Ibigereranirizo Bifatiye ku Bintu Bimenyerewe

BIRUMVIKANA ko bihambaye yuko ibigereranirizo ivyo ari vyo vyose ukoresha bihura n’amayagwa uriko urarimbura. Ariko rero, kugira ngo bibe kirumara kuruta, biranahambaye yuko biba bihuje n’abumviriza.

None wotora gute ibigereranirizo ukoresha mu nsiguro ushikiriza umugwi w’abantu ufatiye ku bakwumviriza abo ari bo? Mbega Yezu Kirisitu yagize iki? Yaba ariko arabwira abantu benshi canke abwira abigishwa biwe, Yezu uturorero twiwe ntiyadukura mu bintu biba mu buzima bwo mu ntara zo hakurya ya Isirayeli. Uturorero mwene utwo twobaye ari utw’ibintu abamwumviriza batazi. Nk’akarorero, Yezu ntiyigeze avuga uburyo bwo kubaho bw’i bwami muri Egiputa canke imigenzo y’ivy’idini yo mu Buhindi. Naho atakora gutyo, ibigereranirizo yakoresha vyari ibifatiye ku bikorwa abantu bari basanzwe bakora mu bihugu vyose. Yaravuze ivyo gutera ibiremo ku mpuzu, kugira urudandaza, gutakaza ikintu c’agaciro, be no gutaha ubukwe. Yaratahura ingene abantu bifata mu bihe binyuranye, maze afatira kuri ivyo. (Mrk. 2:21; Luka 14:7-11; 15:8, 9; 19:15-23) Kubera yuko yigisha canecane abwira abantu bo muri Isirayeli, ibigereranirizo vya Yezu kenshi vyavuga ibintu n’ibikorwa vyari mu bigize ubuzima bwabo bwa misi yose. Ni co catumye afatira nko ku burimyi, ku buryo intama zumvira umwungere, be no kw’ikoreshwa ry’insato z’ibikoko mu kubika urukanywa. (Mrk. 2:22; 4:2-9; Yoh. 10:1-5) Yaranerekeje ku turorero tuzwi two mu nkuru za kahise, nk’iremwa ry’umugabo n’umugore ba mbere, Umwuzure wo mu misi ya Nowa, isangangurwa rya Sodomu na Gomora, urupfu rwa muka Loti. (Mat. 10:15; 19:4-6; 24:37-39; Luka 17:32) None weho igihe uriko urobanura ibigereranirizo, woba urimbura witonze ibikorwa bimenyerewe n’abakwumviriza be n’imico kama babayemwo?

Bite hoho nk’igihe utariko ubwira abantu benshi, ukaba uriko ubwira umuntu umwe canke kumbure bakeya gusa? Niwihatire kurobanura ikigereranirizo kibereye canecane abo bantu bakeya. Igihe Yezu yashinga intahe ku Musamariyakazi hafi y’i Sukara, yaravuze ivy’“amazi y’ubu[zima],” ‘ukudasubira kugira inyota na mba,’ be n’“imbizi y’amazi yiburuka azana ubu[zima] budashira.” Ivyo vyose vyari imvugo ngereranyo zari zifitaniye isano rirashe n’ibikorwa nya mukenyezi yari asanzwe akora. (Yoh. 4:7-15) N’igihe yavugisha abagabo bariko baroza urusenga rwo kuroba, imvugo ngereranyo yahisemwo yarimwo umurimo wo kuroba. (Luka 5:2-11) Muri ivyo bihe vyose, yari gushobora kuvuga ivy’uburimyi, narirya baba mu karere karangwa n’uburimyi, mugabo ibaze ukuntu vyarushirije kuba kirumara kwerekeza ku bikorwa bakora ubwabo uravye ingene yabashize mu bwenge ishusho yavyo! Woba wihatira kugira ivyo?

Naho Yezu yerekeje ivyiyumviro ku “ntama zazimiye z’inzu ya Isirayeli,” intumwa Paulo ntiyari yatumwe gusa kuri Isirayeli mugabo yari yatumwe no ku bihugu vy’Abanyamahanga. (Mat. 15:24; Ivyak. 9:15) Ivyo vyoba vyaratumye Paulo agira ico ahindura mu buryo yigisha? Egome. Igihe yandikira Abakirisu b’i Korinto, yarerekeje ku masiganwa y’amaguru, aravuga umugenzo wo kurira ibifungurwa mu ngoro z’ibigirwamana, aranerekeza ku bagira ingendo z’intsinzi, ivyo bikaba vyari ibintu abo Banyamahanga bobaye bamenyereye.—1 Kor. 8:1-10; 9:24, 25; 2 Kor. 2:14-16.

Woba uraba neza nk’uko Yezu na Paulo babigira mu kurobanura ibigereranirizo be n’uturorero kugira ngo ubikoreshe mu gihe wigisha? Woba urimbura ivyo abakwumviriza babayemwo be n’ivyo bakora mu buzima bwabo bwa misi yose? Birumvikana, ubu hariho ibintu vyahindutse mw’isi kuva mu kinjana ca mbere. Abantu benshi barashobora kuronka amakuru yo mw’isi biciye kuri televiziyo. Usanga kenshi bazi uko ibintu vyifashe mu bihugu vyo hanze. Nimba ivyo ariko bimeze aho ubaye, ntivyoba bibi ukoresheje ibintu vyo mu makuru bwa bigereranirizo. Ariko rero, ibintu bikora abantu ku mutima cane kenshi usanga ari ibivuga ubuzima bwabo bwite, ivy’i muhira iwabo, umuryango wabo, akazi bakora, imfungurwa bihereza, ukuntu ikirere cifashe iwabo.

Nimba ikigereranirizo cawe gisaba insobanuro nyinshi, wohava usanga uriko uvuga ikintu abakwumviriza batamenyereye. Mwene ico kigereranirizo kirashobora gutakaza bitagoranye iciyumviro kiri mu nyigisho. Ingaruka yoba iy’uko abakwumviriza bohava bibuka ikigereranirizo watanze mugabo ntibibuke ukuri kwo mu Vyanditswe wariko wihatira gushikiriza.

Ha gutanga ibigereranirizo bihinguye, Yezu yarakoresheje ibintu bisanzwe kandi vya misi yose. Yarakoresheje ibintu bitobito mu gusigura ibintu bininibinini, arakoresha ibintu vyoroshe mu gushira ahabona ibintu bigoye itahura. Mu gushira isano hagati y’ibintu vyama bishika ku musi ku musi n’ukuri kwo mu vy’impwemu, Yezu yarafasha abantu kurushiriza gutahura ukuri kwo mu vy’impwemu yaba ariko yigisha, no kukwibuka. Ese ingene ari akarorero keza twokurikiza!