Yehova aratuzigama ku bw’ubukiriro

“[Muriko mu]zigamwa n’ububasha bw’Imana biciye ku kwizera ku bw’ubukiriro buteguriwe guhishurwa mu gihe ca nyuma.”​—1 PET. 1:4, 5.

WOKWISHURA GUTE?

Yehova yadukwegereye gute ku gusenga kw’ukuri?

Dushobora gute kureka Yehova akatuyobora akoresheje impanuro ziwe?

Yehova aturonsa indemesho gute?

1, 2. (a) Ni igiki kidukura amazinda yuko Imana izodufasha kugumana ugutungana kwacu? (b) Yehova azi umwe wese muri twebwe ku rugero rungana iki?

“UWIHANGANYE gushika kw’iherezo ni we azokizwa.” (Mat. 24:13) Yezu akoresheje ayo majambo, yaratomoye yuko kugira ngo tuzozigamwe Imana niyashitsa urubanza yaciriye isi ya Shetani, dutegerezwa kugumana ugutungana kwacu gushika kw’iherezo. Mugabo ivyo ntibisobanura yuko Yehova yiteze ko twihangana dukoresheje ubukerebutsi bwacu bwite canke inkomezi zacu bwite. Bibiliya idukura amazinda iti: “Imana ni inyizigirwa, ntizobareka ngo mugeragezwe ibirenze ivyo mushobora kwihanganira, mugabo hamwe na nya kigeragezo, izobacira kandi icanzo kugira mushobore kucihanganira.” (1 Kor. 10:13) None ayo majambo yerekana iki?

² Kugira ngo Yehova yiyemeze neza ko tutageragezwa ibirenze ivyo dushobora kwihanganira, abwirizwa kumenya ikintu cose kitwerekeye, aho hakaba harimwo ingorane zidushikira, ukuntu umwe wese muri twebwe ameze, be n’ukuntu ivyo dushobora kwihanganira bingana. Imana yoba vy’ukuri izi ivyo bintu vyose bitwerekeye? Cane nyene. Ivyanditswe birahishura ko Yehova azi neza umwe wese muri twebwe. Arazi ivyo dukora buri musi be n’inyifato tugaragaza. Arashobora mbere kumenya ivyiyumviro n’imigabo vy’umutima wacu.​—Soma Zaburi 139:1-6.

3, 4. (a) Ivyashikiye Dawidi vyerekana gute ko Yehova yitwararika abantu umwumwe wese ku giti ciwe? (b) Ni igikorwa gihambaye ikihe Yehova ariko ararangura muri iki gihe?

³ Kuba Imana yitwararika gutyo abantu baciye bugufi, vyoba bisa n’ibitumvikana? Umwanditsi w’amazaburi Dawidi yarazirikanye ico kibazo, mu kubwira Yehova ati: “Iyo mbonye amajuru yawe, ibikorwa vy’intoke zawe, ukwezi n’inyenyeri wateguye, umuntu buntu ni iki ku buryo umwibuka?” (Zab. 8:3, 4) Birashoboka yuko Dawidi yabajije ico kibazo abitumwe n’ivyamushikiye. Yehova yarabonye ko uwo muhungu w’umuhererezi wa Yese ari “umuntu ahimbara umutima wiwe” maze amukura “inyuma y’umukuku, kugira ngo [a]be indongozi” ya Isirayeli. (1 Sam. 13:14; 2 Sam. 7:8) Iyumvire ukuntu Dawidi ategerezwa kuba yarumvise amerewe igihe yamenya yuko Umuremyi w’ibiriho vyose yari yaritwararitse ivyiyumviro vyiwe n’inyiyumvo ziwe naho nyene yari akiri agahungu k’akungere!

⁴ Ukuntu Yehova yitwararika mu buryo budasanzwe umwe wese muri twebwe muri iki gihe, na vyo nyene biratangaje. Ariko arakoraniriza mu gusenga kw’ukuri “ibintu bihimbaye vyo mu mahanga yose,” kandi ariko arafasha abasavyi biwe kugumana ugutungana kwabo. (Hag. 2:7) Kugira ngo turushirize gutahura ukuntu Yehova adufasha kugumana ugutungana kwacu, nimuze tubanze tuzirikane ukuntu akwegera abantu ku gusenga kw’ukuri.

