Ivyakozwe n’intumwa
20 Iyo ntureka imaze guhwama, Pawulo atumako abigishwa, hanyuma amaze kubaremesha no kubasezera, afata urugendo aja i Masedwane. 2 Aho amariye guca mu mihingo yo muri ako karere, akabwira abaho amajambo menshi yo kubaremesha, ashika mu Bugiriki. 3 Yamazeyo amezi atatu. Mugabo kubera ko Abayuda bari bateguye umugambi wo kumugirira nabi+ igihe yagira afate ubwato ngo aje i Siriya, yaciye afata ingingo yo gusubira inyuma aciye i Masedwane. 4 Yari aherekejwe na Sopatero mwene Piro w’i Beroya, Arisitariko+ na Sekundo b’i Tesalonika, Gayo w’i Derube, Timoteyo+ hamwe na Tikiko+ na Tirofimo+ bo mu ntara ya Aziya. 5 Bano batwitangiye imbere baturindirira i Tirowa. 6 Mugabo twebwe twafatiye ubwato i Filipi inyuma y’umusi mukuru w’imikate itarimwo umwambiro+, mu misi itanu tuba turabashikiriye i Tirowa, tumarayo imisi indwi.
7 Ku musi wa mbere w’indwi, igihe twari dukoraniye hamwe ngo dufungure, Pawulo atangura kubashikiriza ijambo kuko bwaca agenda. Abandanya gushikiriza iryo jambo gushika mu gicugu. 8 Mu cumba co hejuru twari dukoraniyemwo, hari amatara menshi. 9 Umusore umwe yitwa Eyutiko yari yicaye kw’idirisha, atwarwa n’itiro ryinshi igihe Pawulo yariko aravuga, maze kubera iryo tiro, agwa hasi avuye kw’igorofa igira gatatu, bamutora yapfuye. 10 Mugabo Pawulo arururuka, amwubamako aramugumbira+, avuga ati: «Nimureke guta umutwe kuko ari muzima+.» 11 Pawulo aca asubira muri ca cumba co hejuru, amanyura umukate atangura gufungura. Abandanya kuyaga umwanya utari muto gushika mu mutwenzi aca aragenda. 12 Nuko batwara wa muhungu ari muzima, bahojejwe bimwe bitagira urugero.
13 Maze tugenda kwurira ubwato* tuja i Aso, mugabo Pawulo we yashaka kujayo n’amaguru. Yari yadusavye ko tumuhitana n’ubwato muri ico gisagara. 14 Aho rero amariye kuduhamvya i Aso, tumwuriza mu bwato tuja i Mitileni. 15 Ku musi ukurikira, tuvayo n’ubwato dushika aharabana na Kiyo. Bukeye twarahagaze i Samo, hanyuma ku musi ukurikira dushika i Mileto. 16 Pawulo yari yafashe ingingo yo kudaca i Efeso+, kugira ntamare umwanya munini mu ntara ya Aziya. Yariko yihutira gushika i Yeruzalemu+ ku musi mukuru wa Pentekoti, nimba bishoboka.
17 Ariko akiri i Mileto, atumako abakurambere b’ishengero ry’i Efeso. 18 Bamushikiriye ababwira ati: «Murazi neza ingene nigenjeje muri mwebwe kuva umusi nahonyoza ikirenge mu ntara ya Aziya+. 19 Narashumbiye Umukama ndabigiranye ukwicisha bugufi* kwinshi+, hariko n’amosozi n’ibigeragezo vyanshikira kubera imigambi y’Abayuda yo kungirira nabi. 20 Kandi nta kintu na kimwe c’ingirakamaro naretse kubabwira canke ngo ndeke kubigisha ku mugaragaro+ n’inzu ku nzu+. 21 Mugabo narashinze intahe bimwe bishitse* imbere y’Abayuda n’Abagiriki* yuko bakwiye kwigaya+ imbere y’Imana, bakizera Umukama wacu Yezu+. 22 Ubu rero ngiye i Yeruzalemu nsunitswe* n’impwemu, naho ntazi ibizonshikira ngezeyo. 23 Ico nzi co ni uko mu gisagara no mu kindi impwemu nyeranda iguma imburira yuko nzopfungwa nkongera ngashikirwa n’amakuba+. 24 Yamara rero simbona yuko ubuzima bwanje ari bwo buhambaye*. Icompa gusa nkarangiza isiganwa ry’ubuzima+ n’igikorwa* nahawe n’Umukama Yezu, co kwamamaza* bimwe bishitse* inkuru nziza ya bwa buntu buhebuje* bw’Imana.
25 Ubu rero, ndazi yuko muri mwebwe mwese nabwiye inkuru nziza y’Ubwami ata n’umwe azosubira kumbona. 26 Ndabasavye rero uyu musi mumbere ivyabona yuko nera ku bijanye n’amaraso y’abantu bose+, 27 kuko ntigeze ndeka kubabwira ivyo Imana igomba* vyose+. 28 Mwirinde ubwanyu+, murinde n’ubusho bwose impwemu nyeranda yabagenyemwo ngo mube abahagarikizi*+, kugira muragire ishengero ry’Imana+. Yariguze amaraso y’Umwana wayo bwite+. 29 Ndazi yuko ninamara kugenda amabingira akaze* azobinjiramwo+ kandi ntazofatana ikibabarwe ubusho. 30 Kandi muri mwebwe ubwanyu hazokwaduka abagabo bavuga ibigoramanze kugira bakwegere abigishwa inyuma yabo+.
31 Mugume murikanuye rero, kandi mwibuke yuko mu myaka itatu+, ijoro n’umurango, ntigeze ndeka gukebura umwe wese muri mwebwe hariko n’amosozi. 32 Ubu rero ndabaragije Imana n’ijambo ry’ubuntu bwayo buhebuje, ryo rishobora kububaka no gutuma muronka intoranwa izohabwa aberanda bose+. 33 Sinigeze nipfuza ifeza canke inzahabu canke impuzu vy’umuntu n’umwe+. 34 Mwebwe ubwanyu murazi yuko aya maboko yanje ari yo yandonkeje ivyo nkeneye+, jewe n’abo turi kumwe. 35 Naraberetse muri vyose yuko mukwiye kubira akuya gutyo+ kugira mufashe abagoyagoya. Mukwiye kandi kwibuka ya majambo y’Umukama Yezu, igihe ubwiwe yavuga ati: “Gutanga bizana umunezero*+ kuruta guhabwa.”»
36 Amaze kuvuga ivyo, we n’abo bari kumwe bose barapfukama, aca arasenga. 37 Emwe, bose baraturikisha bararira, bagumbira* Pawulo bamusomana igishika*, 38 kuko bari bababajwe canecane n’uko yari yababwiye yuko batosubiye kumubona+. Baca baramuherekeza gushika ku bwato.