Abungere babera ‘ivyitegererezo ubusho’

“Muragire ubusho bg’Imana bgo muri mwebge, . . . mubikunze, . . . [“mubishashaye”, “NW”] . . . mube ivyitegererezo vy’ubusho”.​—1 PETERO 5:2, 3.

1, 2. (a) Yezu yajeje intumwa Petero ibanga irihe, kandi ni kubera iki twovuga ko atihenze mu kumwizigira? (b) Yehova abona gute abungere bagenywe?

GATOYI imbere y’uko Pentekote yo mu 33 G.C. ishika, Petero be n’abandi bigishwa batandatu bariko barafungura udufungurwa two kwitanga umusase Yezu yari yateguriye ku nkengera y’Ikiyaga c’i Galilaya. Ntibwari bwo bwa mbere Petero abona Yezu inyuma y’aho azukiye, kandi nta gukeka ko vyamunezera rwose kwibonera ko Yezu ari muzima. Mugabo Petero ashobora kandi kuba yari ahagaritse umutima kubera yuko imisi mikeyi imbere y’aho, yari yihakanye Yezu icese, avuga yuko atamuzi na gato (Luka 22:55-60; 24:34; Yohana 18:25-27; 21:1-14). Yezu yoba yarakariye Petero, uwari amaze kwigaya, kubera ko ico gihe vyasa n’uko yabuze ukwizera? Habe namba. Ahubwo riho, Yezu yaramujeje ibanga ryo kugaburira no kuragira “intama” ziwe (Yohana 21:15-17). Nk’uko inkuru ya Bibiliya ivuga ivya kahise k’ishengero rya gikirisu ryo mu kinjana ca mbere ivyerekana, Yezu ntiyihenze mu kwizigira Petero. Petero, yifatanije n’izindi ntumwa be n’abagabo b’inararibonye b’i Yeruzalemu, yararagiye ishengero rya gikirisu mu gihe c’ibigeragezo bikomeye kandi c’iyongerekana ryihuta.​—Ivyakozwe n’intumwa 1:15-26; 2:14; 15:6-9.

² Muri iki gihe, Yehova, abicishije kuri Yezu Kirisitu, yaragenye abagabo bakwije ibisabwa kugira ngo babe abungere bo mu vy’impwemu, bayobore intama ziwe muri ibi bihe bigoye kuruta ikindi gihe cose, kuva abantu babayeho (Abanyefeso 4:11, 12; 2 Timoteyo 3:1). Yehova yoba none yarihenze mu kubizigira? Umuryango w’abavukanyi wo kw’isi yose urangwamwo amahoro urerekana ko Yehova atihenze. Ego ni ko, abo bungere ni abantu bishika bagakora amakosa, nk’uko vyashikiye Petero (Ab’i Galatiya 2:11-14; Yakobo 3:2). Naho ari ukwo, Yehova arabazeza ibanga ryo kwitwararika intama “yaguze amaraso [‘y’Umwana wiwe bwite’, NW]” (Ivyakozwe n’intumwa 20:28). Yehova arakunda cane abo bagabo, akabona ko ari abantu bakwiriye “[“iteka ririmwo abiri”, NW]”.​—1 Timoteyo 5:17.

3. Ni igiki gifasha abungere bo mu vy’impwemu kuguma bafise agatima ko kuragira intama babikunze kandi babishashaye?

³ Ni igiki gifasha abo bungere bo mu vy’impwemu kuguma bafise agatima ko kuragira ubusho babikunze kandi babishashaye, gutyo bakabubera ivyitegererezo? Cokimwe na Petero be n’abandi bungere bo mu kinjana ca mbere, abo bungere bariheka ku mpwemu yera y’Imana, iyibaronsa inkomezi bakeneye kugira ngo barangure ibanga bajejwe (2 Ab’i Korinto 4:7). Vyongeye, impwemu yera iratuma bama ivyamwa vyayo, ari vyo urukundo, umunezero, amahoro, ukwihangana, ubuntu, ukumera neza, ukwizera, ubugwaneza be n’ukwigumya (Ab’i Galatiya 5:22, 23). Nimuze turimbure uburyo bumwebumwe butomoye abungere bashobora kuba intangakarorero mu kugaragaza ivyo vyamwa mu buryo baragira ubusho bajejwe n’Imana.

Barakunda ubusho be n’intama imwimwe ukwayo

4, 5. (a) Yehova na Yezu berekana gute ko bakunda ubusho? (b) Urukundo abungere bo mu vy’impwemu bakunda ishengero barugaragaza mu buryo bumwebumwe ubuhe?