IMANA IRADUKWEGERA

5. Yehova akwegera gute abantu ku Mwana wiwe? Tanga akarorero.

⁵ Yezu yavuze ati: “Nta muntu ashobora kuza kuri jewe kiretse Data yandungitse amukwegereye.” (Yoh. 6:44) Ayo majambo yerekana yuko kugira ngo umuntu abe umwigishwa wa Kristu, ategerezwa gufashwa n’Imana. Yehova akwegera gute abantu bameze nk’intama ku Mwana wiwe? Abicisha ku gikorwa co kwamamaza inkuru nziza no ku mpwemu nyeranda. Nk’akarorero, igihe Paulo n’abamisiyonari bagenziwe bari i Filipi, barabonye umugore yitwa Lidiya maze batangura kumubwira inkuru nziza. Inkuru yahumetswe ivuga ivy’ico kintu, igira iti: “Yehova yugurura cane umutima wiwe ngo yiteho ibivugwa na Paulo.” Egome, Imana yarakoresheje impwemu yayo kugira imufashe gutahura ubwo butumwa, ivyo bikaba vyatumye we n’abo mu rugo rwiwe babatizwa.​—Ivyak. 16:13-15.

6. Ni gute twese Imana yadukwegereye ku gusenga kw’ukuri?

⁶ Ivyo none vyoba vyashikiye Lidiya gusa? Eka data! Nimba uri umukirisu yiyeguye, na wewe nyene Imana yaragukwegereye ku gusenga kw’ukuri. Nka kurya nyene Dawe wa twese wo mw’ijuru yabonye ikintu c’agaciro mu mutima wa Lidiya, ni na ko yabonye ikintu ciza muri wewe. Igihe watangura kwumviriza inkuru nziza, Yehova yaragufashije kuyitahura akoresheje impwemu nyeranda. (1 Kor. 2:11, 12) Igihe wihatira gushira mu ngiro ivyo wiga, yarahezagiye utwigoro twawe two gukora ivyo agomba. Igihe wamwegurira ubuzima bwawe, umutima wiwe waranezerewe. Mu vy’ukuri, kuva igihe watangura kugendera mu nzira y’ubuzima, intambwe yose watera Yehova yaba ari kumwe nawe.

7. Tumenya dute ko Imana izodufasha kuguma turi abizigirwa?

⁷ Kubera ko Yehova yadufashije gutangura kugendana na we, n’ubu aradushigikira kugira ngo tugume turi abizigirwa. Arazi yuko nka kurya nyene tutaje mu kuri biciye ku bushobozi bwacu, ari na ko tutoshobora kukugumamwo biciye ku bushobozi bwacu. Igihe intumwa Petero yandikira abakirisu barobanuwe, yavuze ati: “M[uriko mu]zigamwa n’ububasha bw’Imana biciye ku kwizera ku bw’ubukiriro buteguriwe guhishurwa mu gihe ca nyuma.” (1 Pet. 1:4, 5) Ku bwa ngingo, ayo majambo arerekeye abakirisu bose kandi umwe wese muri twebwe arakwiye kuyitwararika muri iki gihe. Kubera iki? Kubera ko twese dukeneye gufashwa n’Imana kugira ngo tugume turi abizigirwa kuri yo.

IMANA IRATUBUZA GUTIRIMUKA

8. Ni kubera iki dukwiye kuba maso ku bijanye no gutirimuka?

⁸ Imikazo yo mu buzima be n’udusembwa twacu bwite vyoshobora gutuma tutaba tukibona ibintu mu buryo bw’impwemu maze tugahakwa gutirimuka tutanabizi. (Soma Abagalatiya 6:1.) Ivyo birerekanwa n’ikintu cashitse mu buzima bwa Dawidi.

9, 10. Yehova yabujije gute Dawidi gutirimuka, kandi ni ibiki adukorera muri iki gihe?

