Amasengesho Yawe Yoba ‘Ateguye nk’Imibavu’?

“Ugusenga kwanje gu[tegurwe] imbere yawe nk’imibavu.”—ZABURI 141:2.

1, 2. Uguturira imibavu vyagereranya iki?

YEHOVA IMANA yategetse umuhanuzi wiwe Musa gutegura imibavu myeranda ikoreshwa kw’ihema rya Isirayeli ry’ugusengeramwo. Imana yasaba ko ihingurwa mu kuvanga ibintu bine bimoga. (Kuvayo 30:34-38) Vyagaragaye ko imota neza koko.

² Isezerano ry’Ivyagezwe ihanga rya Isirayeli ryari ryaragize ryategekanya ko imibavu iturirwa imisi yose. (Kuvayo 30:7, 8) Ugukoresha imibavu kwoba kwari gufise insobanuro idasanzwe? Ego cane, kubera ko umwanditsi wa Zaburi yatereye mw’ijwi ati: “Ugusenga kwanje gu[tegurwe] imbere yawe [Yehova Imana] nk’imibavu, n’amaboko yanje kuyatarika kube nk’ikimazi co ku mugoroba.” (Zaburi 141:2) Mu gitabu

c’Ivyahishuriwe, intumwa Yohani adondora abakikuje intebe y’ubwami y’Imana yo mw’ijuru ko bafise inzavya z’inzahabu zuzuyemwo imibavu. Iyo nkuru yahumetswe ivuga iti: ‘Iyo mibavu isobanura amasengesho y’abera.’ (Ivyahishuriwe 5:8) Ni co gituma rero uguturira imibavu imota neza vyagereranya amasengesho yakirwa na Yehova aturwa n’abasavyi biwe ijoro n’umutaga.—1 Ab’i Tesalonike 3:10; Abaheburayo 5:7.

3. Ni igiki gikwiye kudufasha ‘gutegura amasengesho yacu nk’imibavu imbere y’Imana’?

³ Niba dushaka ko amasengesho yacu yakirwa n’Imana, dukwiye kuyisenga biciye mw’izina rya Yezu Kirisitu. (Yohana 16:23, 24) Ariko dushobora gute gutuma amasengesho yacu aba meza kuruta? Urabona, kurimbura uturorero tumwetumwe two mu Vyanditswe bikwiye kudufasha gutegura amasengesho yacu akaba nk’imibavu imbere ya Yehova.—Imigani 15:8.

Niduture Amasengesho Dufise Ukwizera

4. Ukwizera gufitaniye isano gute n’isengesho ryemewe n’Imana?

⁴ Niba dushaka ko amasengesho dutura aduga ku Mana ameze nk’imibavu imota neza, dutegerezwa gusenga dufise ukwizera. (Abaheburayo 11:6) Igihe abakurambere b’Abakirisu babonye ko umuntu yari arwaye mu buryo bw’impwemu yemeye imfashanyo bamuhaye ishingiye ku Vyanditswe, ‘isengesho [batura] rifatanije n’ukwizera bizokiza uyo murwayi.’ (Yakobo 5:15) Amasengesho aturanywe ukwizera arashimisha Data wa twese wo mw’ijuru, nk’uko nyene inyigisho y’Ijambo ry’Imana igizwe biciye mu gusenga imushimisha. Umwanditsi wa Zaburi yaragaragaje agatima keza igihe yaririmba ati: “Nzotarikira amaboko amabgirizwa yawe, kukw ari yo nkunda; kandi nzokwiyumvira ivyo washinze. N’unyigishe guhitamwo neza no kumenya ubgenge; kuko nizeye amabgirizwa yawe.” (Zaburi 119:48, 66) Nimuze ‘dutarike amaboko’ mu gusenga twicishije bugufi twongere tugaragaze ukwizera mu gukurikiza amategeko y’Imana.

