Ivuka rya Yezu: Ukuntu rizana amahoro

YA MAJAMBO yatangazwa ngo “amahoro abe mu bantu bashimwa na yo”, ntibwari bwo buhanuzi bwonyene bujanye n’ivuka rya Yezu. Turetse ivyo abamarayika bamenyesheje abungere, abari bumiwe muri ako kanya, hari amajambo yahumetswe n’Imana intumwa zivuye mw’ijuru zari zarabwiye Mariya n’umunega wiwe Yozefu ku bijanye n’akayoya kovutse ari ko Yezu. Nitwarimbura ubwo butumwa uko ari bubiri biraza gutuma turushiriza kubona mu buryo bugera kure ibijanye n’ivuka rya Yezu, twongere dutahure ico umuhango abamarayika batanze werekeye amahoro mu bantu usobanura vy’ukuri.

Imbere y’uko Mariya avyara Yezu, eka n’imbere y’uko asama inda, yaragendewe n’umumarayika Bibiliya ivuga ko ari Gaburiyeli. Uwo mumarayika yamuramukije ati: “N’amahoro, ugiriwe ubuntu, Umwami Imana ari kumwe nawe”. Nk’uko woshobora kuvyiyumvira, Mariya ivyo vyaramuhagaritse umutima cane yongera kumbure asa n’uwugize ubwoba. None iyo ndamutso yoba yasobanura iki?

Gaburiyeli yasiguye ati: “Umve, uzosama inda, uvyare umuhungu, kand’uz’umwite YESU. Azoba mukuru, azokwitwa Umwana w’Īsumba vyose, kand’Umwami Imana azomuha intebe y’ubgami ya sekuruza Dawidi, ahangame mu nzu ya Yakobo ibihe bidashira; ubgami bgiwe ntibuzogira iherezo”. Mariya yaciye amubaza ingene ivyo vyoshobotse narirya yari akiri isugi, akaba ata mugabo bari basanzwe baryamana. Gaburiyeli yamwishuye yuko inda y’uwo mwana yoyisamye biciye ku mpwemu yera y’Imana. Ntiyobaye ari umwana asanzwe.​—Luka 1:28-35.

Umwami yari yaravuzwe kuva kera

Amajambo Gaburiyeli yabwiye Mariya ategerezwa kuba yaramufashije gutahura vy’uko umwana yovyaye yari yaravuzwe cane mu buhanuzi bwa kera. Ivyo Gaburiyeli yahishuye vy’uko Yehova yohaye umwana wa Mariya “intebe y’ubgami ya sekuruza Dawidi”, vyotumye Mariya, eka mbere n’Umuyuda wese yari azi neza Ivyanditswe, yiyumvira ibijanye n’umuhango Imana yari yarahaye Dawidi wa mwami wa Isirayeli.

Yehova abicishije ku muhanuzi Natani, yari yarabwiye Dawidi ati: “Inzu yawe n’ubgami bgawe bizohora bihamye imbere yiwe, uti N’ingoma yawe izokwama ihangamye na ntaryo” (2 Samweli 7:4, 16). Ku vyerekeye Dawidi, Yehova yavuze ati: “Uruvyaro rwiwe nzoruha kuramba gushitsa ibihe bidashira, bo n’ingoma yiwe nk’imisi y’ijuru. Uruvyaro rwiwe ruzoramba gushitsa ibihe bidashira, ingoma yiwe izohoraho nk’izuba imbere yanje” (Zaburi 89:20, 29, 35, 36). Biri n’ico bivuze kuba Mariya na Yozefu bari bakomotse mu muryango wa Dawidi.

Ubwo ntibwari bwo buhanuzi bwo mu Vyanditswe vy’igiheburayo bwonyene bwavuga ivy’umwana wa Dawidi yobaye umwami. Mariya ashobora kandi kuba yari azi neza ubu buhanuzi bwa Yesaya bugira buti: “Umwana a[ra]tuvukiye, duhawe umwana w’umuhungu; ubutware buzoba ku bitugu vyiwe: azokwitwa Igitangaza, Umujanama, Imana y’ubushobozi, Data wa twese ahoraho, Umukama w’amahoro. Ukugwira kw’ubutware bgiwe n’amahoro ntibizogira iherezo, ku ngoma ya Dawidi no ku bgami bgiwe, bibukomeze, bibushigikize guca imanza zibereye n’ukugororoka, uhereye none ugashitsa ibihe vyose. Umwete w’Uhoraho Nyen’ingabo uzoshitsa ivyo”.​—Yesaya 9:6, 7.

