XIDONDZRO 34
Hi Nga Mu Kombisa Kuyini Yehovha Leswaku Ha Mu Zrandzra?
U swi vonisa kuyini, xana wuxaka byaku na Xikwembu Nkulukumba byi ye byi kula ku sukela nkama lowu u sunguliki ku dondzra Bibele ku ta tlhasa swoswi? Wa swi navela ku ya mahlweni u kulisa wunghanu byaku na yene? Loko swi li tanu, dzrimuka leswaku loko Yehovha a ya a vona lizrandzru dzraku ha yene dzri kula, a ta ya a ku zrandzra a tlhela a ku hlayisa. Kutani ke, u nga mu kombisa kuyini leswaku wa mu zrandzra?
1. Hi mu kombisa kuyini Yehovha leswaku ha mu zrandzra?
Hi komba Yehovha leswaku ha mu zrandzra hi ku mu yingiseta. (Dondzra 1 Yohan 5:3.) A nga sindzrisi mhunu ku mu yingiseta. A matsrhan’wini ya leswo, a nyika mun’wana ni mun’wana wezru mukhandlu wa ku hlawula ku mu yingiseta kumbe ku kala a nga mu yingiseti. Ha yini? Yehovha a djula kuva hi mu “yingiseta hi mbilu”. (Ba-le-Roma 6:17) Hi mahlayela mambeni, a djula kuva u mu yingiseta, ku nga li hi ku sindzriseka, kambe hi leswi u mu zrandzraka. A swiyenge 3 ni 4 swa buku ledzri, swi hambeliwe ku ku pfuna akuva u kombisa leswaku wa mu zrandzra Yehovha hi ku yentxa leswi mu nyonxisaka ni ku fulazrela leswi mu khunguvanyisaka.
2. I yini swi nga ha yentxaka swi kazrata ku zrandzra Yehovha?
“A makhombo ya mululami i manyingi.” (Amapsalma 34:19) Hinkwezru hi lwisana ni ku kala ku hetiseka. Handle ka leswo, hi nga ha lwisana ni swikazratu swa timali, wubihi ni swikazratu swimbeni. Loko hi kumana ni swizralanganya, swi nga ha hi kazratela ku yentxa leswi Yehovha a hi kombelaka swone hikusa swi nga ha voneka na swi nabyala ku bakanya nawu wake. Kambe loko u yentxa leswi Yehovha a ku byelaka swone hi ku dumbeka, u mu komba leswaku u mu zrandzra ku tlula yini na yini. U kombisa leswaku u dumbekile kwake. Xileswo na yene a ta dumbeka kwaku. A nge ti za a ku fulazrelile.—Dondzra Amapsalma 4:3.
KELISISA
Kambisisa leswaku ha yini ku yingiseta kwaku ku li ka lisima ka Yehovha u tlhela u dondzra leswi nga ku pfunaka ku tsrhama na u dumbekile kwake.
3. Mhaka leyi khumbaka wene
Hi ku ya hi buku dzra Bibele dzra Yob, Sathana a hehle Yobe kun’we ni vhanu hinkwavu lava djulaka ku tizrela Yehovha. Dondzrani Yob 1:1, 6–2:10, mi gama mi bulisana hi swivutiso leswi:
Xana Sathana a li i yini lexi yentxiki Yobe a yingiseta Yehovha?—Vonani Yob 1:9-11.
Xana Sathana a va hehlisa kuyini vhanu hinkwavu, ku patsra na wene?—Vonani Yob 2:4.
Dondzrani Yob 27:5b, mi gama mi bulisana hi xivutiso lexi:
Xana Yobe a swi kombisise kuyini leswaku a a zrandzra Yehovha hi mbilu hinkwayu?
Yobe a kombise leswaku awa mu zrandzra Xikwembu Nkulukumba hi ku tsrhama na a dumbekile kwake
Hi kombisa leswaku ha mu zrandzra Xikwembu Nkulukumba hi ku tsrhama na hi dumbekile kwake
4. Yentxa mbilu ya Yehovha yi nyonxa
Dondzrani Amaproverbia 27:11, mi gama mi bulisana hi swivutiso leswi:
Xana Yehovha a titwisa kuyini loko u tlhazriha u tlhela u mu yingiseta? Ha yini?
5. U nga swi kota ku dumbeka ka Yehovha
Ndlela leyi hi mu zrandzraka ha yone Yehovha yi hi susumetela ku byela vambeni ha yene. Ku dumbeka kwezru ka Yehovha ku hi susumetela ku zrezrela vambeni nambi swi nga nabyali. Vonani VHIDIYU, mi gama mi bulisana hi swivutiso leswi landzrelaka.
Xana swa ku kazratela ku byela vambeni ha Yehovha?
Ka vhidiyu, i yini xi pfuniki Grayson ku hlula ku txhava kwake?
Swa nabyala ku dumbeka ka Yehovha loko hi zrandzra leswi a swi zrandzraka, hi nyenya leswi a swi nyenyaka. Dondzrani Amapsalma 97:10, mi gama mi bulisana hi swivutiso leswi:
Hi ku ya hi leswi u swi dondzriki, he swini swin’we swa leswi Yehovha a swi zrandzraka? He swini swin’we swa leswi a swi nyenyaka?
U nga dondzrisa kuyini ku zrandzra leswinene u nyenya leswi bihiki?
6. Ha pfuneka loko hi yingiseta Yehovha
Minkama hinkwayu i swinene ngopfu ku yingiseta Yehovha. Dondzrani Ezaya 48:17, 18, mi gama mi bulisana hi swivutiso leswi:
Xana hi nga dumba leswaku minkama hinkwayu Yehovha awa swi tiva leswi nga swinene kwezru? Ha yini?
Xana ku dondzra Bibele ni ku tiva Xikwembu Nkulukumba wa ntiyiso, Yehovha, swi ku pfunise kuyini ku ta tlhasela swoswi?
VAN’WE VA LI: “Xikwembu Nkulukumba a nga na mhaka ni leswi ni swi yentxaka.”
He dzrini tsralwa ledzri u nga dzri tizrisaka akuva u kombisa leswaku leswi hi swi yentxaka swi nga nyonxisa kumbe swi khunguvanyisa Yehovha?
NKATSRAKANYU
U nga kombisa leswaku wa mu zrandzra Yehovha hi ku mu yingiseta ni ku tama u dumbeka kwake nambiloko u kumana ni swikazratu.
Mpfuxeto
U dondzre yini ka xikombiso xa Yobe?
U ta mu kombisa kuyini Yehovha leswaku wa mu zrandzra?
I yini lexi taka ku pfuna ku tama u dumbeka ka Yehovha?
HANDZRISISA
Gungula ndlela leyi u nga dumbekaka ka Yehovha ni ka bandla ha yone.
Dondzra leswi yengetelekiki mayelanu ni leswi Sathana a va hehlisaka xiswone vhanu.
“Yobe A Tsrhame Na A Dumbekile” (Bibele—Dzri Tamele Dzrungula Muni? xiyenge 6)
Kambisisa ndlela leyi nambi vampshwa va nga kombisaka ha yone leswaku va mu zrandzra Yehovha.
Xana mumpshwa lweyi a sindzrisiwaka hi vanghanu vake ku yentxa leswi bihiki, a nga tama a dumbekisa kuyini ka Xikwembu Nkulukumba?