Hansi ka wulawuli bya Xikwembu Nkulukumba, swivumbiwa hinkwaswu a swi li ni wumun’we ni ku zrula

Ha Yini Hi Djula Mfumu Wa Xikwembu Nkulukumba?

A ku sunguleni ka matimu ya vhanu, Mutumbuluxi wezru lweyi vito dzrakwe a nga Yehovha, hi yene ntsena a a li Mufumi. A a fuma hi ndlela ya lizrandzru. A lulamisele mbangu wa ku xonga ngopfu—xizramba xa le Edeni—akuva vhanu va hanya kone. A tlhele a va nyika swakuda hi ntalu. Ku yengetela ka leswo, a va nyike ntizro wa lisima swinene akuva va wu yentxa. (Genesis 1:28, 29; 2:8, 15) Loko vhanu a ve tibeka hansi ka wuhosi bya Xikwembu Nkulukumba bya lizrandzru, a va ta va ni ku zrula.

Adamu a tameliki mhandzru lowu yilisiweke, a nyikiweke ha Evha. — Vhanu va ku sungula va mu yalile Xikwembu Nkulukumba swanga Mufumi

Bibele dzri dzrungula leswaku ntsrumi yin’we ya mupfukeli leyi txhuliwiki Sathana, Diyavulosi yi hlaye leswaku Xikwembu Nkulukumba a nga na mfanelo ya ku fuma vhanu. Yone yi hlaye leswaku vhanu a va ta tihanyela hi ku nyonxa na va nga fumiwi ha Xikwembu Nkulukumba. Lexi vavisaka, vapswele vezru va ku sungula, Adamu na Evha, va ma kholwile madzrimi wolawo kutani va yima na Diyavulosi a ku pfukeleni ka Xikwembu Nkulukumba.—Genesis 3:1-6; Apfuletelo 12:9.

Leswi Adamu na Evha va yaleke ku fumiwa hi Xikwembu Nkulukumba, va lahlekeliwile hi kaya dzravu dzra Paradeyisi va tlhela va lahlekeliwa hi ku lavisela kwavu ka ku hanya hi lani ku nga helikiki na va ni lihanyu ledzri hetisekiki. (Genesis 3:17-19) Xiboho lexi va xi tekiki xi khumbe ni vana lava viki navone hi ku famba ka nkama. Bibele dzri hlaya leswaku hikola ka xidoho xa Adamu ‘ha mhunu mun’we a xihono xi nhingeni misaveni’. (Ba-le-Roma 5:12) Xidoho xi tise xikazratu xin’wana: ‘Mhunu a fuma mun’wana ku mu yentxa swa ku biha.’ (Eklesiasta 8:9) Leswi liki, loko mhunu a fuma mun’wana ku ta va ni swikazratu.

VHANU VA SUNGULA KU FUMA

Nimrod a yimiki hi ndlela ya ku ti kukumusha. A ntsrhaku kwakwe, vhanu va nga kazri va yaka xihondzro. — Nimrodi a ve mupfukeli wa Yehovha

Mhunu wa ku sungula ku fuma lweyi a hlayiwaka a Bibeleni a ve Nimrodi, mupfukeli lweyi a a nga pfumeli wulawuli bya Xikwembu Nkulukumba. Ku sukela a minkameni yoleyo ku ta tlhasa namunhla, vhanu lava nga wuhosini va tizrisa wulawuli byavu hi ndlela leyi hoxekiki. Kolomu ka 3.000 wa malembe lama khalutiki, hosi Salomoni a hlaye leswi: ‘Ndzri vona minyembeti ya lava xanisiwaka na va nge na lwe wa ku va miyeta. A vaxanisi vavu va ni ku lebya, kambe va nge na lwe wa ku va miyeta.’—Eklesiasta 4:1.

Ni namunhla swa ha li tanu. Hi 2009, buku dzra kukazri dzra Ntlhanganu wa Matiko dzri hlaye leswaku swi ya swi tikomba leswaku “mimfumu ya mona hi yone xivangelo lexikulu xa swikazratu leswi hi swi vonaka misaveni”.

KU TXINTXA LOKU TAKA VA KONE!

Misava yi vilela vafumi va ku yampswa ni mafumela mambeni. Nakunene, leswi hi swone leswi Xikwembu Nkulukumba a hi dumbisiki swone!

Xifaniso: Leswi vanguiwaka hi mimfumu ya vhanu. 1. Wansati wa le Asia a tsrhamiki ndleleni leyi nga ni nsila, a xingazriki xin’wanana na xi dzrila. 2. Xiduhwati xa xinuna xi vabyaka xi yetleliki mubedweni a xipiritana 3. Masotxha ma baleselaka a yimpini. 4. Vhanu la va hlundzrukiki va hambaka xitereka na va tameli swidjekana. 5. Wansati a yimiki ni n’wanakwe wa xisati a handle ka muti, va vonaka a vhidru dzra xipfalo ledzri dlayekeke. 6. Doropa ledzri nga ni maphayiphi lama humesaka ximusi ni tifiyu ta maghezi. — Nambi mimfumu ya ku yampswa ya vhanu yi hlulekile ku lulamisa swizralanganya leswikulu swa vhanu

Xikwembu Nkulukumba a simeke Mfumu, lowu taka susa mimfumu leyi hinkwayu, wu taka ‘va kone hinkwayu minkama’. (Daniel 2:44) Hi wone Mfumu lowu vhanu va wu kombelaka ka Xikhongoto xa Hosi. (Mattheo 6:9, 10) Kambe Xikwembu Nkulukumba a nga ti fuma ha wuswakwe. Matsrhan’wini yakwe, a yimise lwa samiki a hanya swanga mhunu wa lani misaveni akuva a va Mufumi. Xana Xikwembu Nkulukumba a hlawule mani?