Rero, ubutumwa Gaburiyeli yashikirije Mariya bwarimwo n’ibindi turetse ibijanye n’ukuvuka ku gitangaro kw’umwana w’umuhungu. Umwana wiwe yobaye samuragwa akomoka mu nda y’Umwami Dawidi, samuragwa w’ibihe bidahera yorazwe Ubwami bwashinzwe n’Imana. Ubuhanuzi Gaburiyeli yashikirije ku bijanye n’uruhara Yezu yoranguye muri kazoza burahambaye rwose kuri twese.

Igihe Yozefu yamenya yuko uwohavuye aba umukenyezi wiwe yari yibungenze, yaciye afata ingingo yo kumuheba. Yari azi ko iyo nda itari iyiwe kubera ko atari bwigere aryamana n’uwo yari areheje. Ibaze nawe ukuntu Yozefu bitegerezwa kuba vyaramugoye kwemera ivyo Mariya yamusiguriye ku bijanye n’inda yari afise! Inkuru yo mu Njili yigana iti: “Umumarayika w’Umwami Imana amwiyerekera mu nzozi, aramubarira, ati Yosefu, mwana wa Dawidi, ntutinye kurongora Mariya umugeni wawe, kukw atwaye inda [biciye ku m]pwemu [y]era. Azovyara umwana w’umuhungu, nawe uz’umwite YESU, kukw ari we azokiza abantu biwe ivyaha vyabo”.​—Matayo 1:20, 21.

Bibiliya ntivuga aho Yozefu yashikanye mu gutahura ukuntu uwo mwana “[yokijije] abantu biwe ivyaha vyabo”. Naho ari ukwo, ubwo butumwa bwarashoboye gukura amazinda Yozefu yuko Mariya, uwari yimirije kwibaruka, ata kibi na kimwe yari yarakoze. Yagize nk’uko umumarayika yamutegetse aratwara Mariya i muhira, ivyo bikaba vyari cokimwe n’ubugeni.

Bivuye ku makuru dusanga n’ahandi mu Vyanditswe, turashobora gutahura ico nya mumarayika yashaka kuvuga. Mu ntango z’ukubaho kw’abantu, hari umumarayika w’umugarariji yahaririye avuga yuko Yehova adafise uburenganzira bwo kuba Segaba. Ivyanditswe vy’igiheburayo birerekana yuko mu vyo uwo mugarariji yavuze, harimwo ivy’uko ngo Imana yategeka mu buryo burimwo akarenganyo be n’uko ata muntu n’umwe yogumye kuri Yehova aramutse ageragejwe (Itanguriro 3:2-5; Yobu 1:6-12). Adamu ntiyagumye ari intadohoka kuri Yehova. Kubera icaha yakoze, abantu bose bararazwe icaha, ingaruka y’ico caha na yo ikaba ari urupfu (Abaroma 5:12; 6:23). Yezu we, nta caha yavukanye kubera ko Mariya atasamye inda abanje kuryamana n’umugabo. Kubera ko Yezu yemeye guheba ubuzima bwiwe butagira agasembwa ngo bube incungu ikwiranye neza na neza n’ico Adamu yari yaratakaje, yarashoboye gukura abantu mu vyaha vyabo no gutuma bagira icizigiro c’ubuzima budahera.​—1 Timoteyo 2:3-6; Tito 3:6, 7; 1 Yohana 2:25.

Yezu, mu gihe c’ubusuku bwiwe bwo kw’isi, yarerekanye gatoyi ico gukuraho inkurikizi z’icaha bizoba bisobanura. Yarakiza abantu indwara z’ubwoko bwose mbere n’abapfuye agasubira kubagira bazima (Matayo 4:23; Yohana 11:1-44). Ivyo bitangaro vyarerekana ivyo azokora muri kazoza. Yezu ubwiwe yavuze ati: “Igihe [kiragiye] kuza, ah’abari mu mva bose bazokwumvira ijwi ry[anje], bakazivamwo”.​—Yohana 5:28, 29.

Uwo muhango ujanye n’izuka rizoba muri kazoza urasigura igituma ivuka rya Yezu, na canecane urupfu rwiwe, ari ikintu gihambaye rwose kuri twebwe. Muri Yohana 3:17 havuga yuko Imana yarungitse Umwana wawo mw’isi “ngw abari mw isi bakizwe na we”. Iyo nkuru nziza igitangaza idusubije kuri ya majambo abamarayika batangariza abungere bari baraririye imikuku yabo mw’ijoro Yezu avuka.

