Dukurikirane “ubweranda mu gutinya Imana”

MU KUVUGA ko Yehova Imana ari mweranda ku rugero rw’agaheta, Bibiliya igira iti: “Mweranda, mweranda, mweranda ni Yehova.” (Yes. 6:3, NW; Ivyah. 4:8) Ijambo ry’igiheburayo be n’iry’ikigiriki rikoreshwa mu kuvuga “ubweranda” ritanga iciyumviro c’uko ikintu gityoroye canke kidahumanye mu bijanye no gusenga, ataho gisa gisana n’uguhumana. Ubweranda bw’Imana bwerekeza ku gutungana kwayo kutagira agahaze mu bijanye no kumenya ikibereye n’ikitabereye.

None Imana nyeranda Yehova yoba yiteze yuko abayisenga baba beranda, haba mu buryo bw’umubiri, mu vy’inyifato runtu be no mu buryo bw’impwemu? Bibiliya irerekana idakikiriza yuko Yehova agomba y’uko abasavyi biwe baba beranda. Muri 1 Petero 1:16, tuhasoma duti: “Mutegerezwa kuba beranda, kuko jewe ndi mweranda.” Abantu badatunganye boba vy’ukuri bashobora kwigana ubweranda bwa Yehova? Egome, ariko ntibabishobora ijana kw’ijana. Turashobora kuboneka mu nyonga z’Imana ko turi beranda mu gihe tuyisenga tudahumanye mu buryo bw’impwemu, kandi tukaba dufitaniye na yo ubucuti somambike.

Dushobora gute none kuguma tudahumanye mw’isi ihumanye mu vy’inyifato runtu? Ni ingeso izihe dukwiye kwirinda? Ni ibiki twoshobora kuba dukeneye guhindura mu mvugo zacu no mu buryo twigenza? Reka turabe ivyo twokwiga ku bijanye n’ivyo, dufatiye ku vyo Imana yasavye Abayuda bagarutse mu gihugu cabo bavuye i Babiloni mu 537 B.G.C.

‘Hazobaho Inzira Nyeranda’

Yehova yari yabwiye abasavyi biwe bari mu bunyagano i Babiloni ko bosubijwe mu gihugu cabo. Mu buhanuzi bujanye n’ugusubira mu gihugu cabo, yabakuye amazinda ati: “Kandi hazobay’inzira y’iroro, iyo nzira izokwitwa Inzira [“Nyeranda”, NW].” (Yes. 35:8a) Ayo majambo ntiyerekana gusa yuko Yehova yugururiye Abayuda inzira kugira bashike iwabo, ariko kandi yarabakura amazinda yuko yobakingiye bari muri iyo nzira.

Yehova yarugururiye “Inzira Nyeranda” abasavyi biwe bo mu gihe ca none bari kw’isi ibakura muri Babiloni Akomeye, ni ukuvuga muri ya nganji y’isi yose y’idini ry’ikinyoma. Mu 1919, yarabohoye Abakirisu basizwe abakuye mu migozi y’ivy’impwemu idini ry’ikinyoma ryari ryarababohesheje, maze bukebuke bagenda baratyorora ugusenga kwabo bagukuramwo inyigisho zose z’ikinyoma. Kubera ko turi abasavyi ba Yehova muri kino gihe, twibereye mw’ishengero ridahumanye kandi ritekanye mu vy’impwemu aho dushobora gusengera Yehova tukongera tukagiriranira ubucuti somambike na we hamwe na bagenzi bacu.

Abakirisu basizwe bagize “ubusho buto” be n’abagize “isinzi rinini” ry’“izindi ntama” bahisemwo kugendera mu nzira nyeranda kandi bariko baratumira abandi ngo bifatanye na bo. (Luka 12:32; Ivyah. 7:9; Yoh. 10:16) “Inzira Nyeranda” iruguruye kuri abo bose bari n’umutima ukunze wo ‘gushikiriza imibiri yabo nk’ikimazi kizima, ceranda, cemerwa ku Mana.’​—Rom. 12:1.

