Woba ukenguruka ingabirano y’umubano w’abubatse iva ku Mana?

“Yehova abahe ingabirano, muronke ahantu h’ukuruhukira, umwe wese mu nzu y’umugabo wiwe.”​—RUSI 1:9.

NURONDERE INYISHU:

Ni kubera iki twovuga yuko abasavyi b’Imana ba kera bakenguruka ingabirano y’umubano w’ababiranye iva kuri yo?

Tuzi dute ko Yehova arazwa ishinga n’ukuntu duhitamwo uwo tuzokwubakana?

Ni impanuro zo muri Bibiliya zijanye n’umubano w’ababiranye izihe utegekanya gushira mu ngiro mu buzima bwawe?

1. Dondora ukuntu Adamu yavyakiriye igihe yaronka umugore.

“UYU noneho ni igufa ryo mu magufa yanje be n’umubiri w’umubiri wanje. Uyu azokwitwa Umugore, kubera ko mu mugabo ari ho uyu yakuwe.” (Ita. 2:23) Ese ukuntu umugabo wa mbere Adamu yahimbawe igihe yaronka umugore! Ntibitangaje kubona yarivuze amazina! Yehova amaze guteza Adamu itiro rirerire, yararemye uwo mugore yasa n’irirenga amukuye muri rumwe mu mbavu z’uwo mugabo. Adamu yahavuye amwita Eva. Imana yarashize abo babiri mu mubano w’ababiranye urangwa agahimbare. Kubera ko Yehova yakoresheje urubavu rwa Adamu mu kurema Eva, bari bafitaniye ubucuti bukomeye kuruta ubw’ umugabo n’umugore abo ari bo bose bo muri iki gihe.

2. Ni igiki gituma umugabo n’umugore bakwegerana?

² Yehova akoresheje ubukerebutsi bwiwe ntangere, yarashize mu muntu ubushobozi bwo gukunda uwo badasangiye igitsina, ico kikaba ari ikintu cotumye umugabo n’umugore bakwegerana. Igitabu kimwe c’inkoranyabumenyi (The World Book Encyclopedia) kivuga giti: “Umugabo n’umugore babirana, baba bizigiye kugiranira ubucuti bushingiye ku kurangura amabanga y’abubatse no kugiranira inyiyumvo z’ivy’urukundo zamaho.” Ivyo birashika incuro zitari nke mu basavyi ba Yehova.

BǍRAKENGURUKA INGABIRANO Y’UMUBANO W’ABUBATSE

3. Izahaki yaronse umugore gute?

³ Wa mwizigirwa Aburahamu yarubaha cane umubano w’ababiranye. Ni co gituma yarungitse i Mezopotamiya umusuku wiwe yari akuze kuruta abandi bose kugira ngo aronderere Izahaki umugore. Isengesho uwo musuku yatuye ryaravuyemwo ivyiza. Rebeka wa mwigeme yatinya Imana yaracitse umugore wa Izahaki akundwa cane yongera aragira uruhara mu ndinganizo ya Yehova ijanye no kuzigama uruvyaro rwa Aburahamu. (Ita. 22:18; 24:12-14, 67) Ivyo ntibikwiye gutuma dushika ku ciyumviro c’uko umuntu akwiye kwigira umurānzi, naho yoba abigiranye imvo nziza gute. Mu kibano ca none, abantu benshi barihitiramwo uwo bubakana. Ego ni ko imibano y’abubatse ntitunganirizwa mw’ijuru, mugabo Imana irayobora abakirisu muri uwo muce no mu yindi mice y’ubuzima igihe bayisenze bayisaba ubuyobozi kandi bakayoborwa n’impwemu yayo.​—Gal. 5:18, 25.

4, 5. Ni igiki kikwemeza yuko wa Mushulamukazi na wa mwungere bakundana bimwe bidasanzwe?