5. Dukwiye kugira iki iyo tubuze ubukerebutsi?

⁵ Dufate ko tubuze ubukerebutsi dukeneye kugira tumenye ingene tuvyifatamwo mu kigeragezo kanaka. Kumbure ntiwemera neza yuko ubu hari ubuhanuzi bunaka bwa Bibiliya buriko buraranguka. Aho kureka ngo ivyo biduhungabanye mu vy’impwemu, nimuze dusenge dusaba ubukerebutsi. (Ab’i Galatiya 5:7, 8; Yakobo 1:5-8) Mugabo ntiwumve, ntidushobora kwitega ko Imana itwishura mu buryo bw’igitangaza. Dukwiye kwerekana ko amasengesho yacu tuyatura ata buryarya mu kugira ico yiteze ko abasavyi bayo bose bagira. Birakenewe ko tugira inyigisho y’Ivyanditswe yubaka ukwizera tubifashijwemwo n’ibisohokayandikiro turonka biciye kuri “wa mushumba w’umwizerwa kandi w’incabwenge.” (Matayo 24:45-47, NW; Yosuwa 1:7, 8) Vyongeye, turakeneye gutera imbere mu bumenyi mu kugira uruhara ubudahengeshanya mu makoraniro agirwa n’abasavyi b’Imana.—Abaheburayo 10:24, 25.

6. (a) Twese twari dukwiye gutahura iki ku vyerekeye igihe cacu hamwe n’iranguka ry’ubuhanuzi buri muri Bibiliya? (b) Ikigeretse ku gusenga ngo izina rya Yehova rininahazwe, ni igiki dukwiye kugira?

⁶ Muri iki gihe, hari Abakirisu bakurikirana inyungu n’ubuzi vyabo bwite bikerekana ko batakibona yuko ubu tugeze kure mu “gihe c’iherezo.” (Daniyeli 12:4) Abo bihuje ukwemera barashobora gusenga mu buryo bukwiriye basaba yuko abantu mwene abo bosubira kuvyura canke gukomeza ukwizera ikimenyamenya co mu Vyanditswe c’uko ukuhaba kwa Kirisitu kwatanguye mu 1914 igihe Yehova yamwimika ngo abe Umwami mw’ijuru, n’uko aganza hagati y’abansi biwe. (Zaburi 110:1, 2; Matayo 24:3) Twese dukwiye gutahura ko ibintu vyavuzwe imbere y’igihe nk’isangangurwa ry’idini y’ikinyoma—‘Babiloni Hahambaye’—igitero Shetani ari we Gogi w’i Magogi azogaba ku basavyi ba Yehova, hamwe n’ukurokorwa kwabo barokowe n’Imana Mushoboravyose kuri ya ntambara ya Harumagedoni, bishobora kwaduka bukwi na bukwi mu buryo butangaje cane, n’uko kandi bishobora vyose kuba mu gihe gito ugereranije. (Ivyahishuriwe 16:14, 16; 18:1-5; Ezekiyeli 38:18-23) Nimuze rero dusenge dusaba ko Imana yodufasha kuguma turi maso mu buryo bw’impwemu. Ese twese twosengana ubwira kugira ngo izina rya Yehova rininahazwe, kugira ngo Ubwami bwiwe buze, be no kugira ngo ukugomba kwiwe kugirwe kw’isi nk’uko kugirwa mw’ijuru. Egome, ese twobandanya kugaragaza ukwizera tukongera tukanatanga ikimenyamenya c’uko amasengesho yacu ata buryarya arimwo. (Matayo 6:9, 10) Nkako, ese abakunda koko Yehova bose bobanza kurondera Ubwami hamwe n’ubugororotsi bwiwe kandi bakagira uruhara uko bishoboka kwose mu vy’ukwamamaza inkuru nziza imbere y’uko umuhero uza.—Matayo 6:33; 24:14.

Nushemeze Yehova kandi Umushimire

7. Ni igiki kigutangaza ku vyerekeye isengesho Dawidi yatuye, igice caryo kikaba canditse muri 1 Ngoma 29:10-13?

⁷ Uburyo buhambaye bwo ‘gutegura amasengesho yacu nk’imibavu’ ni mu gushemeza Imana hamwe no mu kuyishimira bimwe bivuye ku mutima. Umwami Dawidi yaratuye isengesho mwene iryo igihe we hamwe n’igisata ca Isirayeli baterera agacumu k’ubumwe mu vy’ukwubaka urusengero rwa Yehova. Dawidi yasenze ati: “Ewe [Yehova], Mana ya sogokuruza wacu Isirayeli, ur’uwo guhimbazwa ibihe bitazoshira. [Yehova], ubukuru n’ubushobozi n’icubahiro n’inganji n’igitinyiro n’ivyawe; kukw ibiri mw ijuru n’ibiri mw isi vyose ar’ivyawe; ubgami n’ubgawe, ewe [Yehova], kandi ni wewe ushizwe hejuru ng’ube ūsumba vyose. Ubutunzi n’icubahiro ni wewe vyandurukako, kandi ni wewe uganza vyose; mu kuboko kwawe harimw’ububasha n’inkomezi; kandi ni wewe ushobora guha bose icubahiro n’inkomezi. None rero, Mana yacu, turagukengurukiye, duhimbaje izina ryawe ry’icubahiro.”—1 Ngoma 29:10-13.

