Nugume wiyegereza Yehova

1, 2. (a) “Imigabo” ya Shetani ni iyihe? (b) Ni igiki kizodufasha kwiyegereza Imana?

YEHOVA IMANA yaremanye abantu icipfuzo co kumwiyegereza. Yamara, Shetani ashaka ko twiyumvira yuko tudakeneye Yehova, nk’uko na we avyiyumvira. Ico ni ikinyoma Shetani yaremesheje kuva igihe yagihendesha Eva mu murima wa Edeni. (Ita. 3:4-6) Kuva kera na rindi, abantu benshi bagiye barakora iryo kosa.

² Igishimishije, si ngombwa ngo tugwe mu mutego wa Shetani. “[Ntitu]yobewe imigabo yiwe.” (2 Kor. 2:11) Shetani aragerageza kudutandukanya na Yehova mu gutuma duhitamwo nabi. Mugabo nk’uko ikiganiro giheruka cavyerekanye, turashobora guhitamwo neza mu bijanye n’akazi, ukwisamaza no mu bijanye n’umuryango. Iki kiganiro kirerekana ukuntu kugumiza mu kibanza kibereye ibijanye n’ubuhinga, amagara, amahera be n’ubwishime, bishobora kudufasha ‘kwiyegereza Imana.’—Yak. 4:8.

UBUHINGA

3. Erekana ukuntu ubuhinga bushobora gukoreshwa neza canke nabi.

³ Hirya no hino kw’isi, ivyuma vyo mu buhinga bwa none bigezweho usanga vyiraye. Bikoreshejwe neza, birashobora kuba ibikoresho ngirakamaro. Bikoreshejwe nabi na ho vyoshobora kudutandukanya na Data wa twese wo mw’ijuru. Rimbura ibijanye na orodinateri. Iki kinyamakuru uriko urasoma canditswe congera gisohorwa hakoreshejwe orodinateri. Orodinateri irashobora kuba igikoresho ngirakamaro co kugira ubushakashatsi no guhanahana amakuru, kandi rimwe na rimwe irashobora kuba isôko ry’ukwisamaza kuruhura. Ariko rero, turashobora kandi gucika abaja b’ubuhinga bwa orodinateri. Abadandaza barajijura abantu ku ruyeri yuko bategerezwa gutunga ivyuma bigezweho. Umusore umwe yaripfuje cane orodinateri ngendanwa kanaka igezweho gushika n’aho agurisha mu mpisho rimwe mu mafyigo yiwe kugira ngo ayigure. Mbega ukutabona kure!

4. Umukirisu umwe yatoreye umuti gute ingorane yari afise yo gukoresha orodinateri mu buryo burenze urugero?

⁴ Kwemera guheba ubucuti ufitaniye na Yehova biciye ku gukoresha nabi ubuhinga canke ku kubukoresha mu buryo burenze urugero, birateye agahinda mbere kuruta. Jon,a akaba ari umukirisu ari mu gushikana imyaka 30 avuga ati: “Ndazi yuko Bibiliya ivuga ko dukwiye ‘kwicungurira umwanya ubereye’ wo kwitwararika ivy’impwemu. Mugabo ku bijanye na orodinateri, ndigirira nabi cane.” Jon akenshi bwahakwa kumukerako ari kuri Internet. Yigana ati: “Uko narushiriza kuruha, ni ko vyarushiriza kungora kureka kurungikiranira ubutumwa canke kuraba utuvidewo tugufitugufi, kandi tuno ntitwama tubereye.” Kugira ngo Jon ashobore guheba ako kamenyero kabi, yaratunganije orodinateri yiwe ku buryo ica yizimya hageze ko aja kuryama.—Soma Abanyefeso 5:15, 16.

5, 6. (a) Ni amabanga ayahe abavyeyi bajejwe ku bana babo? (b) Abavyeyi bashobora gute kwiyemeza neza ko abana babo bifatanya n’abantu beza?