⁴ Umwigeme umwe w’akaranga w’Umushulamukazi wo muri Isirayeli ya kera ntiyipfuza ko abandi bamuhata ngo abe umwe mu bagore benshi b’Umwami Salomo. Yavuze ati: “Ndabarahije, emwe bakobwa ba Yeruzalemu, ntimugeze gukangura canke kuvyura urukundo muri jewe rutarabishaka.” (Ind. 8:4) Uwo Mushulamukazi hamwe n’umwungere umwe barakundana bimwe bidasanzwe. Yavuze yicishije bugufi ati: “Ndi ishurwe ry’izafarani gusa ryo mu kiyaya co ku nkengera, ilisi ryo mu biyaya vyo hasi.” Mugabo uwo mwungere yishuye ati: “Kurya kw’ilisi mu vyatsi vy’amahwa, ni ko umwigeme nikundira ameze mu bakobwa”! (Ind. 2:1, 2) Barakundana koko.

⁵ Kubera yuko uwo Mushulamukazi n’uwo mwungere imbere ya vyose bakunda Imana, nta gukeka ko bogiraniye ubucuti bukomeye mu mubano wabo w’ababiranye. Nkako, uwo Mushulamukazi yabwiye uwo mwungere yikundira ati: “Nunshire ku mutima wawe nk’ikidodo, nk’ikidodo ku kuboko kwawe; kuko urukundo rukomeye nk’urupfu, ugushaka kwiheberwa wenyene gusa ni nk’ukuzimu mu kutagondeka. Imirurumbo yarwo ni imirurumbo y’umuriro, urubeya rwa Ya [kuko ari we ruvako]. Amazi menshi ubwayo ntashobora kuzimya urukundo, eka n’inzuzi ubwazo ntizishobora kurukukumura. Naho umuntu yotanga ibintu vy’agaciro vyose vyo mu nzu yiwe abitangiye urukundo, abantu ntibogenda batabisuzuguye.” (Ind. 8:6, 7) Umusavyi wa Yehova ntakwiye none kwitega ukwiheberwa nk’ukwo ku wo bubakanye?

IHITAMWO RIHAMBAYE KU MANA

6, 7. Tuzi dute ko Imana irazwa ishinga n’ukuntu duhitamwo uwo tuzokwubakana?

⁶ Yehova ararazwa ishinga n’ukuntu uhitamwo uwo muzokwubakana. Ku bijanye n’abantu baba i Kanani, Abisirayeli bategetswe ngo: “Ntuze wunge na bo ubucuti bw’ukwabirana. Umukobwa wawe ntuze umuhe umuhungu wiwe, n’umukobwa wiwe ntuze umusabire umuhungu wawe. Kuko azokevya umuhungu wawe akamubuza kunkurikira, kandi ntibazobura gukorera izindi mana. Ishavu rya Yehova na ryo rizobarurumbira koko, kandi ntazobura kukuzimanganya ningoga.” (Gus. 7:3, 4) Haciye imyaka amajana, Ezira umuherezi yavuze ati: “Mwebwe mwarahemutse kubera mwabiriye abagore b’abanyamahangakazi kugira mwongereze icaha ca Isirayeli.” (Ezr. 10:10) Vyongeye, intumwa Paulo yabwiye abakirisu bagenziwe ati: “Umugore abohwa mu gihe cose umugabo wiwe akiriho. Ariko iyo umugabo wiwe asinziriye mu rupfu, nta kimubuza kwubakana n’uwo ashaka, ariko mu Mukama gusa.”​—1 Kor. 7:39.

⁷ Mu gihe umusavyi wa Yehova yiyeguye yokwubakana n’uwo badasangiye ukwemera, yoba agambarariye Imana. Abisirayeli bo mu gihe ca Ezira barahemutse mu kwabira “abagore b’abanyamahangakazi,” kandi vyoba bitabereye tugerageje kurondera ivyitwazo vyo kudakurikiza amajambo atomoye yo mu Vyanditswe. (Ezr. 10:10; 2 Kor. 6:14, 15) Umukirisu yubakanye n’uwo badasangiye ukwemera ntaba ari intangakarorero kandi aba adakenguruka vy’ukuri ingabirano y’umubano w’ababiranye iva ku Mana. Umuntu yubatse urwiwe muri ubwo buryo amaze kubatizwa, arashobora gutakaza uduteka tumwetumwe yari afise mu basavyi b’Imana. Kandi vyoba bitumvikana yiteze guhezagirwa, mu gihe yiyemerera mw’isengesho ati: ‘Yehova, narakugambarariye n’ibigirankana, mugabo ndakwinginze umpezagire naho biri ukwo.’