8. (a) Ni amajambo ayahe yo gushemeza ari muri Zaburi y’148 gushika ku y’150 agukora cane ku mutima? (b) Niba dufise inyiyumvo isa n’iyagaragajwe muri Zaburi 27:4, tuzogira iki?

⁸ Mbega amajambo aryoheye ugutwi yo gushemeza no gukenguruka! Amasengesho dutura ashobora kuba atoroshe nk’ukwo, ariko arashobora kuba ari ayavuye ku mutima nk’ayo nyene. Igitabu ca Zaburi cuzuyemwo amasengesho yo gushima be no gushemeza. Amajambo acaguwe neza yo gushemeza tuyasanga muri Zaburi y’148 gushika ku y’150. Ugukurira ubwatsi Imana biserurirwa mu mazaburi menshi. Dawidi yaririmvye ati: “Ico nsaba [Yehova] ni kimwe, ni co nzohora nitwaririka: n’ukuba mu ngoro y[a Yehova] imisi yose y’ubugingo bganje, nkarāba ubgiza bg[a Yehova], nkihweza urusengero rwiwe.” (Zaburi 27:4) Reka dukore duhuza n’amasengesho mwene ayo mu kugira uruhara n’umwete mu mirimo yose irangurwa n’amasinzi akoraniye hamwe ya Yehova. (Zaburi 26:12) Gukora ivyo hamwe no kuzirikana Ijambo ry’Imana uko bukeye bizoduha imvo nyinshi zo kwiyegereza Yehova mu kumushemeza no mu kumushimira bivuye ku mutima.

Nurondere Wicishije Bugufi Imfashanyo Iva Kuri Yehova

9. Umwami Asa yasenze gute, kandi bigira ingaruka iyihe?

⁹ Niba turiko dukorera Yehova n’umutima wose turi Ivyabona vyiwe, turashobora kumenya neza ko atega ugutwi amasengesho yacu yo gusaba imfashanyo. (Yesaya 43:10-12) Reka turimbure ivy’Umwami Asa w’i Buyuda. Imyaka 10 ya mbere y’ingoma yiwe yamaze imyaka 41 (977-937 B.G.C.) yaranzwe n’amahoro. Niho Ubuyuda bwaterwa n’inteko zigizwe n’ingabo umuriyoni zirongowe na Zera Umunyetiyopiya. Naho nyene Asa hamwe n’ingabo ziwe bari bake cane ugereranije, baragiye kwivuna ababateye. Ariko rero, imbere y’uko urugamba rutangura Asa yarasenganye ubwira. Yaremeye icese ko Yehova afise ubushobozi bwo kurokora. Mu gutakamba ngo aronke imfashanyo, uwo mwami yagize ati: “Udutabare, kukw ari wewe twizigiye, kandi tuje mw izina ryawe kurwanya iki gitero kingana girtyo. Ewe [Yehova], ni wewe Mana yacu: ntuneshwe n’umuntu buntu.” Intsinzi ikomeye yarabonetse igihe Yehova yarokora Ubuyuda ku bw’izina ryiwe rihambaye. (2 Ngoma 14:1-15) Imana yaba idukijije ikigeragezo canke ikadukomeza kugira ngo tukirinde, nta mazinda y’uko itega ugutwi igihe tuyitakambiye ngo idusahirize.

10. Igihe tuba tutazi ukuntu twovyifatamwo mu ngorane kanaka, isengesho ryatuwe n’Umwami Yehoshafati ryoshobora kudufasha gute?

