Ndlela Leyi Wukhongoti Bya Madzrimi Byi Hembelaka Xikwembu Nkulukumba Ha Yone

Leswi Xikwembu Nkulukumba a nga lizrandzru, ha yini mintxhumu yinyingi ya ku biha yi yentxiwa hi wukhongoti lebyi hlayaka leswaku byi tizrela Xikwembu Nkulukumba? Hi ku kongoma, wukhongoti byobyo i bya madzrimi; byi hembela Xikwembu Nkulukumba. Xana wukhongoti bya madzrimi byi hembela Xikwembu Nkulukumba hi ndlela yini? Xana yene a titwisa kuyini hi swoswo nakone i yini leswi a taka swi yentxa?

1. Xana wukhongoti bya madzrimi byi mu hembelisa kuyini Xikwembu Nkulukumba hi tidondzro ta byone?

Wukhongoti bya madzrimi byi ‘ndzrulute xihlayelamfuzri xa Xikwembu Nkulukumba, [byi] xi hamba madzrimi’. (Ba-le-Roma 1:25) Hi xikombiso, ku tala ka byone a byi va dondzrisi vhanu a vito dzra Xikwembu Nkulukumba. Kambe Bibele dzri li i swa lisima ku tizrisa vito dzrake. (Ba-le-Roma 10:13, 14) Loko ku yentxeka ntxhumu wa ku biha, vazrangeli va magereja va li: “A ve ku zrandzra ka Xikwembu Nkulukumba.” Kambe leswo i madzrimi. Xikwembu Nkulukumba a nge txhuki a yentxa ntxhumu wa ku biha. (Dondzra Yakob 1:13.) Lexi vavisaka, madzrimi wolawo ma hambanisa vhanu na Xikwembu Nkulukumba.

2. Xana wukhongoti bya madzrimi byi mu hembelisa kuyini Xikwembu Nkulukumba hi mintizro ya byone?

Bibele dzri li swidoho swa wukhongoti bya madzrimi ‘swi longoloke swi ya tlhasa tilweni’. (Apfuletelo 18:5) Ku dzringana madzana ya malembe, a wukhongoti byi tinghenisela ka politika byi tlhela byi seketela tiyimpi. Handle ka leswo, byi vange byi tlhela byi seketela a ku dlayiwa ka vhanu va magidigidi. Vazrangeli van’wana va hanya wutomi bya mafehlefehle nakone va djula leswaku swizro swa gereja swi va humesela mali. Wukhongoti bya madzrimi a byi va khomi a vhanu hi ndlela leyi Yehovha a va khomaka ha yone. Vazrangeli volavo va li va zrumiwe ha Xikwembu Nkulukumba, kambe mintizro yavu yi hlaya swa ku hambana ni swoswo. Phela nambi Xikwembu Nkulukumba a va mu tivi!—Dondzra 1 Yohan 4:8.

3. Xana Xikwembu Nkulukumba a titwisa kuyini hi wukhongoti bya madzrimi?

Loko leswi yentxiwaka hi wukhongoti bya madzrimi swi ku hlundzrukisa, xana u vona leswaku Yehovha a titwisa kuyini? Yehovha awa va zrandzra vhanu, kambe awa va hlundzrukela vazrangeli va wukhongoti lava mu hembelaka va tlhela va nga va khomi ha hombe vhanu va gereja. A dumbisa leswaku wukhongoti bya madzrimi byi ta helisiwa, byi “nga ha kumiwi”. (Apfuletelo 18:21) Xileswo, ku nga li khale, Xikwembu Nkulukumba a ta helisa wukhongoti hinkwabyu bya madzrimi.—Apfuletelo 18:8.

KELISISA

4. A hi wukhongoti hinkwabyu byi nyonxeliwaka hi Xikwembu Nkulukumba

Vanyingi va kholwa leswaku wukhongoti byi fana ni tindlela ta ku hambanahambana leti hinkwatu ka tone ti yisaka ka Xikwembu Nkulukumba. Kambe xana leswo i ntiyiso? Dondzrani Matewu 7:13, 14, mi gama mi bulisana hi xivutiso lexi:

• Xana Bibele dzri li ndlela leyi yisaka a wuton’wini yi tsrhamisise kuyini?

Vonani VHIDIYU, mi gama mi bulisana hi xivutiso lexi landzrelaka.

VHIDIYU: Xana Xikwembu Nkulukumba A Yamukela Tindlela Hinkwatu Ta Wugandzreli—Xitlephu (3:22)

• Xana Bibele dzri hlaya leswaku ku ni wukhongoti byinyingi lebyi nyonxisaka Xikwembu Nkulukumba?