YEHOVA ARAZI ICOTUBERA CIZA KURUTA IBINDI

8. Sigura igituma dukwiye gukurikiza ubuyobozi Imana itanga bujanye n’umubano w’ababiranye.

⁸ Uwakoze imashini yinaka aba azi neza ukuntu ikora. Mu gihe ibihimba vyayo bikeneye guteranywa, arashobora gutanga amakuru akenewe ayerekeye. Tuvuge iki mu gihe twirengagije ubwo buyobozi maze tugateranya ivyo bihimba uko tuvyishakiye? Hamwe vyoshika iyo mashini igakora, yokora amarorerwa. Nimba rero twipfuza kugira umubano w’ababiranye urangwa agahimbare, dutegerezwa gukurikiza ubuyobozi butangwa na Yehova, we yakoze canke yatanguje umubano w’ababiranye.

9. Ni kubera iki twovuga ko Yehova atahura irungu umuntu agira be n’agahimbare abubakanye bashobora kugira?

⁹ Yehova arazi ibintu vyose vyerekeye abantu n’umubano w’ababiranye. Yarashize mu bantu icipfuzo co guhuza ibitsina kugira ngo ‘barondoke maze bagwire.’ (Ita. 1:28) Imana iratahura irungu umuntu agira, kubera ko imbere y’uko irema umugore wa mbere, yavuze iti: “Kuba umugabo ari wenyene si vyiza; ngira ndamukorere umufasha bikwiranye.” (Ita. 2:18, Byington) N’ikindi kandi, Yehova arazi neza umunezero abubatse bashobora kugira.​—Soma Imigani 5:15-18.

10. Abakirisu bubakanye bakwiye kwisunga iki mu bijanye no kurangura amabanga y’abubatse?

¹⁰ Kubera igicumuro n’agasembwa abantu barazwe na wa mucumuzi Adamu, nta mubano w’ababiranye n’umwe wo muri iki gihe utagiramwo agahaze. Ariko rero, mu basavyi ba Yehova umubano w’ababiranye urashobora kubamwo agahimbare nyakuri mu gihe Ijambo ry’Imana rikurikijwe. Nk’akarorero, rimbura impanuro zitomoye Paulo yatanze ku bijanye no kurangura amabanga y’abubatse. (Soma 1 Abakorinto 7:1-5.) Ivyanditswe ntibisaba yuko abubakanye barangura amabanga y’abubatse mu gihe gusa barondera kwibaruka. Ukwo kurangura amabanga y’abubatse kurashobora kubaronsa mu buryo bwemewe ivyo bakeneye mu nyiyumvo no ku mubiri. Mugabo ingeso zijanye n’ubushegabo mu vy’ukuri ntizihimbara Imana. Nta gukeka ko abagabo n’abagore b’abakirisu boshima kwitwararikana ikibabarwe uwo muce uhambaye w’ubuzima bwabo, ivyo bikaba vyotuma biyumvanamwo vy’ukuri. Ariko ntiwumve, barakwiye kwirinda gukora ikintu ico ari co cose cobabaza Yehova.

11. Rusi yahezagiwe gute kubera ko yakoze ibintu nk’uko Yehova agomba?

¹¹ Umubano w’ababiranye ukwiye gutuma abantu bagira umunezero aho gutuma bagira umubabaro canke barambirwa. Na canecane urugo rw’abakirisu, rukwiye kuba ahantu h’ukuruhukira kandi harangwa amahoro. Rimbura ivyashitse mu myaka nka 3.000 iheze, igihe wa mupfakazi yari ageze mu zabukuru Nawomi hamwe n’abakazana biwe b’abapfakazi Orupa na Rusi bariko baja muri Yuda bavuye i Mowabu. Nawomi yarahimirije abo bagore bari bakiri bato ngo basubire mu bantu b’iwabo. Uwo Munyamowabukazi Rusi yarumiye kuri Nawomi, araba umwizigirwa ku Mana y’ukuri kandi arakurwa amazinda ko ‘Yehova, uwo yaje kuronderera ubuhungiro munsi y’amababa yiwe, yomuhaye impembo itunganye.’ (Rusi 2:12) Kubera yuko Rusi yakenguruka cane ingabirano y’umubano w’ababiranye iva ku Mana, yarubakanye na wa mugabo yari akuze Bowazi, uno akaba yari umusavyi nyakuri wa Yehova. Rusi niyazukira kuba mw’isi nshasha y’Imana, azohimbarwa no kumenya yuko yabaye inakuruza wa Yezu kristu. (Mat. 1:1, 5, 6; Luka 3:23, 32) Ese ukuntu yahezagiwe kubera yuko yakoze ibintu nk’uko Yehova agomba!