¹⁰ Iyo tutazi ingene turi buvyifatemwo mu ngorane yinaka, turashobora kwizigira yuko Yehova azotega ugutwi ugutakamba kwacu ngo adufashe. Ivyo vyaragaragajwe mu misi y’Umwami w’Umuyuda Yehoshafati, ingoma yiwe y’imyaka 25 ikaba yatanguye mu 936 B.G.C. Igihe Ubuyuda bwari busagirijwe n’ingabo zabukoraniye z’i Mowabu, i Moni hamwe no mu karere ko mu misozi y’i Seyiri, Yehoshafati yaratakamvye ati: “Ewe Mana yacu, mbega none ntiwobacirakw itēka? Kukw ata nkomezi dufise zo kurwanya ico gitero kingana girtyo kije kudutera, kandi turabuze ico twokora; ariko ni wewe duhanze amaso.” Yehova yarishuye iryo sengesho riranga ukwicisha bugufi, ararwanira Ubuyuda mu gutuma abo bansi bata umutwe ku buryo baciye basubiranamwo. Ingaruka yabaye iy’uko amahanga abakikuje yatekewe n’ubwoba, maze amahoro arasasagara mu Buyuda. (2 Ngoma 20:1-30) Igihe tubuze ubukerebutsi bukenewe kugira ngo duhangane n’ingorane, nka kumwe kwa Yehoshafati turashobora gusenga duti: ‘Ntituzi ico turibugire, ariko ni wewe duhanze amaso, Yehova.’ Impwemu yera irashobora gutuma twibuka ibintu vyo mu Vyanditswe bikenewe kugira ngo dutorere umuti iyo ngorane, canke Imana igashobora kudufasha mu buryo burengeye ukwiyumvira kw’umuntu.—Abaroma 8:26, 27.

11. Ku vyerekeye isengesho, dushobora kwigira iki ku vyo Nehemiya yakoze bijanye n’uruhome rwa Yeruzalemu?

¹¹ Hari igihe vyodusaba gusenga twamizako mu gusaba Imana ngo idufashe. Nehemiya yaragize intuntu, ararira, arisonzesha, eka aramara imisi n’iyindi asenga ku vyerekeye uruhome rwasenyutse rwa Yeruzalemu no ku kwihebura kw’ababa i Buyuda. (Nehemiya 1:1-11) Amasengesho yatuye biboneka ko yaduze ku Mana ameze nk’imibavu imota neza. Umusi uri izina Umwami w’Umuperesi Aritazeruzi yarabajije Nehemiya uwari yishwe n’akabonge ati: ‘Ico urondera gukiza ni igiki?’ Nehemiya avuga ati: “N[aciye] nsenga Imana Nyen’ijuru.” Iryo sengesho rigufi yatuye Imana mu gacerere ryarishuwe, kubera ko Nehemiya yarekuriwe gushitsa ico umutima wiwe wipfuza mu kuja i Yeruzalemu gusubira kwubaka uruhome rwayo rwari rwasenyutse.—Nehemiya 2:1-8.

Reka Yezu Akwigishe Uburyo Bwo Gusenga

12. Mu majambo yawe bwite, wovuga gute mu ncamake ingingo nyamukuru ziri mw’isengesho ry’akarorero rya Yezu?

¹² Mu masengesho yose yanditswe muri Bibiliya, iritwigisha vyinshi gusumba ayandi ni rya sengesho ry’akarorero Yezu Kirisitu yatura bwa mibavu imota neza. Injili ya Luka ivuga iti: “Umwe mu bigishwa [ba Yezu] aramubgira, ati Mugenzi, twigishe gusenga, nk’uko Yohana yigishije abigishwa biwe. Arababarira, ati Ni mwasenga, muvuge muti Data, izina ryawe ryubahwe, ubgami bgawe buze; imisi yose uduhe ivyo kurya vyayo; uduharire ivyaha vyacu, kuko natwe duhebera abari n’imyenda yacu bose; kandi ntutujane mu bitwosha nabi.” (Luka 11:1-4; Matayo 6:9-13) Reka twihweze iryo sengesho. Si iryagenewe kuza rirasubirwamwo ku mutwe, ariko ni iryo kutuyobora.

13. Wosigura gute ico aya majambo ngo “Data, izina ryawe ryubahwe” asobanura?

¹³ “Data, izina ryawe ryubahwe.” Kuganira na Yehova tumwita Data ni agateka kadasanzwe katewe abasavyi biwe bamwiyeguriye. Kubera ko tumeze nk’abana begera se w’umunyembabazi n’umutima ukunze bamutura ikibaraje ishinga cose, dukwiye kuza turamara umwanya dutura isengesho Imana tudahengeshanya mu rupfasoni no mu buryo buranga icubahiro. (Zaburi 103:13, 14) Amasengesho yacu akwiye kugaragaza ko turajwe ishinga n’uko izina rya Yehova rininahazwa kubera ko dushashaye kubona ryakuweko iceyi cose ryasizwe. Egome, dushaka ko izina rya Yehova rishirwa ku ruhande kandi rikabonwa ko ari ryeranda, ritagatifu.—Zaburi 5:11; 63:3, 4; 148:12, 13; Ezekiyeli 38:23.

