-
Ubwami bw’Imana ni iki?Urashobora kwiberaho ibihe bidahera—Ivyigwa bishingiye kuri Bibiliya
-
-
ICIGWA CA 31
Ubwami bw’Imana ni iki?
Ubutumwa nyamukuru dusanga muri Bibiliya ni ubwerekeye Ubwami bw’Imana. Yehova azokoresha ubwo Bwami mu guhindura iyi si ibe iparadizo. Ubwami bw’Imana ni iki? Ni ibiki bitwemeza ko buriko buraganza? Ni ibiki bumaze gukora? Kandi ni ibiki buzokora muri kazoza? Tuzoronka inyishu z’ivyo bibazo muri iki cigwa no mu bindi bibiri bikurikira.
1. Ubwami bw’Imana ni iki kandi Umwami wabwo ni nde?
Ubwami bw’Imana ni intwaro Yehova Imana yashizeho. Umwami w’ubwo Bwami ni Yezu Kristu akaba aganza ari mw’ijuru. (Matayo 4:17; Yohani 18:36) Ku vyerekeye Yezu, Bibiliya ivuga iti: “Azoganza . . . ibihe vyose.” (Luka 1:32, 33) Yezu we Mwami w’Ubwami bw’Imana azoganza abantu bose kw’isi.
2. Ni bande bazofadikanya na Yezu kuganza?
Yezu ntazoganza ari wenyene. Abantu bo “mu muryango wose n’ururimi rwose n’igisata cose n’ihanga ryose . . . bazoganza isi.” (Ivyahishuwe 5:9, 10) Ni bangahe bazofadikanya na Yezu kuganza? Kuva Yezu aje kw’isi, abantu amamiliyoni barabaye abigishwa biwe. None abo bose boba bazofadikanya na we kuganza? Oya. Abantu 144.000 ni bo bonyene bazoja mw’ijuru bafadikanye na we kuganza. (Soma Ivyahishuwe 14:1-4.) Abasigaye bose bazoba bari kw’isi kandi bazotwarwa n’ubwo Bwami.—Zaburi 37:29.
3. Kubera iki Ubwami bw’Imana buruta intwaro z’abantu?
Naho abategetsi bagerageza gukora ibintu vyiza, nta bubasha bafise bwo gukora ivyo bashaka vyose. N’igihe bavuye ku butegetsi, hari aho usanga basubiriwe n’abantu batitaho ineza y’abanyagihugu. Ariko Yezu we Mwami w’Ubwami bw’Imana, nta muntu n’umwe azokwigera amusubirira. Imana “[yashinze] ubwami butazokwigera busenyurwa.” (Daniyeli 2:44) Yezu azoganza isi yose kandi ntazogira nkunzi. Arakundana, ni umunyabuntu kandi arangwa n’ubutungane. Vyongeye, azokwigisha abantu gufata abandi muri ubwo buryo, ni ukuvuga kubagaragariza urukundo, ubuntu n’ubutungane.—Soma Yesaya 11:9.
TWINJIRE MU MIZI
Reka turabe igituma Ubwami bw’Imana buruta intwaro zose z’abantu.
4. Ubwami bw’Imana buzoganza isi yose
Yezu Kristu arafise ububasha bwo kuganza buruta ubw’umutegetsi uwo ari we wese w’umuntu yigeze kubaho muri kahise. Nimusome Matayo 28:18, muce muganira kuri iki kibazo:
Ububasha Yezu afise bwo kuganza butandukaniye he n’ubw’abategetsi b’abantu?
Ubutegetsi bw’abantu burahindagurika kenshi kandi usanga butwara akarere kanaka k’isi. Ubwami bw’Imana bwo bite? Nimusome Daniyeli 7:14, muce muganira kuri ibi bibazo:
Kubera iki ari vyiza kuba Ubwami bw’Imana butazokwigera busenyurwa?
Kubera iki ari vyiza kuba buzoganza isi yose?