“Abanduye imitima ntibazoyicamwo”

Mu 537 B.G.C., hari ikintu gihambaye Abayuda bategerezwa gushitsa. Ku bijanye n’abakwije ibisabwa kugira bagendere mu “Nzira Nyeranda,” muri Yesaya 35:8b havuga hati: “Abanduye imitima ntibazoyicamwo.” Kubera ko icatumye Abayuda bagarukanwa i Yeruzalemu kwari ugusubira gushiraho ugusenga gutyoroye, abakora ibintu babitumwe n’ubwikunzi, abatubaha ibintu vyeranda canke abahumanye mu vy’impwemu, nta kibanza bobaye bahafise. Abo bene kugarukanwa bari bakeneye kugumya ingingo mfatirwako z’ukwigenza runtu ziri hejuru za Yehova. Abashaka ko Imana ibaraba ryiza muri iki gihe, bakwiye gushitsa ivyo nyene vyasabwa Abayuda. Bategerezwa gukurikirana “ubweranda mu gutinya Imana.” (2 Kor. 7:1) Ni ingeso izihe zihumanye none dukwiye kwirinda?

Intumwa Paulo yanditse ati: “Ibikorwa vy’umubiri biribonekeza, bikaba ari ubusambanyi, ubuhumane, ubushirasoni.” (Gal. 5:19) Ubusambanyi burimwo ibintu vyose bijanye no gukoresha ibihimba vy’irondoka hagati y’abantu batubakanye. Ubushirasoni burimwo “ibiterasoni; ubuhehesi; ingeso iranga ukutamaramara; inyifato iranga ukutisonera.” Ubusambanyi be n’ubushirasoni, vyompi birahushanye mu buryo butomoye n’ubweranda bwa Yehova. Ku bw’ivyo, ababandanya gukora ibintu nk’ivyo ntibemererwa kwifatanya n’ishengero rya gikirisu, canke bagacibwa muri ryo. Ivyo ni nako bigenda ku bakora ibintu vy’ubuhumane bukomeye, ni ukuvuga abakora n’“umunoho n’akantu ubuhumane bw’ubwoko bwose.”​—Ef. 4:19.

“Ubuhumane” ni ijambo ririmwo ivyaha vy’ubwoko bwinshi. Ijambo ry’ikigiriki rikoreshwa mu kuvuga ubuhumane ririmwo insobanuro y’umwanda w’uburyo ubwo ari bwo bwose, haba mu nyifato, mu mvugo, no mu bijanye n’abo twifatanya mu vy’ugusenga. Ritekeye iciyumviro c’ingeso zirimwo ubuhumane bwo ku rugero runaka rwoshobora kuba rudasaba ko hashingwa komite ncarubanza.a Ariko none abaja muri bene izo ngeso z’ubuhumane boba bariko barakurikirana ingendo y’ubweranda?

Dufate ko hari umukirisu atanguye kurabira mu kinyegero amashusho yerekana ivy’ubushegabo. Buhorobuhoro, uko ivyipfuzo bihumanye biza biravyuka, ni ko umwiyemezo wiwe wo kuguma adahumanye mu nyonga za Yehova ugenda uragabanuka. Iyo nyifato yiwe ishobora kuba itarashika ku rugero rwo kuba ubuhumane bukomeye, mugabo ntaba akiriko arabandanya yiyumvira gusa ‘ibitanduye vyose, ibivugwa neza, ivy’ingeso nziza kandi bibereye gushimagizwa.’ (Flp. 4:8). Amashusho yerekana ivy’ubushegabo arahumanye kandi ata gukeka aronona ubucuti umuntu afitaniye n’Imana. Ubuhumane ubwo ari bwo bwose ntibukwiye no kuvugwa muri twebwe.​—Ef. 5:3.

Rimbura akandi karorero. Tuvuge ko hari umukirisu afise ingeso yo kwimara inambu y’umubiri ari wenyene, akabigiri yaba ariko araraba amashusho yerekana ivy’ubushegabo canke atariko arayaraba. Naho ijambo “kwimara inambu y’umubiri” ritaboneka muri Bibiliya, hari uwokekeranya ko bihumanya mu muzirikanyi no mu nyiyumvo? None umuntu abandanije akora ibintu bihumanye nk’ivyo, ubucuti afitaniye na Yehova bworeka gute kwononekera mu buryo bukomeye, kandi vyoshoboka gute ko ataba uwuhumanye mu nyonga za Yehova? Nimuze dushire ku mutima inkeburo Paulo atanga yo “[kwiyuhagira] ubuhumane bwose bw’umubiri n’umutima” be no “[kwica] ibihimba vy’umubiri wa[cu] biri kw’isi ku bijanye n’ubusambanyi, ubuhumane, inambu y’umubiri, ukwipfuza kubi, n’umwina.”​—2 Kor. 7:1; Kol. 3:5.

