Twaratevye turabonana!

Linda: Igihe nari mfise imyaka 12, mama yarambwiye ko mfise mutoyi wanje arerewe ahandi. Naribaza nimba yavutse ari umuragi nka jewe. Ariko nakuze ntamuzi.

Sally: Sinigeze menya ko uwari andeze atari umuvyeyi wanje. Umugore yari andeze yarankubita cane kandi yamfata nk’umuja. Vyatumye nkurana umubabaro n’irungu, ivyo bikaza vyiyongera ku ngorane y’uko navutse ndi umuragi. Umusi umwe narabonanye n’Ivyabona vya Yehova, nca ndatangura kwiga Bibiliya. Igihe uwo mugore yari andeze yabimenya, yarankubise umukaba aca anyugaranira mu nzu maze arahindura amagufuri y’umuryango. Nshikanye imyaka 20, narataye ndomoka, Ivyabona baca baranyitorera. Nabatijwe mu ntango z’umwaka wa 2012.

Linda: Igihe nari mfise imyaka 20, naratanguye kwiga n’Ivyabona vya Yehova. Mu nyuma, naratanguye kwitaba amahwaniro y’intara i Jakarta, aho porogarama yaza irasubirwamwo mu rurimi rw’ibimenyetso. Nahahuriye n’abandi baragi benshi, ushizemwo na Sally, umwigeme w’Icabona yaba muri Sumatra ya Ruguru. Naramwiyumvisemwo cane ariko sinatahuye igituma.

Sally: Twe na Linda twahavuye tuba abagenzi. Narabonye ko dusa ariko sinabishizeko umutima.

Linda: Muri Myandagaro 2012, buca mbatizwa, narumvise nkeneye cane kubona mutoyi wanje, naho ntari nzi iyo ari. Naratakambiye Yehova nti: “Ndagusavye umfashe mbone mwene wacu, kuko nshaka kumubwira ibikwerekeye.” Haciye akanya gatoyi, mama yaciye aronka mesaje ivuye ku muntu yari afise amakuru yerekeye uwo mutoyi wanje. Iyo ni yo yabaye intandaro yo kubonana na Sally.

Sally: Igihe Linda yambwira ko nari mutoyi wiwe, naciye mfata indege yihuta y’i Jakarta, nja kumuraba. Nsohotse ikibuga c’indege, nasanze Linda na papa na mama hamwe n’uwundi mukuru wanje, bandindiriye. Ikigumbagumba carahatswe kunyica. Twararwanye mu nda, turasomagurana. Mama vyahatswe kwanka ko andekura. Twese twariko turarira. Igihe papa na mama bansaba ikigongwe hariko n’amosozi kubera bantanze ngo nderwe n’uwundi muntu, twaciye dusubira kurwana mu nda twongera turarira cane.

Linda: Kubera ko tutarezwe kumwe, umwe wese aragerageza kwihanganira kamere z’uwundi. Ariko turakundana cane.

Sally: Ubu twe na Linda turabana kandi turi mw’ishengero rimwe ry’ururimi rw’ibimenyetso i Jakarta.

Linda: Twe na Sally twamaze imyaka irenga 20 tutari kumwe. Turashimira Yehova kubona twaratevye tukabonana!