Yeremiya
3 Abantu barabaza ngo: «Umugabo yirukanye umugore wiwe akagenda, akaba umugore w’uwundi mugabo, mbega yoba akimucura?»
Wumva ico gihugu kitahumanye rwose+?
2 «Raramura amaso urabe imirambi igaragara.
Ni hehe abagabo bataryamaniye nawe?
Wicaye ku mabarabara ubarindiriye
nk’umuntu aguma yimuka* mu bugaragwa.
Uguma uhumanisha igihugu
ubumaraya bwawe n’ububisha bwawe+.
5 Hari uwoguma ashavuye ibihe vyose
canke akagumana inzika?”
Ivyo ni vyo muvuga,
mugabo muguma mukora ibibi vyose mushoboye gukora+.»
6 Mu gihe c’umwami Yosiya+, Yehova yambwiye ati: «“Wabonye ivyo wa muhemu Isirayeli yakoze? Yagiye ku misozi miremire yose no munsi y’igiti gitotahaye cose, ahakorera ubumaraya+. 7 N’inyuma y’aho akoreye ivyo bintu vyose, nagumye ndamubwira ngo angarukeko+, mugabo ntiyagarutse. Yuda na we yaguma yitegereza mwenewabo w’umuhemu+. 8 Aho ndabiboneye, narirukanye uwo muhemu Isirayeli, ndamuha urupapuro rwo kwahukana+ kubera yarenze ibigo+. Yamara mwenewabo w’umuhemu Yuda ntiyatinye. Na we nyene yaragiye akora ubumaraya+. 9 Ubumaraya yakora yabufata ibisanzwe, kandi yagumye ahumanya igihugu yongera arenga ibigo mu gusenga ibiti n’amabuye+. 10 Naho ivyo vyose vyabaye, mwenewabo w’umuhemu Yuda ntiyangarutseko n’umutima wiwe wose. Kwari ukwigirisha gusa”, ni ko Yehova avuze.»
11 Yehova aca ambwira ati: «Wa muhemu Isirayeli yabaye umugororotsi gusumba wa muhemu Yuda+. 12 Genda utangaze aya majambo uyerekeza mu buraruko+ uti:
“‘Ewe muhemu Isirayeli, nugaruke’, ni ko Yehova avuze+.” “‘Sinzokurabira hasi nshavuye+ kuko ndi intahemuka’, ni ko Yehova avuze.” “‘Sinzogumana inzika ibihe vyose. 13 Wewe gusa niwemere ikosa ryawe, kuko wagararije Yehova Imana yawe. Wagumye uryamana* n’abanyamahanga* munsi y’igiti gitotahaye cose, mugabo ntiwumviye ijwi ryanje’, ni ko Yehova avuze.”»
14 «Nimugaruke mwa bana b’ibihemu», ni ko Yehova avuze. «Kuko nababereye shobuja w’ukuri*. Nzobatora, umwe ndamukuye mu gisagara, babiri mu muryāngo maze ndabajane i Siyoni+. 15 Nzobaha abungere bameze nk’uko umutima wanje ugomba+. Bazobagaburira bakoresheje ubumenyi n’ubukerebutsi*. 16 Muri iyo misi muzogwira kandi murondoke mu gihugu», ni ko Yehova avuze+. «Nta wuzosubira kuvuga ngo: “Isandugu y’isezerano rya Yehova!” Ntizobaza mu mutima canke ngo bayibuke canke ngo bayikumbure, kandi nta yindi izosubira gukorwa. 17 Ico gihe Yeruzalemu bazoyita intebe y’ubwami ya Yehova+. I Yeruzalemu ni ho amahanga yose azokoranirizwa kugira ngo ashemeze izina rya Yehova+, kandi ntibazokwongera gukurikira umutima wabo mubi babigiranye akagagazo.»
18 «Muri iyo misi, abo mu Buyuda no muri Isirayeli bazogendana+. Bazova mu gihugu co mu buraruko bari kumwe, binjire mu gihugu nahaye ba sogokuruza banyu ngo kibe intoranwa yabo+. 19 Nibwiye nti: “Ese ukuntu nagufashe nk’umwe mu bahungu banje nkaguha igihugu gihimbaye, intoranwa nziza kuruta izindi zose mu mahanga*+!” Nibwiye kandi ko wonyise “Dawe!”, be n’uko utokwigeze ureka kunkurikira. 20 “Mu vy’ukuri, nka kurya umugore ahemuka agata umugabo* wiwe, ni ko na mwebwe Bisirayeli mwampemukiye+”, ni ko Yehova avuze.»
21 Ku mirambi igaragara humvikanye ijwi.
Ni ijwi ry’ukurira n’ugutakamba kw’Abisirayeli.
Kuko bagoramitse inzira yabo,
bibagira Yehova Imana yabo+.
22 «Yemwe bana b’ibihemu, nimugaruke.
Nzokiza ubuhemu bwanyu+.»
«Turarengutse! Tuje iwawe Yehova,
kuko uri Imana yacu+.
23 Ni ukuri ivyo twakorera ku mirambi n’urwamo twavugiriza ku misozi vyari ivy’uruhendo+.
Ni ukuri Yehova Imana yacu ni we azokiza Isirayeli+.