14. Bisobanura iki gusenga ngo, “Ubgami bgawe buze”?

¹⁴ “Ubgami bgawe buze.” Ubwo Bwami ni ubutegetsi bwa Yehova buserukira mu ntwaro ya kimesiya yo mw’ijuru iri mu maboko y’Umwana wiwe Yezu hamwe n’“abera” bafatanije na we. (Daniyeli 7:13, 14, 18, 27; Ivyahishuriwe 20:6) Ubu bwa vuba ‘buzoza’ bukomvomvore abantu bose baterekwa ukugaba n’ukuganza kw’Imana bari ngaha kw’isi, bubakure mu nzira. (Daniyeli 2:44) Niho rero ukugomba kwa Yehova kuzogirwa kw’isi, nk’uko nyene kuri mw’ijuru. (Matayo 6:10) Mbega umunezero ivyo bizozanira ivyaremwe vyose bikorera Segaba w’ijuru n’isi bidahemuka!

15. Gusaba Yehova ngo “imisi yose uduhe ivyo kurya vyayo” vyerekana iki?

¹⁵ “Imisi yose uduhe ivyo kurya vyayo.” Gusaba Yehova imfungurwa ‘z’umusi’ vyerekana ko tudasaba ibidutunga vy’umurengera, mugabo dusaba gusa ivyo dukenera ku musi ku musi. Naho twizigiye ko Imana ibituronsa, na twebwe nyene turakora, tukanakoresha uburyo bubereye bwose dufise kugira ngo turonke imfungurwa hamwe n’ibindi vya nkenerwa. (2 Ab’i Tesalonike 3:7-10) Mugabo ntiwumve, turakwiye gushimira Uwo Muvyeyi tuzeyeko uburaro n’uburamuko wo mw’ijuru, kubera urukundo, ubukerebutsi, hamwe n’ubushobozi vyiwe dukesha ivyo bintu.—Ivyakozwe 14:15-17.

16. Dushobora kuronka gute ikigongwe c’Imana?

¹⁶ “Uduharire ivyaha vyacu, kuko natwe duhebera abari n’imyenda yacu bose.” Kubera ko turi abanyagasembwa tukaba n’abanyavyaha, ntidushobora gushitsa mu buryo bwuzuye ingingo ngenderwako zitagira agasembwa za Yehova. Ni co gituma dukeneye gusenga kugira ngo tumusabe ikigongwe twishimikije inkuka y’incungu ya Yezu. Mugabo niba dushaka ko ‘Umwe yumva isengesho’ akoresha agaciro k’iyo nkuka ku vyaha vyacu, dukwiye kwihana kandi tukakirana umutima ukunze ugutozwa indero na we ukwo ari kwo kwose. (Zaburi 65:2; Abaroma 5:8; 6:23; Abaheburayo 12:4-11) Ikindi kandi, dushobora kwitega kubabarirwa n’Imana igihe gusa “twahebeye abari mu myenda yacu,” ni ukuvuga abaducumurako.—Matayo 6:12, 14, 15.

17. Amajambo ngo “Ntutujane mu bitwosha nabi” asobanura iki?

¹⁷ “Ntutujane mu bitwosha nabi.” Rimwe na rimwe Bibiliya iravuga ko Yehova akora ibintu, igihe aba gusa yabiretse bikaba. (Rusi 1:20, 21) Imana ntitugerageza ngo dukore icaha. (Yakobo 1:13) Inyosha mbi yo gukora ikibi iva kuri Diyabule, ku mubiri wacu munyacaha hamwe no kuri iyi si. Shetani ni we atwosha nabi akagerageza n’urwenge kudusuka mu gucumura ku Mana. (Matayo 4:3; 1 Ab’i Tesalonike 3:5) Igihe dusavye ngo: “Ntutujane mu bitwosha nabi,” tuba turiko dusaba Imana ntitureke ngo tunanirwe igihe tugeragejwe mu vy’ukuyigambararira. Irashobora kutuyobora kugira ngo ntiturambirwe kandi ntidutsindwe na Shetani, “wa Mubi.”—Matayo 6:13; 1 Ab’i Korinto 10:13.

