Inkuru y’Ubuzima

“Nta Kintu na Kimwe Nohindura!”

NK’UKO VYAVUZWE NA GLADYS ALLEN

Rimwe na rimwe barambaza bati: “Mu gihe ubuzima bwawe bworamuka busubiye itoto, ni igiki wohindura?” Ndashobora kwishura ntihenze nti: “Nta kintu na kimwe nohindura!” Reka nsigure igituma niyumva gutyo.

MU CI ryo mu 1929, igihe nari mfise imyaka ibiri y’amavuka, hari ikintu gitangaje cashikiye dawe, ari we Matthew Allen. Yararonse agatabu kavuga ngo Des millions de personnes actuellement vivantes ne mourront jamais! (Abantu Amamiliyoni Bariho Ubu Ntibazokwigera Bapfa), kasohowe n’Abatohoji ba Bibiliya bo mu Mahanga Yose, ari kwo Ivyabona vya Yehova bitwa ico gihe. Amaze gusomana igishika impapuro nkeyi gusa, Dawe yaciye atangara ati: “Iki ni ikintu gihambaye kuruta ivyo nigeze gusoma vyose!”

Bidatevye inyuma y’aho, Dawe yararonse ibindi bisohokayandikiro vy’Abatohoji ba Bibiliya. Yaciye ubwo nyene atangura kubwira ababanyi bose ivyo yariko ariga. Ariko rero, nta shengero ry’Ivyabona vya Yehova ryariho mu kibano iwacu mu gihugu hagati. Kubera yuko yatahura ko akeneye kwama aja hamwe n’abandi Bakirisu, mu 1935 Dawe yaciye yimurira umuryango mu gisagara ca Orangeville co mu ntara ya Ontario, muri Kanada kubera ko aho hariyo ishengero.

Muri ico gihe, abana ntibama baremeshwa kwitaba amakoraniro y’ishengero; akenshi baguma hanze y’ahabera amakoraniro bikinira, gushika abakuze barangije. Ivyo ntivyahimbara Dawe. Yiyumviriye ati: “Nimba amakoraniro ampimbara, ategerezwa no guhimbara abana banje.” Naho hari haciye igihe gito yifatanije n’abandi, Dawe yadutegetse twe na musazanje mukuru Bob be na bakuru banje Ella na Ruby kwifatanya n’abakuze mu makoraniro, kandi twarabigize. Bidatevye abana b’Ivyabona bandi na bonyene barayitavye. Kwitaba amakoraniro no gutanga insasanuro vyacitse umuce uhambaye cane w’ubuzima bwacu.

Dawe yarakunda Bibiliya, kandi yari afise uburyo buhimbaye bwo gukina inkuru zo muri Bibiliya. Biciye kuri utwo dukino, yarashize mu mitima yacu itari bwamenye vyinshi ivyigwa bihambaye n’ubu ncibukana umunezero. Ico nibuka ni ic’uko Yehova ahezagira abamugamburukira.

Dawe kandi yaratwigishije gukoresha Bibiliya kugira ngo turwanire ukwizera kwacu. Twarakunda kubikina. Dawe yarashobora kuvuga ati: “Nemera yuko mpfuye nca nja mw’ijuru. Ce munyereka yuko atari yo nja.” Jewe na Ruby twararondera mu gitabu nkoranyamajambo (concordance) kugira ngo dutore ivyanditswe twashobora gukoresha kugira tubeshuze iyo nyigisho. Tumaze gusoma ivyanditswe twaba twatoye, Dawe yaraheza akavuga ati: “Ivyo birashimishije, mugabo n’ubu sindajijuka.” Gutyo twaca dusubira kurondera muri nya gitabu. Akenshi ivyo vyaramara amasaha, gushika Dawe anyuzwe n’inyishu twamuhaye. Ico vyavuyemwo, jewe na Ruby twararonse ibikwiye vyose kugira ngo dusigure ivyo twemera twongere turwanire ukwizera kwacu.

Ugutsinda ivy’Ugutinya Umuntu

Naho nari naramenyerejwe neza i muhira no ku makoraniro y’ishengero, sinobura kwiyemerera icese yuko hariho imice y’ivy’ukuba Umukirisu nasanga igoye. Cokimwe n’abakiri bato benshi, sinanezererwa no kuba uwutandukanye n’abandi, canecane abo twigana mw’ishure. Ikigeragezo ca mbere c’ukwizera kwanje cari cerekeye ico twise amadefile yo kumenyesha ubutumwa.