⁵ Bavyeyi, naho bidakenewe ko mucungera akantu kose abana banyu bakora, murakwiye kuza murasuzuma ukuntu bakoresha orodinateri. Ntimureke ngo barabe ubuhumbu kuri Internet, bakine udukino tw’ubukazi, barabe ivy’ubupfumu canke ngo bifatanye n’abantu babi kugira gusa bagume bafise ivyo bakora kandi ntibabagore. Mubaretse, boshobora kwiyumvira bati: ‘Ko dawe na mawe batabitubuza, bitegerezwa kuba ari vyiza.’ Kubera ko muri abavyeyi, muri n’igikorwa co gukingira abana banyu, harimwo n’abana b’imiyabaga, ikintu cose coshobora kubatandukanya na Yehova. Mbere n’ibikoko birakingira ivyana vyavyo. Iyumvire ico idubu y’ingore yokora hagize umuntu arondera kugirira nabi ivyana vyayo.—Gereranya na Hoseya 13:8.

⁶ Nimufashe abana banyu gutunganya ivyo kwifatanya mu buryo bubereye n’abandi bakirisu b’intangakarorero, abato n’abakuze. Muribuka kandi yuko abana banyu bakeneye ko mumarana umwanya na bo. Ku bw’ivyo, nimurondere umwanya wo gutwenga, gukina, gukora no ‘kwiyegereza Imana’ muri kumwe.b

AMAGARA

7. Ni kubera iki twese twipfuza kuguma dufise amagara meza?

⁷ “Umerewe gute?” Iyo mvugo ikunda gukoreshwa, irerekana ikintu kibabaje kibaho. Kubera ko abavyeyi bacu ba mbere baretse Shetani akabatandukanya na Yehova, twese turarwara. Indwara irakamira mu coze Shetani, kuko iyo turwaye, bitatworohera gukorera Yehova. Kandi iyo dupfuye, ntidushobora kumukorera na gato. (Zab. 115:17) Ni ibisanzwe rero ko twipfuza gukora uko dushoboye kwose kugira ngo tugume dufise amagara meza.c Vyongeye, turakwiye kurazwa ishinga n’amagara y’abavukanyi bacu be n’ineza yabo.

8, 9. (a) Dushobora gute kwirinda kurenza urugero mu bijanye n’amagara? (b) Ni ivyiza ibihe biva ku kugira akanyamuneza?

⁸ Ariko rero, birahambaye ko twirinda kurenza urugero. Hari abahayagiza babigiranye umwete ibifungurwa binaka, uburyo bwo kwivuza bunaka canke imiti minaka, mbere bakabigiramwo umwete kuruta kwamamaza inkuru nziza y’Ubwami bw’Imana. Boshobora kwiyumvira ata buryarya ko bariko barafasha abandi. Naho ari ukwo, ntibibereye guhayagiza imiti canke ibintu vyo kwisiga be n’ibindi bintu imbere canke inyuma y’amakoraniro ku Ngoro y’Ubwami canke ku materaniro kibure ku mahwaniro. Uti kubera iki?

⁹ Dukoranira hamwe kugira ngo tuganire ibintu vy’impwemu twongere turushirize kugira akanyamuneza, kano kakaba kava ku mpwemu nyeranda y’Imana. (Gal. 5:22) Kuri ivyo biringo, gutanga impanuro ku bijanye n’amagara canke ibindi bintu, baba babidusavye canke batabidusavye, birashobora gutuma dutakaza intumbero yacu yo mu vy’impwemu bikongera bigatuma abandi batakaza akanyamuneza. (Rom. 14:17) Umuntu ni we ategerezwa kwihitiramwo ukuntu yitwararika amagara yiwe. Vyongeye, nta n’umwe ashobora gutorera umuti indwara zose. Mbere n’abaganga karuhariwe barasaza, bakarwara, amaherezo bagapfa. Kandi guhagarikwa umutima birenze urugero n’amagara yacu, ntibishobora gutuma turamba. (Luka 12:25) Igihushanye n’ivyo, “umutima unezerewe ugira neza nk’umuti uvūra.”—Imig. 17:22.

10. (a) Ni kamere izihe Yehova abona ko ari nziza? (b) Dushobora gute kugira amagara meza ashoboka?