Nukore Ibihuye n’Ivyo Wasavye

18. Dushobora gute gukora mu buryo bujanye n’amasengesho twatuye dusaba kwubaka urugo hamwe no kugira ubuzima bw’umuryango birangwa ubuhirwe?

¹⁸ Rya sengesho ry’akarorero rya Yezu ryarimwo ingingo nkurunkuru, mugabo turashobora gusenga dusaba ikintu ico ari co cose. Nk’akarorero, turashobora gusaba ku vyerekeye icipfuzo dufise co kwubaka urugo rurangwa ubuhirwe. Kugira ngo twoye kugwa mu buhumbu gushika igihe co kwubaka urwacu, kumbure turashobora gusenga Imana ngo tugire ukwigumya. Mugabo rero nimuze dukore ibihuye n’ivyo twasavye mu kwirinda ibitabu be n’ukwisamaza birimwo ubushegabo. Vyongeye, nitwiyemeze ‘kwubaka mu Mukama gusa.’ (1 Ab’i Korinto 7:39; Gusubira mu Vyagezwe 7:3, 4) Nitwamara kwubaka urwacu, tuzokenera gukora ibihuje n’amasengesho dutura dusaba kugira ubuhirwe mu gushira mu ngiro impanuro z’Imana. Kandi niba dufise abana, gusenga kugira ngo bazobe abasavyi ba Yehova b’abizerwa ntibihagije. Dukwiye gukora uko dushoboye kwose kugira twinjize ukuri kw’Imana mu mizirikanyi yabo biciye ku nyigisho ya Bibiliya hamwe no ku kwitaba tudahorereza amakoraniro ya gikirisu turi kumwe na bo.—Gusubira mu Vyagezwe 6:5-9; 31:12; Imigani 22:6.

19. Dukwiye gukora iki niba dusenze ku vyerekeye igikenurwa cacu?

¹⁹ Twoba dusenga dusaba imihezagiro mu gikenurwa? Gutyo rero, nimuze dukore ibijanye n’amasengesho mwene ayo mu kugira uruhara bimwe bifise ico bivuze mu murimo wo kwamamaza Ubwami. Iyo dusenze kugira ngo turonke uturyo two gufasha abandi gushika mu nzira ishikana ku buzima budashira, dukwiye kugira aho twandika neza abashimishijwe kandi tukemera gushira mu rutonde rwacu ivyo kurongora inyigisho za Bibiliya. Vyogenda gute niba twipfuza gutangura umurimo w’igihe cose wo kwamamaza inkuru nziza turi abatsimvyi? Nimuze rero dutere intambwe zijanye n’ivyo twasavye mu kwongereza umurimo wacu wo kwamamaza inkuru nziza no mu kujana mu gikenurwa turi kumwe n’abatsimvyi. Gutera intambwe nk’izo bizokwerekana ko turiko dukora mu buryo bujanye n’amasengesho yacu.

20. Ikiganiro gikurikira cihweza iki?

²⁰ Niba turiko dukorera Yehova tudahemuka, turashobora kwizigira ko azokwishura amasengesho yacu ajanye n’ukugomba kwiwe. (1 Yohana 5:14, 15) Vy’ukuri, twatororokanije ibintu vy’ingirakamaro mu gusuzuma amwamwe mu masengesho yanditse muri Bibiliya. Mu kiganiro cacu gikurikira twihweza ibindi bintu bishingiye mu Vyanditswe vyoyobora abipfuza ‘gutegura amasengesho yabo nk’imibavu imbere ya Yehova.’

Wokwishura Gute?

◻ Ni kuki dukwiye gutura amasengesho dufise ukwizera?

◻ Ugushemeza be n’ugukenguruka bikwiye kugira uruhara uruhe mu masengesho yacu?

◻ Ni kuki dukwiye kurondera imfashanyo ivuye kuri Yehova mu gusenga tubigiranye ukwizigira?

◻ Ni ingingo nkurunkuru zimwezimwe izihe dusanga muri rya sengesho ry’akarorero?

◻ Dushobora gukora gute mu buryo bujanye n’ivyo twasavye?

[Ifoto ku rup. 10]

Nka kumwe kw’Umwami Yehoshafati, rimwe na rimwe dushobora kuba dukeneye gusenga duti: ‘Ntituzi ico turi bugire, ariko ni wewe duhanze amaso, Yehova’

[Ifoto ku rup. 11]

Woba usenga mu buryo buhuje na rya sengesho rya Yezu ry’akarorero?