Samweli ateza imbere ugusenga kw’ukuri

UMUHANUZI umwe arahambarira abo basangiye ukwizera basavye kuronka umwami w’umuntu akongera akabahimiriza kugamburukira Imana. Arasaba Yehova ngo agwishe imvura irimwo imituragaro kugira ngo kibe ikimenyetso cerekana ko ari umuhanuzi w’Imana koko. Muri Isirayeli bisa n’uko batarigera babona imvura irimwo imituragaro igwa muri ico gihe c’umwaka kibamwo iyimbura ry’ingano. Yamara, Imana irarungika imituragaro n’imvura. Ivyo biratuma abantu batinya rwose Yehova n’uwo muserukizi wiwe, na we akaba ari Samweli.​—1 Samweli 12:11-19.

Umuhanuzi Samweli yari n’umwanditsi. Inkuru z’ivya kahise yanditse, izirimwo ibintu vyinshi vyakozwe, zivuga ivyabaye mu kiringo c’imyaka nka 330, zikaba kandi zirimwo ibikorwa bihambaye vyakozwe n’Abacamanza ba Isirayeli. Nk’akarorero, mu vyese, mu bikino bijana n’ukuririmba, mu bikino bisanzwe no mu masenema, harisungwa inkuru y’ivyabaye ivuga ivya Samusoni, wa mugabo akomeye kuruta ababaye kw’isi bose (Abacamanza, ikigabane ca 13–16). Samweli yaranditse kandi ivya Rusi na inabukwe Nawomi, abo bompi bakaba bari abapfakazi n’abakene. Iyo nkuru y’ivyabaye koko irangira mu buryo buteye umunezero, na yo nyene iraryoshe bimwe utoraba.​—Rusi, ikigabane ca 1–4.

Ni ivyigwa ibihe dushobora kwigira ku vyo Samweli yanditse no ku buzima bwiwe? Yateje imbere gute ugusenga kw’ukuri?

Ubwana bwiwe

Elukana se wa Samweli yari umuntu asenga Yehova akaba n’umunega w’umunyarukundo. Umukenyezi wiwe Hana yari umugore akomeye mu vy’impwemu. Igihe Hana, uwari ingumba, yari ku ngoro y’Imana i Shilo, yaratakambiye Yehova akobeje amusezeranira ati: “Ewe Uhoraho Nyen’ingabo, ni warāba umubabaro wanje incoreke yawe, ukanyibuka, ntunyibagire jewe incoreke yawe, ukantabaza umwana w’umuhungu, nanje nzomuguha, Uhoraho, abe uwawe kuzorinda apfa, kandi nta rupfuhe ruzomugera ku mutwe” (1 Samweli 1:1-11). Ivyo vyasobanura ko nya mwana yokoreye Yehova gusa mu buzima bwiwe bwose.

Hana yasengeye mu gacerere. Iyo nkuru ivuga iti: “[Y]akubita umunwa gusa”. Umuherezi Mukuru Eli yarihenze mu kwiyumvira yuko yari yaborewe, aca aramuhambarira. Yamara, Hana yarasiguye ivyiwe mu rupfasoni, hanyuma Eli amubwira ati: “Nuko ni wīgīre amahoro; Imana ya Isirayeli iguhe ico wayisavye”. Kandi ni ko, Yehova yarumvise isengesho rya Hana kuko iyo nkuru ibandanya iti: “Igihe kiragera, Hana asama inda, avyara umwana w’umuhungu, amwita Samweli, ati Kuko namusavye Uhoraho”.​—1 Samweli 1:12-20.

Samweli yarezwe ‘atozwa indero yongera ayoborwa ivyiyumviro nk’uko Yehova yashinze’ (Abanyefeso 6:4, NW). Ka Samweli kapfuye gusa gucuka Hana aca akajana ku ngoro y’Imana i Shilo agashikiriza Umuherezi Mukuru Eli. Eli yaritwararitse ako gahungu karacika “[ag]akorera Uhoraho”. Umunezero ntangere Hana yari afise yawuseruye mu majambo yo gukenguruka akora ku mutima yavuze, ayahavuye yandikwa na Samweli ubwiwe.​—1 Samweli 2:1-11.

Niba uri umuvyeyi, woba uriko uraremesha abana bawe kugira umurimo wa Yehova wo mwuga wabo? Uburyo bwiza kuruta ubundi bwose umuntu yokoresha inguvu ziwe, ni mu guteza imbere ugusenga kw’ukuri.

Samweli yaramenyereye ubuzima bwo mu ngoro ya Yehova, “akurira imbere y’Uhoraho” yongera “[a]shimwa n’Imana n’abantu”. Yaragaragaje kamere z’Imana zatumye abantu bamukunda.​—1 Samweli 2:21, 26.

