Samweli wa kabiri
14 Nuko Yowabu mwene Zeruwiya+ amenya ko umwami yipfuza cane kubona Abusalomu+. 2 Yowabu atumako rero umugore w’umunyabwenge yaba i Tekowa+, amubwira ati: «Ndagusavye wigire nk’uwuri mu kigandaro, wambare nk’uwugandaye, kandi ntihagire amavuta wisiga+. Wigire nk’umugore amaze igihe kirekire agandariye uwiwe. 3 Uraca winjira iyo umwami ari, umubwire ivyo ngira nkubwire.» Yowabu aca amubwira ivyo avuga*.
4 Nya mugore w’i Tekowa ashitse imbere y’umwami, aca arunama mu maso hiwe hashika hasi, avuga ati: «Ntabara mwami!» 5 Umwami amwishura ati: «Ufise ingorane iyihe?» Asubizayo ati: «Aho ubona jewe ndi umupfakazi. Umugabo wanje yarapfuye. 6 Databuja, nari mfise abahungu babiri maze barwanira mu gahinga. Nta muntu yari hafi ngo ababanguranye. Hanyuma umwe akubita uwundi aramwica. 7 None ubu databuja, umuryango wose wampagurukiye. Baguma bambwira ngo: “Zana uwishe mwenewabo. Dutegerezwa kumwica naho ata samuragwa azoba agisigaye, kubera ko na we yishe uwo bavukana+.” Nibamwica bazoba bazimije agakara nari nsigaranye*. Izina ry’umugabo wanje rizoba rizimanganye kandi nta wumukomokako azoba agisigaye kw’isi.»
8 Maze umwami abwira uwo mugore ati: «Niwitahire, mpava ntanga itegeko bagutunganirize.» 9 Uwo mugore w’i Tekowa aca abwira umwami ati: «Mwami wanje, ikosa ry’umwana wanje niriharurwe kuri jewe n’umuryango wa dawe. Ariko wewe n’ubwami* bwawe ntiribāgīre.» 10 Umwami na we amwishura ati: «Nihagira uwusubira kukubaza ivy’ico kibazo uraca umunzanira. Ntazokwigera asubira kukubuza amahoro.» 11 Mugabo uwo mugore avuga ati: «Ndagusavye mwami, wibuke Yehova Imana yawe kugira ngo uwuhora amaraso y’uwishwe+ ntakore ibara ngo yice umuhungu wanje.» Umwami aca amwishura ati: «Ndakurahiye Yehova Imana nzima+ yuko ata wuzomurya n’urwara*.» 12 Uwo mugore ni kwo kuvuga ati: «Ndagusavye mwami wanje ngire ico ndakubwiye.» Umwami ati: «Vuga!»
13 Nya mugore aca avuga ati: «Kubera iki none wiyumviriye gukorera abantu b’Imana ikintu kibi nk’ico+? Ivyo uvuze mwami birakwagiriza kuko utaragarukana umuhungu wawe womoye+. 14 Twese tuzopfa ata kabuza tumere nk’amazi aseseka ntibayore. Mugabo Imana ntirondera kwica, ahubwo iguma irondera imvo zotuma uwaciwe ataguma ari igicibwa kuri yo. 15 Icatumye nza gushikiriza iri jambo umwami wanje, ni uko abantu banteye ubwoba. Naciye nibwira nti: “Reka nje kubibwira umwami. Hari aho yokwumva ivyo ndamusavye, akabikora. 16 Hari aho umwami yonyumviriza maze twe n’umuhungu wenyene nsigaranye, akadukiza uwugomba kuduhonya ngo adukure mu ntoranwa Imana yaduhaye+.” 17 Nibwiye kandi nti: “Ivyo umwami wanje ambwira bize kuba ibimpumuriza.” Erega mwami wanje, umeze nk’umumarayika w’Imana y’ukuri mu bijanye no gutandukanya iciza n’ikibi. Yehova Imana yawe abane nawe.»
18 Umwami amwishura ati: «Ndagusavye ntihagire ico umpisha ku vyo ngira nkubaze.» Nya mugore aca avuga ati: «Ndaguteze yompi, mwami.» 19 Umwami amubaza ati: «Ibi vyose ni Yowabu yabigutumye+?» Nya mugore yishura ati: «Ni ukuri ndakurahiye mwami, ni ukwo nyene ubivuze*. Umunwa ni jewe ariko ijambo ni Yowabu. 20 Umusuku wawe Yowabu yabikoze kugira ngo uhindure uko ubona ibintu. Mugabo mwami, ufise ubukerebutsi* nk’ubw’umumarayika w’Imana y’ukuri kandi ibiba mu gihugu vyose urabizi.»
21 Mu nyuma umwami abwira Yowabu ati: «Nta ngorane ndavyemeye+. Genda ugarukane uwo musore Abusalomu+.» 22 Yowabu aca arunamira umwami, mu maso hiwe hashika hasi, hanyuma aramushimira. Avuga ati: «Mwami wanje, uyu musi ndamenye yuko unshima kubera wemeye gukora ivyo nagusavye.» 23 Yowabu aca arahaguruka aja i Geshuri+ maze azana Abusalomu i Yeruzalemu. 24 Ariko umwami avuga ati: «Nasubire iwe mugabo ntaze yigere aza imbere yanje.» Nuko Abusalomu asubira iwe, ntiyabonana n’umwami.
25 Muri Isirayeli yose nta mugabo bahayagiza kubera ubwiza nka Abusalomu. Kuva munsi y’ikirenge gushika hejuru ku mutwe, nta kanenge wamubonako. 26 Buri mwaka yabwirizwa kwimosha kubera ko umushatsi wamuremera cane. Umushatsi yaba amosheje wapima shekeli 200* hisunzwe ingero y’i bwami*. 27 Nuko Abusalomu avyara abahungu batatu+ n’umukobwa umwe yitwa Tamari. Yari umwigeme mwiza cane.
28 Imyaka ibiri irakwira Abusalomu aba i Yeruzalemu, ariko ntiyigera abonana n’umwami+. 29 Abusalomu atumako Yowabu kugira ngo amutume ku mwami, mugabo ntiyaza. Amutumako n’irigira kabiri, na ho nyene yanka kuza. 30 Amaherezo abwira abasuku biwe ati: «Murabona urya murima wa Yowabu uteyemwo sayiri* uri iruhande y’uwanje? Genda muwuturire.» Abasuku ba Abusalomu baca baja kuwuturira. 31 Yowabu aca aja kwa Abusalomu amubaza ati: «Kubera iki abasuku bawe baturiye umurima wanje?» 32 Abusalomu amwishura ati: «Naragutumyeko uranka kuza. Nagomba uje kumbariza umwami uti: “Naviriye iki i Geshuri+? Iyo mpfuma nigumirayo. Nkundira mbonane nawe mwami. Nimba hari icaha nakoze, uce unyica.”»
33 Yowabu aca aja kubibwira umwami, maze umwami atumako Abusalomu. Abusalomu arenguka imbere y’umwami, aramwunamira mu maso hiwe hashika hasi. Umwami aca aramusoma+.