Iyi si itwarwa na Shetani irarenza uruho rw’amazi ku buhumane, mbere ikanaburemesha. Kunanira ibitwosha kwisuka mu nyifato ihumanye birashobora kuba urugamba rukomeye. Ariko rero, abakirisu b’ukuri ntibakwiye “kugenda nk’uko amahanga na yo agenda agendera mu bupfu bw’imizirikanyi yayo.” (Ef. 4:17) Mu gihe gusa twirinze kwigenza mu buryo buhumanye, twaba turi ahantu hiherereye canke turi kumwe n’abandi, ni ho Yehova azotureka ngo tubandanye kugendera mu “Nzira Nyeranda.”

“Nta ntambge izohaba”

Kugira ngo abantu bamwebamwe bagume bashimwa na ya Mana nyeranda Yehova, vyoshobora gusaba ko bagira ivyo bahinduye mu buryo budasanzwe mu bijanye n’ukuntu bigenza be n’imvugo zabo. Muri Yesaya 35:9 havuga hati: “Nta ntambge izohaba, nta gikōko na kimwe c’inkazi kizoyigeramwo”, ni ukuvuga ya “Nzira Nyeranda”. Mu buryo bw’ikigereranyo, abantu b’inkazi mu vyo bakora no mu vyo bavuga bagereranywa n’ibikoko vyo mw’ishamba. Ata gukeka nta kibanza bazoronka mw’isi nshasha y’ubugororotsi y’Imana. (Yes. 11:6; 65:25) Birahambaye rero ko abipfuza gushimwa n’Imana baheba bene izo kamere z’ubunyamaswa, maze bagakurikirana ubweranda.

Ivyanditswe biduhanura biti: “Umururazi ubabaza wose, n’ishavu, n’uburake, n’ugukankama, n’ugutukana, bikurwe muri mwebwe hamwe n’ububi bwose.” (Ef. 4:31) Mu Bakolosayi 3:8, dusoma duti: “Nimuvyikunkumure . . . vyose: uburake, ishavu, ububi, ugutukana, n’amajambo ateye isoni ava mu kanwa kanyu.” Ijambo “ugutukana” rikoreshwa muri iyi mirongo ibiri ahanini ryerekeza ku majambo acumita, amajambo y’agasuzuguro, canke amajambo yo kurogota.

Muri kino igihe, imvugo zicumita be n’iziteye isoni ziriraye, mbere no mu ngo. Abubakanye barabwirana amajambo acumitana, canke yo gutyozanya, kibure bakayabwira abana babo. Bene izo mvugo zibabaza ntizikwiye kuba mu ngo z’abakirisu.​—1 Kor. 5:11.

Gukurikira “ubweranda mu gutinya Imana,” ni umuhezagiro!

Ese ukuntu ari agateka gukorera Imana nyeranda Yehova! (Yos. 24:19) Iparadizo yo mu buryo bw’impwemu Yehova yadushizemwo ni iy’agacira kanini cane. Nta gukeka ko kuguma dufise inyifato nyeranda mu nyonga za Yehova ari bwo buryo bwiza kuruta ubundi bwo kubaho.

Ubu bwa vuba Iparadizo yo kw’isi Imana yasezeranye igiye kuza. (Yes. 35:1, 2, 5-7) Abayishashaye kandi babandanya kubaho bibanga Imana bazoronka ikibanza muri yo. (Yes. 65:17, 21) Rero, uko vyogenda kwose, nimuze tubandanye gusenga Imana tudahumanye mu vy’impwemu, twongere tugume dufitaniye na yo ubucuti bwa somambike.

[Akajambo k’epfo]

[Ifoto ku rup. 26]

Abayuda basabwa iki kugira ngo bagendere mu “Nzira Nyeranda”?

[Ifoto ku rup. 27]

Amashusho yerekana ivy’ubushegabo aronona ubucuti umuntu afitaniye na Yehova

[Ifoto ku rup. 28]

“Ugukankama, n’ugutukana, bikurwe muri mwebwe”