Yobu

 3 Kubera iki udufata nk’ibikoko+,

tukaboneka nk’ibijuju* imbere yawe?

 4 Naho woshavura ukameneka!

Ugira ngo isi izoca ihebwa kubera wewe,

canke ugira ngo ibitandara bizoca vyimuka?

 5 Emwe, umuco w’umubisha uzozima,

kandi urubeya rw’umuriro wiwe ntiruzokwaka+.

 6 Umuco wo mw’ihema ryiwe uzohinduka umwiza,

kandi itara riri hejuru yiwe rizozima.

 7 Umuvuduko wiwe uragabanuka,

kandi imigambi yiwe ni yo izotuma atemba+.

 8 Kuko ibirenge vyiwe bizomujana mu rusenga,

kandi azojuragirika ari muri rwo.

 9 Umutego uzomucakira ku kirenge.

Umushibuka uzomufata+.

10 Umugozi wo kumufata unyegejwe mw’ivu.

Umutego uramurindiriye mu nzira yiwe.

11 Akikujwe n’ibintu bimutera ubwoba+,

kandi biguma bimukurikira iyo aja hose.

12 Inguvu ziwe ziramuherana,

kandi ivyago+ bizotuma acumbagira.

13 Urukoba rwiwe ruratabagurika,

umubiri wiwe ugaterwa n’indwara yica cane.

14 Bamukura aho yari yitekaniye mw’ihema ryiwe+,

bakamujana kumwica urupfu rubi*.

15 Ihema ryiwe rizobamwo abantu atazi*.

Urugo rwiwe ruzoturirwa n’amazuku*+.

16 Nka kurya kw’igiti, imizi yiwe izokwumira munsi yiwe,

kandi amashami yiwe azokwumira kuri we.

17 Mw’isi abantu bazomwibagira,

kandi no mw’ibarabara abantu ntibazomenya izina ryiwe*.

18 Bazomukura mu muco bamuhindire mu mwiza,

kandi bazomwomora kw’isi.

19 Nta ruvyaro canke abamukomokako azoronka mu bantu b’iwabo.

Nta muntu n’umwe azorokoka aho yahora aba*.

20 Ku musi w’ivyago vyiwe, abantu bo mu burengero bazokwumirwa,

abo mu buseruko na bo bazotekerwa n’ubwoba.

21 Ivyo ni vyo bishikira amahema y’inkozi y’ikibi,

ni vyo bishikira ahantu haba umuntu atazi Imana.»