Niwifate ruto wemere ko hari ivyo utazi

1. Ni ubushobozi ubuhe Yehova yaturemanye, kandi kubera iki?

YEHOVA yaturemanye ubushobozi bwo kwiyumvira, kwiga ibintu bishasha, gutahura ibintu no gushira mu ngiro ivyo twize. Kubera iki none yaturemye muri ubwo buryo? Yipfuza ko ‘tumumenya’ maze tukamukorera dukoresheje ububasha bwacu bwo kwiyumvira.—Imig. 2:​1-5; Rom. 12:1.

2. (a) Ubushobozi bwacu bugarukira he? (Yobu 37:​23, 24) (Raba n’ifoto.) (b) Kwifata ruto tukemera ko hari ivyo tudashoboye, bitugirira akamaro akahe?

² Naho dufise ubushobozi bwo kwiga ibintu bishasha, turafise aho tugarukira. (Soma Yobu 37:​23, 24.) Ehe raba ivyashikiye Yobu. Yehova yaramubajije ibibazo vyinshi vyamufashije kubona ko hariho ibintu vyinshi atazi. Ivyo vyatumye yicisha bugufi, biranamufasha gukosora ivyiyumviro vyiwe. (Yobu 42:​3-6) Na twebwe igihe twifashe ruto tukemera ko tutazi vyose, biratugirira akamaro. Ukwo kwifata ruto gutuma twizigira ko Yehova azoduhishurira ivyo dukeneye kumenya vy’ukuri kugira ngo dufate ingingo nziza.—Imig. 2:6.

3. Twihweza ibiki muri iki kiganiro?

³ Muri iki kiganiro, turaza kubona ibintu bimwebimwe tutazi be n’igituma kutabimenya bishobora gutuma tutoroherwa mu buzima. Turaza no kubona igituma ari vyiza kuba hari ibintu bimwebimwe tutazi. Kwihweza ivyo vyiyumviro biraza kudufasha kurushiriza kwizigira ko Yehova, «umwe afise ubumenyi butagira agahaze», atubwira ivyo dukeneye kumenya vy’ukuri.—Yobu 37:16.

NTITUZI UMUSI IHEREZO RIZOZIRAKO

4. Twisunze Matayo 24:​36, ni ikintu ikihe tutazi?

⁴ Soma Matayo 24:36. Ntituzi umusi iherezo ry’ivy’iyi si rizozirako. Mbere na Yezu igihe yari ng’aha kw’isi ntiyari azi ‘umusi n’isaha.’a Mu nyuma yabwiye intumwa ziwe yuko Yehova, umwe Ruheta mu vyo kwubahiriza umwanya, ari we afise «ububasha» canke ubukuru bwo gushinga igihe ibintu bimwebimwe bizoberako. (Ivyak. 1:​6, 7) Yehova yarashinze umusi n’isaha iherezo ry’ivy’iyi si rizozirako, ariko twebwe ntidushobora kubimenya.

5. Kutamenya umusi iherezo rizozirako bishobora kutugirako izihe ngaruka?

⁵ Nk’uko Yezu yabivuze, ntituzi ikiringo tuzomara turindiriye imbere y’uko iherezo riza. Ivyo vyoshobora gutuma tudebukirwa maze tugacika intege, canecane nimba tumaze igihe kitari gito turindiriye uwo musi wa Yehova. Vyongeye, hari aho bitotworohera kuguma twihanganira agacokoro k’abo mu muryango be n’abandi bantu. (2 Pet. 3:​3, 4) Hari aho twokwiyumvira ko iyo tuza kuba tuzi umusi iherezo rizozirako, vyotuma turushiriza kwihangana no kudacika intege igihe baducokoye.

