwaku ka Yehovha ni ku babatisiwa a hi matlangwana. Tiyiseka leswaku Yehovha awa yi tlangela ndlela leyi u kombisiki ha yone leswaku wa ti tlangela timpswalu leti nga ku faneliki leti a ku kombisiki tone.

1. He wini nawu wa wukriste hi wukati? He xini xivangelo xin’we xa le matsralweni lexi pfumelelaka mhunu ku dlaya wukati?

• ‘Xana a mi dondzranga leswaku a Muvumbi, a ku sunguleni, a va yentxi wanuna ni wansati, kutani a ku: Hi leswo ke, wanuna a ta siya tatana ni mamana wakwe, a ta namazrela nsati wakwe; hi wubidzri byavu va ta va nyama yin’we. Hi leswo ke, a ve he vabidzri, ya ku va nyama yin’we; leswi ke Xikwembu Nkulukumba a nga swi tlhanganisa kun’we, a mhunu a nga txhuke a swi tsravukanisa. . . . Loko mhunu a hlongola nsati wakwe na ku nga vanga na vuwoswi, a tlhela a teka mun’wanyana, a yentxa vumbuye.’​—Mt 19:4-6, 9.

2. Ha yini lava hanyaka xikan’we swanga nuna na nsati va fanela ku tekana hi nawu? Loko u txhatile, xana wa tiyiseka leswaku mutxhatu waku wu le nawini nakone wa tiviwa hi mfumu?

• ‘Va dzrimuxe leswaku va tibeka hansi ka tihosi ni mintamu, va ya hi nawu.’​—Ti 3:1

• ‘A vukati a byi khensiwe ku hinkwavu, ni likuku dzri nga vi na xambya; kambe loko ve va vumbuye ni vawoswani Xikwembu Nkulukumba a ta va yavanyisa.’​—Hb 13:4.

3. He byini wutiyanguleli byaku a ndzreni ka ndangu?

• ‘N’wananga, yingela dondzro ya tatana waku, u nga fulazreli ku laya ka mamana waku.’​—Pr 1:8.

• ‘Hikusa a nuna i nhloko ya nsati, swanga ha Kriste a nga nhloko ya bandla. . . . Vavanuna, zrandzrani vasati venu, swanga hi leswi Kriste na yene a nga zrandzra bandla.’​—Ef 5:23, 25.

• ‘Vatatana, mi nga hlundzrukiseni vana venu, kambe va wundlani hi makhatela ni madondzrisela ya Hosi [Yehovha, NM].’​—Ef 6:4.

• ‘Vana, yingisetani vapswele venu mintxun’wini hinkwayu, hikusa i swa hombe leswo a Hosini.’​—Kl 3:20.

• ‘Na n’wine vasati, yingisetani vanuna venu.’​—1Pe 3:1.

4. Ha yini hi fanela ku bekela lisima wutomi?

• ‘[Xikwembu Nkulukumba] lweyi a nyikaka hinkwavu a vutomi ni hika ni hinkwaswu. . . . Hikusa ku yene ha hanya, ha famba-famba, hi ni ku va kone.’​—Min 17:25, 28.

5. Ha yini hi nga fanelanga ku dlaya mhunu, nambi n’wana lwa nga siki pswaliwa?

• ‘Loko vhanu va lwa, va vavisa wansati lwe wa nyimba . . . loko ku humelela mhangu, lanu ke u ta dzrihisa wutomi hi wutomi.’​—Eks 21:22, 23.

• ‘A mahlu yaku ma ni vonile na ni nga sanga na vumbiwa, kutani a bukwini dzraku ku tsraliwi hinkwawu masiku ya ku hanya kwanga; dzrin’wana ni dzrin’wana ku wone ma tsraliwile, na ni dzrin’we dzra wone dzri nga sanga na va kone.’​—Ps 139:16, TLM.

• ‘Leswi vengiwaka ha Yehovha . . . mavoko lama halataka ngati leyi ngeke na nandzru.’​—Pr 6:16, 17.

