“Mubiherewe ubusa, mubitangire ubundi”

“MUBIHEREWE ubusa, mubitangire ubundi” (Matayo 10:8). Yezu yahaye iryo tegeko intumwa ziwe igihe yazirungika kwamamaza inkuru nziza. Intumwa zoba zaragamburutse iryo tegeko? Egome, kandi zarabandanije kurigamburuka n’igihe Yezu yari amaze kuva kw’isi.

Nk’akarorero, igihe Simoni uwahora akora ivy’amareba yabona ububasha bwo gukora ibitangaro intumwa Petero na Yohani bafise, yabahaye amahera kugira ngo bamuhe ubwo bubasha. Mugabo Petero yarakankamiye Simoni, avuga ati: “Ifeza zawe ziragapfana nawe, kuk’ugira ngw ingabire y’Imana woyironkesha amahera”.​—Ivyakozwe 8:18-20.

Intumwa Paulo yaragaragaje agatima nk’aka Petero. Paulo yari gushobora kubera umuzigo mu vy’amahera abavukanyi biwe bakirisu b’i Korinto. Ariko rero, yarakoresheje amaboko yiwe bwite kugira ngo yibesheho (Ivyakozwe 18:1-3). Ni co gituma yavuze adakeka yuko yari yarabwiye inkuru nziza Abanyakorinto “ku buntu”.​—1 Ab’i Korinto 4:12; 9:18.

Ikibabaje, abantu benshi bivugisha ko ari abayoboke ba Kirisitu ntibagaragaje umutima ukunze nk’uwo wo ‘gutanga ku buntu’. Kukaba nkako, benshi mu ndongozi z’amadini bo mu biyita abakirisu “bigishiriza ingero” (Mika 3:11). Indongozi zimwezimwe z’amadini mbere zarabaye abatunzi bivuye ku mahera atozwa mu mikuku yabo. Mu 1989, hari umuvugabutumwa umwe wo muri Leta Zunze Ubumwe za Amerika yaciriwe umunyororo w’imyaka 45. Bitewe n’iki? Yari amaze igihe “anyuruza amadolari amamiliyoni n’amamiliyoni yatangwa n’abanywanyi biwe maze agakoresha amwe muri ayo mahera mu kwigurira amazu, imiduga, mu gufata ingendo zo gutembera, eka mbere arayakoresha no mu gushira mu nzu y’imbwa icuma gitanga ubukanye”.​—Ikinyamakuru People’s Daily Graphic, co ku wa 7 Gitugutu 1989.

Muri Gana, nk’uko ikinyamakuru kimwe (Ghanaian Times) co ku wa 31 Ntwarante 1990 kibivuga, hari umupatiri w’umugatolika yafashe amahera yari yatojwe mu gihe c’imisa imwe maze ayaraririza mw’isengero yatojwemwo. Ico kinyamakuru kivuga yuko “imvo yatumye agira ivyo yari iy’uko, kubera ko bari abantu bakuze, vyari vyitezwe ko batanga inoti nininini”. Ntibitangaje kubona amashengero menshi agerageza mbere gutuma abanywanyi bayo bagira umwina, mu kuremesha yivuye inyuma ivyo gukina akamari hamwe n’iyindi migambi kugira ngo baronke amahera.

Ivyabona vya Yehova bobo bihatira kwigana Yezu be n’abigishwa biwe bo mu ntango. Muri bo, nta mugwi w’abakuru bahembwa uhari. Icabona wese ni umusuku yashinzwe ibanga ryo kubwira abandi “ubutumwa bgiza bg’ubgami” (Matayo 24:14). Abarenga imiliyoni zitandatu muri bo kw’isi yose baragira uruhara rero mu vyo gushira abantu “amazi y’ubu[zima]” ku buntu (Ivyahishuriwe 22:17). Muri ubwo buryo, n’‘abadafise amahera’ barashobora kwungukira ku butumwa bwo muri Bibiliya (Yesaya 55:1). Naho igikorwa barangurira kw’isi yose gishigikirwa n’intererano zitangwa n’abavyishakiye, ntibigera batoza amahera. Kubera ari abasuku b’ukuri b’Imana, “[nti]bacurūrīsha ijambo ry’Imana”, mugabo bavuga “nk’abatagira ubugunge, bavuga ibiva ku Mana”.​—2 Ab’i Korinto 2:17.

None ni kubera iki Ivyabona vya Yehova bafise umutima ukunze wo gufasha abandi, bakabigira bakoresheje amahera yabo bwite? Ni igiki kibasunika? Gutanga ku buntu vyoba bisobanura yuko babigira ata mpera baronka ku bw’utwigoro twabo?

