Umugwi ugira 131 w’abasohoka Ishure rya Gileyadi

‘Muzotume Yehova anezerwa’

INCUTI, abagenzi n’abandi batumire barakoraniye hamwe ku wa 10 Nyakanga 2011 kugira bakurikirane ibirori vyo gushikiriza impapuro z’umutsindo umugwi ugira 131 w’abasohoka Ishure ry’ivya Bibiliya rya Gileyadi. Mu ntango z’uwo musi, abashikirizansiguro n’abanyeshure umutima ntiwari mu nda. Ariko ivyo birori birangiye, abari bavyitavye bose uko bari 9.063 bari baryohewe, akamwemwe ari kose, kuko bari bahimbawe no gukurikira insiguro, imyerekano n’ibiganiro vyo kubaza ibibazo.

Stephen Lett wo mu Nama Nyobozi y’Ivyabona vya Yehova akaba ari na we yari ahagarikiye ivyo birori, ni we yashikirije insiguro y’intango. Yaraciye irya n’ino ivyanditswe vyo muri Bibiliya bidondora Yehova Imana nk’aho afise umubiri, ashimika canecane ku mirongo ivuga ukuntu Yehova akoresha amaso yiwe, amatwi yiwe n’amaboko yiwe vy’ikigereranyo.

Yabanje guca irya n’ino icanditswe co mu 2 Ngoma 16:9, ahavuga ko “amaso [ya Yehova] anyuragira mw’isi yose kugira ngo yerekane inkomezi ziwe ku bw’abafise umutima ukwiye kuri we.” Abanyeshure bararemeshejwe kuguma bayobokera Yehova n’umutima wabo wose. Yarababwiye yuko bashobora kwigana Imana mu kurondera iciza mu bandi. Umuvukanyi Lett yaciye aca irya n’ino 1 Petero 3:12, ahavuga ko amatwi ya Yehova ari ku gutakamba kw’abagororotsi. Yahimirije abanyeshure kuguma baganira na Yehova, bakibuka yuko Yehova ashaka vy’ukuri gutega ugutwi amasengesho yabo.

Yaraciye kandi irya n’ino Yesaya 41:13, aho Yehova asezerana ati: “Jewe, Yehova Imana yawe, ngufata ukuboko kw’ukuryo, nkakubwira nti: ‘Ntutinye. Jewe nzogufasha.’” Umuvukanyi Lett yaciye ababwira n’igishika kandi abikuye ku mutima ati: “Umve yemwe ayo majambo akora ku mutima Yehova avuga! Aratuma ukuboko kwiwe akadufata ukuboko.” Ni kwo guca abwira abanyeshure kwama bareka Yehova akabafasha, ntibigere banana igihe ashaka kubafasha. Yaravuze kandi yuko abanyeshure bokwigana Yehova mu gutuma amaboko yabo kugira bafashe abandi.

Ubwa nyuma, umuvukanyi Lett yarasomye muri Yesaya 40:11. Yasavye abari aho bose ngo base n’ababona ikibabarwe giserurwa muri ico canditswe. Umuvukanyi Lett yaciye avuga ati: “Yehova aratwegeranya n’amaboko yiwe, akadutwara mu gikiriza ciwe.” None natwe dukwiye kugira iki? Abanyeshure baremeshejwe kuguma boroshe kandi batekereje nk’umwagazi w’intama kugira ngo Yehova ashime kubatwara mu gikiriza ciwe.

“Dufise iryo tunga mu vyombo vy’ivu”

David Splane wo mu Nama Nyobozi yaraciye irya n’ino uwo mutwe-shimikiro wari ushingiye ku canditswe ca 2 Abakorinto 4:7. Iryo tunga ni irihe? Bwoba ari ubumenyi canke ubukerebutsi? Yishuye ati: “Oya. Itunga intumwa Paulo yariko aravuga ni ‘ubu busuku’ bwo ‘gushira ahabona ukuri.’” (2 Abakorinto 4:1, 2, 5) Umuvukanyi Splane yaribukije abanyeshure yuko amezi atanu bari bamaze biga yari ayo kubategura ngo barangure igikorwa kidasanzwe mu busuku. Ico gikorwa ni ico guha agaciro kanini.