6. Xana wu li yini nawu wa Xikwembu Nkulukumba mayelanu ni ngati?

• ‘Mi tsrhika . . . ngati ni leswa ku fa hi xihluku.’​—Min 15:29.

7. Ha yini hi fanela ku zrandzra vakriste-kulozri?

• ‘Ni n’wi nyika nawu lowumpshwa, hi leswaku n’wi zrandzrana. Swanga hi leswi ni n’wi zrandzriki, na n’wine zrandzranani. Hi laha hinkwavu va taka tiva leswaku n’wi vadondzrisiwa vanga, loko n’wi zrandzrana.’​—Yh 13:34, 35.

8. Leswaku a mavabyi lama dlayaka ma nga tluleli vambeni: a) Ha yini mhunu lweyi a nga ni mavabyi lama tlulelanaka a nga fanelanga ku zranga a xingazra ni ku nyunta vambeni? b) Ha yini a nga fanelanga a vaviseka loko vambeni va nga mu zrambi makaya kwavu? c) Ha yini mhunu lweyi a nga ha txhukaka a li ni mavabyi lama tlulelanaka a fanela ku ya kambeliwa ngati hi ku swi zrandzra na a nga si sungula ku namorara? d) Ha yini mhunu lweyi a nga ni mavabyi lama tlulelanaka a fanela ku byela mutlhanganisi wa huvo ya vakulu na a nga si babatisiwa?

• ‘N’wi nga veneni ni nandzru wa ntxhumu ku mhunu; . . . U ta zrandzra wa le kwenu swanga ha wene. A lizrandzru a dzri yentxi wa le kwavu leswa ku biha.’​—Ro 13:8-10.

• ‘A mun’wana ni mun’wana a nga txhuki a ku tilavisela swa kwakwe, kambe a a lavisele ni swa van’wana.’​—Flp 2:4.

9. Ha yini Yehovha a yimela leswaku hi dzrivalela vambeni?

• ‘Vanani lava pfunanaka, lava vavelelanaka, lava dzrivalelanaka swanga hi leswi Xikwembu Nkulukumba na yene a nga n’wi dzrivalela ha Kriste.’​—Ef 4:32.

10. U fanela ku yentxa yini loko makwezru wa kukazri a ku lumbeta kumbe a ku kanganyisa?

• “Handle ka leswo, loko makwenu a yentxa xidoho, famba u ya yandlala xidoho xakwe na n’wi li vuswenu. Loko a ku yingela, u ta va u kume makwenu. Kambe loko a nga ku yingeli, yengeta u teka mun’we kumbe vabidzri akuva a mhaka hinkwayu yi ta tiyisiwa hi milomu ya timboni tibidzri kumbe tizrazru. Loko a yala ku va yingela, byela bandla. Loko nambi bandla a nga dzri yingeli, ku wene a a ve swanga hi wa matiko ni muhlengisi.”​—Mt 18:15-17, NM.

11. Xana Yehovha a swi vonisa kuyini swidoho leswi landzrelaka?

▪ Mahanyela ya ku biha hi tlhelo dzra tinkuku

▪ Ku tizrisa swithombe a wugandzrelini

▪ Wusodoma

▪ Ku yiva

▪ Mintlangu ya ku thela mali

▪ Ku popswa

• ‘N’wi nga wongiwe; loko ve vawoswani, loko ve lava khongotaka swithombe, ni va wumbuye, ni lava titsrhikaka, nambi vasodoma, nambi swi swiyivi, ni vafeleli kumbe va makwanga, ni timpopswi, ni vahlevi, ni vawutli, va ngaka va nga di pfindla dzra Mfumu wa Xikwembu Nkulukumba.’​—1Ko 6:9, 10.

12. Mayelanu ni mahanyela ya ku biha hi tlhelo dzra tinkuku, ku nga hinkwaswu leswi fambelanaka ni tinkuku a handle ka mutxhatu, xana u tiyimisele ku yentxa yini?

• ‘Tsrutsrumani n’wi txhava wumbuye!’​—1Ko 6:18.

13. Ha yini hi fanela ku tingawula swidzraha-dzrahana leswi fumanaka, leswi nga leletiwangakiki hi madokodela kumbe leswi txintxaka miyanakanyu?