¹⁰ Muri ubwo buryo nyene, birabereye ko turazwa ishinga n’ukuntu dusa. Mugabo ntidukwiye kwita ku rutare turondera gukuraho ibintu vyose vyerekana ubusaza. Ivyo bintu birashobora kuba ikimenyamenya c’ubuhumure, icubahiro be n’ubwiza bwo mu mutima. Nk’akarorero, Bibiliya ivuga iti: “Imvi ku mutwe ni urugori rw’ubwiza iyo ruboneka mu nzira y’ubugororotsi.” (Imig. 16:31) Ukwo ni ko Yehova atubona, kandi turakwiye kugerageza kwibona muri ubwo buryo. (Soma 1 Petero 3:3, 4.) Vyoba none biranga ubukerebutsi kwemera kubagwa canke kuvurwa bidakenewe kandi mu buryo bwoshobora kuduteza ingorane turondera gusa kurushiriza gusa neza? “Akanyamuneza ka Yehova” ni ryo sôko ry’ubwiza nyakuri buzanana imbere mu muntu, naho yoba angana gute canke afise amagara ameze gute. (Neh. 8:10) Mw’isi nshasha ni ho gusa tuzogira amagara atagira agahaze twongere dusubire kugira ubwiza bwo mu buto. (Yobu 33:25; Yes. 33:24) Imbere y’uko ico gihe kigera, kugaragaza ubukerebutsi ngirakamaro n’ukwizera bizodufasha kuguma twiyegereje Yehova magingo twungukira uko bishoboka kwose ku kuntu ivyacu vyifashe muri iki gihe.—1 Tim. 4:8.

AMAHERA

11. Amahera ashobora gute kuba umutego?

¹¹ Amahera si mabi, eka kandi si bibi kugira urucuruza rutarimwo ubugunge. (Umus. 7:12; Luka 19:12, 13) Ariko rero, gutsimbataza “urukundo rw’amahera” ntibizobura kudutandukanya na Yehova. (1 Tim. 6:9, 10) “Amaganya y’ivy’iki gihe,” ni ukuvuga kurazwa ishinga birenze urugero n’ukwironsa ivyo dukeneye mu buzima, arashobora kutunyoha mu vy’impwemu. Ukwo nyene ni ko biri ku “bubasha buhendana bw’ubutunzi,” ni ukuvuga ukwiyumvira twihenda yuko ubutunzi buzana agahimbare n’ugutekanirwa biramba. (Mat. 13:22) Yezu yarerekanye neza yuko ‘ata’ woshobora gushumbira Imana n’ubutunzi.—Mat. 6:24.

12. Ni imitego ijanye n’amahera iyihe yiraye muri iki gihe, kandi twoyirinda gute?

¹² Kubona amahera mu buryo butabereye birashobora gutuma umuntu akora ibintu bitabereye. (Imig. 28:20) Ivyiyumviro vyo kuronka amahera ningoga na ningoga bitagoranye vyarakwegakweze bamwebamwe baragura udutike twa tombora canke baraja muri bimwe vyo gutanga amahera makeyi hanyuma ukaronka inyungu nini mu gukoka abanywanyi, abo uzanye na bo bagakoka abandi, gutyogutyo, mbere bavyinjizamwo n’abagize ishengero. Abandi barahenzwe mu kwemererwa ko baramutse batanze umutahe mutoyi ngo boca bunguka umurengera. Ntureke ngo umwina utume uhendwa ubona. Nukoreshe ubwenge. Igihe wemerewe ikintu gisa n’ikidashoboka, birashoboka rwose ko kiba atari co.

13. Ukuntu Yehova abona amahera gutandukanye gute n’ukuntu isi iyabona?

¹³ Igihe dushize imbere “ubwami n’ubugororotsi” bwa Yehova, arahezagira utwigoro turi ku burimbane tugira kugira ngo twironse ivyo dukenera mu buzima. (Mat. 6:33; Ef. 4:28) Ntiyipfuza ko twisinzirirako mu makoraniro bitumwe n’uko twakoze birenze urugero canke ko twicara mu Ngoro y’Ubwami twiyumvira ibijanye n’amahera. Yamara, benshi muri iyi si babona yuko bihebeye ivyo kurondera amahera ari ho gusa bashobora kuzogira kazoza keza no kwidibamira mu busaza. Akenshi usanga bahimiriza abana babo gukurikirana imigambi y’ivy’umubiri nk’iyo nyene. Yezu yerekanye ko ivyiyumviro nk’ivyo biranga ubujuju. (Soma Luka 12:15-21.) Ivyo vyoshobora kutwibutsa Gehazi, uwiyumviriye ko yari gushobora guhaza umwina wiwe kandi akaguma afise impagararo nziza imbere ya Yehova.—2 Abm. 5:20-27.

