Senga Yehova Umusaba Imfashanyo
1 Yezu yarumvishije abigishwa biwe y’uko bikenewe ko Yehova ahezagira igikenurwa cabo. (Mat. 9:37, 38) Amasengesho yacu avuye ku mutima yo gushemeza no gushima ari kumwe no kwinginga be no gutakamba n’ubwira, aragaragaza yuko twiheka kuri Yehova tugaherezako kugira ngo adufashe. (Flp. 4:6, 7) Ivyanditswe biduhimiriza kubandanya gusenga “mu buryo bgose bgo gusenga no kwinginga,” kandi ivyo vyokoreshwa no ku masengesho yacu yerekeye igikenurwa.—Ef. 6:18.
2 Turashemeza Yehova mw’isengesho kubera kamere ziwe ntangere be n’ivyo arangura. Turamushemeza kandi kuko ari we Nyenegutanga inkuru nziza twamamaza. Birakwiriye ko tumushemeza kubera yuko ari we musa atuma igikenurwa cacu kiroranirwa.—Zab. 127:1.
3 Amasengesho yacu yo gushima araserura ukuntu dukengurukira Yehova kubera yaduhaye gutahura ivyo agomba n’imigambi yiwe. None si agateka gushikiriza abantu ukuri kwerekeye Ubwami? Turakurira Yehova ubwatsi ku bw’ibintu vyose turangura mu gikenurwa.—Zab. 107:8; Ef. 5:20.
4 Mu buryo bubereye cane, turasaba Yehova ngo adufashe kuronka abantu bazokwemera ko twigana Bibiliya, tukongera tukamusaba ngo adufashe gushikira imitima yabo n’ukuri. Igihe twinginga gutyo, tuba twemeye icese yuko Imana yo nsa ari yo ishobora gutuma igikorwa turangura mu gikenurwa cimbuka.—1 Kor. 3:5-7.
5 Hari umuvukanyikazi yabona ari nk’aho umukenyezi umwe ari mu bo yama ashira ibinyamakuru adasoma Umunara w’Inderetsi na Réveillez-vous! Kubera ko atashaka yuko ivyo binyamakuru vy’agaciro bipfa ubusa, yaratakambiye Yehova amusaba ko nimba uwo mukenyezi atabisoma yopfuma yanka kuvyakira. Igihe uwo muvukanyikazi yaja kumugendera ubukurikira, umunega w’uwo mugore yavuze ati: “Ndagushimiye cane kubona wama uzana ibi binyamakuru. Ndabisoma kandi ndabikunda vy’ukuri.”
6 Dutakamvye twicishije bugufi kandi tubigiranye ubwira, turashobora kwinginga Yehova ngo adufashe kumenya ukuntu tuvyifatamwo igihe abantu batabinezwe, igihe dukorera mu turere tugoye n’igihe badutyekeza, akadufasha no gutsinda ugutinya umuntu kugira ngo tubandanye gushingira intahe abandi dushize amanga. (Ivyak. 4:31) Tugumye dushishikara gutura isengesho “mu buryo bgose bgo gusenga no kwinginga” mu gihe tubandanya gukora umurimo wacu mweranda tugamburuka, turashobora kwizigira tudakeka ko Yehova azodufasha.—1 Yoh. 3:22.