5. Wukhongoti bya madzrimi a byi kombisi lizrandzru dzra Xikwembu Nkulukumba

Wukhongoti byi hembele Xikwembu Nkulukumba hi tindlela tinyingi. Yin’we ya tindlela leyi xiyekaka ngopfu i ku nghenela ka byone a tiyimpini. Akuva u vona xikombiso xa leswo, vonani VHIDIYU, mi gama mi bulisana hi swivutiso leswi landzrelaka.

VHIDIYU: Xiyenge Xa Wukhongoti A Yimpini Ya Wubidzri Ya Misava (2:22)

• Xana magereja manyingi ma teke xiyimu xini hi nkama wa Yimpi Ya Wubidzri Ya Misava?

• U titwisa kuyini hi xiyimu lexi ma xi tekiki?

Dondzrani Yohan 13:34, 35 na 17:16, mi gama mi bulisana hi swivutiso leswi:

• Xana Yehovha a titwisa kuyini loko wukhongoti byi tinghenisela ka tiyimpi?

• Wukhongoti bya madzrimi byi zrwala nandzru hi mintxhumu yinyingi ya ku biha. Hi swini leswi u swi voniki leswi swi kombaka leswaku wukhongoti a byi swi koti ku kombisa lizrandzru dzra Xikwembu Nkulukumba?

6. Xikwembu Nkulukumba a djula ku ntsrhunxa vhanu ka wukhongoti bya madzrimi

Dondzrani Apfuletelo 18:4,a mi gama mi bulisana hi xivutiso lexi:

• Xana ku tiva leswaku Xikwembu Nkulukumba a djula ku huluxa vhanu lava kanganyisiwiki hi wukhongoti bya madzrimi, swi ku yentxa u titwisa kuyini?

7. Tama u dondzra mayelana na Xikwembu Nkulukumba wa ntiyiso

Xana wukhongoti bya madzrimi byi fanela ku ku yentxa u sola Xikwembu Nkulukumba? A hi nge n’wana wa kukazri a yala nkongomiso lowunene lowu papayi wake a mu nyikaka wone, a gama a suka kaya a ya hanya wutomi bya manyala. Papayi wake a nga nyonxi hi mintizro ya n’wanake. Xana swi nga twala loko ho sola papayi lweyo hi mahanyela ya n’wanake lwa yalaka ku layiwa?

• Xana swi nga twala loko hi zrwexa Yehovha nandzru hi va hi tsrhika ku dondzra mayelanu na yene hi mhaka ya mintizro ya wukhongoti bya madzrimi?

NKATSRAKANYU

Wukhongoti bya madzrimi byi hembele Xikwembu Nkulukumba hi kola ka tindondzro ta byone ta madzrimi ni mintizro ya byone ya ku biha. Xikwembu Nkulukumba a ta helisa wukhongoti bya madzrimi.

Mpfuxeto

• Xana u titwisa kuyini hi leswi wukhongoti bya madzrimi byi swi dondzrisaka ni mahanyela ya byone?

• Xana Yehovha a titwisa kuyini hi wukhongoti bya madzrimi?

• Xana Xikwembu Nkulukumba a ta yentxa yini hi wukhongoti bya madzrimi?

HANDZRISISA

Dondzra mayelana ni tindlela tibidzri leti ku tala ka wukhongoti byi khunguvanyisaka Xikwembu Nkulukumba ha tone.

“Xana Wukhongoti Bya Fana? Hinkwabyu Bya Yamukeleka Ka Xikwembu Nkulukumba?” (Leswi kumekaka ka jw.org)

Ha yini Yehovha a djula leswaku hi mu gandzrela na hi li xikan’we ni vambeni?

“Xana I Swa Lisima Ku Va Ka Wukhongoti Bya Kukazri?” (Leswi kumekaka ka jw.org)

Padri wa kukazri a a kazrateka hi wukhongoti byake. Kambe leswo a swi mu sivelanga ku dondzra ntiyiso mayelanu na Xikwembu Nkulukumba.

“Leswi Yentxiki Padri Wa Kukazri A Tsrhika Gereja Dzrake” (Pfukani!, Fevhereru wa 2015)

A tinxakeni hinkwatu, wukhongoti byi dondzrise vhanu madzrimi lama yentxaka Xikwembu Nkulukumba a voneka ingiki a le kule nakone a ni mona. Dondzra ntiyiso mayelana ni tindondzro tizrazru ta madzrimi wolawo.

“Madzrimi Lama Yentxaka Xikwembu Xi Voneka Ingiki A Xi Na Lizrandzru” (Xihondzro Xa Ku Zrindzra, 1 ka Novhembru wa 2013)