14, 15. Ni kubera iki tudakwiye kuronderera ugutekanirwa mu bijanye n’amahera? Tanga akarorero.

¹⁴ Barayamaze bati: “Amaronko menshi aziba amatwi.” Ikintu nk’ico coba coshobora gushikira umukirisu? Umukurambere umwe yitwa Alex asigura ati: “Nsanzwe ndi umuntu adasesagura. Igihe nsutse bene ya sabuni y’amazi bogesha imishatsi hakaza nyinshi, nca nsubiza mw’icupa nkeyi.” Naho ari ukwo, Alex yaragiye mu vy’urudandaza rw’isoko ry’imitahe, yiyumvira yuko atotevye guheba akazi kiwe maze akaja mu murimo w’ubutsimvyi. Yararushirije gucokera mu vyo gutohoza amasoko y’imitahe atandukanye be n’amaraporo bijana. Akoresheje amahera yari yaraziganije be n’ayo yaguranye, yaraguze amasoko y’imitahe abihweza utuntu n’utundi bavuga ko atotevye kurushiriza kugira agaciro. Aho kumera gutyo, agaciro kayo karakorotse bimwe bikomeye. Alex yigana ati: “Nari niyemeje kugarura amahera yanje. Nabona ko ndamutse numiyeko, iyo mitahe yogarukanye agaciro.”

¹⁵ Alex yamaze amezi ata kindi kintu yiyumvira. Vyaramugora gushira umutima ku vy’impwemu, kandi ntiyari agitora agatiro. Mugabo iyo mitahe ntiyigeze isubirana agaciro kayo. Alex yarahomvye maze biba ngombwa ko agurisha inzu yiwe. Yiyemerera ati: “Naratuntuje rwose umuryango wanje.” Mugabo yarahakuye icigwa gihambaye. Avuga ati: “Ubu ndazi ko uwo wese yizigira isi ya Shetani azovunika umutima cane.” (Imig. 11:28) Mu vy’ukuri, gushingira icizigiro cacu ku mahera dufise, ku mitahe twashinze canke ku bubangukirwe dufise bwo kurondera amahera muri iyi si, nta ho bitaniye no gushingira icizigiro cacu ku “mana y’iki gihe,” ari yo Shetani. (2 Kor. 4:4; 1 Tim. 6:17) Kuva ico gihe, Alex yaroroheje ubuzima bwiwe “ku bw’inkuru nziza.” Avuga yuko kubigenza gutyo vyatumye we n’umuryango wiwe barushiriza kugira agahimbare no kwiyegereza Yehova.—Soma Mariko 10:29, 30.

UBWISHIME

16. Ubwishime bubereye butandukaniye he n’ubwishime butabereye?

¹⁶ Kwishimira ibintu bibereye birashobora kuba vyiza. Nk’akarorero, dukwiye kwama twishimira kuba turi Ivyabona vya Yehova. (Yer. 9:24) Kwiyubahiriza ku rugero runaka biradufasha gufata ingingo zibereye no kwirinda gutitura ingingo mfatirwako zacu zigenga inyifato runtu. Mugabo kubona ko ivyiyumviro vyacu canke ikibanza turimwo bihambaye cane birashobora kudutandukanya na Yehova.—Zab. 138:6; Rom. 12:3.

17, 18. (a) Vuga uburorero bwo muri Bibiliya bw’abantu bicisha bugufi be n’ubw’abanyabwishime. (b) Umuvukanyi umwe yirinze gute kureka ngo ubwishime bumutandukanye na Yehova?