Inyishu ku kibazo cavyuwe na Shetani

Abakirisu b’ukuri muri iki gihe ubwa mbere na mbere basunikwa n’icipfuzo co guhimbara Yehova, si ico kuba abatunzi. Ni co gituma bashoboye gutanga inyishu ku kibazo haciye ibinjana n’ibindi kivyuwe na Shetani wa Mucokoranyi. Ku vyerekeye umuntu w’umugororotsi yitwa Yobu, Shetani yahigishije Yehova akoresheje iki kibazo: “Mbeg’ugira ngo Yobu yubahira Imana ubusa?”. Shetani yashatse kuvuga yuko Yobu yasukurira Imana kubera gusa yari yaramukingiye. Shetani yahaririye avuga yuko nka hamwe Yobu yokwakwa ivyo atunze, yociye arogota ku Mana imbonankubone!​—Yobu 1:7-11.

Kugira ngo Imana yishure ico kibazo, yararetse Shetani aragerageza Yobu, mu kuvuga iti: “Ivy’afise vyose biri mu kuboko kwawe” (Yobu 1:12). Vyavuyemwo iki? Yobu yarerekanye ko Shetani ari umubeshi. Naho yashikiwe n’ivyago bimeze gute, Yobu yagumye ari intahemuka. Yavuze ati: “Kugeza aho nzopfira, sinzokwigera mva ku [kutadohoka] kwanje”!​—Yobu 27:5, 6.

Abasavyi b’ukuri muri iki gihe baragaragaza agatima nk’aka Yobu. Ntibasukurira Imana babitumwe n’amaronko.

Ingabirano Imana yatanze yerekeye ubuntu tutabereye

Iyindi mvo ituma abakirisu b’ukuri bagira umutima ukunze wo ‘gutanga ku buntu’, ni uko na bo nyene Imana ‘yabahaye ku buntu’. Umuryango w’abantu uri mu buja bw’icaha n’urupfu kubera icaha cakozwe n’umwe sokuru wacu Adamu (Abaroma 5:12). Yehova abigiranye urukundo, yaratunganije ivy’uko Umwana wiwe apfa urupfu rwo kwitangako inkuka, ico kikaba ari ikintu catwaye Imana vyinshi. Mu vy’ukuri umuryango w’abantu ntukwiriye ico kintu. Emwe, ni ingabirano iva ku Mana.​—Abaroma 4:4; 5:8; 6:23.

Ni co gituma Paulo yabwiye abakirisu basizwe, nk’uko vyanditswe mu Baroma 3:23, 24, ati: “Bose bākoze ivyaha, ntibashikīra ubgiza bg’Imana; batsindanishirizwa n’ubuntu bgayo, ibibahereye ubusa, kubgo gucungurwa kubonerwa muri Kristo Yesu”. Abafise icizigiro co kubaho ibihe bidahera kw’isi na bo nyene bararonka ‘ingabire y’ubuntu’. Iyo ngabire irimwo agateka ko kwitwa abagororotsi bwa bakunzi ba Yehova.​—Yakobo 2:23; Ivyahishuriwe 7:14.

Inkuka y’incungu ya Kirisitu ituma kandi bishoboka ko abakirisu bose baba abasuku b’Imana. Intumwa Paulo yanditse ati: “Nacitse umukozi [w’iryo banga ryeranda], nk’ukw ingabire y’ubuntu bg’Imana iri” (Abanyefeso 3:4-7). Kubera yuko basabwe kurangura ubwo busuku biciye ku ntunganyo batari bakwiriye canke baronse ata co barishe, abasuku b’ukuri b’Imana ntibashobora kwitega guhembwa mu buryo bw’umubiri kubera babwiye abandi ivyerekeye iyo ntunganyo.

Impera y’ubuzima budahera yoba ishingiye ku bwikunzi?

None ivyo vyoba bisobanura yuko Imana yitega ko abakirisu bayisukurira ata cizigiro na kimwe bafise co kuronka impera? Si ko biri, kubera yuko intumwa Paulo yabwiye abo basangiye ukwemera ati: “Imana ntigabitanya ngo yibagire ibikorwa vyanyu n’urukundo mwerekanye ko mukunze izina ryayo” (Abaheburayo 6:10; Gusubira mu vyagezwe 32:4). Ahubwo riho, Yehova “aha impēra aba[mu]rondera” (Abaheburayo 11:6). Mugabo none umuhango w’ubuzima budahera mw’Iparadizo ntiwoba ushingiye ku bwikunzi?​—Luka 23:43.

