Amarabiro yo mu gatabu k’ikoraniro ry’Ubuzima bwacu n’igikorwa cacu
6-12 RUSAMA
UBUTUNZI BWO MW’IJAMBO RY’IMANA | 2 ABAKORINTO 4-6
“Ntiduheba”
Turaruha mugabo ntitudendebukirwa
16 Birumvikana ko kubungabunga amagara yacu yo mu vy’impwemu bihambaye rwose. Igihe dufitaniye ubucuti bwa somambike na Yehova Imana, vyoshika tukaruha ku mubiri, mugabo ntituzokwigera turambirwa mu vy’ukumusenga. Yehova ni we “aha inkomezi abadendebukiwe, kand’ūtagira intege a[ka]mwongeremw’inkomezi” (Yesaya 40:28, 29). Intumwa Paulo, uwiboneye ingene ayo majambo ari ay’ukuri, yanditse ati: “N[titw]ihebura; ariko, nah’umuntu wacu wo ku rukoba arikw arabora, umuntu wacu w’imbere yama ahinduka musha uko bukeye”.—2 Ab’i Korinto 4:16.
17 Raba iyo mvugo ngo “uko bukeye”. Ivyo bishaka kuvuga ko dukwiye kwungukira ku musi ku musi ku vyo Yehova aturonsa. Hari umumisiyonari amaze imyaka 43 asukura ari umwizerwa yagiye araruha rimwe na rimwe ku mubiri akongera agacika intege. Ariko ntiyarambiwe. Avuga ati: “Naragize akamenyero ko kuvyuka hakiri kare kugira ngo, imbere y’uko ntangura igikorwa ico ari co cose, nshobore gufata umwanya wo gusenga Yehova no gusoma Ijambo ryiwe. Ico kintu nama ngira ku musi ku musi caramfashije kwihangana gushika ubu”. Turashobora kwiheka ku bubasha bwa Yehova butuzigama mu gihe tumusenga tukongera tukazirikana kuri kamere ziwe ziri hejuru be n’imihango yiwe tudahorereza, emwe tukabigira “uko bukeye”.
it-1 759
Ukwihangana
Birahambaye kandi ko tutibagira icizigiro cacu co kuzobaho ibihe bidahera turi abantu batunganye. Mbere naho abaduhama bodukangisha urupfu, ntidutakaza ico cizigiro. (Rm 5:4, 5; 1Ts 1:3; Ivy 2:10) Imibabaro idushikira muri iki gihe, nta co izoba ikivuze tuyigereranije n’ivyiza tuzoronka ico cizigiro ciza igitangaza nicaranguka. (Rm 8:18-25) Ku muntu aguma ahanze amaso ubuzima budahera, imibabaro yose yomushikira, mbere naho yoba ikomeye gute ni iy’‘akanya gato kandi irahwahutse.’ (2Kr 4:16-18) Igihe umukirisu yibuka ko ingorane zimushikira ari iz’igihe gito kandi ntatakaze icizigiro, biratuma atihebura canke ngo ahemukire Yehova Imana.
Ducukure ubutunzi bwo muri Bibiliya
‘Muzotume Yehova anezerwa’
David Splane wo mu Nama Nyobozi yaraciye irya n’ino uwo mutwe-shimikiro wari ushingiye ku canditswe ca 2 Abakorinto 4:7. Iryo tunga ni irihe? Bwoba ari ubumenyi canke ubukerebutsi? Yishuye ati: “Oya. Itunga intumwa Paulo yariko aravuga ni ‘ubu busuku’ bwo ‘gushira ahabona ukuri.’” (2 Abakorinto 4:1, 2, 5) Umuvukanyi Splane yaribukije abanyeshure yuko amezi atanu bari bamaze biga yari ayo kubategura ngo barangure igikorwa kidasanzwe mu busuku. Ico gikorwa ni ico guha agaciro kanini.
Yarasiguye yuko “ivyombo vy’ivu” ari imibiri yacu y’inyama. Yarerekanye ubudasa buri hagati y’icombo c’ivu n’icombo c’inzahabu. Ivyombo vy’inzahabu ntibikoreshwa cane. Ariko ivyombo vy’ivu bigenewe gukoreshwa. Dushize itunga mu combo c’inzahabu, twohava dushira ivyiyumviro ku combo ubwaco no kw’itunga riri muri co. Umuvukanyi Splane yavuze ati: “Mwebwe banyeshure ntimushima kwikwegerako ivyiyumviro. Igihe muzoba muriko murangura igikorwa c’ubumisiyonari, muze mwerekeze abantu kuri Yehova. Muri ivyombo vy’ivu biciye bugufi.”
