INKURU YA 11
Umunywamazi wa Mbere
URAZI ico Nowa yatanguye gukora igihe we hamwe n’abiwe bava mu bwato? Yashikaniye Imana ishikanwa. Murabe kuri ico gishushanyo aho hepfo ariko ararishikana. Yashikaniye Imana ivyo bitungwa kugira ngo ayishimire kubera ko yabakijije isegenya.
Wibaza ko Yehova yashimishijwe n’iryo shikanwa? Egome yararishimye, aca araganira Nowa ko atazokwigera asubira guhonya isi n’amazi y’isegenya.
Isi yose ntiyatevye kwumuka, Nowa n’abiwe batangura kubaho ukundi gusha. Imana irabahezagira ibabwira iti: ‘Ni muvyare murondoke, mube benshi gushika aho mwuzura isi.’
Ariko munyuma igihe abantu bokwumviye ivy’isegenya botinye, bibaza ko yosubiye gutera. Ni co gituma Imana yahaye abantu ikintu cobibukije isezerano ryayo, ryo kutazokwigera isubira kwuzuza amazi kw isi yose. Urazi ico yabahaye ngo kibibutse? Ni umunywamazi.
Umunywamazi ukunda kuboneka mu kirere, igihe izuba ryatse imvura ihejeje kugwa. Hari aho iminywamazi igira amabara meza cane. Uramaze kuwubona? Raba uyu uri ngaha.
Ngibi ivyo Imana yavuze: ‘Ndasezeranye ko abantu n’ibikōko bitazokwigera bisubira gutikizwa n’isegenya. Nshize umunywamazi wanje mu bicu. Ico gihe cose uzoboneka, nzowurāba nce nibuka iryo sezerano ryanje.’
Igihe wobona umunywamazi woca ukwibutsa iki none? Nta kindi atari isezerano ry’Imana, ry’ukutazosubira guhonya isi yose ikoresheje isegenya.