Ibibazo vy’Abasomyi

Ni inyobozo iyihe Ivyanditswe bitanga ku vyerekeye ukurera abana iyo umuvyeyi umwe ari Icabona ca Yehova uwundi atari Icabona ca Yehova?

Hariho ingingo ngenderwako zibiri nyamukuru zo mu Vyanditswe zitanga inyobozo ku vyerekeye ukurera abana ku muvyeyi ari Icabona akaba yubakanye n’uwutari Icabona. Imwe ni iyi: “Igikwiye n’ukwumvira Imana kuyirutisha abantu.” (Ivyakozwe 5:29) Iyindi ni iyi: “Umugabo [ni] we mutwe w’umugore wiwe, nk’uko Kristo na we ar’umutwe w’ishengero.” (Abanyefeso 5:23) Iyo ngingo duherejeko ntikora gusa ku bagore bafise abagabo bari Ivyabona, ahubwo kandi irakora no ku bagore bafise abagabo batari Ivyabona. (1 Petero 3:1) None umuvyeyi ari Icabona yorimbanya gute izo ngingo ngenderwako igihe yigisha abana biwe?

Nimba umugabo ari Icabona ca Yehova, ni we ajejwe kuronsa abo mu rugo rwiwe ivyo bakeneye mu vy’impwemu no mu vy’umubiri. (1 Timoteyo 5:8) Naho inarugo atizera yoba amarana umwanya munini n’abana babo, uwo serugo ari Icabona ni we akwiye kwigisha abana biwe mu kubamenyereza mu vy’impwemu i muhira be no mu kubajana ku makoraniro ya gikirisu, aho bazokwungukira ku nyigisho itangwa mu vy’ukwigenza runtu bakongera bakifatanya n’abagenzi beza.

Bite hoho mu gihe umukenyezi wiwe atizera akobeje ngo ajane abana babo aho asengera, canke ngo abigishe ivyo yemera? Hari aho amategeko y’ico gihugu yoba amuha uburenganzira bwo kubigira. Ivy’uko nya bana boshobora kureshwa ngo baje mu vy’ugusenga muri mwene ivyo bibanza, ahanini vyova ku kuntu inyigisho yo mu vy’impwemu serugo atanga imeze. Uko nya bana bakura, inyigisho yo mu Vyanditswe se abaha ikwiye kubafasha gukurikira ukuri kw’Ijambo ry’Imana. Ibaze ingene nya mugabo yizeye yohimbarwa hamwe abana bofata ingingo yo gukurikira ukuri!

Nimba inarugo ari Icabona ca Yehova, abwirizwa kwubaha ingingo igenga ubukuru mu rugo, mu gihe aguma yitwararitse ukumererwa neza kw’ibihe bidahera kw’abana biwe. (1 Ab’i Korinto 11:3) Kenshi uzosanga umugabo wiwe atizera ata co bimutwara igihe umukenyezi wiwe ari Icabona aha abana babo inyigisho yo mu vy’ukwigenza runtu no mu vy’impwemu, imfashanyo yavyo na yo ikaba iboneka ku makoraniro y’abasavyi ba Yehova. Inarugo arashobora gufasha umugabo wiwe atizera kubona ivyiza biva kuri iyo nyigisho yubaka, iyo abana biwe baronka biciye mw’ishirahamwe rya Yehova. Arashobora gushimika agengeza ku gaciro k’ukwigisha abana babo ingingo ngenderwako za Bibiliya mu vy’ukwigenza runtu, narirya baba bahanganye n’ukuba mw’isi itera itituka mu vy’ukwigenza runtu.