Tugume turushiriza kugaragaza urukundo rwa kivukanyi
7 Twovuga iki ku bitwerekeye? Dushobora gute ‘kwaguka’ mu bijanye no kugaragaza urukundo rwa kivukanyi? Mu bisanzwe, abantu bo mu runganwe rumwe canke abantu bakomoka ahantu hamwe baroroherwa no kugaragarizanya urukundo rwa kivukanyi. Vyongeye, abantu bakunda ibintu bimwe mu bijanye n’ukwisamaza usanga bamara umwanya munini bari kumwe. Ariko, niba ivyo duhurizako n’abakirisu bamwebamwe bidutandukanya n’abandi, turakwiye ‘kwaguka.’ Vyoba biranga ubukerebutsi umwe wese muri twebwe yibajije ati: ‘Noba nsanga ari gake ngira uruhara mu busuku canke mu yindi mirimo yo kwiruhura ndi kumwe n’abavukanyi be n’abavukanyikazi tudashikirana cane? Ku Ngoro y’Ubwami, noba ntayagisha cane abashasha kubera yuko niyumvira ko hataragera kugiranira na bo ubugenzi? Noba ndamutsa abakuze n’abakiri bato bo mw’ishengero?’
13-19 RUSAMA
UBUTUNZI BWO MW’IJAMBO RY’IMANA | 2 ABAKORINTO 7-10
“Igikorwa cacu co gutabara”
w98 1/11 25 ing. 1
“Imana ikunda uwutangana akamwemwe”
Ubwa mbere, Paulo yariganiye Abakorinto ibijanye n’Abanyamakedoniya, abatanze akarorero keza mu bijanye no gutabara. Paulo yabandikiye ati: “Mu gihe c’ikigeragezo gikomeye bari mu marushwa, akanyamuneza kabo kenshi be n’ubworo bwabo bwinshi vyatumye ubutunzi bw’ubutanzi bwabo bwa cane bugwira.” Abanyamakedoniya ntibarinze guhimirizwa. Ahubwo Paulo yavuze ati: “Baguma batwinginga bashimitse rwose bibiviriyeko ngo baterwe agateka ko gutanga n’umutima ukunze.” Birakora ku mutima cane iyo tuzirikanye ingene Abanyamakedoniya batanze babikunze kandi bari mu “bworo . . . bwinshi.”—2 Abakorinto 8:2-4.
Ubusuku bwo gutabara
NI NKO mu 46 Inyuma ya Kristu; Yudaya yugarijwe n’ikigoyi kitagira izina. Abigishwa ba Kristu b’Abayuda bo ng’aho ntibafise amahera yo kugura ibifungurwa vyaduze ibiciro bimwe vy’agacamutwe kubera ko bisigaye ari nk’umuzi w’ibuye. Barashonje, inzara igira ibakureho. Ariko Yehova agira abakingire mu buryo ata bandi bigishwa ba Kristu barigera bakingirwa. Hagira habe iki?
Ubusuku bwo gutabara
4 Mw’ikete rya kabiri Paulo yandikiye Abakorinto, yarasiguye ko abakirisu bafise ubusuku bugizwe n’imice ibiri. Naho iryo kete Paulo yaryandikiye abakirisu barobanuwe, ivyo yanditse biraraba n’ “izindi ntama” za Kristu muri iki gihe. (Yoh. 10:16) Umuce umwe w’ubusuku bwacu ni “ubusuku bw’ugusubiza hamwe,” ni ukuvuga igikorwa cacu co kwamamaza no kwigisha. (2 Kor. 5:18-20; 1 Tim. 2:3-6) Uwundi muce ni ubusuku turangurira abo dusangiye ukwizera. Imvugo Paulo yakoresheje mu 2 Abakorinto 8:4 ngo “ubusuku” ishobora kandi guhindurwa ngo “ubusuku bwo gutabara.” Mu mvugo ngo “ubusuku bw’ugusubiza hamwe” no mu mvugo ngo “ubusuku bwo gutabara,” ijambo “ubusuku” ryahinduwe rikuwe mw’ijambo ry’ikigiriki di·a·ko·niʹa. Kubera iki ivyo biri n’ico bivuze?