5. Intwaro z’abantu zitegerezwa gusubirizwa
Kubera iki Ubwami bw’Imana butegerezwa gusubirira intwaro z’abantu? Nimurabe iyo VIDEWO, muce muganira kuri iki kibazo:
Ubutegetsi bw’abantu bwatumye ibintu bimera gute?
Nimusome Umusiguzi 8:9, muce muganira kuri ibi bibazo:
Ubona Ubwami bw’Imana bukwiye gusubirira ubutegetsi bw’abantu? Kubera iki?
6. Abatware b’Ubwami bw’Imana baradutahura
Kubera ko Umwami wacu Yezu yabayeho ari umuntu, arashobora “gusangira natwe umubabaro mu bugoyagoye bwacu.” (Abaheburayo 4:15) Yehova yaratoye abagabo n’abagore b’abizigirwa 144.000 kugira bazofadikanye na Yezu kuganza. Yabatoye abakuye “mu muryango wose n’ururimi rwose n’igisata cose n’ihanga ryose.”—Ivyahishuwe 5:9.
Ubona vyoba bihumuriza kuba Yezu n’abo bazofadikanya kuganza batahura ingene twiyumva n’ingorane ducamwo? Kubera iki wishuye gutyo?
Yehova yarahisemwo abagabo n’abagore bakomoka mu mihingo itandukanye ngo bazofadikanye na Yezu kuganza
7. Ubwami bw’Imana bufise amategeko meza kuruta ay’abantu
Intwaro zirashiraho amategeko agenewe gufasha no gukingira abatwarwa bazo. Ubwami bw’Imana na bwo nyene burafise amategeko abatwarwa babwo bategerezwa gukurikiza. Nimusome 1 Abakorinto 6:9-11, muce muganira kuri ibi bibazo:
Wibaza ko kw’isi ibintu bizoba vyifashe gute igihe abantu bose bazoba bakurikiza amategeko y’Imana?a
Ubona Yehova afise uburenganzira bwo gusaba abatwarwa b’Ubwami bwiwe kwubahiriza amategeko yiwe? Kubera iki wishuye gutyo?
Ni igiki cerekana ko n’abantu batariko barubahiriza ayo mategeko bashobora guhinduka?—Raba umurongo wa 11.
Intwaro z’abantu zirashiraho amategeko akingira abatwarwa kandi bakayungukirako. Ubwami bw’Imana na bwo nyene burafise amategeko meza cane akingira abatwarwa babwo kandi akabagirira akamaro
HARI ABAVUGA BATI: “Ubwami bw’Imana buri mu mutima wacu.”
Womwishura gute?
INCAMAKE
Ubwami bw’Imana ni intwaro ibaho koko iri mw’ijuru, ikaba izoganza isi yose.
Wize iki?
Ni bande bazoganza mu gihe c’Ubwami bw’Imana?
Ni kubera iki Ubwami bw’Imana buruta intwaro zose z’abantu?
Ni ibintu ibihe Yehova yiteze ko abatwarwa b’Ubwami bwiwe bashitsa?
RONDERA N’IBINDI
Nurabe ivyo Yezu yavuze ku bijanye n’aho Ubwami bw’Imana buri.
“Ubwami bw’Imana bwoba buri mu mutima wawe?” (Ikiganiro co kuri jw.org)
Kubera iki Ivyabona vya Yehova bahitamwo gushigikira Ubwami bw’Imana aho gushigikira intwaro z’abantu?
Nurabe ivyo Bibiliya ivuga ku vyerekeye ba bantu 144.000 Yehova yacagura ngo bafadikanye na Yezu kuganza.
Nurabe icatumye umugore yari apfunzwe yemera yuko Imana yonyene ari yo ishoboye kuzana ubutungane kw’isi.
“Naramenye uwuzotorera umuti akarenganyo” (Be maso!, Munyonyo 2011 mu gifaransa)
a Tuzobona amwe muri ayo mategeko mu Gice ca 3.