“Ubutumwa bgiza bg’akanyamuneza kenshi”

Igihe abamarayika bamenyesha yuko hari havutse ‘Umukiza ari we Kristo Umwami’, vy’ukuri bwari “ubutumwa bgiza bg’akanyamuneza kenshi” ku muryango w’abantu (Luka 2:10, 11). Uwo mwana ni we yobaye Mesiya, wa Muhanuzi ahambaye akaba n’Umutegetsi ahambaye abasavyi b’Imana bari barindiriye kuva kera na rindi (Gusubira mu vyagezwe 18:18; Mika 5:2). Ubuzima bwiwe bwo kw’isi be n’urupfu rwiwe vyogize uruhara ruhambaye mu kwemeza yuko Yehova ari we Segaba w’ijuru n’isi, ku buryo abamarayika bashoboye kuvuga bati: “Icubahiro ni kibe ku Mana ahasumba ijuru”.​—Luka 2:14.

Yezu, uwo Bibiliya yita “Adamu wo hanyuma”, yarerekanye yuko umuntu ashobora kuba intahemuka kuri Yehova naho yoba ari mu kigeragezo gikaze gute (1 Ab’i Korinto 15:45). Gutyo, yaragaragaje yuko Shetani ari umubeshi w’umubisha. Ivyo vyatumye mw’ijuru abamarayika b’intahemuka bagira umunezero.

Ariko reka dusubire kuri ca kibazo: “Hoba hariho icizigiro nyakuri c’uko bwa butumwa abamarayika bashikiriza mw’ijoro Yezu avuka buzoranguka umusi uri izina?”. Cane nyene! Ata mahoro ahari, umugambi Imana ifitiye isi, uwurimwo ivyo guhindura isi igasubira kuba iparadizo, ntiwoshobora kuranguka. Ivyo nivyaranguka kw’isi yose, ivyo abantu bose bazokora bazobikora babitumwe n’urukundo be n’ukudahemuka. Ku bw’ivyo, Imana niyashitsa umugambi wayo, abarwanya ukugaba n’ukuganza kwayo bose bazokurwaho. Iyo si inkuru nziza ku bantu bose bashigikira Shetani mu kwemeza yuko ngo ingingo mfatirwako za Yehova ari mbi. Imana niyashitsa umugambi wayo, bo bazorandurwa.​—Zaburi 37:11; Imigani 2:21, 22.

Raba neza. Ba bamarayika ntibabwiye ba bungere yuko abantu bose bazogira amahoro bakongera bagashimwa. Ahubwo riho, bamenyesheje ibijanye n’“amahoro mu bantu bashimwa na yo”, ni ukuvuga mu bemerwa n’Imana. Aberekana ko bizera Yehova vy’ukuri baba abayoboke badahemuka ba Yezu bakaba n’abamwigana. Abagabo n’abagore nk’abo usanga ari abantu batanga batitangiriye itama kandi batahura abandi, atari mu misi mikeyi gusa uko umwaka utashe, yamara imisi yose.

Vyoba bishoboka ko abantu bagaragaza agatima ka gikirusu mu mwaka wose?

Ububasha bw’inkuru nziza Yezu yamamaje bwaragize ico bukoze ku buzima bw’abantu badaharurika. Benshi barakurikije ingingo ngenderwako za gikirisu mu mice yose y’ubuzima bwabo. Abantu bari basanzwe ari abikunzi, baratanguye kuza baribaza ico Yezu yari gukora iyo aza kuba mu bihe nk’ivyo barimwo. Abantu bamwebamwe bari babayeho bitaho gusa amatungo n’ibibahimbara, baratahuye akamaro k’ingingo ngenderwako z’Imana be n’ako kuzibwira bagenzi babo. Abantu bakora ico kintu barihatira gutanga no kugira umutima mwiza mu mwaka wose. None ivyo si vyo wokwitega ku bakirisu b’ukuri?

Iyaba abantu bose b’inziraburyarya bafata akanya ko kurimbura ico burya butumwa bw’amahoro ba bamarayika bashikiriza busobanura maze bagakora bahuza n’iyo nsobanuro, mu vy’ukuri isi ntiyobaye imeze uku tuyibona.

Ubuhanuzi bujanye n’ivuka rya Yezu burakura amazinda abashimwa n’Imana yuko bashobora kugira amahoro nyakuri ibihe bidahera. None ivyo si vyo wipfuza? Turashobora kwizigira tudakeka yuko ya majambo meza cane y’ubuhanuzi ajanye n’amahoro yatangazwa na ba bamarayika igihe Yezu yavuka azoranguka ata kabuza. Ayo si amajambo ata co avuze avugwa mu gihe ca Noweli, ahubwo riho amahoro azobaho koko ibihe bidahera.

[Ifoto ku rup. 7]

Abantu barashobora kugaragaza agatima ka gikirisu mu mwaka wose, kandi ni na ko bikwiye kumera