Ibibazo vy’abasomyi

Dukwiye gutahura gute ibitigiri vyo muri raporo y’umurimo isohoka buri mwaka?

Buri mwaka tuba twiteganye igishika kubona raporo y’umurimo isohorwa mu gitabu c’umwaka no mu Gikorwa dukorera Ubwami co muri Ruhuhuma. Usanga biteye umunezero kwibonera ivyo abasavyi ba Yehova uko bagize umugwi bashitseko mu gikorwa co kwamamaza Ubwami no kwigisha barangurira kw’isi yose. Ariko rero, kugira ngo turushirize kwungukira kuri iyo raporo, turakeneye gutahura neza ibiri muri be n’ibitigiri vyanditswemwo. Rimbura uburorero bukeyi.

Umwaka w’umurimo. Uwo mwaka utangura mu kwezi kwa Nyakanga kw’umwaka umwe ugahera mu kwezi kwa Myandagaro kw’umwaka ukurikira. Iyo raporo yama ari iy’umwaka w’umurimo uba uheze. Ku bw’ivyo, Igikorwa dukorera Ubwami co muri Ruhuhuma 2011 kirimwo raporo y’umwaka w’umurimo wa 2010, uno ukaba watanguye ku wa 1 Nyakanga 2009 uhera ku wa 31 Myandagaro 2010.

Igitigiri c’agaheta c’abamamaji be n’incahagati y’abamamaji. Mu “bamamaji” harimwo Ivyabona vya Yehova babatijwe hamwe n’abatarabatizwa bakwije ibisabwa vyo kuba abamamaji b’Ubwami. “Igitigiri c’agaheta c’abamamaji” ni igitigiri kiba kitari bwigere gishikwako gitangwa mu kwezi kunaka kw’umwaka w’umurimo kandi coshobora kuba kirimwo amaraporo yacerewe ataba yaraharuwe muri raporo y’ukwezi guheze. Muri ubwo buryo, abamamaji bamwebamwe boshobora guharurwa kabiri. Naho ari ukwo, igitigiri c’agaheta ntikiba kirimwo abamamaji baba vy’ukuri baragize uruhara mu busuku mugabo bakibagira gutanga raporo ku gihe. Ivyo birerekana igituma bihambaye ko umwamamaji wese atanga raporo yiwe buri kwezi adatebaganye. “Incahagati y’abamamaji” ni igitigiri cose hamwe c’amaraporo y’amezi yose, ukigabuye na 12.

Amasaha yose hamwe. Nk’uko biboneka muri raporo yasohotse mu 2011, Ivyabona vya Yehova bamaze amasaha arenga umuliyaridi 1 n’imiliyoni 600 mu busuku bwo mu ndimiro. Ariko rero, ico gitigiri nticerekana amasaha yose tumara turi mu bikorwa vyacu bijanye no gusenga, kuko kitarimwo umwanya twama dukoresha mu bikorwa bimwebimwe nk’ukugendera abavukanyi cungere, kwitaba amakoraniro, kwiyigisha Bibiliya no kuzirikana ivyo dusoma.

Amahera akoreshwa. Mu mwaka w’umurimo wa 2010, Ivyabona vya Yehova bakoresheje amahera arenga imiliyoni 155 z’amadolari (nk’amarundi imiliyaridi 191 n’imiliyoni 580) mu kwitwararika abatsimvyi badasanzwe, abamisiyonari n’abacungezi b’ingenzi bari aho barungitswe gukorera umurimo wo mu ndimiro. Ariko rero, ico gitigiri ntikirimwo amahera yakoreshejwe mu gucapura ibisohokayandikiro bishingiye kuri Bibiliya dusohora; eka kandi ntikirimwo amahera yakoreshejwe mu kwitwararika Abanyabeteli barenga 20.000 basukurira bavyishakiye mu nyubakwa z’amashami ziri hirya no hino kw’isi.

Abafungura ku Cibutso. Ni igitigiri c’abantu babatijwe bafata ku bimenyetso vy’Icibutso kw’isi yose. None ico gitigiri coba cerekana ukuntu abarobanuwe bose bari kw’isi bangana? Si ngombwa. Hari ibintu bitari bike vyoshobora kuba bituma abantu bamwebamwe biyumvira bihenda yuko bahamagariwe kuba mw’ijuru, muri ivyo hakaba harimwo ivyo bahora bemera mu madini barimwo canke mbere ugutwarwa n’inyiyumvo. Ku bw’ivyo, ntidushobora kumenya igitigiri nyezina c’abarobanuwe bari kw’isi; eka kandi ntibikenewe ko tukimenya. Inama Nyobozi ntiguma yandika amazina y’abantu bose bafata ku bimenyetso vy’Icibutso.a

Ico tuzi ni uko bamwebamwe mu “bashumba b’Imana yacu” barobanuwe bazoba bakiri kw’isi ya miyaga itikiza igereranya amakuba akomeye niyarekurwa. (Ivyah. 7:1-3) Gushika ico gihe, abarobanuwe bazoguma bayobora igikorwa cerekanwa mu buryo butomoye muri raporo yacu y’umurimo isohoka buri mwaka, ni ukuvuga igikorwa co kwamamaza no kwigisha gihambaye kuruta ibindi vyose vyigeze kurangurwa.

[Akajambo k’epfo]