-
-
Ubwami bw’Imana buraganzaUrashobora kwiberaho ibihe bidahera—Ivyigwa bishingiye kuri Bibiliya
-
-
ICIGWA CA 32
Ubwami bw’Imana buraganza
Ubwami bw’Imana bwatanguye kuganza mw’ijuru mu 1914. Ico gihe nyene, ni ho imisi ya nyuma y’intwaro z’abantu yatangura. None ivyo tuvyemezwa n’iki? Reka turabe ivyo ubuhanuzi bwo muri Bibiliya bwari bwaravuze. Vyongeye, turaza kuraba ukuntu kuva mu 1914 ibintu vyifashe kw’isi, hamwe n’ukuntu abantu bigenza kuva ico gihe
1. Ni ibiki ubuhanuzi bwo muri Bibiliya bwari bwaravuze?
Igitabu co muri Bibiliya ca Daniyeli cari caravuze ko Ubwami bw’Imana bwotanguye kuganza mu mpera y’ikiringo citwa “ibihe indwi.” (Daniyeli 4:16, 17) Haciye imyaka amajana, Yezu yaravuze ko ico kiringo nyene citwa “ibihe vyashinzwe vy’amahanga,” kandi ko kitari bwarangire. (Luka 21:24) Nk’uko tuza kubibona, vya bihe indwi vyarangiye mu 1914.
2. Kuva mu 1914, ibintu vyifashe gute kw’isi kandi abantu bigenza gute?
Abigishwa ba Yezu bamubajije bati: “Ni igiki kizoba ikimenyetso c’ukuhaba kwawe n’ic’insozero y’ivy’isi?” (Matayo 24:3) Mu kubishura, Yezu yababwiye ibintu vyobaye atanguye kuganza mw’ijuru ari Umwami w’Ubwami bw’Imana. Bimwe muri ivyo ni intambara, amapfa na vya nyamugigima. (Soma Matayo 24:7.) Bibiliya yari yaravuze kandi ko inyifato y’abantu bo mu “misi ya nyuma” yotumye mu buzima haba ibintu “bigoye kwihanganira.” (2 Timoteyo 3:1-5) Ivyo bintu vyose vyararushirije kwibonekeza kuva mu 1914.
3. Kubera iki ibintu vyarushirije kwunyuka kuva Ubwami bw’Imana butanguye kuganza?
Haciye igihe gitoyi Yezu abaye Umwami w’Ubwami bw’Imana, harabaye intambara mw’ijuru hagati yiwe hamwe na Shetani n’amadayimoni yiwe. Ariko Shetani yaratsinzwe. Bibiliya ivuga ko “[yararirijwe] kw’isi, n’abamarayika biwe bararirizanywa na we.” (Ivyahishuwe 12:9, 10, 12) Shetani afise ishavu ryinshi kubera azi yuko agiye gukurwaho. Ni yo mpamvu ariko aratera ingorane n’imibabaro kw’isi yose. Ivyo biradufasha gutahura igituma ibintu vyifashe nabi kw’isi. Ubwami bw’Imana bugiye gukuraho izo ngorane zose.
TWINJIRE MU MIZI
Reka turabe ibitwemeza ko Ubwami bw’Imana bwatanguye kuganza mu 1914 hamwe n’ivyo twokora kugira twerekane yuko twemera ko buriko buraganza.
4. Ibihe bivugwa muri Bibiliya birerekana ko Ubwami bw’Imana bwatanguye kuganza mu 1914
Imana yaratumye umwami wa Babiloni ya kera yitwa Nebukadinezari arota indoto yerekana ivyobaye muri kazoza. Ibijanye n’iyo ndoto hamwe n’ukuntu Daniyeli yayisiguye, tubisanga muri Bibiliya. Iyo ndoto yari yerekeye ubwami bwa Nebukadinezari n’Ubwami bw’Imana.—Soma Daniyeli 4:17.a
Nimusome Daniyeli 4:20-26, muce murondera inyishu z’ibibazo bikurikira mukoresheje igicapo kivuga ngo “Ingene indoto yerekeye igiti ifitaniye isano n’Ubwami bw’Imana”:
(A) Ni ibiki Nebukadinezari yarose?—Raba umurongo wa 20 n’uwa 21.
