Yobu

28 Hariho ikibanza bacukuramwo ifeza,

hakabaho n’ikibanza batyororeramwo inzahabu+.

 2 Ubutare bw’icuma babukura mw’ivu,

umujumpu na wo ukava mu mabuye bashongesheje+.

 3 Abantu baracokera mu mwiza,

bagacukura mu mwiza w’umuzitanya

barondera ubutare*.

 4 Barimba ibinogo kure y’aho abantu baba,

ahantu hibagiwe, kure y’aho abantu baca.

Bamwebamwe bamanukayo benena ku migozi.

 5 Ibifungurwa bimera hejuru kw’isi,

ariko munsi yayo harabiragira nk’ahabiragizwa n’umuriro*.

 6 Amabuye yaho arimwo safiro,

ivu ryaho na ryo ririmwo inzahabu.

 7 Iyo nzira nta gisiga na kimwe kiyizi,

n’ikinyamwanira cirabura nticigeze kiyibona.

 8 Ibikoko bikaze ntivyigeze biyihonyoramwo,

mbere n’intambwe ntiyigeze iyicamwo.

 9 Abantu bamenagura ibitandara vy’isare n’amaboko,

imisozi bakayirandurana n’imishinge yayo.

10 Baca imiserege y’amazi+ mu bitandara.

Nta buye ry’agaciro na rimwe batabona.

11 Bagomera amasoko y’inzuzi,

bagashira ahabona ivyari binyegejwe.

12 Ariko ubukerebutsi ga yemwe, umuntu yobukura he+?

Ni hehe hari isoko ry’ugutegera+?

13 Nta muntu n’umwe azi agaciro kabwo+,

kandi ntibuboneka mu gihugu c’abazima.

15 Inzahabu itavanze ntiyoshobora kubugura,

kandi nta wobukaba ifeza naho zoba zingana iki+.

16 Inzahabu z’i Ofiri+ ntizobugura,

eka n’amabuye yitwa onigisi na safiro ntiyobugura.

17 Ntibwogereranywa n’inzahabu be n’ikiyo,

kandi nta wobukaba igikoresho c’inzahabu nzizanziza*+.

18 Ibuye ryitwa korali n’iryitwa kirisitalo yoyo ntiyovugwa+,

kuko isaho yuzuye ubukerebutsi irusha agaciro iyuzuye imaragarita*.

19 Ntibwogereranywa n’ibuye ry’i Kushi ryitwa topazi+,

kandi n’inzahabu itavanze ntiyoshobora kubugura.

20 None ubukerebutsi buva he?

Isoko ry’ugutegera riri hehe+?

21 Bwarahishijwe amaso yose y’abantu n’ay’ibikoko+,

bunyegezwa n’inyoni zose zo mu kirere.

22 Ukuzimu* n’urupfu vyavuze biti:

“Inkuru yabwo twayumvise ku matwi gusa!”

23 Imana ni yo izi inzira ija iyo buri.

Ni yo yonyene izi aho buba+,

24 kuko yitegereza gushika no ku mpera y’isi,

ikabona ibintu vyose biri munsi y’ijuru+.

25 Igihe yaha inguvu* umuyaga+,

igapima ingene amazi yose angana+,

26 igihe yashingira imvura amategeko+,

igacira inzira ibicu vy’imvura n’umuturagaro+,

27 ni ho yabona ubukerebutsi yongera irabusigura.

Yarabushinze yongera irabusuzuma.

“Raba, ugutinya Yehova ni bwo bukerebutsi+,

kandi uguca kure ikibi ni kwo gutegera+.”»