XIDONDZRO 01
Xana Bibele Dzri Nga Ku Pfunisa Kuyini?
Hinkwezru hi ni leswi hi tivutisaka swone hi wutomi, ku xaniseka, lifu ni leswi taka yentxeka a nkameni lowu taka. Handle ka leswo, siku ni siku hi ni leswi swi hi kazrataka swa ku fana ni leswi: Xana hi ta yi kuma kwini mali ya ku tihanyisa? Hi nga swi kotisa kuyini ku va ni ndangu lowu nyonxiki? Vanyingi va kume leswaku Bibele dzri va hlamula swivutiso swa lisima dzri tlhela dzri va pfuna a wuton’wini byavu bya siku ni siku. Wene ke, u swi vonisa kuyini? Xana Bibele dzri nga hi pfuna hinkwezru?
1. He swini swin’we swa swivutiso leswi Bibele dzri swi hlamulaka?
Bibele dzri hlamula swivutiso leswi swa lisima: Xana wutomi byi sungulise kuyini? Hi hanyela yini? Ha yini vhanu lava kalaka va nga na nandzru va hlupheka? Xana loko mhunu a file, a ya kwini? Leswi hinkwezru hi djulaka ku zrula, ha yini la misaveni ku tale hi tiyimpi? Ku ta yentxeka yini hi misava a nkameni lowu taka? A Bibele dzri hi kutxa ku djula tinhlamulo ta swivutiso leswi, nakone makhulukhulu ya vhanu ma nyonxisiwile hi tinhlamulo ta dzrone.
2. Xana Bibele dzri nga hi pfunisa kuyini akuva hi hanya hi ku nyonxa siku ni siku?
Bibele dzri hi nyika swilayu leswinene. Hi xikombiso, Bibele dzri dondzrisa mindangu ndlela ya ku kuma ku nyonxa ka ntiyiso. Dzri hi komba leswi hi nga swi yentxaka loko hi li swiyin’wini leswi hi tlhanyisaka nhloko, ni ku zrandzra ntizro lowu hi wu yentxaka. U ta dondzra leswi Bibele dzri swi dondzrisaka mayelanu ni timhaka leti ni timbeni nkama lowu hi bulaka hi dzrungula ledzri xikan’we. U ta pfumelelana ni leswaku ‘a matsralwa hinkwawu [Bibele hinkwadzru] . . . ma lulamele ku dondzrisa’.—2 Timoteo 3:16.
Xibukwana lexi a xi sivi Bibele. A matsrhan’wini ya leswo, xi ku kutxa kuva u kambisisa Bibele hi wuswaku. Xileswo, hi ku kutxa kuva u dondzra matsralwa lama kombisiwiki ka dondzro yin’wana ni yin’wana u gama u dzringisa ku vona ku yelana ka wone ni leswi u swi dondzraka.
KELISISA
Vona ndlela leyi Bibele dzri pfunaka vhanu ha yone, ndlela u nga zrandzraka ku dzri dondzra ha yone ni leswaku ha yini swi li swinene akuva u kuma mpfunu wa ku dzri twisisa.
3. Bibele dzri nga hi kongomisa
Dzri fana ni xigezana lexi vaningaka ngopfu swinene. Bibele dzri nga hi pfuna ku hamba swiboho leswinene dzri tlhela dzri hi pfuna ku vona leswi taka yentxeka a nkameni lowu taka.
Dondzrani Amapsalma 119:105, mi gama mi bulisana hi swivutiso leswi landzrelaka:
A mutsrali wa psalma ledzri a a dzri vonisa kuyini Bibele?
Wene ke, u dzri vonisa kuyini Bibele?
4. Bibele dzri nga hlamula swivutiso swezru
Wansati mun’we a gungule leswaku Bibele dzri ni tinhlamulo ta swivutiso leswi a swi mu kazrata hi malembe ya ku tala. Txhaya vhidiyu u gama u hlamula swivutiso leswi landzrelaka. Vonani VHIDIYU, mi gama mi bulisana hi swivutiso leswi landzrelaka:
Ka vhidiyu ledzri, he swini swivutiso leswi lweyi wansati a a li na swone?
Xana ku dondzra Bibele swi mu pfunise kuyini?
Bibele dzri hi kutxa ku hamba swivutiso. Dondzrani Matewu 7:7, mi gama mi bulisana hi xivutiso lexi landzrelaka:
Hi swini swivutiso leswi u nga na swone leswi Bibele dzri nga ha swi hlamulaka?
5. U nga dondzra Bibele hi ndlela ya ku nyonxisa
Vhanu vanyingi va swi zrandzra ku dondzra Bibele nakone va pfunekile ha dzrone. Vonani VHIDIYU, mi gama mi bulisana hi swivutiso leswi landzrelaka:
Ka vhidiyu, xana vampshwa a va titwisa kuyini hi ku dondzra mabuku?
Nambileswi a va nga swi zrandzri ku dondzra mabuku, ha yini swoswi va zrandzra ku dondzra Bibele?
Bibele dzri li dzri nga hi nyika swileleto leswi swi nga hi khongotelaka ni ku hi nyika ku lavisela. Dondzrani Ba-le-Roma 15:4, mi gama mi bulisana hi xivutiso lexi landzrelaka:
Xana wa nyonxa hi ku tiva leswaku Bibele dzri dumbisa leswaku dzri ta hi khongotela dzri tlhela dzri hi nyika ku lavisela?
6. Swa xonga ku tsrhika vambeni va hi pfuna ku twisisa Bibele
Handle ka kuva va tidondzrela Bibele wuswavu, vanyingi va vone leswaku swa xonga ku bula ha dzrone ni vambeni. Dondzrani Amintiṛo 8:26-31, mi gama mi bulisana hi xivutiso lexi landzrelaka:
I yini xi nga hi pfunaka ku twisisa Bibele?—Vona tindzrimana 30, 31.
Mu-Etiyopiya a djule xipfunu akuva a twisisa matsralwa. Vhanu vanyingi namunhla va vone swi pfuna ku bula hi Bibele ni vambeni
VAN’WE VA LI: “Ku dondzra Bibele i ku tlanga hi nkama.”
Wene ke, u li yini? Ha yini u hlaya leswo?
NKATSRAKANYU
Bibele dzri hi nyika swilayu swa ku hanya ha swone siku ni siku, dzri tlhela dzri hi nyika tinhlamulo ta lisima ni ku lavisela.
Mpfuxeto
Xana hi nga kuma swilayu swa muxaka muni a Bibeleni?
He swini swin’we swa swivutiso leswi Bibele dzri swi hlamulaka?
A wu navela ku dondzra yini a Bibeleni?
HANDZRISISA
Vona leswaku ha yini swilayu swa Bibele swa ha tizra ni namunhla.
“Tidondzro Ta Bibele A Ti Khaluteliwi Hi Nkama” (Xihondzro Xa Ku Zrindzra No 1 2018)
Vona ndlela leyi Bibele dzri pfuniki wanuna wa kukazri lweyi ku sukela na a he ntsrongo a a nga kumi ku nyonxa hi matitwela yake.
Vona ndlela leyi Bibele dzri layaka mindangu ha yone akuva yi kuma ku nyonxa.
“Mintxhumu Ya 12 Yi Tisaka Ku Nyonxa A Ndangwini” (Pfukani! No 2 2018)
Dondzra ndlela leyi ha yone Bibele dzri khanyisaka mhaka leyi kanganyisaka vanyingi mayelanu ni lweyi hi ntshimantshima a fumaka misava ya swoswi.
Ha Yini U Fanela Ku Dondzra Bibele?—Vhidiyu Hinkwadzru (3:14)