5 Mu gukoresha ijambo rimwe kuri ivyo bikorwa vyompi, Paulo yashize igikorwa co gutabara hamwe n’ubundi bwoko bw’ubusuku bwarangurirwa mw’ishengero rya gikirisu. Imbere y’aho, yari yaravuze ati: “Hari . . . ubusuku butandukanye, yamara hari Umukama umwe; hari kandi uburyo bw’ugukora butandukanye [canke, “hari ibikorwa bitandukanye”], . . . Mugabo [ivyo bikorwa vyose bi]rangurwa n’impwemu imwe nyene.” (1 Kor. 12:4-6, 11) Mu vy’ukuri, Paulo yasanishije ubusuku butandukanye bwo mw’ishengero n’ “igikorwa ceranda.” (Rom. 12:1, 6-8) Ntibitangaje kuba yabona yuko vyari bibereye ko umwe mu mwanya wiwe awukoresha mu “gukorera aberanda”!—Rom. 15:25, 26.
6 Paulo yarafashije Abakorinto kubona igituma igikorwa co gutabara cari mu bigize ubusuku bwabo n’ugusenga Yehova kwabo. Raba ivyo yavuze: Abakirisu batanga imfashanyo zo gutabara bazitanga kubera ko “[ba]yobokera inkuru nziza yerekeye Kristu.” (2 Kor. 9:13) Ku bw’ivyo, abakirisu babitumwe n’icipfuzo bafise co gushira mu ngiro inyigisho za Kristu, barafasha abo basangiye ukwizera. Paulo yavuze ko ibikorwa vyiza bakorera abavukanyi babo ari “ubuntu buhebuje bw’Imana.” (2 Kor. 9:14; 1 Pet. 4:10) Ku bw’ivyo, Umunara w’Inderetsi wo ku wa 1 Kigarama 1975 waragize ico uvuze ku bijanye no gukorera abavukanyi bari mu nkenero, muri ivyo hakaba harimwo n’igikorwa co gutabara. Wavuze bikwiriye uti: “Ntidukwiye kwigera dukekeranya ko Yehova Imana n’Umwana wiwe Yezu Kristu baha agaciro cane ico gikorwa.” Ni vyo, igikorwa co gutabara ni umuce uhambaye w’igikorwa ceranda.—Rom. 12:1, 7; 2 Kor. 8:7; Heb. 13:16.
Aho amahera akoreshwa mu bikorwa vy’Ubwami ava
10 Imvo ya mbere: turatanga intererano ku bushake kubera ko dukunda Yehova kandi twipfuza gukora “ibihimbaye mu maso [yiwe].” (1 Yoh. 3:22) Yehova arahimbarwa koko n’uwumusenga atanga abikuye ku mutima. Reka twihweze amajambo intumwa Paulo yavuze ku bijanye n’ukuntu abakirisu batanga. (Soma 2 Abakorinto 9:7.) Umukirisu w’ukuri ntagonanwa canke ngo agoberwe gutanga. Ahubwo atanga kubera “yavyiyemeje mu mutima wiwe.” Ivyo bisobanura ko atanga abanje kuzirikana ibikenewe be n’ico yofasha. Yehova arakunda cane umuntu nk’uyo, kuko “Imana ikunda uwutangana akamwemwe.” Iyindi Bibiliya ivuga iti: “Imana ikunda abantu bakunda gutanga.”
Ducukure ubutunzi bwo muri Bibiliya
Tugoberwe n’‘ingabirano ya gusa itagira uko yovugwa’ Imana yatanze
2 Paulo yari azi yuko ikimazi ca Kristu kitagira akanenge cari icemeza c’uko imihango myiza igitangaza yose Imana yatanze yorangutse. (Soma 2 Abakorinto 1:20.) Ku bw’ivyo, iyo ‘ngabirano ya gusa itagira uko yovugwa’ irimwo ivyiza vyose Yehova azoduha be n’urukundo rudahemuka azotugaragariza biciye kuri Yezu. Nkako, iyo ngabirano irateye akoba cane ku buryo tutoronka amajambo dukoresha mu kuyidondora neza. None kuba twararonse iyo ngabirano idasanzwe bikwiye gutuma twiyumva gute? Ni ibintu bifadika ibihe iyo ngabirano ikwiye gutuma dukora uko twitegurira guhimbaza Icibutso c’urupfu rwa Kristu ku wa gatatu igenekerezo rya 23 Ntwarante 2016?
g99 8/7 20-21
Kwishima vyoba ari bibi?