⁴ Kamere nyamukuru impwemu y’Imana yama ni urukundo. Yehova aragaragaza ko akunda ubusho bwose uko bugize umugwi mu kuburonsa imfungurwa umukimba zo mu vy’impwemu (Yesaya 65:13, 14; Matayo 24:45-47). Yamara, hari n’ibindi agira uretse kugaburira ubusho. Aritwararikana urukundo intama imwimwe ukwayo (1 Petero 5:6, 7). Yezu na we nyene arakunda ubusho. Yaratanze ubuzima bwiwe ku neza yabwo, kandi arazi intama imwimwe yose ‘mw’izina’.​—Yohana 10:3, 14-16.

⁵ Abungere bo mu vy’impwemu barigana Yehova na Yezu. Baragaragaza ko bakunda ubusho bw’Imana bwose uko bugize umugwi mu ‘kugira umwete wo kwigisha’ ishengero. Insiguro zishingiye kuri Bibiliya bashikiriza zirafasha mu bijanye n’ukugaburira be n’ugukingira ubusho, kandi igikorwa kitoroshe bakora muri ivyo, kiribonekeza kuri bose (1 Timoteyo 4:13, 16). Yamara, umuntu ntahuta abona umwanya bamara bariko batunganya ibijanye n’amadosiye y’ishengero, bitwararika ivy’amakete, bagira intonde zinaka, be n’uwo bamara bariko bitwararika ibindi bintu vyinshi kugira ngo amakoraniro y’ishengero be n’iyindi mirimo bishobore ‘gutungana neza, birorane’ (1 Ab’i Korinto 14:40). Myinshi muri iyo mirimo usanga itabonwa n’abagize ishengero kandi irashobora kudahabwa agaciro cane. Mu vy’ukuri, ni igikorwa kitoroshe kiranga urukundo.​—Ab’i Galatiya 5:13.

6, 7. (a) Ni uburyo bumwe ubuhe bufasha abungere kurushiriza kumenya intama? (b) Ni kubera iki rimwe na rimwe usanga ari ngirakamaro guserurira umukurambere uko twumva tumerewe?

⁶ Abungere bakirisu b’abanyarukundo barihatira kwitwararika intama imwimwe ukwayo mw’ishengero (Ab’i Filipi 2:4). Uburyo bumwe bufasha abo bungere kurushiriza kumenya intama imwimwe ukwayo ni ugukorana na zo mu gikorwa co kwamamaza kirangurirwa ku mugaragaro. Yezu yarakunda kujana n’abayoboke biwe mu gikorwa co kwamamaza maze agakoresha ako karyo kugira abaremeshe (Luka 8:1). Umwungere mukirisu umwe azi utuntu n’utundi avuga ati: “Mbona yuko uburyo bumwe bwiza kuruta ubundi bwo kumenya no kuremesha umuvukanyi canke umuvukanyikazi ari ugukorana na we mu busuku bwo ndimiro”. Nimba hari umukurambere mudaherutse gukorana mu busuku bwo mu ndimiro, ubona gute urondeye ukuntu mwokorana vuba?

⁷ Urukundo rwaratuma Yezu asangira n’abayoboke biwe umunezero n’umubabaro. Nk’akarorero, aho ba bigishwa biwe 70 bagarukiye banezerewe bavuye kwamamaza, Yezu yaciye ‘anezerwa cane’ (Luka 10:17-21). Ariko igihe Yezu yabona ukuntu Mariya be n’abo mu muryango wiwe hamwe n’abagenzi biwe bababajwe n’urupfu rwa Lazaro, ‘yararize’ (Yohana 11:33-35). Nk’ukwo nyene, muri iki gihe abungere bitwararika abandi baritaho ukuntu intama zumva zimerewe. Urukundo ruratuma ‘banezeranwa n’abanezerewe’ rukongera rugatuma ‘barirana n’abarira’ (Abaroma 12:15). Biramutse bishitse ukagira umunezero canke umubabaro mu buzima, ntiwitinye guserurira abo bungere bakirisu ukuntu wumva umerewe. Kwumva ko unezerewe bizobaremesha (Abaroma 1:11, 12). Kumenya ivyerekeye ibigeragezo uriko uracamwo bizobafasha kumenya ukuntu bogukomeza be n’ukuntu boguhumuriza.​—1 Ab’i Tesalonike 1:6; 3:1-3.

8, 9. (a) Umukurambere umwe yerekanye gute urukundo akunda umukenyezi wiwe? (b) Kuba umwungere akwiye kugaragaza urukundo akunda umuryango wiwe bihambaye ku rugero rungana iki?