• “Mi nyikela mizri yenu, yi va mhamba leyi hanyaka, ya ku xwenga ni leyi yamukelekaka ka Xikwembu Nkulukumba, ku nga ntizro wa ku xwenga hi ntamu wenu wa ku yanakanya. Nakone tsrhikani ku tifanisa ni misava ya swoswi, kambe ndzrulutiwani hi ku txintxa miyanakanyu yenu, akuva mi ta kota ku tiyiseka hi ku zrandzra ka Xikwembu Nkulukumba loku nga kunene ni loku yamukelekaka ni loku nyonxisaka.”​—Ro 12:1, 2, NM.

14. He swini swiyentxo swin’wana swa wudemona leswi Xikwembu Nkulukumba a swi tsimbisaka?

• ‘A nga vi kumeka mhunu ni mun’we ku wene . . .  mungoma ni lwa hlahluvaka, ni mupfhumbi, ni lwe wa vula, ni muzrungi wa tinfisa, ni lwa gongondzrelaka swikwembu, ni lwe wa tinhlolo ni lwa vutisaka vafi.’​—Dt 18:10, 11.

15. Loko mhunu a yentxe xidoho lexikulu kambe a djula ku kombisiwa timpswalu ha Yehovha, xana a fanela ku yentxa yini hi xihatla?

• ‘Ndzri ku tivisile a swihono swanga, a ndzri byi fihlanga a wusomboloki byanga.’​—Ps 32:5.

• ‘Xana a mun’we ku n’wine awa vabya xana? A a tivitanele vakulu va bandla, a va mu khongotelele, na va mu tota mafuzra hi vito dzra Yehovha. Kutani a xikhongoto xa ku pfumela xi ta huluxa muvabyi; Yehovha a ta mu wololoxa; nambi na e ku yentxa xihono a ta dzrivaleliwa xone.’​—Yk 5:14, 15, NM.

16. Loko u tiva leswaku mukriste kuloni a yentxe xidoho lexikulu, xana u fanela ku yentxa yini?

• “Loko mhunu a doha hi mhaka ya kuva a yingele ku zruketeliwa ka le livaleni nakone a li mboni kumbe a swi vonile kumbe a swi tivile kambe a nga swi hlayi, a ta hlamula hi kola ka xidoho xakwe.”​—Lv 5:1, NM.

17. Loko ku hambiwa xitiviso xa leswaku mhunu wa kukazri a nga ha li Mboni ya Yehovha, xana hi fanela ku mu teka hi ndlela yini?

• ‘N’wi nga tlhangani ni lweyi a tihlayaka makwenu, na e lweyi wa vumbuye, kumbe lweyi a navelaka ku fuya, kumbe lweyi a gandzrelaka swithombe, kumbe mulumbeti, kumbe mpopswi, kumbe muwutli; loko a li lwe wa ku nhaso, mfuzri n’wi nga de na yene.’​—1Ko 5:11.

• ‘Loko . . . ku ta mhunu ku n’wine, na a nga tisi dondzro leyi, n’wi nga mu yamukeleni a tindlwini tenu, n’wi nga mu loseni; hikusa lweyi a mu losaka a tlhangana kumbe a twanana ni mintizro yakwe lemimfani.’​—2Yh 10.

18. Ha yini vanghanu vaku lavakulu va fanela ku va lava zrandzraka Yehovha?

• ‘Lwa fambaka ni tintlhazri a ta tlhazriha; kambe lweyi a tolovelanaka ni swihunguki a ta honeka.’​—Pr 13:20.

• ‘N’wi nga lahlekeni. Ku tolovelana ni lavamfani ku bolisa swihena leswinene.’​—1Ko 15:33.

19. Ha yini Timboni ta Yehovha ti nga tipeti ka politika?

• ‘A hi va misava, swanga ha mine [Yesu] ni ngeke wa misava.’​—Yh 17:16.

20. ‘Ha yini u fanela ku yingiseta wuhosi?