IMPANURO NZIZA ZITUMA UMUBANO W’ABABIRANYE URORANIRWA

12. Umuntu yokura hehe impanuro nziza zijanye n’umubano w’ababiranye?

¹² Uwatanguje umubano w’ababiranye aratubwira ivyo twokora kugira ngo uroranirwe. Nta muntu n’umwe azi nk’ivyo azi. Bibiliya yama nantaryo ivuga ukuri, kandi uburyo bumwe rudende umuntu uwo ari we wese ashobora kuronka impanuro nziza zerekeye umubano w’ababiranye ni ukwisunga ingingo mfatirwako ziri mu Vyanditswe. Nk’akarorero, intumwa Paulo yanditse ahumekewe n’Imana ati: “Umwe wese muri mwebwe ku ruhande rwiwe akunde umugore wiwe nk’uko yikunda; umugore na we ategerezwa kugirira umugabo wiwe icubahiro kigera kure.” (Ef. 5:33) Nta kintu na kimwe kiri muri iyo mpanuro ishingiye kuri Bibiliya abakirisu bahumuye badashobora gutahura. Ikibazo ni iki: Boba bazoshira mu ngiro Ijambo rya Yehova? Bazobigira nimba bakenguruka vy’ukuri ingabirano y’umubano w’ababiranye atanga.a

13. Kudakurikiza impanuro iri muri 1 Petero 3:7 vyoshobora kuvamwo iki?

¹³ Umugabo mukirisu ategerezwa gufatana urukundo umugore wiwe. Intumwa Petero yanditse ati: “Namwe bagabo, ni kwo kw’ukwo, mubandanye kubana na bo mwisunze ubumenyi, mubatera iteka nk’abaritera icombo kirushirije kuba goyigoyi, icombo kigore, kuko namwe musangiye na bo kuba ba samuragwa ba bwa butoni ata wari abukwiriye bw’ubuzima, kugira ngo amasengesho yanyu ntatangirwe.” (1 Pet. 3:7) Amasengesho y’umugabo arashobora gutangirwa mu gihe adashira mu ngiro impanuro Yehova atanga. Ivyo birashobora gutuma abubakanye bompi bamererwa nabi mu vy’impwemu, bikaba vyobashikana ku mibabaro ikomeye, imitongano n’ukuryagagurana.

14. Umugore w’umunyarukundo ashobora kugira ico akoze gute ku buzima bw’umuryango?

¹⁴ Umugore ayoborwa n’Ijambo rya Yehova hamwe n’impwemu nyeranda yiwe arashobora gufasha cane mu gutuma mu rugo haba ahantu harangwa ugutekana n’agahimbare. Ni ibisanzwe ko umugabo atinya Imana akunda umugore wiwe akongera akamukingira mu buryo bw’impwemu no mu buryo bw’umubiri. Umugore wiwe aripfuza cane ko amukunda, ivyo bikaba rero bisaba ko na we agira ico akoze kugira ngo akundwe. Mu Migani 14:1 havuga hati: “Umugore w’inkerebutsi vy’ukuri yubaka inzu yiwe, mugabo uw’igipfu arayisambura n’amaboko yiwe bwite.” Umugore w’inkerebutsi kandi w’umunyarukundo aratuma umuryango urushiriza kuroranirwa no kugira agahimbare. Arerekana kandi ko akenguruka vy’ukuri ingabirano y’umubano w’ababiranye iva ku Mana.