⁸ Urukundo umwungere akunda ubusho rubonekera ahanini mu kuntu afata umuryango wiwe (1 Timoteyo 3:1, 4). Nimba yubatse, urukundo n’icubahiro agaragariza umukenyezi wiwe birabera akarorero abandi banega (Abanyefeso 5:25; 1 Petero 3:7). Raba amajambo umukenyezi mukirisu umwe yitwa Linda yavuze. Umunega wiwe yamaze imyaka irenga 20 ari umukurambere imbere y’uko ahwera. Linda avuga ati: “Umunega wanje yama afise vyinshi akora mu kwitwararika ishengero. Ariko yaratuma numva ko twe na we dushigikiranye. Yarakunda gukenguruka ukuntu ndamushigikira, kandi igihe cose ataba ari mu bikorwa vy’ishengero, yaba ari kumwe nanje. Ivyo vyatuma numva ko nkundwa bigatuma kandi ntagira inzigo kubera umwanya yamara ariko arasukurira ishengero”.

⁹ Nimba umwungere mukirisu afise abana, uburyo abatoza indero abigiranye urukundo be n’ukuntu yama abakeza birabera akarorero abandi bavyeyi (Abanyefeso 6:4). Mu vy’ukuri, urukundo akunda umuryango wiwe ruguma rwerekana ko abereye ibanga yajejwe igihe yagenwa n’impwemu yera.​—1 Timoteyo 3:4, 5.

Baratuma haba umunezero n’amahoro biciye ku kuganira

10. (a) Ni igiki gishobora guhungabanya umunezero n’amahoro mw’ishengero? (b) Ni ikibazo ikihe cagira gihungabanye amahoro y’ishengero ryo mu kinjana ca mbere, kandi ico kibazo catorewe umuti gute?

¹⁰ Impwemu yera irashobora gutuma umukirisu agira umunezero n’amahoro mu mutima, igatuma kandi izo kamere zirangwa mu nama y’abakurambere be no mw’ishengero ryose. Yamara rero, igihe habuze ukuganira ata guhishanya, uwo munezero n’ayo mahoro birashobora guhungabana. Salomo yavuze ati: “Ahatagira inama imigabo irapfa” (Imigani 15:22). Ku rundi ruhande, ukuganira mu buryo buranga ukwubaha abandi kandi ata guhishanya kuratuma haba umunezero n’amahoro. Nk’akarorero, igihe ca kibazo cerekeye ugukebwa cagira gihungabanye amahoro y’ishengero ryo mu kinjana ca mbere, inama nyobozi yari i Yeruzalemu yaciye irondera ubuyobozi buva ku mpwemu yera. Umwe wese muri bo yaraseruye kandi ukuntu abona ivy’ico kibazo. Inyuma y’aho bagiriye ikiganiro kirekire kandi gishushe, barashitse ku ngingo yinaka. Aho bamenyeshereje amashengero ingingo bahurijeko bose, abavukanyi ‘baranezerejwe n’iyo mpanuro’ (Ivyakozwe n’intumwa 15:6-23, 25, 31; 16:4, 5). Baratumye haba umunezero n’amahoro.

11. Abakurambere bashobora gute gutuma mw’ishengero haba umunezero n’amahoro?

¹¹ No muri iki gihe, abungere baratuma mw’ishengero haba umunezero n’amahoro mu kuba abantu bazi kuyaga neza. Igihe hari ingorane zishaka guhungabanya amahoro y’ishengero, barahurira hamwe hanyuma bagaserura ata guhishanya ukuntu babibona. Baratega yompi babigiranye icubahiro ivyo abungere bagenzi babo bavuga (Imigani 13:10; 18:13). Inyuma y’isengesho batura basaba impwemu yera, ingingo bafata bazishingira ku ngingo ngenderwako zo muri Bibiliya be no ku nyobozo zitangwa na wa “mushumba wo kwizigirwa w’ubgenge” (Matayo 24:45-47; 1 Ab’i Korinto 4:6). Mu gihe inama y’abakurambere ishitse ku ngingo ishingiye ku Vyanditswe, umukurambere wese ariyorosha akemera ubuyobozi bw’impwemu yera mu gushigikira iyo ngingo bashitseko, naho nyene iciyumviro ciwe kitoba cashigikiwe na benshi. Ukwo kwicisha bugufi kuratuma haba umunezero n’amahoro, maze kukabera akarorero keza intama mu bijanye n’ukuntu zogendana n’Imana (Mika 6:8). Woba ushigikira wicishije bugufi ingingo zishingiye kuri Bibiliya zifatwa n’abungere mw’ishengero?