Mu Vyanditswe vy’ikigiriki, irivuga kau·khaʹo·mai, ryahinduwe ngo “kwishimira, kwirata,” rirakoreshwa mu kuvuga ikintu kibi canke ciza. Nk’akarorero, Paulo yavuze ati: “Uwirata, niyirate muri Yehova.” (2 Abakorinto 10:17) Ivyo bisobanura ko dukwiye kwiratira ukuba Yehova ari Imana yacu, ibishobora gutuma dushira hejuru izina ryiwe.
20-26 RUSAMA
UBUTUNZI BWO MW’IJAMBO RY’IMANA | 2 ABAKORINTO 11-13
“‘Ihwa mu mubiri’ wa Paulo”
Urashobora kuba umunyabubasha naho woba uri n’ubugoyagoye
Hari uwundi musavyi wa Yehova w’umwizigirwa yamusavye ngo amukure “ihwa mu mubiri,” ikaba yari ingorane ibandanya yari afise. Intumwa Paulo yaratakambiye Imana incuro zitatu ngo imukureko ico kigeragezo. Uko iyo ngorane yari imeze kwose, nka kumwe kw’ihwa ribabaza, yari gushobora gutuma Paulo atakaza umunezero mu murimo wa Yehova. Paulo yasanishije iryo hwa n’ukuguma akubitwa. Yehova yamwishuye ati: “Ubuntu ata wari abukwiriye bwanje burahagije kuri wewe; kuko ububasha bwanje buriko butunganirizwa mu bugoyagoye.” Yehova ntiyamukuye iryo hwa yari afise mu mubiri. Paulo yabwirizwa kunyinyana na ryo, mugabo yongeyeko ati: “Iyo ngoyagoya [ni] ho mba umunyabubasha.” (2 Kor. 12:7-10) None yashaka kuvuga iki?
Yehova araha ‘impwemu yera abayimusaba’
17 Mu kwishura amasengesho Paulo yari yatuye, Imana yamubwiye iti: “Ubuntu bganje buraguhāgije; kuk’ubushobozi bganje buhīngūrirwa mu ntege nke”. Paulo na we ati: “Nuko canecane nzonezererwa kwirata intege nke zanje, ng’ubushobozi bga Kristo [“bugume hejuru yanje nk’ihema”, NW]” (2 Ab’i Korinto 12:9; Zaburi 147:5). Gutyo, Paulo yariboneye ko biciye kuri Kristu, ubushobozi bw’Imana bwari bumukingiye nka kurya ihema rikingira umuntu. Muri iki gihe, Yehova arishura mu buryo nk’ubwo nyene amasengesho tumutura. Arakingira abasavyi biwe, bikamera nk’aho ashira ihema hejuru yabo.
18 Mu bisanzwe, ihema ntiribuza imvura kugwa canke ngo ribuze imiyaga guhuhuta, mugabo rirakingira umuntu ivyo bintu ku rugero runaka. N’uburinzi turonswa n’“ubushobozi bga Kristo” ntibubuza ko dushikirwa n’ibigeragezo canke ingorane. Yamara, buradukingira mu buryo bw’impwemu ibintu vyo muri ino si bishobora kutugirira nabi be n’ibitero vya nyene kuyitwara, ari we Shetani (Ivyahishuriwe 7:9, 15, 16). Ku bw’ivyo rero, naho woba uriko unyinyana n’ingorane yanka ‘kukuvako’, urashobora guhera amazinda yuko Yehova azi neza urugamba uriko urarwana, kandi ko yishuye “ijwi ry’ugutakamba kwa[we]” (Yesaya 30:19; 2 Ab’i Korinto 1:3, 4). Paulo yanditse ati: “Imana n’iyo kwizigirwa ntizobakundira ko mugeragezwa n’ibiruta ivyo mushobora, ariko hamwe n’ikibagerageza izobacira icanzo, kugira ngo mubone ingene mushobora kucihanganira”.—1 Ab’i Korinto 10:13; Ab’i Filipi 4:6, 7.