• ‘A mun’wana ni mun’wana a a yingisete vuhosi lebyi nga kone; hikusa a ku na vuhosi lebyi nga humikiki ku Xikwembu Nkulukumba; mfuzri a tihosi, leti nga kone, te ku bekiwa hi Xikwembu Nkulukumba.’​—Ro 13:1.

21. U nga yentxa yini loko mfumu wu djula kuva u yingiseta nawu lowu lwisanaka ni nawu wa Xikwembu Nkulukumba?

• ‘Swi fanekeli ku yingela Xikwembu Nkulukumba ku tlula vhanu.’​—Min 5:29.

22. He wani matsralwa ma nga ku pfunaka ku hambana ni misava loko u hlawula ntizro?

• ‘A tiko dzri ngaka dzri nga ha tlakuxi lipanga henhla ka dzrin’wana, ma ngaka ma nga ha dondzri ku lwa.’​—Mik 4:3.

• ‘Humani ku yene [Babilona Lwenkulu], vhanu vanga, akuva n’wi nga vi na yavelo a swihonweni swakwe, ni kuva n’wi nga yamukeli makhombo.’​—Mpf 18:4.

23. I mahungatela ya muxaka muni lawa u nga ma hlawulaka ni lawa u nga ma tingawulaka?

• ‘Yehovha . . . a venga lwemfani ni lwa zrandzraka ku lebya.’​—Ps 11:5.

• ‘Hambulani leswimfani, n’wi namazrela leswinene.’​—Ro 12:9.

• ‘A ku heleni, vamakwezru, ndzri li: hinkwaswu leswi nga xihlayelamfuzri, leswi khensekaka, leswi lulamiki, leswi basiki, leswi zrandzrekaka, leswi nga ni vito ledzrinene, loko ku ni leswi nga ni vunene ni ku khensiwa, swi kumbukani.’​—Flp 4:8.

24. Ha yini Timboni ta Yehovha ti nga tipatsri ni wukhongoti byimbeni a ku gandzreleni ka Xikwembu Nkulukumba?

• ‘A n’wi na ku swi kota a ku nwa a ntsrheko wa Hosi ni wa mademona.’​—1Ko 10:21, TLM.

• “Mi tsravukana navu, ku hlaya Yehovha, mi nga khomeni leswa xambya; kutani ni ta mi yamukela.”​—2Ko 6:17, NM.

25. He yini minsinya ya milawu leyi nga ku pfunaka ku vona leswaku u fanela ku ya kumbe u nga yi ka nkhuvu wa kukazri?

• ‘Va ku tlhangana ni matiko lawo, va dondzra mintizro yavu. Va tizrela swifaniso swavu, swi va swi va ntlhamu ku vone.’​—Ps 106:35, 36.

• ‘Kambe a vafi a va tivi ntxhumu.’​—Ekl 9:5.

• ‘A hi va misava, swanga ha mine ndzri ngeke wa misava.’​—Yh 17:16.

• ‘Hikusa wu dzringanile a nkama lowu khalutiki, wa ku yentxa ku zrandzra ka vamatiko, hi ku tifambela vuwoswanini ni le ku naveleni ni le ku popsweni, ni le mafexteni, ni le ku nweni, ni le ku gandzreleni loka likasi ni ka swithombe.’​—1Pe 4:3.

26. Xana swikombiso swa le Bibeleni swi nga ku pfunisa kuyini ku vona leswaku swa fanela kumbe a swi faneli ku tlangela malembe ya ku pswaliwa?

• ‘Hi siku dzra vuzrazru, a siku dzra ku belekiwa ka Faro, a ku hambela malandzra yakwe fexta; a ku tlakuxa nhloko ya ndzruna ya vatxheleli ni nhloko ya ndzruna ya vaswekeli a makazri ka malandzra yakwe. A ku buyelisa ndzruna ya vatxheleli a wutxheleleni bya yone . . . a ku hayeka ndzruna ya vaswekeli.’​—Gn 40:20-22.