Yarasiguye yuko “ivyombo vy’ivu” ari imibiri yacu y’inyama. Yarerekanye ubudasa buri hagati y’icombo c’ivu n’icombo c’inzahabu. Ivyombo vy’inzahabu ntibikoreshwa cane. Ariko ivyombo vy’ivu bigenewe gukoreshwa. Dushize itunga mu combo c’inzahabu, twohava dushira ivyiyumviro ku combo ubwaco no kw’itunga riri muri co. Umuvukanyi Splane yavuze ati: “Mwebwe banyeshure ntimushima kwikwegerako ivyiyumviro. Igihe muzoba muriko murangura igikorwa c’ubumisiyonari, muze mwerekeze abantu kuri Yehova. Muri ivyombo vy’ivu biciye bugufi.”

Yabandanije ico kigereranyo avuga ko mu bihe vya Bibiliya ivyombo bimwebimwe vy’ivu vyarinda umuriro, kandi ko bimwebimwe vyaba bikomeye ku buryo bitamanyuka. None yashaka kuvuga iki? Mu mezi ya mbere y’igikorwa cabo c’ubumisiyonari, ntibazobura gushikirwa n’ibintu bizotuma bakomera. Bazosigara ari abantu badashoka bababazwa n’ugutorwa amahinyu kandi batihutira gushavura. Umuvukanyi Splane yavuze ati: “Muzosanga mukomeye kuruta uko mwiyumvira.” Iryo tunga, ari ryo busuku, Yehova ntiyarijeje abamarayika ahubwo yarijeje ivyombo vy’ivu. Yasozereye ati: “Ivyo vyerekana ko Yehova abizigiye.”

‘Ko wirutse uri kumwe n’abagenda n’amaguru, none uzoshobora gusiganwa n’amafarasi?’

Samuel Herd wo mu Nama Nyobozi yabajije ati: “Ushobora kwiruka umwanya ungana iki, ukiruka unyaruka ukungana iki?” Kubera iki yabajije ico kibazo abanyeshure? Uwo mushikirizansiguro yaragereranije ivy’abo banyeshure n’ivya Yeremiya. Uwo mugabo w’intahemuka ntivyamworoheye kwihanganira ingorane yari ahanganye na zo. Mugabo ibigeragezo bikomeye kuruta vyari bikimurindiriye. Ni co gituma Yehova yamubajije ati: “Ko wirutse uri kumwe n’abagenda n’amaguru bakakuruhisha, none uzoshobora gute gusiganwa n’amafarasi?”​—Yeremiya 12:5.

Umuvukanyi Herd yaciye yerekeza ico ciyumviro ku banyeshure, ati: “Mwoshobora kubona ko mwirutse n’amafarasi kubera ibibazo vyose mwakoze. Mugabo mu vy’ukuri ntimwirutse n’amafarasi, mwirutse n’abagenda n’amaguru. Aho muzoja gukorera, muzokwiruka n’amafarasi, egome, muzohangana n’ingorane zikomeye kuruta izo mwiyumvira ubu. Mwoba muzovyifatamwo neza? Ukumenyerezwa mwaronkeye mw’Ishure rya Gileyadi kwarabateguye kugira mwiruke n’amafarasi mutaruha.” Yaremesheje abanyeshure kubandanya bimenyereza mu vy’impwemu, bakaguma bafise akamenyero keza ko kwiga Bibiliya no gusenga.

Umuvukanyi Herd yaravuze yuko muri kazoza bamwe muri abo bagira barungikwe kuba abamisiyonari bazocika intege canke abo babwira inkuru nziza ntibayiteho. Abandi na bo bazobuzwa amahoro n’indwara canke ukwiyumva ko batabishoboye. Ariko yasubirije umutima mu nda abanyeshure yuko bafise isôko ry’inkomezi rizobafasha gusiga ikintu cose kibi coshika kandi ntibaruhe. Yavuze ati: “Mwaba mwiruka n’abagenda n’amaguru canke mwiruka n’amafarasi, muze mwizigire yuko ukuboko gukomeye kw’Imana gushobora kubafasha mugasozera isiganwa. Muzoheza mube abamisiyonari baroranirwa, bitume Yehova aterwa iteka kandi ashemezwa.”

Ibindi bintu bikurubikuru vyaranze ivyo birori

“Nturondere bike gusa.” John Ekrann, umwe mu bagize Komite y’ishami yo muri Leta Zunze Ubumwe za Amerika, yaraciye irya n’ino inkuru y’umuhanuzi Elisha n’umupfakazi yari afise abana bagira batwarwe kugirwa abashumba. (2 Abami 4:1-7) Uwo mupfakazi yari afise umubindi mutoyi umwe gusa ujamwo amavuta. Elisha yamubwiye ngo arondere iyindi mibindi mu babanyi, yongerako ati: “Nturondere [m]ike gusa.” Biciye kuri Elisha, Yehova yarakoze igitangaro aruzuza amavuta imibindi yose uwo mupfakazi yari yaronse. Uwo mupfakazi yaciye agurisha ayo mavuta, aronka amahera akwiye yo kuriha amadeni afise no kumara igihe atunze umuryango wiwe.