⁹ Igihe Dawidi yariko arahigwa buhongo n’Umwami Sauli, yaragaragaje ukwigumya kudasanzwe mu kwanka kwihora uwo mwami w’umunyeshari. (1 Sam. 24:2-7) Mugabo haciye igihe gito, Dawidi yarabuze ukwigumya. Kubera ko yari akeneye ibifungurwa vyo guha abantu biwe, yarasavye abigiranye urupfasoni Umwisirayeli mugenziwe yitwa Nabali ngo amufashe. Igihe Nabali yishura Dawidi ibitutsi, yaciye ashangashirwa maze afata ingingo yo kwihora abagabo bose bo mu rugo rwa Nabali, ntiyatahura ko kwica abantu ata co bazira vyotumye yagirwa n’amaraso imbere y’Imana. Kuba Abigayili, umugore wa Nabali yarahaserutse ku gihe kibereye, ni co gusa catumye Dawidi adakora iryo kosa ryari kugira ingaruka z’agahomerabunwa. Kubera ko Dawidi yatahuye yuko Yehova yari yabigiyemwo, yabwiye Abigayili ati: “Hahezagirwe Yehova Imana ya Isirayeli, we yakurungitse uyu musi guhura nanje! Kandi hahezagirwe ukwiyumvira neza kwawe nawe uhezagirwe, wewe wambujije uyu musi gukora amaraso no gutuma ukuboko kwanje bwite gushitsa ubukiriro bwanje.”​—1 Sam. 25:9-13, 21, 22, 32, 33.

¹⁰ None iyo nkuru itwigisha iki? Yehova yarakoresheje Abigayili kugira ngo abuze Dawidi gutirimuka. Ivyo nyene ni vyo adukorera muri iki gihe. Ariko ntiwumve, ntidukwiye kwitega yuko igihe cose tuzoba tugira dukore ikosa, Yehova azoca arungika umuntu kugira ngo atubuze. Vyongeye, ntidushobora kumenya neza na neza ukuntu Imana izokora mu gihe kinaka canke ivyo izoreka ngo bishike mu bijanye n’iranguka ry’umugambi wiwe. (Umus. 11:5) Ariko rero, turashobora kwizigira tudakeka ko Yehova yama azi ukuntu ivyacu vyifashe be n’uko azodufasha kuguma turi abizigirwa kuri we. Adukura amazinda ati: “Nzotuma ugira ugutahura kwimbitse nongere nkwigishe inzira ukwiye gucamwo. Nzokugīra inama ijisho ryanje riri kuri wewe.” (Zab. 32:8) None Yehova atugīra inama gute? Dushobora gute kuyungukirako? Kandi ni kubera iki dushobora kwemera tudakeka ko Yehova ariko arayobora abasavyi biwe muri iki gihe? Raba ukuntu ivyo bibazo vyishurwa mu gitabu c’Ivyahishuwe.

IMPANURO ZIRATUZIGAMA

11. Yehova azi ku rugero rungana iki ibiriko biraba mu mashengero y’abasavyi biwe?

¹¹ Mw’iyerekwa rivugwa mu Vyahishuwe ikigabane ca 2 n’ica 3, Yezu Kristu uwari yaninahajwe, aragendura amashengero indwi yo muri Aziya Ntoya. Iryo yerekwa rirahishura yuko Kristu atabona gusa ukuntu ibintu vyifashe muri rusangi mugabo ko abona ukuntu ikintu kimwekimwe cose cifashe. Mu bihe bimwebimwe, aranavuga abantu kanaka, kandi igihe cose avuze ishengero, ararikeza canke akarihanura yisunze uko ivyaryo vyifashe. None ivyo vyerekana iki? Muri iryo yerekwa, ayo mashengero indwi agereranya abakirisu barobanuwe inyuma ya 1914, kandi impanuro ayo mashengero yahawe ku bwa ngingo ziraraba amashengero yose y’abasavyi b’Imana bari hirya no hino kw’isi muri iki gihe. Ntitwoba rero twihenze dushitse ku ciyumviro c’uko Yehova abicishije ku Mwana wiwe, ariko arayobora abasavyi biwe abigiranye umwete. Dushobora gute none kwungukira kuri ubwo buyobozi?

