HARI ku wa 14 Ndamukiza 1989. Nariko ndayobora amakoraniro mu gisagara ca Maumere, mw’izinga rya Flores. Abategetsi barinjiye mu nzu twarimwo baca baramfata twe n’abandi batatu.

Abarinzi b’ibohero ryo muri ako karere baragerageje kuduhata ngo turamutse ibendera ariko turanka. Baciye badukubita inkoni n’imigere bongera batumaza imisi itanu duhagaze ku zuba rimena imbwa agahanga. Twarara turajugumira turyamye kw’isima mu gasho gatoyi kuzuyemwo umucafu, utuguvu twose twaheze, ibikomere vyacu na vyo bikaguma bidusasata. Umukuru w’ibohero yama agerageza kutujijura ngo duhemuke, ariko tukamwishura duti: “Twopfuma dupfa hako turamutsa ibendera.” Cokimwe n’abakirisu benshi batwitangiye imbere, twabona ko ari agateka ‘kubabara duhorwa ubugororotsi.’​—1 Pet. 3:14.

KU WA 19 Nzero 1999, urwanko rwari hagati y’abakirisu n’abisilamu rwatumye batana mu mitwe nko ku bilometero bitatu uvuye aho naba. Ibintu vyahavuye bikomera.a

Maze guhungisha umuryango wanje, naciye nterefona abandi bamamaji kugira numve uko bamerewe. Nabasavye kuguma batekanye no kwirinda ahantu hateye akaga. Mu nyuma abakurambere baragendeye abavukanyi kugira babakomeze bongere babaremeshe kugira amakoraniro mu migwi mitomito.

Ibiro vy’ishami vyaradusavye guhimiriza abamamaji bose baba mu turere duteye akaga ngo baveyo. Ubwo buyobozi twaciye tubumenyesha imiryango itari mike. Umuvukanyi umwe yanse kuvayo yahavuye yicwa n’akagwi kitwaje ibirwanisho. Ariko abantu bose bagamburutse ubuyobozi bw’ibiro vy’ishami bararokotse.