Ingene amasengesho yogufasha

Igihe Pamela yarwara indwara ikomeye yaciye yitura abaganga. Ariko kandi yarasenze Imana ayisaba inkomezi zo kwihanganira izo ngorane yarimwo. None gusenga vyoba vyaramufashije?

Pamela avuga ati: “Igihe bariko baramvura kanseri, akenshi naragira ubwoba bwinshi. Ariko igihe nasenga Yehova Imana, naciye numva ntekanye ndasubira kwiyumvira neza. Naho ngifise ububabare budahera, gusenga biramfasha kuguma mbona ibintu mu buryo bwiza. Iyo abantu bambajije ukuntu merewe, nca ndababwira nti: ‘Simerewe neza, ariko ndafise umunezero.’”

Ariko ntiwumve, ntidukwiye gusenga igihe gusa dukitswe n’amagara. Twese turahura n’ingorane, zaba izoroshe canke izikomeye, kandi akenshi turakenera icodufasha kuzihanganira. None gusenga vyoba vyodufasha?

Bibiliya ivuga iti: “Terera umuzigo wawe kuri Yehova ubwiwe, na we ubwiwe azogushigikira. Ntazokwigera yemera ko umugororotsi anyiganyiga.” (Zaburi 55:22) Ese ukuntu ayo majambo ahumuriza! None gusenga vyogufasha gute? Niwasenga Imana mu buryo bubereye, izokuronsa ivyo ukeneye kugira ngo wihanganire ingorane.—Raba uruzitiro ruvuga ngo “Ivyo amasengesho yokuronsa.”

Ivyo amasengesho yokuronsa

Amahoro yo mu mutima

“Ivyo musaba bimenyeshwe Imana; maze amahoro y’Imana arengeye ukwiyumvira kwose azorinda imitima yanyu n’ububasha bwanyu bwo kwiyumvira biciye kuri Kristu Yezu.” (Abafilipi 4:6, 7) Niwabwira Imana ibikuraje ishinga, izogufasha kuguma utekanye no gukorana ubukerebutsi igihe wataye umutwe.

Ubukerebutsi buva ku Mana

“Nimba rero hari uwo muri mwebwe ahajije mu bukerebutsi, nagume abusaba Imana, kuko itanga cane kuri bose ata gutera imirarwe; kandi azobuhabwa.” (Yakobo 1:5) Iyo twataye umutwe, ntivyama vyoroha ko dufata ingingo nziza. Niwasenga Imana uyisaba ubukerebutsi, izokwibutsa impanuro ngirakamaro zitari nke dusanga mw’Ijambo ryayo Bibiliya.

Inkomezi n’uruhoza

“Muri vyose, ndonka inkomezi ndabikesheje umwe ampa ububasha.” (Abafilipi 4:13) Kubera ko Yehova Imana ari Mushoboravyose, arashobora kuguha inkomezi ukeneye kugira wihanganire ingorane, canke akagushigikira mu bigeragezo ucamwo. (Yesaya 40:29) Bibiliya yita kandi Yehova ngo “Imana y’uruhoza rwose.” Arashobora kuduhoza “mu makuba yacu yose.”—2 Abakorinto 1:3, 4.