6. Kubera iki ari vyiza kuba tutazi umusi iherezo rizozirako?

⁶ Mu vy’ukuri, kuba tutazi umusi iherezo rizozirako biraduha akaryo ko gukorera Yehova tubitumwe n’urukundo be n’ukumwizigira. Ntidukorera Yehova dufise mu bwenge itariki ntarengwa, nk’aho umengo ukwizera kwacu gufise itariki kuzoterako garanti. Aho gushira umutima cane kw’itariki «umusi wa Yehova» uzozirako, dukwiye nyabuna kuwushira ku bintu vyiza bizoba iherezo niryaza. Ivyo bizotuma turushiriza kwihebera Imana twongere dukore ivyo dushoboye vyose kugira ngo tuyihimbare.—2 Pet. 3:​11, 12.

7. Ni ibiki tuzi?

⁷ Birahambaye ko dushira umutima ku vyo tuzi. Nk’akarorero, turazi ko imisi ya nyuma yatanguye mu 1914. Muri Bibiliya, Yehova yaravuze ubuhanuzi bwerekeza kuri uwo mwaka kandi bwerekana mw’ido n’ido ukuntu ivyo kw’isi vyobaye bimeze kuva muri uwo mwaka. Kubera ko ubwo buhanuzi bwarangutse, bituma twemera ko «umusi uhambaye wa Yehova uri hafi.» (Zef. 1:14) Turazi kandi igikorwa Yehova ashaka ko dukora, na co akaba ari ukubwira abantu benshi bashoboka «inkuru nziza y’Ubwami.» (Mat. 24:14) Iyo nkuru nziza iriko iramamazwa mu bihugu nka 240 be no mu ndimi zirenga 1.000. Ntibikenewe ko tumenya ‘umusi n’isaha’ kugira dukorane umwete ico gikorwa gihambaye.

NTITUZI INGENE YEHOVA AZODUFASHA

8. Imvugo ngo «igikorwa c’Imana y’ukuri» yerekeza ku ki? (Umusiguzi 11:5)

⁸ Ntitwama tuzi «igikorwa c’Imana y’ukuri.» (Soma Umusiguzi 11:5.) Iyo mvugo yerekeza ku bintu Yehova atuma biba canke ivyo areka bikaba kugira ashitse ivyo agomba. Ntidushobora kumenya neza na neza igituma Yehova ashobora kureka ibintu kanaka bikaba, canke ngo tumenye neza na neza ingene azodufasha. (Zab. 37:5) Kumenya ivyo bintu biraturengeye cane, nka kurya nyene tutazi ingene umwana akurira mu nda ya nyina, ico kikaba ari ikintu n’abahinga bataratahura neza.

9. Ni ibiki vyoshobora kudushikira kubera ko tutazi ingene Yehova azodufasha?

⁹ Kutamenya ingene Yehova azodufasha vyoshobora gutuma tuba abantu badafata ingingo. Twoshobora kugonanwa kwagura umurimo, nk’akarorero tugatinya kugira ivyo duhevye kugira tworoshe ubuzima, canke kwimukira ahakenewe abamamaji kuruta. Canke na ho, twoshobora kwibaza nimba Imana idushima, nk’igihe tudashitse ku migambi y’ivy’impwemu twishingiye, igihe twitanga cane mu ndimiro ariko tukabona umengo nta kivamwo, canke igihe duhura n’intambamyi mu gikorwa twashinzwe.

10. Kuba tutazi ingene Yehova azodufasha, bidufasha gutsimbataza kamere zihambaye izihe?

¹⁰ Mu bisanzwe, kuba tutazi ingene Yehova azodufasha bituma dutsimbataza kamere zihambaye, nk’ukwicisha bugufi n’ukwifata ruto. Biradufasha gutahura ko ivyiyumviro vya Yehova n’inzira ziwe biri hejuru y’ivyacu. (Yes. 55:​8, 9) Vyongeye, biradufasha kurushiriza kwizigira Yehova, tukamwihekako kugira turoranirwe. Bishitse tukaroranirwa mu ndimiro canke mu bikorwa twashinzwe, ubuninahazwa bwose tubwerekeza kuri Yehova. (Zab. 127:1; 1 Kor. 3:7) Nimba na ho ibintu bitagenze nk’uko twari tuvyiteze, turakwiye kwibuka ko Yehova abona ivyabaye vyose. (Yes. 26:12) Twebwe turakora ivyo dushoboye maze tukizigira ko Yehova na we azogira ico akoze. Turemera tudakeka ko azoturonsa ubuyobozi dukeneye, naho atobikora ku gitangaro nk’uko rimwe na rimwe yabikora mu bihe vya kera.—Ivyak. 16:​6-10.