Ariko rero, vyoshika umugabo atizera agashimika ngo abana biwe bakurikire idini ryiwe, akaza arabajana iyo asengera yongera abaha inyigisho z’ivy’idini yisunze ukwizera kwiwe. Canke na ho umugabo yoshobora kuba aterekwa idini na rimwe, hanyuma agashimika avuga ko abana biwe ata nyigisho namba z’ivy’idini bakwiye guhabwa. Kubera ko ari we serugo, ni we ubwa mbere na mbere ajejwe gufata ingingo.a

Naho aguma yubashe ubukuru bw’umugabo wiwe mu rugo, bwa Mukirisukazi yiyeguye, uwo mukenyezi yizeye yokwamiza mu muzirikanyi agatima intumwa Petero na Yohani bari bafise, bo bavuze bati: “Tweho [ntidu]shobora kureka kuvuga ivyo twabonye n’ivyo twumvise.” (Ivyakozwe 4:19, 20) Bivuye ku kwitwararika ukumererwa neza mu vy’impwemu kw’abana, inarugo ari Icabona azorondera uturyo two guha abana biwe ubuyobozi mu vy’ukwigenza runtu. Imbere ya Yehova arafise ibanga ryo kwigisha abandi ivyo azi ko ari ukuri, kandi ntiyokwigisha abandi ngo areke abana biwe. (Imigani 1:8; Matayo 28:19, 20) None inarugo ari Icabona yobigenza gute imbere y’iyo ngorane itoroshe?

Fata nk’akarorero ikibazo kijanye n’ukwemera Imana. Umukenyezi ari Icabona ashobora kuba adashoboye kugirira abana biwe inyigisho yemewe ya Bibiliya kubera umugabo wiwe yabibujije. None ku bw’ivyo yoba akwiye gutinyatinya kubwira abana biwe ikintu na kimwe cerekeye Yehova? Oya. Ivyo avuga hamwe n’ivyo akora ntivyobura kugaragaza ko yemera Umuremyi. Abana biwe ntibobura ivyo bashaka kumubaza kuri ico kibazo. Nta gikwiye kumubuza gukoresha uburenganzira bwiwe bwo gukurikira idini mu guserura ukwemera afitiye Umuremyi, be no mu kuguserurira abana biwe. Naho yoba adashoboye kurongorera abana biwe inyigisho ya Bibiliya canke kubajana ku makoraniro adahorereza, arashobora kubaha ubumenyi bwerekeye Yehova Imana.​—Gusubira mu Vyagezwe 6:7.

Ku vyerekeye ubucuti buri hagati y’Icabona be n’uwo bubakanye atizeye, intumwa Paulo yanditse ati: “Umugabo atizera yezwa kubg’umugore wiwe, kand’umugore atizera yezwa kubga mwene Data uyo. Iyo bitamera birtyo, abana banyu baba ar’ibihumane, ariko noneho n’abera.” (1 Ab’i Korinto 7:14) Yehova abona ubunywanyi hagati y’ababiranye nk’aho ari bweranda bitewe n’uwizera mu bubakanye, hanyuma abana bagafatwa nk’abera mu nyonga za Yehova. Uwo mugore ari Icabona akwiye gukora uko ashoboye kwose agafasha abana biwe gutahura ukuri, ico amaherezo bizovamwo akakirekera mu minwe ya Yehova.

Uko abana bagenda barakura, babwirizwa guhitamwo impagararo bofata ishingiye ku vyo bigishijwe n’abavyeyi babo. Hari aho bofata ingingo yo gukora bisunze aya majambo Yezu yavuze, ati: “Ūkunze se canke nyina akabandutisha, ntaba ankwiye.” (Matayo 10:37) Babwirwa kandi bati: “Bana, mwumvire abavyeyi banyu mu Mwami wacu.” (Abanyefeso 6:1) Abakiri bato benshi bahisemwo ‘kwumvira Imana nka yo mutware’ aho kwumvira umuvyeyi atari Icabona, naho nyene uyo muvyeyi yobateza amagume. Ese ingene vyoshimisha uwo muvyeyi ari Icabona abonye abana biwe bahisemwo gukorera Yehova naho boba barwanywa!

[Akajambo k’epfo]