Ni ivyigwa ibihe iyo nkuru yashobora kwigisha abo bari bagiye kuba abamisiyonari? Igihe uwo mupfakazi yarondera iyindi mibindi, na we nu ntiyari kwinenaguza. Umuvukanyi Ekrann yavuze ati: “Yari gutora umubindi wose washobora kujamwo amavuta, kandi aronse mininiminini ntiyari kuyigisha.” Yaciye aremesha abanyeshure kwemera igikorwa cose bahawe, caba kinini canke gito. Yavuze ati: “Ntimwinenaguze.” Yaribukije kandi abanyeshure yuko uwo mupfakazi yaronse imihezagiro ihwanye n’urugero yagejejeko mu gukora ivyo Elisha yamubwiye. None umushikirizansiguro yashaka kwerekana iki? Yashaka kwerekana ko imihezagiro turonka ivana n’umwete be n’ukwizera tugaragaza. Ni kwo guca avuga ati: “Ntimwiziganye.”

‘Ni umukate kuri twebwe.’ William Samuelson, umuhagarikizi w’Urwego rujejwe amashure y’ivya gitewokarasi, ni we yaciye irya n’ino uwo mutwe-shimikiro wari ushingiye ku Guharūra 14:9. Yarashimitse ku karorero keza ka Yosuwa na Kalebu. Muri ico canditswe, ijambo “umukate” ryashaka kwerekana yuko ababa mu gihugu ca Kanani boneshejwe bitagoranye be n’uko iyo ntsinzi yoremesheje ikongera igakomeza Isirayeli. None yashaka kwigisha iki abanyeshure? Yavuze ati: “Mu bikorwa bijanye n’ivy’Imana muzokora, ingorane muze muzibone nk’ikintu kibakomeza kandi kibaremesha.”

“Ubwato bwabo bw’ukwizera bwoba buzoguma bufashwe n’inanga mu bihuhusi bizobashikira?” Sam Roberson, umwe mu bigishije abo banyeshure, yaraciye irya n’ino ingabisho intumwa Paulo yatanze y’uko abakirisu bamwebamwe bari “[barashikiwe] n’ugusāba nk’imeri mu bijanye n’ukwizera kwabo.” (1 Timoteyo 1:19) Yahimirije abanyeshure gutsimbataza mu bandi ukwizera gushinze imizi muri Yehova Imana nka kurya kw’ubwato bufashwe rwose n’inanga. Yavuze ati: “Igikorwa canyu kimeze nk’ic’umucuzi.” Gute? Umucuzi arafatanya utwuma tukavamwo umunyororo ushobora gutuma inanga igumiza ubwato hamwe ntibugire ingorane. Ni ko n’abamisiyonari bafasha abatohoji ba Bibiliya gutsimbataza kamere zishimwa n’Imana zikenewe kugira ngo baronke ubukiriro.

Umushikirizansiguro yagereranije turya twuma tugize umunyororo na kamere umunani zivugwa muri 2 Petero 1:5-8. Umuvukanyi Roberson yavuze yuko mu gihe abamisiyonari bafashije abatohoji ba Bibiliya kubona ukuntu Yehova agaragaza izo kamere, abo batohoji bashobora kwunga na Yehova ubucuti bw’intamenwa. Bazokwihanganira ingorane zose zimeze nk’igihuhusi zoshobora kugeza ukwizera kwabo.

Ivyabonywe be n’ibiganiro vyo kubaza ibibazo

Michael Burnett, uwundi mwigisha wo kw’Ishure rya Gileyadi, yarasavye abanyeshure ngo bigane bongere basubiremwo mu buryo bw’agakino bimwebimwe mu vyo bari baherutse kwibonera bariko baramamaza inkuru nziza. Abari ng’aho barahimbawe no kwumva ukuntu abanyeshure bashoboye kwamamaza mu kibanza co kudandarizamwo, ku kibuga c’indege, inzu ku nzu be n’ukuntu babwiye inkuru nziza umuntu yari yihenze mu guterefona.