15. Ni impanuro izihe ziri mu Banyefeso 5:22-25?

¹⁵ Abagabo n’abagore bashingira umubano wabo ku karorero Yezu yatanze mu bijanye n’ukuntu yafata ishengero ryiwe, barakenguruka ingabirano y’umubano w’ababiranye iva ku Mana. (Soma Abanyefeso 5:22-25.) Ese imihezagiro abubakanye bironkera igihe bakundana vy’ukuri kandi ntibigere bareka ngo ubwibone, ukwinumira kuranga abana canke izindi ngeso ziteye kubiri n’ubukirisu vyonone umubano wabo w’ababiranye!

UMUNTU NTAKABATANYE

16. Ni kubera iki abakirisu bamwebamwe baguma ari abirebange?

¹⁶ Naho abantu benshi bategekanya kuzokwubaka izabo umusi uri izina, abasavyi ba Yehova bamwebamwe baguma ari abirebange kubera yuko badashobora kuronka uwo bubakana abahimbara akongera agahimbara Yehova. Abandi usanga bifitiye ingabirano Imana yabahaye y’ubwirebange, ikaba ituma bashobora kwihebera umurimo wa Yehova badasamazwa n’ivyerekeye umubano w’ababiranye. Ariko ntiwumve, umuntu akwiye kwungukira ku bwirebange atarenga uturimbi Yehova yashinze.​—Mat. 19:10-12; 1 Kor. 7:1, 6, 7, 17.

17. (a) Ni amajambo ayahe ya Yezu yerekeye umubano w’ababiranye dukwiye kuguma twibuka? (b) Mu gihe umukirisu uwari we wese atanguye kwipfuza umuntu yubakanye n’uwundi, akwiye gukora iki adatebaganye?

¹⁷ Twaba turi abirebange canke twubatse, twese turakeneye kuguma twibuka amajambo ya Yezu agira ati: “Mbega ntimwasomye yuko [Imana y]abaremye kuva mu ntango yabagize umugabo n’umugore, [i]kavuga [i]ti: ‘Ni co gituma umugabo azosiga se na nyina akifatanya n’umugore wiwe, kandi abo babiri bazoba umubiri umwe’? Ku buryo bataba bakiri babiri, ahubwo baba ari umubiri umwe. Ku bw’ivyo rero, ico Imana yaboheye ku ngǒgo imwe, umuntu ntakagitanye.” (Mat. 19:4-6) Kwipfuza umuntu yubakanye n’uwundi ni igicumuro. (Gus. 5:21) Mu gihe umukirisu uwo ari we wese atanguye kugira icipfuzo nk’ico, arakwiye kugira ico akoze adatebaganye kugira ngo arandurane n’imizi ico cipfuzo gihumanye, naho vyotuma agira intuntu ikomeye bitumwe n’uko aba yaretse ivyipfuzo vy’ubwikunzi bigatsimbatara. (Mat. 5:27-30) Birahambaye cane ko akosora ivyiyumviro nk’ivyo akongera agahagarika ivyipfuzo biranga igicumuro vy’umutima w’umuhemu.​—Yer. 17:9.

18. Wiyumvira ko dukwiye kubona gute ingabirano y’umubano w’ababiranye iva ku Mana?

¹⁸ Mbere na benshi mu bantu bazi bike canke batazi na kimwe ku vyerekeye Yehova Imana be n’ingabirano nziza igitangaza y’umubano w’ababiranye, barerekana ku rugero runaka ko bakenguruka umubano w’ababiranye. Ese ukuntu twebwe abiyeguriye “ya Mana ihimbawe” Yehova, dukwiye kurushiriza kunezererwa intunganyo ziwe zose kandi tukerekana yuko dukenguruka vy’ukuri ingabirano y’umubano w’ababiranye iva ku Mana!​—1 Tim. 1:11.

[Akajambo k’epfo]

[Iciyumviro nyamukuru ku rup. 6]

Umubano w’abubatse mwiza uratera iteka Yehova kandi urashobora gutuma umwe wese mu bagize umuryango ahimbarwa cane

[Ifoto ku rup. 5]

Rusi yarakenguruka ingabirano y’umubano w’ababiranye iva ku Mana

[Ifoto ku rup. 7]

Woba werekana yuko ukenguruka koko ingabirano y’umubano w’ababiranye iva kuri Yehova?