Woba Uriko Urarangura Ivyo Utegerezwa ku Mana Vyose?

“Imana izoshira igikorwa cose mu rubanza, bo n’ikintu cose gihishijwe, ari kibi ari ciza.”—UMUSIGUZI 12:14.

1. Ni indinganizo izihe Yehova yagiriye abasavyi biwe?

YEHOVA arafata mu mugongo abaguma bibuka ko ari Umuremyi wabo Ahambaye. Ijambo ryiwe ryahumetswe rirabaha ubumenyi bukenewe kugira ngo bamushimishe mu buryo bwuzuye. Impwemu yera y’Imana irabayobora mu vy’ugukora ivyo igomba hamwe no “m[u kwa]ma imbuto mu bikorwa vyiza vyose.” (Ab’i Kolosayi 1:9, 10) Vyongeye, Yehova aratanga imfungurwa zo mu buryo bw’impwemu be n’ubuyobozi bwa gitewokarasi biciye kuri wa “mushumba w’umwizerwa kandi w’incabwenge.” (Matayo 24:45-47, NW) Mu buryo bwinshi rero, abasavyi b’Imana bararonka umuhezagiro uva mw’ijuru uko bakorera Yehova bakongera bakarangura wa murimo w’ingirakimazi wo kwamamaza inkuru nziza z’Ubwami.—Mariko 13:10.

2. Ku vyerekeye umurimo dukorera Yehova, ni ibibazo ibihe bishobora kuvyuka?

² Abakirisu b’ukuri barafise umunezero wo kugira vyinshi bakora mu murimo mweranda bakorera Yehova. Yamara, hari abashobora gucika intege maze bakiyumvira yuko utwigoro bagira ataco tumaze. Nk’akarorero, rimwe na rimwe Abakirisu biyeguriye Imana boshobora kwibaza nimba utwigoro bagira babikuye ku mutima hari ico twoba tumaze vy’ukuri. Igihe bazirikana ku nyigisho y’umuryango be no ku yindi mirimo, ibibazo nk’ibi bikurikira birashobora kuza mu muzirikanyi wa serugo: ‘Yehova yoba vy’ukuri ashimishwa n’ivyo turiko turakora? Twoba turiko turarangura ivyo dutegerezwa ku Mana vyose?’ Amajambo yavuzwe n’umusiguzi aranga ubukerebutsi arashobora gufasha kwishura ibibazo nk’ivyo.

Mbega Ibintu Vyose Vyoba Ari Ubusa?

3. Mu bijanye n’Umusiguzi 12:8, ubusa buhebuje ni ubuhe?

³ Hari abashobora kwiyumvira ko amajambo y’uwo mugabo w’inkerebutsi ata muntu n’umwe aremesha—yaba uwukiri muto canke uwukuze. “N’ubusa gusa, ni k’Umusiguzi [y]agize, vyose n’ubusa.” (Umusiguzi 12:8) Mu vy’ukuri, ni ivy’ubusa buhebuje kwirengagiza Umuremyi Ahambaye mu buto, umuntu agasaza atamukoreye, akiratira gusa imyaka myinshi y’ubuzima. Ku muntu nk’uyo, vyose biba vyabaye ubusa, canke ataco vyamaze, naho mbere yopfa afise ubutunzi kandi ari rurangiranwa muri iyi si iri mu bubasha bwa wa mubi, Shetani ya Diyabule.—1 Yohana 5:19.

4. Ni kuki bishobora kuvugwa yuko ibintu vyose atari ubusa?

⁴ Ibintu vyose si ubusa ku birundaniriza ubutunzi mw’ijuru ari abasavyi ba Yehova b’abizigirwa. (Matayo 6:19, 20) Bafise vyinshi bakora mu murimo w’agaciro w’Umukama, kandi ibikorwa nk’ivyo usanga atari ivy’impfagusa na gato. (1 Ab’i Korinto 15:58) Mugabo nimba turi Abakirisu biyeguriye Imana, twoba tuguma dufise vyinshi dukora mu gikorwa twashinzwe n’Imana muri iyi misi y’iherezo? (2 Timoteyo 3:1) Canke twoba twarahisemwo uburyo bwo kubaho ata kinini butandukaniyeko n’ubw’ababanyi bacu muri rusangi? Bashobora kuba bari mu madini atandukanye kandi bakaba bayijukiye vy’ukuri, bakama bagiye ku masengero kandi bakagerageza gushitsa ivyo idini ryabo ribasaba. Birumvikana, si abamamaji b’ubutumwa bw’Ubwami. Ntibafise ubumenyi nyakuri bw’uko iki ari “igihe c’iherezo” kandi ntibabona ko ibintu vyihutirwa ku vyerekeye iyi misi turimwo.—Daniyeli 12:4.