“Aha ububasha uwurushe”
8 Soma Yesaya 40:30. Naho twoba turi abahanga gute, hariho ivyo tutoshobora n’inkomezi zacu bwite. Ico ni ikintu twese dukwiye kumenya. Naho intumwa Paulo yari ashoboye ibitari bike, hari ivyo yipfuza gukora mugabo ntabishikeko. Igihe yaserurira Imana ingorane yari afise, yamubwiye iti: “Ububasha bwanje buriko butunganirizwa mu bugoyagoye.” Paulo yaratahuye ico Imana yari imubariye. Ni co gituma yavuze ati: “Iyo ngoyagoya [ni] ho ngira ububasha.” (2 Kor. 12:7-10) None yashaka kuvuga iki?
9 Paulo yaratahuye ko ivyo yari kwishoboza adafashijwe n’Imana vyari bike cane. Impwemu nyeranda y’Imana yarashobora guha Paulo inkomezi igihe yaba agoyagoya. Uretse n’ico, impwemu y’Imana yarashobora kumuha ububasha bwo kurangura ibikorwa atokwigeze akora n’inkomezi ziwe bwite. Na twebwe ni ukwo. Yehova niyaduha impwemu yiwe, tuzogira inkomezi!
Ducukure ubutunzi bwo muri Bibiliya
Ibibazo vy’abasomyi
“Ijuru rya gatatu” rivugwa mu 2 Abakorinto 12:2 bushobora kuba ari bwa Bwami bwa Mesiya burongowe na Yezu Kristu be na bamwe 144.000, ni ukuvuga ya “majuru mashasha.”—2 Pet. 3:13.
Ni “ijuru rya gatatu” kubera ko ubwo Bwami ari ubutegetsi buhambaye kandi busumba ubundi bwose.
“Iparadizo” Paulo ‘yatwawemwo’ igihe yerekwa, ishobora kwerekeza (1) kuri ya Paradizo igiye kuza kw’isi, (2) kw’iparadizo yo mu buryo bw’impwemu izoba iriho ico gihe, ikazoba yagutse cane kuruta iyo muri iki gihe (3) no kuri ya “paradizo y’Imana” izoba iri mw’ijuru mu gihe c’isi nshasha.
it-1 753
Gusomana
“Ugusomana kweranda.” Abakirisu bo mu ntango bararamukanisha “ugusomana kweranda” (Rm 16:16; 1Kr 16:20; 2Kr 13:12; 1Ts 5:26) canke “ugusomana kw’urukundo” (1Pt 5:14), kumbure bikaba vyagirwa hagati y’abasangiye igitsina. Ukwo kuramukanya gushobora kuba kwavuye ku mugenzo Abaheburayo ba kera bari bafise wo gusomana mu kuramukanya. Naho Ivyanditswe bidatanga amakuru y’ido n’ido, biboneka ko ukwo “gusomana kweranda” canke “gusomana kw’urukundo” cari ikimenyetso c’urukundo n’ubumwe vyarangwa mw’ishengero rya gikirisu.—Yoh 13:34, 35.
27 RUSAMA–2 RUHESHI
UBUTUNZI BWO MW’IJAMBO RY’IMANA | ABAGALATIYA 1-3
“Naramurwanije amaso mu yandi”
Woba wigana ubutungane bwa Yehova?
16 Soma Abagalatiya 2:11-14. Petero yaraguye mu mutego wo gutinya abantu. (Imig. 29:25) Naho yari yariboneye ingene Yehova abona Abanyamahanga, yaratinye ingene Abayuda bagenyerewe bo mw’ishengero ry’i Yeruzalemu bomwiyumvira. Intumwa Paulo, akaba na we nyene yari muri ya nama yabera i Yeruzalemu mu 49, yarahambariye Petero i Antiyokiya, arashira ahabona ubwiyorobetsi bwiwe. (Ivyak. 15:12; Gal. 2:13) None abo bakirisu b’Abanyamahanga Petero yakoreye ico kintu, bavyakiriye gute? Boba bararetse bikabatsitaza? Iryo kosa ryoba ryaratumye Petero aca yakwa amabanga?