• ‘Hi siku dzra fexta dzra ku belekiwa ka Heroda, a n’wana wa wanhwanyana wa Herodiya a kina makazri kwavu, a tsrhavisa Heroda, lakakuva a va a mu dumbisa hi ku hlambanya, a ku a ta mu nyika xini ni xini, lexi a taka kombela xone. Lweyi wanhwanyana, hi ku susumetiwa hi mamana wakwe, a ku: Ndzri nyike kola, a mbakeni, a nhloko ya Yohane mubabatisi. Kutani a zruma ku ya tsrema nhloko ya Yohane, a bohelweni.’​—Mt 14:6-8, 10.

27. Ha yini u fanela ku landzra nkongomiso wa vakulu?

• ‘Yingisetani vafambisi venu, n’wi tibeka hansi kwavu, hikusa vone va hitekela mahika yenu, swanga hi leswi va taka vutisiwa ha wone; akuva va swi tizra hi ku tsrhava na va nga konyi, hikusa afa swi nga ti n’wi pfuna leswo.’​—Hb 13:17.

28. Ha yini swi li swa lisima kwaku ni ka ndangu waku ku tinyika nkama wa ku hlaya ni ku dondzra Bibele?

• ‘A . . . titsrhavela nawini wa Yehovha, a wu yanakanya nhlikanhi ni vusiku. A fana ni muzri lowu byaliwiki kusuhi ni mati la ya ku tsrutsruma, lowu pswalaka mihandzru ya wone hi nsiku ya yone, a makamba ya wone ma nga buni; hinkwaswu leswi a swi yentxaka swi humelela ha hombe.’​—Ps 1:2, 3.

29. Ha yini u zrandzra ku va kone a mintlhanganwini ni ku hlengemela ka yone hi ku hlamula?

• ‘Ndzri ta hlaya vito dzraku ku vamakwezru, ndzri ta ku twalisa a makazri ka nhlengeletanu.’​—Ps 22:22.

• ‘Hi va hi yanakanyana, hi susumetana a lizrandzrwini ni swiyentxweni leswinene; hi nga tsrhiki ku hlengeletana, swanga hi leswi van’wana va swi toloveliki, kambe hi khongotelana; ngopfu na swone hikusa n’wi vona leswaku a siku dzri tsrhindzrekela kusuhi.’​—Hb 10:24, 25.

30. He wini ntizro wa lisima lowu Yesu a hi nyikiki akuva hi wu yentxa?

• ‘Hi leswo ke, fambani n’wi ya dondzrisa matiko hinkwawu, n’wi va babatisa . . . n’wi va dondzrisa ku bekisa hinkwaswu leswi ndzri n’wi leletiki swone.’​—Mt 28:19, 20.

31. He dzrini vonela ledzri Yehovha a nyonxelaka leswaku hi va nadzru loko hi nyikela swihanano a ntizrweni wa Mfumu kumbe loko hi pfuna vamakwezru?

• ‘Dzrumisa Yehovha hi leswi u nga naswu.’​—Pr  3:9.

• ‘A mun’wana ni mun’wana a a humexe swanga hi leswi a pimisisiki xiswone a mbilwini yakwe, ku nga ve ha ku vaviseka na ha ku sindzrisiwa; hikusa Xikwembu Nkulukumba a zrandzra lwa hananaka na a tsrhavile.’​—2Ko 9:7.

32. I swikazratu muni leswi vakriste va swi tivaka leswaku va ta lavisana naswu?

• ‘Va ni ndjombo lava xaniseliwaka ku lulama; hikusa Mfumu wa matilo i wavu. N’wi ta va ni ndjombo loko va n’wi zruka, va n’wi xanisa, va hlaya mazritu hinkwawu ya ku biha ha n’wine hi ku hemba, hi nkonta yanga. Tsrhavani, n’wi tsrhavisisa, hikusa hakelo dzrenu i dzrikulu matilweni. Hikusa va xanisise xiswoswo vaprofeta lava nga va kone, lava nga n’wi zrangela.’​—Mt 5:10-12.