Intumbero yari iy’uko umugwi umwe ugizwe n’abavukanyi be n’abavukanyikazi ugenda buhorobuhoro uciye mu mabarabara makurumakuru y’igisagara utwaye ivyandiko biriko ivyivugo. Umuntu wese yaramenya umuntu uwo ari we wese wo mu gisagara cacu cabamwo nk’abantu 3.000. Igihe kimwe turi kw’idefile yo kumenyesha ubutumwa, nariko ngendera inyuma ku murongo w’abatwaye icandiko kivuga ngo: “Idini Ni Umutego Kandi Ni Ububeshi.” Bamwebamwe mu bo twigana barankubise ijisho, maze ubwo nyene baca baja ku murongo inyuma yanje, baririmba ngo: “Imana Iragakiza Umwami.” Navyifashemwo gute? Narasenganye ubwira nsaba inkomezi zo kubandanya. Igihe amaherezo nya defile yarangira, naciye nyaragasa ku Ngoro y’Ubwami gusubiza ca candiko, maze nca ndataha. Ariko rero, uwari ajejwe ivy’amadefile yaciye ambwira ko iyindi yari igiye gutangura, kandi yuko bari bakeneye uwundi muntu afasha gutwara icandiko. Ku bw’ivyo, vyansavye gusubira kugenda, ndushiriza gusengana ubwina kuruta uko nari narigeze kubigira. Ariko rero, ico gihe abo twigana bari barushe, bakaba kandi bari batashe. Amasengesho natura nsaba inkomezi yaciye acika amasengesho yo gukura ubwatsi!​—Imigani 3:5.

Twama twakira i muhira iwacu abasuku b’igihe cose. Bari umugwi unezerewe kandi uhimbawe, kandi twararyoherwa iyo turi kumwe na bo. Mu bintu vyo mu ntango ncibuka, ni uko abavyeyi bacu bama batubwira tukiri abana ko ubusuku bw’igihe cose ari wo mwuga mwiza cane ushoboka.

Mu kwerekana ko nakira indemesho baduha, mu 1945 naciye ntangura igikorwa canje mu busuku bw’igihe cose. Mu nyuma narakurikiye mukuru wanje Ella yariko asukura ari umutsimvyi mu gisagara ca Londres, co mu ntara ya Ontario. Ngaho, narinjijwe mu muce w’umurimo niyumvira ko ntokwigeze nshobora gukora. Abavukanyi bahora bagenda bava ku meza imwe baja ku yindi mu bubare bwo ngaho, baha abaje kuhanywera ibinyamakuru Umunara w’Inderetsi na Consolation (ubu citwa Réveillez-vous!). Igihimbaye, igikorwa cakorwa ku mihingamo yo ku ya Gatandatu, gutyo nari mfise umushamvu wose wo gusenga nsaba uburindutsi bwo kugenda! Emwe, ico gikorwa nticari kinyoroheye, mugabo caravamwo impera.

Ku rundi ruhande, narize kandi ukuntu bashikiriza inomero zidasanzwe za Consolation zivuga ivy’uruhamo rw’abavukanyi bacu muri ya makambi y’itunatuniro y’Abanazi, canecane mu gushikira abagabo b’abadandaza bakomakomeye bo muri Kanada, udasize inyuma abakuru b’amashirahamwe akomakomeye. Mu myaka n’iyindi, narabonye yuko Yehova yagumye nantaryo adushigikira uko twiheka kuri we ngo aturonse inkomezi. Nk’uko Dawe yakunda kubivuga, Yehova arahezagira abamugamburukira.

Kwitaba Akamo ko Gukorera Muri Québec

Kw’igenekerezo rya 4 Mukakaro 1940, igikorwa c’Ivyabona vya Yehova carabujijwe muri Kanada. Mu nyuma, ukubuzwa kwarakuweho, mugabo twagumye duhamwa mu ntara ya Québec yari yiganziwemwo n’Abagatolika b’i Roma. Isekeza ridasanzwe ryo gukoresha agapapuro k’inkuru nziza kanditswemwo amajambo akomeye avuga ngo La haine ardente du Québec pour Dieu, pour Christ et pour la liberté, est un sujet de honte pour tout le Canada (Urwanko Rukaze Québec Yanka Imana, Kirisitu be n’Umwidegemvyo, Ni Ikintu Giteye Isoni Muri Kanada Yose) ryatangujwe kugira ngo dushire ahabona ugufatwa nabi kw’abavukanyi bacu bo muri ako karere. Nathan H. Knorr, umwe mu bari bagize Inama Nyobozi y’Ivyabona vya Yehova, yarahuye n’abatsimvyi amajana n’amajana bo mu gisagara c’i Montréal kugira ngo asigure ico igikorwa twari tugiye gukora covyuye. Umuvukanyi Knorr yaratubwiye yuko nimba twemeye kuja muri iryo sekeza, twoshoboye kwitega gufatwa no gutabwa mw’ibohero. Ese ingene ivyo vyagaragaye ko ariko biri! Mu bihe n’ibindi, narafashwe incuro 15. Igihe twasohoka mu murimo wo mu ndimiro, twararaba neza ko twitwaje umujigiti n’igisokozo mu gihe vyari gushika tukamara ijoro ryose mw’ibohero.

