Ikigabane ca 32

Ni Ibiki Vyemewe Gukorwa kw’Isabato?

KU WUNDI musi w’Isabato, Yezu agendera isinagogi hafi y’Ikiyaga c’i Galilaya. Hari umugabo yanyunyutse ukuboko kw’iburyo. Abanyabwenge b’ivyanditswe n’Abafarizayo bariko bararereka bitonze ngo barabe ko Yezu amukiza. Amaherezo babaza bati: “Mbega birēmerwa gukiza kw isabato?”

Indongozi z’idini y’Abayuda bemera yuko gukiza vyemerwa kw’Isabato igihe gusa ubuzima buri mu kaga. Bigisha nk’akarorero yuko kw’Isabato bitemerwa kwunga igufa canke gutenga aho umuntu yahinyagaye. Abanyabwenge b’ivyanditswe n’Abafarizayo rero bariko babaza ibibazo Yezu kugira ngo baronke ico bomwagiriza.

Ariko rero Yezu arazi ivyiyumviro vyabo. Ubwo nyene, abona ko bafashe ivyiyumviro birengeje urugero kandi bidahuye n’Ivyanditswe ku vyerekeye ukurenga ibwirizwa ry’umusi w’Isabato ribuza ibikorwa. Gutyo Yezu agira ikintu kiza gukwega ibihari bikomeye mu kubwira wa muntu yanyunyutse ukuboko, ati: “Va hasi, uhagarare hagati.”

Buno, Yezu ahindukirira abanyabwenge b’ivyanditswe n’Abafarizayo, avuga ati: “Ni nde muri mwebge yoba afise intama imwe ikagwa mu cobo kw isabato, ntayifate ngw ayikūreyo?” Kubera ko intama ari igitungwa kizana amahera, ntiboyirekera mu cobo gushika bukeye, kumbure igahava irwara canke bigatuma bahomba. Turetse n’ivyo, Ivyanditswe bivuga biti: “Umuntu agororotse ababara igitungwa ciwe.”

Yezu mu kugereranya ibintu, abandanya avuga ati: “Mbega non’umuntu ntaruta intama cane? None rero birēmerwa gukora ivyiza kw isabato.” Za ndongozi z’idini ntibashobora guhinyuza ico ciyumviro kiroranye kandi kiranga imbabazi, baca baguma banumye.

Yezu areraguza ashangashiwe kandi atewe intuntu n’ubujuju bwabo burangwa n’ukutagondwa. Maze abwira nya mugabo ati: “Ramvura ukuboko kwawe.” Na we arakuramvura hanyuma kurakira.

Aho kunezerezwa n’uko ukuboko kwa nya muntu kuvuwe, ba Bafarizayo barasohoka baca buno nyene baja inama n’abanywanyi b’umugambwe wa Herode, kugira ngo bice Yezu. Uwo mugambwe w’ivya politike biboneka ko warimwo n’abo mw’idini y’Abasadukayo. Mu bisanzwe, uwo mugambwe w’ivya politike usanzwe uteye kubiri n’abo Bafarizayo bimwe bigaragara, ariko barunga ubumwe bukomeye mu kurwanya Yezu. Matayo 12:9-14; Mariko 3:1-6; Luka 6:6-11; Imigani 12:10; Kuvayo 20:8-10.

▪ Ibihari bikomeye hagati ya Yezu n’indongozi z’idini y’Abayuda vyaje gute?

▪ Indongozi z’idini y’Abayuda zemera iki ku biraba Isabato?

▪ Yezu yakoresheje akarorero akahe mu kwanka ivyiyumviro vyabo bitari vyo?