Barihangana kandi ni abanyabuntu

12. Ni kubera iki vyabaye ngombwa ko Yezu yihangana akagira n’ubuntu mu kuntu yafata intumwa?

¹² Yezu yarihangana akagira n’ubuntu mu kuntu yafata intumwa, naho zasubira gukora amakosa zaba zakoze ubwa mbere. Nk’akarorero, Yezu yaragerageje incuro n’izindi gufasha izo ntumwa kubona ko bikenewe yuko baba abantu bicisha bugufi (Matayo 18:1-4; 20:25-27). Yamara, mw’ijoro rya nyuma Yezu yamaze ngaha kw’isi, inyuma gato y’aho abigishirije icigwa c’ukwicisha bugufi mu kuboza ibirenge, “[haravyutse] impāri muri bo, z’uwo bagereranyako kw ar’umukuru uw’ari we” (Luka 22:24; Yohana 13:1-5). Yezu yoba yaciye ahambarira izo ntumwa? Habe namba. Ahubwo riho, abigiranye ubugwaneza, yarazifashije kuzirikana, avuga ati: “Umukuru ni nde, n’ūkorerwa, canke n’ūmukorera? Mbega s’ūkorerwa? Ariko jeho ndi hagati muri mwebge mmeze nk’ūbakorera” (Luka 22:27). Ukwihangana kwa Yezu be n’ubuntu bwiwe hamwe n’akarorero keza yatanze, amaherezo vyarakoze ku mutima izo ntumwa.

13, 14. Ni ryari canecane abungere bategerezwa kuba abanyabuntu?

¹³ Nk’ukwo nyene, vyoshobora kuba ngombwa ko umwungere wo mu vy’impwemu ahanura umuntu akatari gake ku bijanye n’ikosa rinaka. Uwo mwungere yoshobora gushavuzwa n’uwo muntu. Yamara, ‘guhanura abasaragurika’, yibuka ko na we bishika agahuba, birashobora gutuma yihanganira uwo muvukanyi wiwe akongera akamugaragariza ubuntu. Gutyo aba yiganye Yezu na Yehova, abagaragariza izo kamere abakirisu bose, ushizemwo n’abungere.​—1 Ab’i Tesalonike 5:14; Yakobo 2:13.

¹⁴ Rimwe na rimwe, vyoba ngombwa ko abungere baha impanuro zikomeye umuntu yakoze icaha gikomeye. Mu gihe uwo muntu yakoze icaha atigaye, abo bungere bategerezwa kumukura mw’ishengero (1 Ab’i Korinto 5:11-13). Yamara naho biba vyifashe ukwo, uburyo bafata uwo muntu yakoze icaha burerekana ko banka icaha yakoze, atari we banka (Yuda 23). Abungere bagaragaza ubuntu boshobora gutuma iyo ntama yataye inzira mu nyuma biyorohera kugaruka mu ruhongore.​—Luka 15:11-24.

Barakora ibikorwa vyiza babitumwe n’ukwizera

15. Abungere bagaragaza ukugira neza kwa Yehova mu buryo bumwe ubuhe, kandi ni igiki kibavyurira umutima wo kubigira?

¹⁵ “Uhoraho agirira neza bose”, mbere na barya batamukengurukira ku bw’ineza abagirira (Zaburi 145:9; Matayo 5:45). Ukugira neza kwa Yehova kuribonekeza cane mu kuntu arungika abasavyi biwe kwamamaza “ubutumwa bgiza bg’ubgami” (Matayo 24:14). Abungere baragaragaza ukwo kugira neza kw’Imana mu kuja imbere abandi muri ico gikorwa co kwamamaza. None ni igiki kibavyurira umutima wo kugira utwo twigoro badatezura? Ni ukuntu bizera Yehova be n’imihango yiwe bimwe bikomeye.​—Abaroma 10:10, 13, 14.

16. Abungere bashobora gute ‘kugirira neza’ intama?

¹⁶ Uretse ko abungere bagirira “neza bose” mu kwamamaza, barafise n’ibanga ryo kugirira neza “cane-cane ab’inzu y’abizera” (Ab’i Galatiya 6:10). Uburyo bumwe babigira ni mu kubagendera cungere mu buryo buremesha. Hari umukurambere umwe avuga ati: “Ndahimbarwa no kugendera cungere abavukanyi. Birandonsa akaryo ko gukeza abavukanyi n’abavukanyikazi ku twigoro bagira, bikongera bikandonsa akaryo ko kubafasha kubona ko igikorwa kitoroshe barangura gihabwa agaciro”. Rimwe na rimwe, abungere boshobora kwereka umuvukanyi canke umuvukanyikazi uburyo bumwebumwe ashobora kugira ivyo aryohoye mu murimo arangurira Yehova. Mu gukora ivyo, abungere b’inkerebutsi barigana intumwa Paulo. Raba ukuntu yahimirije abavukanyi b’i Tesalonike. Yavuze ati: “Twizigiye Umwami ku vyanyu, yukw ivyo tugeze mubikora kandi muzokwama mubikora” (2 Ab’i Tesalonike 3:4). Mwene ayo majambo aranga ukwizigira atuma intama zikorana umutima ukunze akongera agatuma birushiriza kuzorohera ‘kwumvira [‘abaziyobora’, NW]’ (Abaheburayo 13:17). Igihe ugendewe cungere mu buryo buremesha, ntubona none ko vyoba vyiza ubikengurutse?