Mu ntango, igikorwa kinini twakirangura mw’ijoro kugira ngo ntidukwegere cane amaso y’abantu uko bishoboka kwose. Nakunda gutwara udupapuro tw’inkuru nziza turenze mu gasaho nambara mw’izosi munsi y’ikoti. Ako gasaho kuzuye udupapuro tw’inkuru nziza kaca kavyimba, kagatuma mboneka nk’uwibungenze. Ivyo vyarangirira akamaro igihe naba ninjiye mw’ibisi yaba irimwo abantu benshi nja mu cibare nari narakebewe. Ntivyabaye rimwe canke kabiri aho umugabo akomeye yaca ahagarara agahebera ikibanza yari yicayemwo uwo mugore “yibungenze.”

Uko igihe carengana, twaratanguye kuja mu gikorwa co gukwiragiza utwo dupapuro ku mutaga. Twarasiga ku nzu udupapuro tw’inkuru nziza dutatu canke tune, hanyuma tukaja mu kindi cibare. Akenshi ivyo vyaragenda neza. Ariko rero, umupadiri wa paruwase aramutse amenye yuko twari turi muri ako karere, twaba tugowe. Igihe kimwe, hari umupadiri yagumuye akagwi k’inkozi z’ikibi k’abantu 50 canke 60 kagizwe n’abana be n’abakuze kugira ngo badutere inyanya be n’amagi. Twaciye duhungira mu nzu y’umuvukanyikazi mukirisu umwe, aho twabwirijwe kumara ijoro ryose turyamye hasi.

Hari hakenewe cane abatsimvyi kugira ngo bamamaze mu bantu bavuga Igifaransa muri Québec, ku bw’ivyo, muri Kigarama 1958, jewe na mukuru wanje Ruby twaratanguye kwiga ururimi rw’Igifaransa. Mu nyuma, twararungitswe gukorera mu turere nka tungahe tw’abavuga Igifaransa muri iyo ntara. Aho twarungikwa gukorera hose, twashikirwa n’ibintu bitameze kumwe. Mu karere kamwe, twamaze imyaka ibiri tugenda inzu ku nzu amasaha umunani ku musi tutaronka umuntu n’umwe atwishura! Abantu baraza gusa ku muryango bakaturabira mw’irido bagaca bayisubizako. Mugabo ntitwahevye. Muri iki gihe, hariho amashengero atatu ariko arasagamba muri ico gisagara.

Gushigikirwa na Yehova mu Buryo Bwose

Twarugururiwe akaryo ko gukora igikorwa c’ubutsimvyi budasanzwe mu 1965. Mu karere kamwe twari twarungitswemwo gukora igikorwa c’ubutsimvyi budasanzwe, twarashitse ku gutahura insobanuro ishitse y’amajambo ya Paulo yanditse muri 1 Timoteyo 6:8: “Iyo dufise ivyo turya n’ivyo twambaye biba bitubūmvye.” Twategerezwa guhangira amahera dukoresha kugira ngo turabe neza ayo dusohora. Ku bw’ivyo, twarashize ku ruhande amahera yo kuriha kugira mu nzu hashuhe, kugira turonke amahera yo kuriha inzu, ay’umuyagankuba be n’ay’ibifungurwa. Twitwararitse ivyo vyose, twasigarana amahera angana n’amasenge y’amadolari 25 muri ukwo kwezi yo gukoresha uko dushaka.

Kubera ko twari dufise amahera make yo kuriha, twaguma twakije ubushuhe mu nzu yacu mu masaha makeyi gusa yo mw’ijoro. Kubera ico, icumba cacu c’uburyamo nticigera kirenza ibipimo vy’ubushuhe bishika kuri dogere 15 kandi kenshi haba hakanye cane. Umusi umwe rero, umuhungu w’umwe mu bigana Bibiliya na Ruby yaratugendeye. Ategerezwa kuba yaciye aja muhira maze abwira nyina yuko twariko turicwa n’imbeho kubera yuko mu nyuma yaciye aza araturungikira amadolari cumi uko ukwezi gutashe yo kugura ibitoro kugira ngo tugume twakije nya cuma gitanga ubushuhe igihe cose. Ntitwigeze twumva ko hari ico tubuze mu buryo na bumwe. Ntitwari abatunzi, mugabo twama nantaryo dufise ibikenewe. Twumva yuko ikintu cose kirenzeko wari umuhezagiro. Ese ukuntu aya majambo yo muri Zaburi 37:25 yarangutse: “Sinigeze kubona umugororotsi yahebge, cank’uruvyaro rwiwe rusēgerereza ivyo kurya”!