33. Ha yini ku li ndjombo ya ku hlawuleka kuva u babatisiwa swanga Mboni ya Yehovha?

• ‘A mazritu yaku ma ve ku mine ku nyonxa ni ku tsrhava ka mbilu yanga; hikusa ndzri txhuliwe hi vito dzraku, we Yehovha, Xikwembu Nkulukumba wa makhandzra.’​—Yr 15:16.

Hi ntolovelo babatiso dzri hambiwa a tinhlengeletanwini ta muganga ni le tinhlengeletanwini letikulu ta xifundzra ta Timboni ta Yehovha. Loko wukaneli bya babatiso byi ya ku heleni, xikaneli xi ta kombela lava yaka ku babatisiweni leswaku va sekeleka va hlamula swivutiso swibidzri leswi landzrelaka hi zritu dzra ku tlakuka:

1. Xana u tisolile a swidohweni swaku, u tinyiketela ka Yehovha, u tlhela u pfumela ka ndlela yakwe ya ku huluxa hi ku tizrisa Yesu Kriste?

2. Xana wa swi twisisa leswaku babatiso dzraku dzri ku yentxa u tiviwa swanga mun’wana wa Timboni ta Yehovha lweyi a fambisanaka ni nhlengeletanu ya Yehovha?

Loko lava yaka ku babatisiweni va hlamula swivutiso leswi va ku ina, va va na va swi “hlaya a livaleni” leswaku va kombisa lipfumelo ka xitizrulo ni leswaku va tinyiketele hi ku helela ka Yehovha. (Ro 10:9, 10) Lava djulaka ku babatisiwa va fanela ku zranga va khongota ni ku yanakanyisisa hi swivutiso leswi akuva va kota ku hlamula hi ku ya hi leswi mhunu ha byakwe a swi kholwaka.

Xana u tinyiketelile ka Yehovha hi xikhongoto, u mu dumbisa ku gandzrela yene ntsena ni ku yentxa ku zrandzra kwakwe swanga ntxhumu wa lisima ku tlula hinkwaswu a wuton’wini byaku?

Xana wa kholwiseka hi ku helela leswaku u djula ku babatisiwa ka nhlengeletanu leyi landzrelaka?

Xana u fanela ku yambalisa kuyini loko u ya ku babatisiweni? (1Tm 2:9, 10; Yh 15:19; Flp 1:10)

Hi fanela ku yambala ‘hi ku simama ni hi ku tikhoma’ akuva hi kombisa leswaku hi ‘tizrela Xikwembu Nkulukumba’. Xileswo, lava yaka ku babatisiweni a va fanelanga va yambala mpahla leyi gomiki, yi kombisaka mizri loko va tsrakamile kumbe leyi tsraleteliwiki. Va fanela ku yambala mpahla leyi basiki, yi hlelekiki, ni leyi fanelekaka ka xiyentxakalo lexo.

Xana mhunu a fanela ku tikhomisa kuyini loko a babatisiwa? (Lk 3:21, 22)

Babatiso dzra Yesu dzri beke xikombiso xa ndlela leyi vakriste va fanelaka ku babatisiwa ha yone namunhla. A a swi twisisa leswaku babatiso a hi gwansu dzra matlangwana, nakone a swi kombise hi mimpimiso ni hi mintizro. Xileswo, a mbangu wa babatiso a hi wa ku hamba mafenya, wa ku tlangela kone, ku hlambeta, kumbe swimbeni leswi nga ha susaka lisima dzra babatiso; handle ka leswo mukriste lweyi a ha ku babatisiwaka a nga fanelanga ku titeka ingi hi loko a ganye xihiwa xa kukazri lexikulu. Nambi leswi ku babatisiwa swi nyonxisaka, ku nyonxa koloko ku fanela ku kombisiwa hi ndlela ya xitxhavu.

Xana ku ya mintlhanganwini nkama ni nkama ni ku titlhanganisa ni bandla swi ta ku pfunisa kuyini ku ya mahlweni u tinyiketela ka Yehovha?

A ntsrhaku ka ku babatisiwa ha yini swi ta va swa lisima ku tibekela xiyimiso lexinene xa dondzro ya ximhunu ni ku ya nsin’wini nkama ni nkama?