‘Turagaburirwa amajambo y’ukwizera’

¹ Kubaho mu buryo buranga ukuyobokera Imana bisaba akigoro gakomeye (1 Tim. 4:7-10). Mu gihe twogerageza gukurikira iyo ngendo y’ubuzima dukoresheje inkomezi zacu bwite, ntitwoteba kuruha no gutsitara (Yes. 40:29-31). Uburyo bumwe turonkeramwo inkomezi ziva kuri Yehova ni mu ‘kugaburirwa amajambo y’ukwizera’.—1 Tim. 4:6.

² Imfungurwa zo mu vy’impwemu umukimba: Yehova abicishije kw’ijambo ryiwe no kuri wa “mushumba wo kwizigirwa w’ubgenge”, aratanga imfungurwa zo mu vy’impwemu umukimba (Mat. 24:45). Twoba turiko turangura uruhara rutwega kugira ngo tuzungukireko? Twoba dusoma Bibiliya ku musi ku musi? Twoba twarishiriyeho umwanya wo kwiyigisha no kuzirikana (Zab. 1:2, 3)? Izo mfungurwa nziza zo mu vy’impwemu ziraduha ingoga zikongera zikadukingira ngo isi ya Shetani ntitume tugoyagoya (1 Yoh. 5:19). Imizirikanyi yacu n’imitima yacu tuyujujemwo ibintu vyiza tukongera tukabishira mu ngiro mu buzima bwacu, Yehova azoba kumwe natwe.—Flp. 4:8, 9.

³ Yehova kandi aradukomeza biciye ku makoraniro y’ishengero (Heb. 10:24, 25). Kuri iyo mitororokano turaharonkera inyigisho yo mu vy’impwemu tukongera tukifatanya n’abandi mu buryo bwiza, ivyo bikaba bidukomeza kugira duhagarare dushikamye n’igihe twoba turi mu bigeragezo (1 Pet. 5:9, 10). Umukirisukazi umwe akiri muto yavuze ati: “Umusi wose ndawumara kw’ishure, kandi biranduhisha cane. Yamara, amakoraniro ambera nk’agace karimwo amazi ko mu bugaragwa, aho nduhukira kugira ngo nshobore kwihanganira umusi w’ishure ukurikira”. Ese ukuntu duhezagirwa kubera akigoro tugira ko kwitaba amakoraniro!

⁴ Ugutangaza ukuri: Kubwira abandi inkuru nziza vyari nk’imfungurwa kuri Yezu. Vyaramuha ingoga (Yoh. 4:32-34). Muri ubwo buryo nyene, igihe tubwiye abandi ivyerekeye imihango myiza igitangaza Imana yatanze, turumva tugaruriwe agatege. Kugira vyinshi dukora mu busuku bituma kandi tugumiza umutima wacu n’umuzirikanyi wacu ku Bwami no ku mihezagiro igiye kuza. Ivyo biraturuhura koko.—Mat. 11:28-30.

⁵ None si agateka ga yemwe kubona twungukira ku mfungurwa umukimba zo mu vy’impwemu Yehova ariko aronsa abasavyi biwe muri iki gihe! Nimuze tubandanye gushira amajwi hejuru tubigiranye umunezero ku bwo kumushemeza.—Yes. 65:13, 14.

Igice ca 5: Kurongora inyigisho za Bibiliya zitera imbere

Kuraba ivyo mwokwiga ingene vyoba bingana

¹ Igihe Yezu yaba ariko arigisha, yararimbura aho ubushobozi bw’abigishwa biwe bugarukira. Yababwira akurikije “urugero rw’ivyo bashobora kwumva” (Mrk. 4:33, UB; Yoh. 16:12). Muri ubwo buryo nyene, abigisha b’Ijambo ry’Imana muri iki gihe barakeneye kuraba ntibagende ningoga na ningoga canke buhorobuhoro birenze mu kuntu bahetura amayagwa igihe barongora inyigisho ya Bibiliya. Ivyo bokwiga ingene vyoba bingana vyovana n’ubushobozi bwa nyene kwigisha n’ubwa nyene kwiga hamwe n’ukuntu ivyabo vyifashe.

² Niwubake ukwizera gukomeye: Ivyo abatohoji bamwebamwe boshobora kwiga mu biringo bibiri canke bitatu, abandi boshobora kuvyigira rimwe ata ngorane. Ntitwoshima kwiga twihutagiza kandi umutohoji adatahura neza. Umutohoji wese arakeneye ishimikiro rikomeye ashingirako ukwizera gushasha aba aherutse kwubura mw’Ijambo ry’Imana.—Imig. 4:7; Rom. 12:2.

³ Uko urongora inyigisho ku ndwi ku ndwi, nufate umwanya wose ukenewe ufashe umutohoji gutahura no kwemera ivyo ariko ariga mw’Ijambo ry’Imana. Niwirinde ukwihutagiza kwotuma umutohoji atungukira ku gaciro k’ukuri ariko yigishwa. Nimufate umwanya uhagije wo gushimika ku vyiyumviro bikurubikuru no kurimbura ivyanditswe nyamukuru inyigisho zishingiyeko.—2 Tim. 3:16, 17.

⁴ Ntimuje mu bindi mu gihe c’inyigisho: Ni vyiza ko twirinda kwihutagiza mu gihe c’inyigisho, tukirinda no gukevya tukaja mu bindi. Niba umutohoji asa n’uwushaka kumara umwanya muremure avuga ibimwerekeye, hari aho twokenera kuraba ukuntu tubiyaga inyuma y’inyigisho.—Umus. 3:1.

⁵ Ku rundi ruhande, igishika twebwe ubwacu dufitiye ukuri coshobora gutuma kutavuga ibintu birenze urugero mu gihe c’inyigisho biba urugamba (Zab. 145:6, 7). Gucishamwo iciyumviro canke icabonywe kanaka birashobora kugira ico vyongereje ku cigwa, mugabo ntitwoshima ko biba vyinshi cane canke birebire cane ku buryo bibuza uwo mutohoji kuronka ubumenyi ntagakosa bwerekeye inyigisho za Bibiliya z’ishimikiro.

⁶ Mu gihe turimbuye amayagwa ari ku rugero igihe cose twiganye n’abatohoji ba Bibiliya, turabafasha ‘kugendera mu muco w’Uhoraho’.—Yes. 2:5.