Naho twahangana n’ukurwanywa, naragize umunezero kubona abatari bake mu bo narongoreye inyigisho ya Bibiliya barashitse ku kumenya ukuri. Bamwebamwe baciye baja mu busuku bw’igihe cose babugira wo mwuga, bikaba bintera umunezero udasanzwe.

Duhangana n’Ibigeragezo Bishasha Tukererwa

Ahitwa Cornwall, i Ontario, ni ho hantu hashasha twaciye turungikwa gukorera mu 1970. Tumaze nk’umwaka dushitseyo, Mawe yaciye arwara. Dawe yari yapfuye mu 1957, jewe na benewacu babiri duca dukurakuranwa mu kwitwararika Mawe gushika arinde apfa mu 1972. Abo twakorana mu butsimvyi budasanzwe ari bo Ella Lisitza na Ann Kowalenko, baratumye muri ico gihe dutekanirwa kandi baradushigikira bimwe biranga urukundo. Baciye bitwararika abo twigana Bibiliya be n’ayandi mabanga muri ico gihe tutari tuhari. Ese ukuntu aya majambo yo mu Migani 18:24 ari ay’ukuri: “Har’umukunzi yimatanya n’umuntu kurusha ūvukana na we”!

Nta gukeka ko ubuzima bwuzuye ibigeragezo. Nshigikiwe n’ukuboko kwa Yehova kuranga urukundo, narashoboye guhangana na vyo. Ndacakurikirana ubuzima bw’umurimo w’igihe cose ndabigiranye umunezero. Uwitwa Bob, uwapfuye mu 1993, yari amaze imyaka 20 mu gikorwa c’ubutsimvyi, harimwo imyaka 10 y’agaciro yamaranye n’umugore wiwe Doll bakora ubutsimvyi. Mukuru wanje Ella, uwapfuye muri Gitugutu mu 1998, yamaze imyaka irenga 30 ari umutsimvyi, kandi agatima k’ubutsimvyi yarakagumanye. Mu 1991, uwundi mukuru wanje Ruby, yatowe kanseri. Yamara, yarakoresheje ubushobozi buke yari afise kugira ngo yamamaze inkuru nziza. Yari umuntu akunda gutwenza, kugeza mu gitondo co ku wa 26 Nyakanga 1999 yapfiriyeko. Naho ntagifise mwene wacu, ndafise umuryango wo mu vy’impwemu ugizwe n’abavukanyi be n’abavukanyikazi bamfasha kuguma ndi umuntu atwenza.

Iyo ndavye inyuma ku buzima nagize, ni igiki nohindura? Sinigeze nja ku mugabo, ariko narahezagiwe mu kuronka abavyeyi bakundana, musanzanje na benewacu bashira ukuri mu kibanza ca mbere mu buzima bwabo. Nditeganye umushasharo kubabona bose vuba mw’izuka. Ndashobora kwiyumvamwo dawe angwa mu nda ubu kandi nkabona amosozi ya mawe turiko turwana mu nda rwose. Ella, Ruby na Bob bazokwigina n’umunezero.

Mu kurindira, ndafise imvo zose zotuma mbandanya gukoresha amagara be n’inguvu zose nsigaranye kugira ngo nshemeze nongere ntere iteka Yehova. Umurimo w’ubutsimvyi bw’igihe cose ni ubuzima bwiza igitangaza kandi buronsa impera. Bumeze nk’uko mbere umwanditsi wa Zaburi yavuze ku vyerekeye abagendera mu nzira za Yehova ati: “Uzonezerwa, uzohirwa.”​—Zaburi 128:1, 2.

[Amafoto ku rup. 26]

Dawe yarakunda Bibiliya. Yaratwigisha kuyikoresha kugira ngo turwanire ukwizera kwacu

[Ifoto ku rup. 28]

Uhereye ibubamfu uja iburyo: Ruby, jewe, Bob, Ella, Mawe na Dawe mu 1947

[Ifoto ku rup. 28]

Ku murongo w’imbere, uhereye ibubamfu uja iburyo: Jewe, Ruby na Ella turi kw’Ihwaniro ry’Intara ryo mu 1998