Ubugwaneza busaba ukwigumya

17. Ni icigwa ikihe Petero yigiye kuri Yezu?

¹⁷ Yezu yama ari umugwaneza, n’igihe baba bamushavuje (Matayo 11:29). Igihe Yezu yagurwa maze agafatwa, yaragaragaje ubugwaneza n’ukwigumya gukomeye. Petero yarafashe inkota gihuruduka maze arihora. Ariko Yezu yamwibukije ati: “Ugira ngo sinoshobora kwinginga Data, na we akandungikira ubu nyene abamarayika basāga legiyono cumi na zibiri?” (Matayo 26:51-53; Yohana 18:10). Petero yarafashe nka nkama icigwa yahakuye ku buryo mu nyuma yibukije abakirisu ati: “Kristo ya[ra]bababarijwe, a[r]abasigarana icitegererezo, kugira ngo mugere ikirenge mu ciwe . . . ; yaratutswe, ntiyabasubiza; yarababajwe, ntiyabahigira”.​—1 Petero 2:21-23.

18, 19. (a) Ni ryari canecane abungere bategerezwa kugaragaza ubugwaneza n’ukwigumya? (b) Ni ibibazo ibihe turimbura mu kiganiro gikurikira?

¹⁸ Abungere kirumara na bo nyene baragaragaza ubugwaneza n’igihe babafashe nabi. Nk’akarorero, mu bo bagerageza gufasha mw’ishengero, vyoshika hakaba abatavyakira neza. Igihe uwukeneye imfashanyo agoyagoya canke arwaye mu vy’impwemu, vyoshika akanka impanuro ahawe mu “[ku]vuga ibisunitswe n’impwemu bimeze nk’ugucumita kw’inkota” (Imigani 12:18). Ariko rero, nk’ukwo kwa Yezu, abungere ntibaca babasubiriza mu nkoko mu kuvuga amajambo acumita canke ngo bagire ivyo bakoze barondera kwihora. Ahubwo riho, barigumya kandi bakaguma bamubabaye, ivyo bikaba vyoshobora kubera umuhezagiro uwo muntu akeneye gufashwa (1 Petero 3:8, 9). Hoba hari ico wigira ku karorero k’abakurambere maze ukagaragaza ubugwaneza n’ukwigumya igihe baguhaye impanuro?

¹⁹ Nta nkeka ko Yehova na Yezu bashima igikorwa kitoroshe abungere ibihumbi barangura mu kwitwararika ubusho bwo kw’isi yose babikunze. Yehova n’Umwana wiwe barakunda cane abakozi b’ishengero ibihumbi n’ibihumbi bafata mu mugongo abakurambere mu ‘gusukurira abera’ (Abaheburayo 6:10, NW). Ni kubera iki none hari abavukanyi babatijwe usanga hari ukuntu batinya kurondera gushikira ico “gikorwa ciza” (1 Timoteyo 3:1)? N’ikindi kandi, Yehova amenyereza gute abo agena kuba abungere? Ivyo bibazo turabirimbura mu kiganiro gikurikira.

Woba uvyibuka?

• Urukundo abungere bakunda ubusho barugaragaza mu buryo bumwebumwe ubuhe?

• Abagize ishengero bose bashobora gute gutuma haba umunezero n’amahoro?

• Ni kubera iki abungere bihangana kandi bakagira ubuntu igihe batanga impanuro?

• Abakurambere bagaragaza gute ukugira neza n’ukwizera?

[Ifoto ku rup. 18]

Urukundo ni rwo ruvyurira abakurambere umutima wo gusukurira ishengero

[Amafoto ku rup. 18]

Baramara kandi umwanya bari kumwe n’imiryango yabo mu gihe co kwiruhura . . .

. . . no mu busuku

[Ifoto ku rup. 20]

Igihe abakurambere baganira neza biratuma mw’ishengero haba umunezero n’amahoro