Ihibambewe. Kimwe coco ni uko icipfuzo co kubaho ibihe bidahera mw’Iparadizo ngaha kw’isi camuka ku Mana ubwayo. Ni yo yahaye ico cizigiro umugabo n’umugore ba mbere (Itanguriro 1:28; 2:15-17). Yaratumye kandi bishoboka ko ico cizigiro gisubira kubaho igihe Adamu na Eva bagitakariza abobakomotseko. Ni co gituma Imana isezerana mw’Ijambo ryayo yuko ‘ivyaremwe bizocungurwa ngo ntibibe ibija vyo kubora bihabwe ukwidegemvya, gufatana n’ubwiza bw’abana b’Imana’ (Abaroma 8:21). Birabereye rwose rero yuko abakirisu muri iki gihe, nka kumwe kwa Musa wo mu gihe ca kera, ‘batumbera ingero bazogererwa’ (Abaheburayo 11:26). Imana ntitanga iyo mpera bwa giturire. Iyitanga ibitumwe n’urukundo nyakuri ikunda abayisukurira (2 Ab’i Tesalonike 2:16, 17). Natwe “tugira urukundo, kukw ari yo yabanje kudukunda”.​—1 Yohana 4:19.

Imvo ibereye ituma dusukurira Imana

Naho ari ukwo, abakirisu bo muri iki gihe bategerezwa kwama basuzuma imvo zituma basukurira Imana. Muri Yohana 6:10-13, dusoma yuko Yezu yagaburiye ku gitangaro ishengero ry’abantu barenga ibihumbi bitanu. Ivyo vyatumye bamwebamwe batangura gukurikira Yezu babitumwe n’ubwikunzi gusa. Yezu yababwiye ati: “[M]undondera kuko . . . mwariye kuri ya mitsima, mugahāga” (Yohana 6:26). Haciye imyaka mirongo, abakirisu bamwebamwe biyeguye na bo nyene barasukuriye Imana ariko ‘bitavuye ku mvo nziza’ (Ab’i Filipi 1:17). Bamwebamwe ‘batemera amajambo mazima ya Yezu Kirisitu’ baranarondeye uburyo butandukanye bwo kwironkera inyungu bivuye ku kwifatanya n’abakirisu.​—1 Timoteyo 6:3-5.

Muri iki gihe, umukirisu asukurira Imana abitumwe gusa n’uko ashaka kuzobaho ibihe bidahera mw’Iparadizo, na we nyene ashobora kuba ariko akorana imvo iranga ubwikunzi. Impera n’imperuka, ivyo vyoshobora gutuma atemba mu buryo bw’impwemu. Kubera yuko urunkwekwe rw’ibintu rwa Shetani rusa n’urumaze igihe kirekire kuruta uko yari avyiteze, yoshobora ‘kurambirwa’, mu kubona yuko iherezo ryatevye (Ab’i Galatiya 6:9). Yoshobora mbere kwumva ababajwe n’ibintu vy’umubiri yahevye. Yezu atwibutsa ati: “Mukundishe Uhoraho Imana yanyu imitima yanyu yose n’ubugingo bganyu bgose n’ubgenge bganyu bgose” (Matayo 22:37). Vyemere, umuntu asukurira Imana abitumwe ubwa mbere na mbere n’urukundo ntashinga igihe ugusukurira Imana kwiwe kuzomara. Aba yiyemeje gusukurira Yehova ibihe bidahera (Mika 4:5)! Ntiyicuza ku vyerekeye ibintu ivyo ari vyo vyose yagize mu vyo gusukurira Imana (Abaheburayo 13:15, 16). Urukundo akunda Imana rumusunikira gushira ivy’Imana mu kibanza ca mbere mu buzima bwiwe.​—Matayo 6:33.

Muri iki gihe, abasavyi b’ukuri barenga imiliyoni zitandatu “b[ar]itanga babikunze” mu murimo wa Yehova (Zaburi 110:3). Woba uri umwe muri bo? Nimba utari umwe muri bo, nuzirikane rero kuri ibi bintu Imana itanga: ubumenyi butyoroye bwerekeye ukuri (Yohana 17:3); umwidegemvyo wo kuva mu buja bw’inyigisho z’ikinyoma zo mu madini (Yohana 8:32); icizigiro co kubaho ibihe bidahera (Ivyahishuriwe 21:3, 4). Ivyabona vya Yehova barashobora kugufasha kumenya ingene Imana ishobora kuguha ivyo vyose ata co urishe.

[Iciyumviro ku rup. 22]

Abakirisu b’ukuri muri iki gihe basunikwa ubwa mbere na mbere n’icipfuzo co guhimbara Yehova, si ico kuba abatunzi

[Ifoto ku rup. 21]

Ingabire y’ubuntu y’Imana yerekeye incungu ituma abakirisu bamamaza inkuru nziza ku buntu