Ku bakunda Yehova, “nta gitsitaza kihaba”
12 Petero yaratinye abantu, bikaba vyarashika agatsitara bimwe bikomeye; mugabo yagumye ari intahemuka kuri Yezu no kuri Yehova. Nk’akarorero, yarihakanye ku mugaragaro Shebuja, atari rimwe gusa, mugabo gatatu. (Luka 22:54-62) Mu nyuma, Petero ntiyigenjeje rukirisu, mu gufata Abanyamahanga bari basangiye ukwemera nk’aho hari ukuntu barutwa n’abakirisu b’Abayuda. Ariko rero, intumwa Paulo yabona ico kintu mu buryo butomoye, akaba yabona ko gusumbanya abantu ata kibanza vyari bifise mw’ishengero. Agatima Petero yari afise ntikari kabereye. Imbere y’uko iyo nyifato ya Petero ihungabanya umuryango w’abavukanyi, Paulo yaciye agira ico akoze mu kumuhanura amaso mu yandi. (Gal. 2:11-14) Petero yoba none yariyumvisemwo ko asuzuguritse ku buryo aca aheba gusiganirwa ubuzima? Oya. Yarafatanye uburemere iyo mpanuro Paulo yari amuhaye, arayikurikiza maze aguma muri iryo siganwa.
Ducukure ubutunzi bwo muri Bibiliya
Nukorere Imana udahemuka naho woca mu “makuba menshi”
20 Tuvuge iki ku bitero bidashoka vyibonekeza? Nk’akarorero, dushobora gute gutsinda ugucika intege? Bumwe mu buryo bukomeye kuruta ubundi bwose bwo kubigira ni ukuzirikana ku ncungu. Ivyo ni vyo intumwa Paulo yagize. Yari azi ko vyashika akumva ko agowe. Ariko kandi yari azi ko Kristu atapfiriye abantu batunganye, mugabo ko yapfiriye abacumuzi, Paulo na we akaba yari umwe muri bo. Nkako yanditse ati: “[M]bayeho ku bw’ukwizera kwerekeye Umwana w’Imana yankunze akanyigura.” (Gal. 2:20) Ego cane, Paulo yaremera incungu. Yaratahura ko incungu yatanzwe ku bwiwe.
21 Kubona ibintu muri ubwo buryo, ukabona ko incungu ari ingabirano Yehova yaguhaye ku giti cawe, birashobora kugufasha cane. Ivyo ntibisobanura ko gucika intege bizoca ubwo nyene bihera. Bamwe muri twebwe boshobora kuba ku rugero kanaka babwirizwa kurwanya ico gitero kidashoka cibonekeza gushika isi nshasha ishitse. Ariko ntiwibagire yuko abumira kw’ibanga ari bo bazoronka impera. Turegereje cane wa musi uninahaye, aho Ubwami bw’Imana buzozana amahoro, butume abantu bose b’abizigirwa baba abatunganye. Niwiyemeze kwinjira muri ubwo Bwami, naho woca mu makuba menshi.
it-1 940
Ikete ryandikiwe Abagalatiya
Igihe Paulo yavuga ngo “yemwe Bagalatiya b’imburabwenge,” nta kintu na kimwe cerekana ko yashaka kuvuga abo mu bwoko bw’Abaseleti (Celtes) bari bagwiriye mu buraruko bwa Galatiya. (Gl 3:1) Ahubwo Paulo yariko akarira bamwebamwe muri iryo shengero bemeye kwoshwa n’akagwi k’Abayuda bo muri bo, bano bakaba bashaka gushinga ubugororotsi bwabo bwite bishimikije Itegeko rya Musa, aho kurondera ‘ubugororotsi buva ku kwizera’ bwabonetse biciye kw’isezerano rishasha. (2:15–3:14; 4:9, 10) “Amashengero y’i Galatiya” (1:2) Paulo yandikiye yari agizwe n’Abayuda be n’abatari Abayuda. Mu batari Abayuda harimwo abinjiye idini ry’Abayuda bagenyerewe be n’Abanyamahanga batagenyerewe, kandi bamwe muri bo bakomoka mu bwoko bw’Abaseleti. (Ivk 13:14, 43; 16:1; Gl 5:2) Abo bose hamwe biswe abakirisu b’i Galatiya kubera ko akarere babamwo kitwa Galatiya. Muri rusangi, iryo kete Paulo yaryandikiye abantu yari azi neza baba mu bumanuko bw’iyo ntara y’Uburoma, ntiyaryandikiye abantu atari azi namba bo mu buraruko bw’iyo ntara, narirya bisa n’uko atigeze ahonyozayo ikirenge.