11. Ni ibiki tuzi bishobora kudufasha?

¹¹ Turazi ko Yehova adahinduka. Yama agaragaza urukundo, ubutungane n’ubukerebutsi. Turazi ko aha agaciro cane ivyo tumukorera be n’ivyo dukorera abavukanyi bacu. Vyongeye, turazi ko Yehova yama aha impera abaguma ari intahemuka kuri we.—Heb. 11:6.

NTITUZI IBIZOBA EJO

12. Twisunze Yakobo 4:​13, 14, ni ibiki tutazi?

¹² Soma Yakobo 4:​13, 14. Ntituzi uko ubuzima bwacu buzoba bumeze ejo. Muri iyi si, turaca mu ‘bihe bigoye kandi tugashikirwa n’ibintu biba giturumbuka.’ (Umus. 9:11) Ivyo bituma tutamenya nimba imigambi yacu izororanirwa canke nimba tuzoba tukiri bazima ngo tuyirangure.

13. Kutamenya ibizoba ejo bitugirako ingaruka izihe?

¹³ Kutamenya ibizoba ejo birashobora gutuma tutoroherwa mu buzima. Uti gute? Twoshobora guhagarika umutima twibaza ibizodushikira, kandi ivyo birashobora kudutwara umunezero. Nk’akarorero, igihe ivyago canke ibindi bintu bibi bidushikiye giturumbuka, turashobora kugira intuntu kandi tugata umutwe. Igihe na ho ivyo twari twiteze bitabaye, turashobora kuvunika umutima tugacika intege.—Imig. 13:12.

14. Kugira ngo duhimbarwe vy’ukuri, bisaba iki? (Raba n’amafoto.)

¹⁴ Naho twoshikirwa n’ingorane zimeze gute, igihe tuzihanganiye tuba twerekanye ko dukorera Umuvyeyi wacu wo mw’ijuru tutabitumwe n’ubwikunzi, ahubwo tubitumwe n’urukundo. Ibivugwa muri Bibiliya birerekana ko tudakwiye kwitega yuko Yehova adukingira ingorane zose zodushikira, kandi ko adashinga imbere y’igihe ibizodushikira. Arazi yuko umunezero wacu utavana n’uko tuba tuzi ibizodushikira. Ahubwo riho kugira duhimbarwe vy’ukuri, bisaba ko tumwihekako kugira atuyobore kandi tukamugamburukira. (Yer. 10:23) Igihe tumwihetseko mu gufata ingingo, ni nk’aho tuba tuvuze duti: «Yehova niyabishaka tuzobaho, dukore iki canke kiriya.»—Yak. 4:15.

15. Ni ibiki tuzi ku bijanye na kazoza?

¹⁵ Naho tutazi ico buca bucana, ico tuzi coco ni uko Yehova yadusezeraniye ubuzima budahera, haba mw’ijuru canke kw’isi. Turazi ko adashobora kubesha kandi ko ata kintu na kimwe comubuza gushitsa ivyo yasezeranye vyose. (Tito 1:2) Ni we wenyene ashoboye ‘kuvuga uko ibintu bizogenda, agahera kuva kera cane akavuga ibintu bitarakorwa.’ Nk’uko nyene ivyo yavuze muri kahise vyarangutse, ni ko n’ivyo muri kazoza bizoranguka. (Yes. 46:10) Turazi neza ko ata kintu na kimwe cobuza Yehova kudukunda. (Rom. 8:​35-39) Azoturonsa ubukerebutsi n’inkomezi dukeneye kugira dushobore kwihanganira ivyodushikira vyose. Turizigira tudakeka ko Yehova azodufasha akongera akaduhezagira.—Yer. 17:​7, 8.