12. Dushobora gute kureka Yehova akayobora intambuko zacu?

¹² Uburyo bumwe dushobora kwungukira ku buyobozi buranga urukundo Yehova aduha, ni ukwiyigisha. Yehova abicishije ku bisohokayandikiro vya wa mugwi w’umushumba w’umwizigirwa kandi w’ubwenge, aratanga impanuro ngirakamaro zishingiye ku Vyanditswe. (Mat. 24:45) Ariko rero, kugira ngo tuzungukireko, dutegerezwa gufata umwanya wo kwiga ivyo bisohokayandikiro maze tugashira mu ngiro ivyo twize. Kwiyigisha ni uburyo bumwe Yehova akoresha mu “kut[u]rinda gutsitara.” (Yuda 24) Woba umaze kwiga ikintu kinaka mu bisohokayandikiro vyacu ukamenga ni wewe candikiwe? Niwemere ukwo gukosorwa mu kubona yuko kuvuye kuri Yehova. Nka kurya nyene umugenzi yoshobora kuturya akara kugira ngo atwereke ikintu kinaka, ni na ko Yehova ashobora gukoresha impwemu yiwe kugira ngo atwereke ikintu kitagenda neza mu nyifato yacu canke muri kamere yacu, dukeneye kuryohora. Twemeye ubuyobozi butangwa n’impwemu, tuba turetse Yehova akayobora intambuko zacu. (Soma Zaburi 139:23, 24.) Mu bijanye n’ivyo, vyoba vyiza dusuzumye utumenyero dufise mu bijanye no kwiyigisha.

13. Ni kubera iki vyoba vyiza dusuzumye utumenyero dufise mu bijanye no kwiyigisha?

¹³ Kumara umwanya urenze urugero turiko turisamaza birashobora kudutwara umwanya dukeneye wo kwiyigisha. Umuvukanyi umwe avuga ati: “Biroroshe cane ko umuntu aheba kwiyigisha. Ubu ibintu vyo kwisamaza biraboneka kandi birazimbutse kuruta ikindi gihe cose. Ubisanga kuri televiziyo, kuri orodinateri no kuri telefone. Dukikujwe na vyo.” Tutabaye maso, umwanya dukeneye kugira ngo twiyigishe mu buryo bwimbitse, urashobora kugenda uragabanuka gushika aho utaba ukiboneka. (Ef. 5:15-17) Vyoba vyiza umwe wese muri twebwe yibajije ati: ‘Ni kangahe mfata umwanya nkiga Ijambo ry’Imana mu buryo bwimbitse? Noba ndabigira igihe gusa mfise insiguro canke ikiganiro co gutegura?’ Nimba ari ukwo biri, twoshobora gukoresha neza wa mugoroba uhariwe ugusenga kwo mu muryango canke ukwiyigisha kugira ngo twibikire muri ntibate ubukerebutsi bwo mu vy’impwemu Yehova aturonsa kugira atuzigame ku bw’ubukiriro.​—Imig. 2:1-5.

INDEMESHO ZIRADUKOMEZA

14. Ivyanditswe vyerekana gute ko Yehova yitwararika ukuntu twiyumva?

¹⁴ Dawidi yarashikiwe n’ibintu vyinshi bibabaje mu buzima bwiwe. (1 Sam. 30:3-6) Amajambo yiwe yahumetswe arerekana ko Yehova yari azi ukuntu yiyumva. (Soma Zaburi 34:18; 56:8.) Imana irazi n’ukuntu twiyumva. Igihe dufise “umutima umenetse” canke “[tu]janjaguritse mu mutima,” iratwiyegereza. Ivyo ubwavyo vyoshobora kuduhoza ku rugero runaka, nk’uko vyahojeje Dawidi, uwaririmvye ati: “Nzonezererwa ubuntu bwuzuye urukundo bwawe, bumpimbare, kuko wabonye amarushwa yanje; wamenye amagorwa y’umutima wanje.” (Zab. 31:7) Mugabo Yehova arakora n’ibindi uretse gusa kubona umubabaro turimwo. Aradukomeza mu kuduhoza no mu kuturemesha. Amakoraniro ya gikirisu ni uburyo bumwe akoresha mu kubigira.