Ivyo si ko vyari vyifashe ku bahungu ba Eli b’imburakimazi ari bo Hofuni na Finehasi, “[a]bāpfa uko bagize ivy’Uhoraho”. Bari ibihumbu bakongera bakitwarira ibihimba vyizavyiza vy’ibimazi abantu bazana ku rusengero. Imana yari yaramaze kurungika umuhanuzi kumenyesha igihano Eli yokwiteze, aho hakaba harimwo urupfu rw’abahungu biwe babiri (1 Samweli 2:12, 15-17, 22-25, 27, 30-34). Yehova yari agiye gukoresha Samweli mu gushikiriza ubundi butumwa bw’urubanza.

Samweli aba umuhanuzi

Imana yabariye Samweli iti: “[Ubwire Eli] yuko ngiye guha inzu yiwe igihano kitazobavako, mbahōye ukugabitanya yirengagije, kukw abahungu biwe bihamagariye umuvumo, na we ntabateshe”. Ntibwari ubutumwa bworoshe gushikiriza, Eli akaba yarasavye ashimitse Samweli ngo ntagire ico amuhisha. Samweli utanse yaciye ajako amugira ku muriri ivyo Yehova yari yavuze vyose. Emwe, vyamusavye kurya umutima amenyo!​—1 Samweli 3:10-18.

Samweli amaze gukura, Isirayeli yose yahavuye imenya ko yari umuhanuzi w’Imana (1 Samweli 3:19, 20). Urwo rubanza Samweli yari yarashikirije rwatanguye igihe Isirayeli yaneshwa bimwe bibi n’Abafilisitiya. Hofuni na Finehasi bapfiriye ku rugamba, maze Abafilisitiya barafata mpiri isandugu y’isezerano ya Yehova. Aho Eli amenyeye yuko abahungu biwe bapfuye be n’uko Isandugu yafashwe mpiri, yaciye agwa agaramye ahanutse ku ntebe yiwe, akenyura izosi arahwera.​—1 Samweli 4:1-18.

Haciye imyaka 20, Samweli yarahimirije Abisirayeli guheba ugusenga kw’ikinyoma. Baciye bakuraho ibigirwamana vyabo, barisonzesha bongera baratura ivyaha vyabo. Samweli yarasenze ku bwabo yongera arabatangira ishikanwa ryo kwoswa. Uti none vyavuyemwo iki? Igihe Abafilisitiya batera, Imana yarabateyemwo umuvurungano, Isirayeli iraheza irikura umwansi kw’izosi. Bivuye ku muhezagiro wa Yehova, ivy’Abisirayeli vyarameze neza bimwe utoraba, barasubira kwigarurira akarere Abafilisitiya bari barabanyaze.​—1 Samweli 7:3-14.

Samweli yarateje imbere koko ugusenga kw’ukuri. Nk’akarorero, yaritwararitse yuko bimwebimwe mu vyari vyanyazwe mu ntambara bikoreshwa mu kubungabunga rya hema. Yarafashije kuringaniza ivy’uguhimbaza Pasika be n’igikorwa c’Abalewi bacunga amarembo (1 Ngoma 9:22; 26:27, 28; 2 Ngoma 35:18). Ku mwaka ku mwaka, Samweli yarava aho yaba i Rama akagira ingendo mu bisagara bitandukanye aja guca imanza. Yaramenyekanye neza ko ari umuntu w’inzirabugunge kandi atagira nkunzi. Kubera ko abantu bubaha Samweli, yarashoboye kubafasha mu vy’impwemu (1 Samweli 7:15-17; 9:6-14; 12:2-5). Kuba yari inzirabugunge akaba n’umuntu akomeye mu vy’impwemu, nta gukeka ko vyavyuriye abenshi umutima wo kwigana akarorero kiwe. Weho bite?

Isirayeli isaba umwami

Samweli ageze mu zabukuru, yaragize abahungu biwe ari bo Yoweli na Abiya abacamanza. “Ntibāri n’ingeso nk’iziwe, ariko bākebereje gukurikira inyungu mbi, bakarya ingurire, bakagoreka imanza”. Inyifato yabo yatumye abakuru b’Abisirayeli basaba umwami (1 Samweli 8:1-5). Samweli ivyo ntiyabishimye. Ariko rero, igihe yasenga ku bijanye n’ico kintu, Yehova yamubwiye ati: “[Si] wewe banse, ariko ni jewe banse ngo simbe Umwami wabo” (1 Samweli 8:6, 7). Imana yabwiye Samweli ngo agirire abo bantu ivyo bashaka yongere abagabishe yuko mu gihe bobaye batwarwa n’umwami hari uburenganzira n’umwidegemvyo botakaje. Igihe abantu bakomeza basaba umwami, Yehova yaciye aringaniza ivy’uko Samweli arobanuza amavuta Sauli ngo abe umwami.​—1 Samweli 8:6-22; 9:15-17; 10:1.