5. Dukwiye gukora iki mu gihe ibintu bisanzwe umuntu yokurikirana mu buzima bibaye ibituraje ishinga kuruta?

⁵ Ku vyerekeye ibihe bigoye turimwo, Yezu Kirisitu yavuze ati: “Uko vyari biri mu misi ya Nowa ni ko bizoba mu kuza kw’Umwana w’umuntu. Kukw ari ko bāri bameze mu misi umwuzure utaribgatere: bārarya, bāranywa, bārarongora, bārashingira, bageza kuri wa musi Nowa yinjiye muri bga bgato, ntibagira ico bamenya kugeza ah’umwuzure waziye ubatwara bose; ni k’ukuza kw’Umwana w’umuntu kuzomera.” (Matayo 24:37-39) Nta kibi kiri mu kurya no mu kunywa mu gihe biri ku rugero, kandi ukwabirana ni indinganizo yashinzwe n’Imana ubwayo. (Itanguriro 2:20-24) Yamara, iyo tubonye ko ibintu bisanzwe umuntu yokurikirana mu buzima ari vyo bituraje ishinga kuruta, ni kuki none tutobishira mw’isengesho? Yehova arashobora kudufasha tukaguma dushira ivyungura Ubwami mu kibanza ca mbere, tugakora ibigororotse, kandi tukarangura ivyo dutegerezwa kuri we.—Matayo 6:33; Abaroma 12:12; 2 Ab’i Korinto 13:7.

Ukwiyegura be n’Ivyo Dutegerezwa ku Mana

6. Ni mu buryo ubuhe buhambaye ababatijwe bamwebamwe bananirwa kurangura ivyo bategerezwa ku Mana?

⁶ Abakirisu babatijwe bamwebamwe barakeneye gusengana ubwira kubera ko batabaho bisunga ivyo bategerezwa gukora mu gikenurwa batanguye igihe biyegurira Imana. Ubu haraciye imyaka itari mike uko umwaka utashe habatizwa abantu barenga 300 000, mugabo igitigiri c’Ivyabona vya Yehova barangura umurimo bose hamwe nticiyongereye mu buryo bujanye n’iryo yongerekana. Hari bamwe mu bacitse abamamaji b’Ubwami bahagaritse kwamamaza inkuru nziza. Yamara, abantu bakwiye kugira uruhara ruri n’ico ruvuze mu gikenurwa c’Abakirisu imbere y’uko babatizwa. Niho rero boba bazi umurimo Yezu yashinze abayoboke biwe bose. Na wo ni uyu: “Ni mugende, muhindure [abantu bo mu] mahanga yose abigishwa, mubabatiza mw izina rya Data wa twese n’iry’Umwana n’iry[’im]pwemu [y]era; mubigishe kwitondera ivyo nabageze vyose.” (Matayo 28:19, 20) Kiretse hamwe boba bafise ibibatangira birushirije kuba ibidasanzwe bivuye ku magara canke izindi mvo zitabaturutseko, abantu babatijwe batakiri Ivyabona b’abanyamwete b’Imana na Kirisitu ntibaba barangura ivyo bategerezwa vyose ku Muremyi wacu Ahambaye.—Yesaya 43:10-12.