NTIDUSHOBORA GUTAHURA NEZA INGENE YEHOVA ATUZI

16. Twisunze Zaburi 139:​1-6, ni ibiki Yehova azi ku bitwerekeye twebwe tudashobora gutahura neza?

¹⁶ Soma Zaburi 139:​1-6. Umuremyi wacu arazi uko turemwe be n’ibintu vyose bituma tumera uko tumeze canke tugaragaza inyifato kanaka. Aratwitaho cane. Arazi ivyo tuvuga be n’ico tuba dushatse kuvuga, akamenya n’ivyo dukora be n’igituma tubikora. Nk’uko umwami Dawidi yabivuze, Yehova yama atwitwararika kandi yiteguriye kudufasha. Ese ingene bikora ku mutima kubona Umukama Segaba yaremye ijuru n’isi atwitwararika ukuraho! Dawidi ni we yivugiyie ati: «Ubwo bumenyi burantangaza cane. Ni bwinshi cane ku buryo ntobutahura.»—Zab. 139:​6, akajambo k’epfo.

17. Kubera iki vyoshobora kutugora kwemera ko Yehova atuzi neza?

¹⁷ Umuryango twakuriyemwo, imico kama yacu canke ivyo twahoze twemera, vyoshobora gutuma bitugora kubona Yehova nk’Umuvyeyi adukunda kandi atwitwararika. Canke na ho, amakosa twakoze kera yoshobora gutuma twumva ko twamenje ku buryo twiyumvira ko Yehova atokwigera yipfuza kutumenya, kandi ko ari kure yacu. Ivyo n’umwami Dawidi vyaramushikiye. (Zab. 38:​18, 21) Canke na ho, umuntu ariko aragerageza kugira ivyo ahinduye mu buzima kugira abeho yisunga ingingo ngenderwako z’Imana zigororotse, yoshobora kwibaza ati: «Nimba Imana inzi neza vy’ukuri, kubera iki yonsaba guheba gukora ibintu izi ko nikundira?»

18. Kwemera ko Yehova atuzi neza kuruta uko twiyizi bitugirira akamaro akahe? (Raba n’amafoto.)

¹⁸ Turakwiye kwiga kwemera ko Yehova atuzi neza kuruta uko twiyizi be n’uko atubonamwo ivyiza tutibonamwo. Ariko naho azi amakosa yacu kandi akaba azi igituma tumeze uko tumeze, aguma adukunda. (Rom. 7:15) Igihe dutahuye neza ko Yehova aguma abona ko hari ico tuzovamwo, bica bituma turushiriza kumukorera tudahemuka kandi tunezerewe.

19. Ni ibiki tuzi tudakeka ku bijanye na Yehova?

¹⁹ Turazi ko Yehova ari urukundo, kandi kuri ico nta makenga dufise. (1 Yoh. 4:8) Turazi yuko ingingo ngenderwako ziwe zigororotse zerekana ko adukunda, kandi ko yama atwitwararika. Turazi ko Yehova yipfuza ko turonka ubuzima budahera. Kanatsinda, yaratanze incungu kugira ivyo bishoboke. Iyo ngabire y’incungu iradukura amazinda ko dushobora gukora ivyo Yehova agomba naho tudatunganye. (Rom. 7:​24, 25) Vyongeye, turazi ko «Imana iruta imitima yacu kandi ikaba izi ibintu vyose.» (1 Yoh. 3:​19, 20) Yehova arabona ibintu vyose bitwerekeye, kandi arizigira ko dushobora gukora ivyo agomba.

20. Ni igiki codufasha kudahagarika umutima?

²⁰ Yehova yaraduhaye amakuru yose dukeneye kumenya. Gutahura ico kintu biratuma tudahagarika umutima kubera ivyo tutazi, ahubwo riho tukitunira ku bihambaye kuruta. Tubigenjeje gutyo, tuba twerekanye ko twizigira Yehova duherejeko, «umwe afise ubumenyi butagira agahaze.» (Yobu 36:4) Naho muri iki gihe hariho ibintu bimwebimwe tudatahura, turiteganye umushasharo igihe tuzobaho ibihe bidahera, aho tuzoguma twiga ibintu bishasha ku bijanye n’Imana yacu ihambaye.—Umus. 3:11.