Shetani

Shetani yoba abaho koko?

‘Ya nzoka yo mu ntango, iyitwa Mubesheranyi na Shetani, izimiza isi yose.’—Ivyahishuwe 12:9.

ABANTU BABIVUGAKO IKI?

Hari abiyumvira ko Shetani atabaho koko, ahubwo ko ari ububi buri mu muntu.

BIBILIYA IBIVUGAKO IKI?

Shetani arabaho koko. Ni umumarayika yagararije, akaba ari ikiremwa c’impwemu kitaboneka kirwanya Imana. Bibiliya yita Shetani “umutware w’iyi si.” (Yohani 12:31) Akoresha ‘ibimenyetso vy’ububeshi’ n’“uruhendo” kugira ngo ashike ku co ashaka.—2 Abatesalonika 2:9, 10.

Bibiliya iravuga ivyerekeye ikiganiro Shetani yagiranye n’Imana mw’ijuru. Nimba Shetani ari ububi gusa buri mu muntu, Imana yavuganye gute n’ububi buri muri yo kandi isanzwe itunganye, izirana n’icitwa ikibi? (Gusubira mu vyagezwe 32:4; Yobu 2:1-6) Biragaragara rero ko Shetani abaho koko, ko atari ububi gusa buri mu muntu.

KUBERA IKI WOVYITAHO?

Imvo zituma Shetani yipfuza ko wiyumvira yuko atabaho, zirasa n’imvo zituma umubisha anyegeza ico ari kugira ngo abandanye gukora ikibi ata n’umwe abiciye n’ikanda. Kugira ngo wikingire Shetani, urakwiye kubanza kwemera ko abaho.

Shetani aba hehe?

“Haragowe isi . . . kuko Shetani amanutse kuri mwebwe.”—Ivyahishuwe 12:12.

ABANTU BABIVUGAKO IKI?

Abantu benshi biyumvira ko Shetani aba mu muriro udahera, hagati mu ntimatima y’isi. Abandi biyumvira yuko aba mu bantu babi.

BIBILIYA IBIVUGAKO IKI?

Shetani ni ikiremwa kitaboneka, akaba ari co gituma yibera mu karere kataboneka k’impwemu. Shetani yarigeze kuba yemererwa kugendagenda aho Imana iba be n’abamarayika b’intahemuka. (Yobu 1:6) Ariko rero, ubu yarirukanywe imbere y’Imana, kandi cokimwe n’ibindi biremwa vy’impwemu bibi ari mu micungararo y’isi, aho adashobora kurenga.—Ivyahishuwe 12:12.

Ivyo none vyoba bisobanura ko Shetani akorera gusa mu karere kamwe k’isi? Nk’akarorero, ushobora kuba warasomye yuko igisagara ca kera ca Perugamo vyavugwa ko ari “aho Shetani aba.” (Ivyahishuwe 2:13) Mu vy’ukuri, iyo mvugo yashaka kwerekana ko muri ico gisagara hari hatsimbataye ivyo gusenga Shetani. Shetani ntaba mu karere kanaka kw’isi. Ahubwo, Bibiliya ivuga ko “ubwami bwose bw’isi” ari rwiwe.—Luka 4:5, 6.

Shetani yoba ashobora kwigarurira abantu canke kubagirira nabi?

“Isi yose iri mu bubasha bwa wa mubisha.”—1 Yohani 5:19.

BIBILIYA IBIVUGAKO IKI?

Abantu benshi barirekeranye Shetani arabazimiza, gutyo arabigarurira. (2 Abakorinto 11:14) Ivyo bica bidufasha gutahura impamvu abantu vyabananiye gutuma ivyo kw’isi bimera neza.

Vyongeye, Bibiliya irimwo n’uturorero tubabaje cane tuvuga ingene Shetani canke abandi bamarayika b’abagarariji bigaruriye abantu bakongera bakabagirira nabi ku mubiri.—Matayo 12:22; 17:15-18; Mariko 5:2-5.

WOKORA IKI?

Ntukwiye gutinya Shetani. Kugira ngo wirinde akosho ka Shetani canke kwigarurirwa na we, urakwiye kumenya ingene ayovya abantu, bigatuma ‘utayoberwa imigabo yiwe.’ (2 Abakorinto 2:11) Ugiye urasoma Bibiliya urashobora kumenya amayeri ya Shetani, gutyo ntugwe mu vyara vyiwe.

Niwikureko ibintu vyose bifitaniye isano n’amadayimoni. (Ivyakozwe 19:19) Ivyo bintu bishobora kuba ari ibiheko, ibitabu, amavidewo, imiziki, n’amaporogarama yo muri orodinateri bifitaniye isano n’ubupfumu.

Bibiliya ivuga iti: “Murwanye Shetani, na we azobahunga.” (Yakobo 4:7) Kugamburuka impanuro Bibiliya itanga ziranga ubukerebutsi, birashobora gutuma wikingira amayeri ya Shetani.—Abanyefeso 6:11-18.