7. Ni kuki dukwiye kwama nantaryo dukoranira hamwe ku bw’ugusenga?

⁷ Isirayeli ya kera ryari ihanga ryiyeguriye Imana, kandi mu gihe c’isezerano ry’Ivyagezwe, abanyagihugu baho bari bafise ivyo bategerezwa kuri Yehova. Nk’akarorero, abagabo bose bategerezwa gutororokana ku bw’imisi mikuru itatu yaba uko umwaka utashe, kandi umuntu atubahiriza Pasika nkana ‘yaracibwa’ mu kwicwa. (Guharūra 9:13; Abalewi 23:1-43; Gusubira mu Vyagezwe 16:16) Kugira ngo Abisirayeli bashitse ivyo bategerezwa ku Mana bwa basavyi biwe bamwiyeguriye, babwirizwa gutororokana ku bw’ugusenga. (Gusubira mu Vyagezwe 31:10-13) Nta hantu na hamwe mu Vyagezwe hagira hati: ‘Ivyo urabigira nimba bikworohera mu buzima bwawe.’ Ubu ku bantu biyeguriye Yehova, nta mazinda yuko iryo tegeko ryongereza uburemere amajambo yavuzwe na Paulo agira ati: “Twiyumviraneko, kugira ngo turwane ishaka ryo gukundana n’iry’ibikorwa vyiza, twoye guheba gukoranira hamwe, nk’uko bamwe bagira, ariko duhanūrane, kand’uko mubonye wa musi wegereza, murushirize kugenza murtyo.” (Abaheburayo 10:24, 25) Egome, gukoranira hamwe n’abo dusangiye ukwemera tudahengeshanya ni ikintu kiri mu vyo Umukirisu yiyeguriye Imana ategerezwa kuri yo.

Nurimbure Witonze Ingingo Ufata!

8. Ni kuki uwiyeguriye Imana akiri muto akwiye kurimbura mw’isengesho ivyerekeye umurimo mweranda arangura?

⁸ Kumbure wiyeguriye Yehova ukiri muto. Uzogira imihezagiro myinshi niwaguma ushira ivyungura Ubwami mu kibanza ca mbere mu buzima. (Imigani 10:22) Biciye mw’isengesho no gutegekanya ibintu witonze, woshobora kumara n’imiburiburi imyaka yo mu buto bwawe mu muce munaka w’umurimo w’igihe cose—bukaba ari uburyo bwiza bwo kwerekana ko wibuka Umuremyi wawe Ahambaye. Ahandiho, amaronko arashobora gutangura kugutwara umwanya wawe mwinshi, akaba ari yo witwararika kuruta. Nk’uko abantu muri rusangi babigira, urashobora kwubaka ukiri muto hanyuma ukaja mu myenda urondera ibintu vy’umubiri. Umwuga ukubeshaho urashobora kugutwara umwanya wawe mwinshi n’inguvu zawe nyinshi. Nimba ufise abana, uzotegerezwa kwikorera amabanga y’umuryango mu kiringo c’imyaka mirongo. (1 Timoteyo 5:8) Ushobora kuba utibagiye Umuremyi wawe Ahambaye, ariko ni ibiranga ubukerebutsi kubona ko ibintu ubitegekanije hakiri kare canke ntubitegekanye, bishobora kugucira inzira ugeze mu bigero. Imyaka imaze kwiterera, ushobora gukubitiza agatima mpembero maze ukipfuza ko n’imiburiburi ubusore canke ubukumi bwawe buba bwarakoreshejwe mu buryo bwuzuye mu murimo mweranda ukorera Umuremyi wacu Ahambaye. Ni kuki ubu bwa none utozirikana mw’isengesho imigambi yawe yo muri kazoza kugira ngo uzomarwe akanyota n’umurimo mweranda uzoba wakoreye Yehova mu myaka y’ubuto bwawe?

9. Ni igiki coshobokera umuntu ageze mu zabukuru kandi akaba yarigeze kugira amabanga ahambaye mw’ishengero?

⁹ Nurimbure ibindi bintu bishobora gushika—ivyoshikira umuntu yigeze kuba umwungere w’ “ubusho bg’Imana.” (1 Petero 5:2, 3) Biturutse ku mvo kanaka, akikura mu mabanga mwene ayo. Ni vyo, ubu ageze mu zabukuru, kandi bishobora kuba vyorushiriza kumugora kubandanya kurangura umurimo w’Imana. Mugabo yoba akwiriye kwongera kurondera gushingwa uduteka twa gitewokarasi? Ese imihezagiro umuntu nk’uwo ashobora kuzanira abandi mu gihe yoba ashoboye kurangura ayandi mabanga mw’ishengero! Kandi kubera ko ata n’umwe abaho ku bwiwe gusa, abagenzi hamwe n’abo akunda bazonezerwa nimba ashoboye kwongereza umurimo wiwe, ku bw’ubuninahazwa bw’Imana. (Abaroma 14:7, 8) Ikiruta vyose, Yehova ntazokwibagira ico uwo ari we wese akora mu murimo wiwe. (Abaheburayo 6:10-12) None, ni igiki gishobora kudufasha kwibuka Umuremyi wacu Ahambaye?