¹⁷ Bibiliya irimwo uburorero bw’abantu b’abanyabwishime hamwe n’ubw’abantu bicisha bugufi. Umwami Dawidi yarahanze amaso Yehova yicishije bugufi kugira ngo amuhe ubuyobozi, kandi Yehova yaramuhezagiye. (Zab. 131:1-3) Mugabo Yehova yaracishije bugufi abami b’abanyabwishime ari bo Nebukadinezari na Belushazari. (Dan. 4:30-37; 5:22-30) No muri iki gihe nyene, harashika ibintu bigerageza ukwicisha bugufi kwacu. Uwitwa Ryan, akaba yari umukozi w’ishengero w’imyaka 32, yarimukiye mu rindi shengero. Yigana ati: “Nari niteze ko ntotevye kuratwa ngo mbe umukurambere, mugabo umwaka warakunkumutse bitabaye.” Ryan yoba yari gushavura canke gushangashirwa, yiyumvira ko abakurambere batamugaragarije icubahiro akwiriye? Yoba yari guhagarika kwitaba amakoraniro, akareka ubwishime bukamutandukanya na Yehova be n’abasavyi biwe? Wewe wari gukora iki?

¹⁸ Ryan avuga ati: “Narasomye ibintu vyose nashoboye kuronka mu bisohokayandikiro vyacu bivuga ibijanye n’igihe ivyitezwe bisubijwe inyuma. (Imig. 13:12) Naratanguye gutahura yuko nari nkeneye kwiga kwihangana no kwicisha bugufi. Nari nkeneye kureka Yehova akamenyereza.” Ryan yararetse kwitwararika ivyiwe maze yitwararika ivyo gusukurira abandi mw’ishengero no mu ndimiro. Bidatevye, yari asigaye arongora inyigisho za Bibiliya zitari nke zitera imbere. Avuga ati: “Igihe nagenwa ngo mbe umukurambere haciye umwaka umwe n’igice, sinari ndavyiteze. Nari nararetse kubishirako umutima kubera ko naryoherwa cane n’ubusuku bwanje.”​—Soma Zaburi 37:3, 4.

NUGUME WIYEGEREJE YEHOVA!

19, 20. (a) Dushobora gute kwiyemeza neza ko ata kintu na kimwe mu vyo dukora buri musi kidutandukanya na Yehova? (b) Ni uburorero ubuhe twokwigana bw’abantu bagumye biyegereje Yehova?

¹⁹ Ibintu vyose bivugwa muri iki kiganiro no mu giheruka birafise ikibanza kibereye mu buzima bwacu. Turishimira kuba turi abasavyi ba Yehova. Kugira umuryango uhimbawe be n’amagara meza ni zimwe mu ngabirano zihambaye kuruta izindi Yehova atanga. Turatahura ko akazi k’umubiri be n’amahera bishobora kudufasha kwironsa ivyo dukenera. Turazi ko ukwisamaza gushobora kuturuhurira be n’uko ubuhinga bwa none bushobora kutugirira akamaro. Mugabo gukurikirana ico ari co cose muri ivyo mu gihe kitabereye, mu buryo burenze urugero canke mu buryo bubangamira ugusenga kwacu, vyoshobora kudutandukanya na Yehova.

²⁰ Ego ni ko, ivyo ni vyo Shetani yipfuza ko bishika. Ariko rero, urashobora kubuza ko ivyo vyago bigushikira wewe n’umuryango wawe! (Imig. 22:3) Niwiyegereze Yehova kandi ugume umwiyegereje. Turafise uburorero bwinshi bwo muri Bibiliya butwigisha ico kintu. Henoki na Nowa “[ba]gendana n’Imana y’ukuri.” (Ita. 5:22; 6:9) Musa “yagumye ashikamye nk’aho abona Umwe ataboneka.” (Heb. 11:27) Yezu yaguma ashigikirwa n’Imana kubera ko yama nantaryo akora ivyahimbara uwo Se wiwe wo mw’ijuru. (Yoh. 8:29) Niwigane uburorero nk’ubwo. ‘Niwame unezerwa. Usenge ubudahengeshanya. Ukenguruke muri vyose.’ (1 Tes. 5:16-18) Kandi ntureke ngo hagire ikintu na kimwe kigutandukanya na Yehova.