Samweli yarashigikiye iyo ndinganizo naho yayibonamwo ingorane. Inyuma y’aho Abisirayeli banesherejwe n’Abamoni, yarakoranirije abantu i Gilugali kugira yemeze ko Sauli ari umwami (1 Samweli 10:17-24; 11:11-15). Samweli yarasubiyemwo ivyari vyarashikiye Isirayeli maze ahanura ashimitse umwami n’abantu ngo baze bagamburukire Yehova. Imana yarishuye isengesho rya Samweli mu kugwisha ya mvura irimwo imituragaro twavuga mu ntango itari imenyereye kugwa mu gihe c’iyimbura. Iyo mvura y’igihuhusi yatumye abantu bemera ko bakoze ikosa mu gutera akagere Yehova. Igihe basaba Samweli ngo abasabire, yishuye ati: “Ntibikanzeko ko noreka kubasengera, ngacumura k’Uhoraho, ariko nzokwama mbarangira inzira nziza itunganye”. Ese ukuntu ako ari akarorero k’ugukunda Yehova n’abasavyi biwe urukundo rudahemuka (1 Samweli 12:6-24)! Ukwo kwoba ari ko nawe witeguriye gushigikira indinganizo za gitewokarasi no gusabira abo musangiye ukwizera?

Abami babiri ba mbere ba Isirayeli

Sauli yari umuntu yifata ruto yemerwa n’Imana (1 Samweli 9:21; 11:6). Yamara, yahavuye yiyobagiza ubuyobozi bw’Imana. Nk’akarorero, Samweli yaramuhambariye kubera yihutiye gutanga ikimazi aho kurindira, nk’uko yari yarategetswe (1 Samweli 13:10-14). Igihe Sauli yagambarara akaziguriza Agagi umwami w’Abamaleki, Samweli yamubwiye ati: “Uhoraho na we uyu musi agutabuyekw ingoma y’Abisirayeli, ayihaye mugenzawe akuruta”. Samweli ubwiwe yariyiciye Agagi hanyuma araririra Sauli.​—1 Samweli 15:1-35.

Yehova yahavuye abwira Samweli ati: “Uzogeza hehe kuririra Sauli, kandi namaze kwanka kw aba umwami w’Abisirayeli?”. Amaze kuvuga ivyo, yaciye arungika Samweli i Betelehemu kurobanuza amavuta umwe mu bahungu ba Isayi ngo abe umwami. Samweli yarasuzumye abahungu ba Isayi umwumwe gushika Yehova yemeje ko Dawidi, umuhererezi, aba ari we arobanuzwa amavuta. Uwo musi, Samweli yarahigiye icigwa gihambaye, na co kikaba ari iki: ‘Imana ntiraba nk’uko abantu baraba: kuko abantu baraba ku rukoba gusa, ariko Uhoraho araba mu mutima’.​—1 Samweli 16:1-13.

Ko ukugambarara kwa Sauli kwababaje Samweli, hari akantu igihe Sauli yanka urunuka Dawidi akarondera kumwica! Naho Samweli yari muri izo ngorane zose, yagumye afise umwete no mu busaza bwiwe yongera arakora ivyo ashoboye mu murimo wa Yehova.​—1 Samweli 19:18-20.

Iragi Samweli yasize

Igihe Samweli yapfa, Isirayeli yaraririye uwo muhanuzi yicisha bugufi kandi w’umurindutsi yari yaratumye abenshi bagira ico bahinduye ku kuntu bari babayeho (1 Samweli 25:1). Samweli yari umuntu adatunganye kandi kakaba karacamwo akihenda. Mugabo rero, naho hari ivyo atari ashoboye, yaribanze kuri Yehova we musa yongera arakomera kw’ibanga mu gufasha abandi na bo ngo bamwibandeko.

Vyinshi ntibicifashe nk’uko vyari mu gihe ca Samweli, mugabo hari ivyigwa ngirakamaro dushobora kwigira ku nkuru y’ubuzima bwiwe. Ikiruta vyose, Samweli yasenga Yehova mu buryo bw’ukuri kandi yarateje imbere ukwo gusenga kw’ukuri. Ivyo vyoba ari vyo nawe uriko uragira?

[Uruzitiro ku rup. 16]

ZIRIKANA KU BUZIMA BWA SAMWELI

• Nka kumwe abavyeyi ba Samweli bamwigisha ijambo ry’Imana, nurere abana bawe ‘ubatoza indero wongera uyobora ivyiyumviro vyabo nk’uko Yehova yashinze’.​—Abanyefeso 6:4, NW.

• Remesha abana bawe kuba nka Samweli mu kugira umurimo wa Yehova wo mwuga wabo.

• Kamere z’Imana Samweli yagaragaje zatumye akundwa n’abantu, gutyo aba adusigiye akarorero keza.

• Samweli yarakoze uko ashoboye kwose kugira ateze imbere ugusenga kw’ukuri, ukwo akaba ari ko natwe dukwiye kugira.

[Ifoto ku rup. 15]

Samweli yarateje imbere ugusenga kw’ukuri aragira n’umutima ukunze wo gufasha abandi mu vy’impwemu