Ibidufasha Kwibuka Umuremyi Wacu Ahambaye

10. Ni kubera iki umusiguzi yari ashoboye cane gutanga ubuyobozi ku vyerekeye ukwibuka Umuremyi wacu Ahambaye?

¹⁰ Umusiguzi yari ashoboye cane gutanga ubuyobozi mu vy’uko twokwibuka Umuremyi wacu Ahambaye. Yehova yari yarishuye amasengesho yiwe avuye ku mutima mu kumuha ubwenge budasanzwe. (1 Abami 3:6-12) Salomo yaragize itohoza rinonosoye ku vyerekeye ibintu vyose abantu bakora. Vyongeye, yarahumekewe n’Imana kugira ngo yandike ivyo yubura kugira ngo n’abandi bavyungukireko. Yanditse ati: “Vyongeye kandi, Umusiguzi kuko yar’umunyabgenge yashishikaye kwigisha abantu ubgenge; mbere yakoze irya n’ino, araserangura, aroranya imigani myinshi. Umusiguzi yagerageje kurondera amajambo aryoshe, ni yo yanditswe atunganye, ni yo majambo y’ukuri.”—Umusiguzi 12:9, 10.

11. Ni kuki dukwiye kwakiriza yompi impanuro ziranga ubukerebutsi Salomo yatanze?

¹¹ Muri ya mpinduro y’Ikigiriki yitwa La Septante, ayo majambo asomwa uku: “Kandi vyongeye, kubera ko umusiguzi yari inkerebutsi, kubera yigishije abantu ubukerebutsi; kugira ngo ugutwi kuronke ikintu ciza kivuye mu migani, umusiguzi yaragize ubushakashatsi bwitondewe kugira ngo aronke amajambo aryoheye ugutwi hamwe n’ukwandika ibigororotse—ni ukuvuga amajambo y’ukuri.” (La Septante, yahinduwe na Charles Thomson) Salomo yarihase gushikira imitima y’abasomyi akoresheje amajambo aryoshe, ashimishije vy’ukuri be n’ibiganiro vy’ingirakamaro. Kubera ko amajambo yiwe ari mu Vyanditswe yabonetse ku bw’uguhumekerwa n’impwemu yera, turashobora kwemera ata guhigima ivyo yubuye be n’impanuro ziwe ziranga ubukerebutsi.—2 Timoteyo 3:16, 17.

12. Mu majambo yawe bwite, woserura gute ivyo Salomo yavuze nk’uko vyanditse mu Musiguzi 12:11, 12?

¹² Eka no mu gihe hataribwaboneke ubuhinga bwa none bwo gucapura, hari hariho ibitabu injojo mu misi ya Salomo. Mbega ivyo bitabu umuntu yari akwiye kubibona gute? Yavuze ati: “Amajambo y’abanyabgenge ni nk’imihunda, kand’amajambo atororokanijwe ni nk’imambo zishimangiwe, umwungere umwe ari we yayatanze. Ibisigaye, mwana wanje, uhanurwe: kwandika ibitabo vyinshi ntikugira iherezo; kand’uk[uvyihebera] cane kuruhisha umubiri.”—Umusiguzi 12:11, 12.

13. Amajambo y’abafise ubukerebutsi buva ku Mana ashobora gute kumera nk’imihunda, kandi ni bande bameze nk’ “imambo zishimangiwe”?

¹³ Amajambo y’abantu bafise ubukerebutsi buva ku Mana ameze nk’imihunda. Mu buryo ki? Ahimiriza abasomyi canke abumviriji gutera imbere mu buryo bujanye n’ayo majambo aranga ubukerebutsi basomye canke bumvise. Si ivyo gusa, abantu baja mu vy’ ‘ugutororokanya amajambo,’ canke ibivuzwe biranga ubukerebutsi kandi vy’ingirakamaro vy’ukuri, bameze nk’ “imambo zishimangiwe” canke zakomerewe zikaguma. Ivyo bishobora kuba bimeze gutyo kubera ko amajambo meza y’abantu nk’abo agaragaza ubukerebutsi bwa Yehova kandi agashobora rero gukoreshwa kugira ngo ashigikire yongere afate mu mugongo abayasoma n’abayumviriza. Nimba uri umuvyeyi atinya Imana, none ntukwiye gukora uko ushoboye kwose kugira ngo ushire ubukerebutsi nk’ubwo mu muzirikanyi be no mu mutima vy’umwana wawe?—Gusubira mu Vyagezwe 6:4-9.