15. Ivyashikiye Asafu bitwigisha iki?

¹⁵ Kimwe mu vyiza vyo kwitaba amakoraniro kirerekanwa n’ivyashikiye umwanditsi w’amazaburi Asafu. Kuba Asafu yaguma yiyumvira ibintu vy’akarenganyo vyagirwa, vyatumye akekeranya ku kamaro ko gukorera Imana. Asafu yaracitse intege. Yadondoye uko yiyumva muri ubu buryo ati: “Umutima wanje watewe gukāta, mu mafyigo yanje ngasogotwa n’ububabare.” Ivyo vyatumye ahakwa guhagarika gukorera Yehova. Ni igiki camufashije kwigarura? Yavuze ati: “Ninjiye aheranda hahambaye h’Imana.” Ari ng’aho mu basavyi ba Yehova bagenziwe, yarasubiye kubona ibintu mu buryo bubereye. Yarabonye yuko ukuroranirwa kw’ababisha kwari ukw’igihe gito gusa be n’uko Yehova atobuze gutorera umuti ivyo bintu vy’akarenganyo. (Zab. 73:2, 13-22) Ukwo ni ko bimeze no kuri twebwe. Umubabaro duterwa n’ibintu vy’akarenganyo bikorwa mw’isi ya Shetani urashobora kuduca intege. Gukoranira hamwe n’abavukanyi bacu biraturuhurira bikongera bikadufasha kuguma dukorera Yehova dufise umunezero.

16. Twokwungukira gute ku karorero ka Hana?

¹⁶ Biteho nka hamwe hoba ikintu mw’ishengero kigatuma bitakworohera kwitaba amakoraniro? Kumbure vyarabaye ngombwa ko wakwa agateka kanaka k’umurimo ukaba wumva ufise ubuyega, canke waragiraniye ingorane n’umuvukanyi canke mushiki wacu. Nimba ari ukwo biri, akarorero ka Hana koshobora kugufasha. (Soma 1 Samweli 1:4-8.) Uribuka yuko yababazwa cane n’ingorane yo mu muryango yari ijanye na mukeba wiwe Penina. Iyo ngorane yararushiriza kwunyuka buri mwaka igihe uwo muryango waba ugiye gushikanira Yehova ibimazi i Shilo. Iyo ngorane yarababaza cane Hana ku buryo “yarira, ntarye.” Yamara, ntiyaretse ngo ivyo bimubuze kuza araja gusenga Yehova. Yehova yarabonye ko ari umwizigirwa maze aramuhezagira.​—1 Sam. 1:11, 20.

17, 18. (a) Ni mu buryo butandukanye ubuhe turonka indemesho igihe turi ku makoraniro y’ishengero? (b) Wumva umerewe gute ku bijanye no kuba Yehova atwitwararikana ikibabarwe kugira adufashe gushikira ubukiriro?

¹⁷ Muri iki gihe abakirisu barafise imvo yumvikana yo kwigana akarorero ka Hana. Turakeneye kwitaba amakoraniro badahorereza. Nk’uko twese tumaze kuvyibonera, amakoraniro araturonsa indemesho dukeneye. (Heb. 10:24, 25) Kwifatanya mu buryo buranga igishika n’abakirisu bagenzi bacu biraduhoza. Ikintu gisanzwe kivuzwe mu nsiguro canke mu nsasanuro coshobora kudukora ku mutima. Mu biyago tugira imbere n’inyuma y’amakoraniro, uwo dusangiye ukwemera yoshobora kudutega yompi canke akatubwira amajambo yirura. (Imig. 15:23; 17:17) Igihe dushira amajwi hejuru mu kuririmbira Yehova, turanezerwa cane. Igihe twugarijwe n’“ivyiyumviro bidurumbanye” ni ho canecane tuba dukeneye indemesho turonkera ku makoraniro, aho Yehova adukomeza akoresheje ivyo ‘yiruza’ akongera akadushigikira mu mwiyemezo dufise wo kuguma turi abizigirwa kuri we.​—Zab. 94:18, 19.

¹⁸ Kubera yuko twajijutse ko Imana itwitwararikana ikibabarwe, twumva tumerewe nk’uko wa mwanditsi w’amazaburi Asafu yumva amerewe, uwaririmbiye Yehova ati: “Wamfashe ukuboko kw’iburyo. Uzonyobora ukoresheje impanuro yawe.” (Zab. 73:23, 24) Ese ukuntu dukenguruka kuba Yehova atuzigama ku bw’ubukiriro!

[Ifoto ku rup. 28]

Na wewe nyene Yehova yaragukwegereye

[Amafoto ku rup. 30]

Gushira mu ngiro impanuro Imana iduha biratuzigama

[Ifoto ku rup. 31]

Indemesho turonka ziradukomeza