Michael Hansen wo mu muryango wa Beteli ya Leta Zunze Ubumwe za Amerika yaciye abaza ibibazo abavukanyi batatu bari baramaze imyaka myinshi ari abamisiyonari, ari bo Stephen McDowell muri Panama, Mark Noumair muri Kenya, na William Yasovsky muri Paraguay. Ivyo bavuze vyarashimitse ku mutwe-shimikiro w’ikiganiro kivuga ngo “Nuhimbarwe no gukora ivyo Yehova agomba.” (Zaburi 40:8) Nk’akarorero, Mark Noumair yaradomyeko ibintu vyabateye umunezero we n’umukenyezi wiwe iyo bakoreye. Ubugenzi bunze n’Ivyabona vya Yehova baho bwatumye we n’umukenyezi wiwe bahimbarwa cane. Ibindi bintu vyabateye umunezero ni ukwibonera ukuntu abavukanyi bakurikiza ubuyobozi, ingene bagira amahinduka akomeye mu buzima bwabo be n’ingene Yehova yahezagira utwigoro bagira. Yabwiye abanyeshure yuko ibizobatera umunezero kuruta ibindi bikibarindiriye.

Umwe mu banyeshure bo muri uwo mugwi ugira 131 amaze gusoma ikete ryabo ryo gukenguruka, umuvukanyi Lett yaciye asozera ivyo birori mu kuremesha abo bari baronse impapuro z’umutsindo gukorana ubukerebutsi. Yavuze yuko bakoranye ubukerebutsi ‘bazotuma Yehova anezerwa.’ Abo bamisiyonari ntibazobura gutuma Yehova anezerwa nibamukorera badahemuka iyo barungitswe gukorera.​—Yesaya 65:19.

[Igicapo/​Ikarata ku rup. 31]

IBIRANGA ABITAVYE IRYO SHURE

Ibihugu bavuyemwo 10

Incahagati y’imyaka 34,7 y’amavuka

Incahagati y’imyaka 19,0 bamaze babatijwe

Incahagati y’imyaka 13,5 bamaze mu busuku bw’igihe cose

[Ikarata]

(Ushaka igisomwa cose, raba iki kinyamakuru)

Abo banyeshure barungitswe ugu vyerekanywe aho hepfo

AHO ABITAVYE IRYO SHURE BARUNGITSWE GUKORERA

BÉNIN

BREZILE

BILGARIYA

UBURUNDI

KAMERUNE

KANADA

RÉPUBLIQUE CENTRAFRICAINE

UBUDAGI

GANA

HONG KONG

ENDONEZIYA

KENYA

LIBERIYA

LITUWANIYA

MALEZIYA

MOZAMBIKE

NÉPAL

PANAMA

PARAGUAY

SIERRA LEONE

SLOVAKIYA

AFRIKA Y’EPFO

LETA ZUNZE UBUMWE ZA AMERIKA

VENEZUWELA

[Ifoto ku rup. 30]

Abanyeshure ba Gileyadi bariko basubiramwo mu buryo bw’agakino ivyo biboneye bariko baramamaza

[Ifoto ku rup. 31]

Umugwi ugira 131 w’abasohoka Ishure ry’ivya Bibiliya rya Gileyadi rya Watchtower

Mu rutonde rukurikira, imirongo iharurwa uhereye imbere uja inyuma, amazina na yo akaba atondetse uhereye ibubamfu uja iburyo ku murongo umwumwe wose.

(1) Lesch, C.; Lesch, N.; Shakarjian, P.; Shakarjian, T.; Budden, R.; Budden, K.; Nash, T.; Nash, L.

(2) Tremblay, E.; Tremblay, C.; Garvey, D.; Garvey, G.; Gaunt, R.; Gaunt, P.; Lau, J.; Lau, J.

(3) Davis, S.; Davis, S.; Sargeant, J.; Sargeant, J.; Fonseca, C.; Fonseca, S.; Thenard, E.; Thenard, A.

(4) Petratyotin, A.; Petratyotin, R.; Reyes, N.; Reyes, N.; Eisiminger, B.; Eisiminger, S.; Hacker, J.; Hacker, C.

(5) Hartman, E.; Hartman, T.; Goolia, W.; Goolia, K.; Thomas, J.; Thomas, E.; Okazaki, N.; Okazaki, M.

(6) Mills, C.; Mills, A.; Benning, L.; Benning, T.; Sobiecki, S.; Sobiecki, T.; Gagnon, L.; Gagnon, E.

(7) Hansen, B.; Hansen, M.; Fahie, A.; Fahie, M.; Dalgaard, J.; Dalgaard, J.; Andersson, M.; Andersson, R.