14. (a) Ni ibitabu bwoko ki ata nyungu iva mu ‘kuvyihebera cane’? (b) Ni ivyandikano ibihe dukwiye kubanza kwitwararika, kandi kubera iki?

¹⁴ None ni kuki Salomo yavuze arya majambo ku vyerekeye ibitabu? Urabona, ibitabu bitagira uko bingana vyo muri iyi si ubigereranije n’Ijambo rya Yehova usanga birimwo ivyiyumviro vy’abantu gusa. Vyinshi muri ivyo vyiyumviro bigaragaza ibiri mu muzirikanyi wa Shetani ya Diyabule. (2 Ab’i Korinto 4:4) Ni co gituma rero ‘kwihebera cane’ ivyo bitabu vyo mw’isi birimwo agaciro kataramba. Kukaba nk’ako, vyinshi muri vyo birashobora kugirira umuntu nabi mu vy’impwemu. Nka kumwe kwa Salomo, nimuze tuzirikane ku vyo Ijambo ry’Imana rivuga ku vyerekeye ubuzima. Ivyo bizokomeza ukwizera kwacu kandi bitume twiyegereza Yehova. Kwitwararika birenze urugero ibindi bitabu canke ayandi masoko atanga amacishabwenge birashobora kuturuhisha. Ivyandikano mwene ivyo biba canecane bibi ku kwizera Imana n’imigambi yayo kandi bikagusambura canecane igihe birimwo ivyiyumviro vy’iyi si biteye kubiri n’ubukerebutsi buva ku Mana. Nuko rero, nitwibuke ko ivyandikano nzanakunguko kuruta vyo mu misi ya Salomo no muri iyi turimwo ari ibigaragaza ubukerebutsi bwa wa “mwungere rudende,” Yehova Imana. Yaraturonkeje vya bitabu 66 vy’Ivyanditswe Vyeranda, kandi ivyo dukwiye kuvyitwararika kuruta ibindi vyose. Bibiliya hamwe n’ibisohokayandikiro ngirakamaro bitangwa na wa ‘mushumba w’umwizerwa’ biratuma dushobora kuronka ‘bwa bumenyi bwerekeye Imana.’—Imigani 2:1-6.

Ivyo Dutegerezwa Vyose ku Mana

15. (a) Woserura gute amajambo Salomo yavuze ku vyerekeye ‘ivyo umuntu ategerezwa vyose’? (b) Dukwiye gukora iki nimba dushaka kurangura ivyo dutegerezwa ku Mana?

¹⁵ Mu kugira incamake y’itohoza ryose yagize, umusiguzi Salomo avuga ati: “Vyose vyarumviswe: indunduro yavyo n’iyi: Wubahe Imana, witondere ivyagezwe na yo; kukw ivyo ari vyo [umuntu ategerezwa vyose]. Kukw Imana izoshira igikorwa cose mu rubanza, bo n’ikintu cose gihishijwe, ari kibi ari ciza.” (Umusiguzi 12:13, 14) Ugutinya Umuremyi wacu Ahambaye kwiza ari kwo kumwubaha bizodukingira kandi twizigire ko bizokingira n’imiryango yacu, ngo mu buzima ntidukurikirane ingendo y’ubupfu ishobora kuduteza umudugararo n’intuntu bitagira uko vyovugwa bikongera bikabiteza n’abo dukunda. Ugutinya Imana kwiza kuratyoroye kandi ni yo ntango nyene y’ubukerebutsi n’ubumenyi. (Zaburi 19:9; Imigani 1:7) Mu gihe dufise ubukerebutsi bushingiye mw’Ijambo ryahumetswe ry’Imana kandi tugashira mu ngiro impanuro yaryo mu bintu vyose, tuzoba turiko turarangura ‘ivyo dutegerezwa vyose’ ku Mana. Oya, si ivy’ukugira urutonde rw’ivyo dutegerezwa. Ahubwo, igisabwa ni uko turonderera ubuyobozi mu Vyanditswe igihe dutorera umuti ingorane zo mu buzima kandi tukama nantaryo dukora ibintu mu buryo Imana ibishaka.

16. Ku vyerekeye urubanza, Yehova azokora iki?

¹⁶ Dukwiye kubona ko ata kintu na kimwe gica mu ryahumye Umuremyi wacu Ahambaye. (Imigani 15:3) “[A]zoshira igikorwa cose mu rubanza.” Egome, Musumbavyose azocira urubanza ibintu vyose, ushizemwo n’ibihishijwe ku maso y’abantu. Tuzi ivyo bintu birashobora gutuma twitondera amabwirizwa y’Imana. Mugabo ikintu kituvyurira ingiro kuruta vyose gikwiye kuba urwo dukunda Data wa twese wo mw’ijuru, kubera ko intumwa Yohani yanditse iti: “Ugukunda Imana [ni] uku, n’uko twitondera ivyagezwe vyayo: kand’ivyagezwe vyayo ntibigora.” (1 Yohana 5:3) Kandi kubera ko ivyagezwe vy’Imana vyagenewe gutuma tumererwa neza mu buryo buramba, nta nkeka ko kuvyitondera bitabereye gusa ariko kandi ko vy’ukuri biranga ubukerebutsi. Ivyo si umutwaro ku bakunda Umuremyi Ahambaye. Bashaka kurangura ivyo bategerezwa kuri we.

Nurangure Ivyo Utegerezwa Vyose

17. Tuzokora iki nimba dushaka vy’ukuri kurangura ivyo dutegerezwa ku Mana vyose?

¹⁷ Nimba dufise ubukerebutsi kandi tukipfuza vy’ukuri kurangura ivyo dutegerezwa ku Mana vyose, uretse ukuguma twitondera amabwirizwa yiwe, tuzogira ubwoba buranga icubahiro bwo kutayishavuza. Mu vy’ukuri, “kwubaha Uhoraho n’itanguriro ry’ubgenge,” kandi abitondera amabwirizwa yiwe bafise “ubgenge bushitse.” (Zaburi 111:10; Imigani 1:7) Nimuze rero dukorane ubukerebutsi twongere tugamburukire Yehova mu bintu vyose. Ivyo birahambaye canecane muri iki gihe kubera ko Umwami Yezu Kirisitu ariho ari, kandi umusi w’amateka ari Umucamanza yagenywe n’Imana ukaba wegereje.—Matayo 24:3; 25:31, 32.

18. Bizotugendera gute turamutse turanguye ivyo dutegerezwa kuri Yehova Imana vyose?

¹⁸ Umwe wese muri twebwe ubu ariko arasuzumwa n’Imana. Twoba duhengamiye ku bintu vy’impwemu, canke twoba twararetse utwosho tw’isi tugatitura ubucuti dufitaniye n’Imana? (1 Ab’i Korinto 2:10-16; 1 Yohana 2:15-17) Twaba turi bato canke dukuze, nimuze dukore uko dushoboye kwose kugira ngo dushimishe Umuremyi wacu Ahambaye. Nitwaramuka tugamburukiye Yehova tukongera tukitondera amabwirizwa yiwe, tuzokwamirira kure ibintu vy’impfagusa vyo muri iyi si ishaje iri ku mushiro. Maze niho dushobora kugira icizigiro c’ubuzima budahera mw’isi nshasha Imana yasezeranye. (2 Petero 3:13) Ese ukuntu ivyo ari ivyizigiro bihambaye kuri abo bose barangura ivyo bategerezwa ku Mana vyose!

Wokwishura Gute?

◻ Ni kuki wovuga ko ikintu cose atari ubusa?

◻ Ni kubera iki Umukirisu akiri muto akwiye kuzirikana mw’isengesho ivy’umurimo mweranda arangura?

◻ Ni ibitabu bwoko ki ata nyungu iva mu ‘kuvyihebera cane’?

◻ ‘Ivyo umuntu ategerezwa vyose’ ni ibiki?

[Ifoto ku rup. 16]

Ku bakorera Yehova, ibintu vyose si ubusa

[Ifoto ku rup. 18]

Ijambo ry’Imana riratandukanye n’ibitabu vyinshi vyo muri iyi si, riraruhura kandi ni nzanakunguko