(B) Ni ibiki vyoshikiye ico giti?—Raba umurongo wa 23.
(C) Ni ibiki vyobaye mu mpera ya vya “bihe indwi”?—Raba umurongo wa 26.
Ingene indoto yerekeye igiti ifitaniye isano n’Ubwami bw’Imana
UBUHANUZI (Daniyeli 4:20-36)
Ubwami
(A) Igiti kinini cane
Ubwami buhagarara
(B) “Nimwicire ico giti” gushika ‘ibihe indwi birangiye’
Ubwami busubiraho
(C) ‘Ubwami bwawe uzobusubizwa’
Mw’iranguka rya mbere ry’ubu buhanuzi . . .
(D) Ico giti kigereranya nde?—Raba umurongo wa 22.
(E) Ubwami bwahagaritswe gute?—Soma Daniyeli 4:29-33.
(F) Ni ibiki vyashikiye Nebukadinezari mu mpera ya vya “bihe indwi”?—Soma Daniyeli 4:34-36.
IRANGUKA RYA MBERE
Ubwami
(D) Umwami wa Babiloni Nebukadinezari
Ubwami buhagarara
(E) Inyuma yo mu 606 M.K, Nebukadinezari yarabaye umusazi bituma amara imyaka indwi adashobora kuganza
Ubwami busubiraho
(F) Nebukadinezari yaragarukanye ubwenge aca arasubira kuganza
Mw’iranguka rya kabiri ry’ubu buhanuzi . . .
(G) Ico giti kigereranya bande?—Soma 1 Ngoma 29:23.
(H) Ubwo bwami bwahagaritswe ryari? Twemezwa n’iki ko n’igihe Yezu yari kw’isi ubwo bwami butariko buraganza?—Soma Luka 21:24.
(I) Ubwo bwami bwasubijweho ryari kandi bwatanguye kuganzira hehe?
IRANGUKA RYA KABIRI
Ubwami
(G) Abami ba Isirayeli bagereranya Ubwami bw’Imana
Ubwami buhagarara
(H) Yeruzalemu yarasanganguwe, bituma abami ba Isirayeli bamara imyaka 2.520 batariko baraganza
Ubwami busubiraho
(I) Yezu atangura kuganza mw’ijuru ari Umwami w’Ubwami bw’Imana
Ibihe indwi vyamaze igihe kingana gute?
Ibice bimwebimwe vya Bibiliya biradufasha gutahura ibindi bice vyayo. Nk’akarorero, igitabu ca Bibiliya c’Ivyahishuwe kivuga ko ibihe bitatu n’igice bingana n’imisi 1.260. (Ivyahishuwe 12:6, 14) Ibihe indwi rero bica bingana n’iyo misi uyigwije kabiri, ni ukuvuga imisi 2.520. Hari igihe Bibiliya ivuga umusi ishaka kuvuga umwaka. (Ezekiyeli 4:6) Rero vya bihe indwi bivugwa mu gitabu ca Daniyeli bingana n’imyaka 2.520.
5. Ibintu vyo kw’isi vyarahindutse kuva mu 1914
Yezu yari yaravuze ibintu vyobaye kw’isi amaze kuba Umwami. Nimusome Luka 21:9-11, muce muganira kuri iki kibazo:
Muri ivyo bintu dusomye, ni ibiki umaze kwibonera canke kwumva?
Intumwa Paulo yaravuze ukuntu abantu bobaye bameze mu kiringo ca nyuma c’intwaro z’abantu. Nimusome 2 Timoteyo 3:1-5, muce muganira kuri iki kibazo:
Woba umaze kwibonera abantu bameze gutyo muri iki gihe?
6. Niwerekane yuko wemera ko Ubwami bw’Imana buriko buraganza
Nimusome Matayo 24:3, 14, muce muganira kuri ibi bibazo:
Ni igikorwa gihambaye ikihe cerekana ko Ubwami bw’Imana buriko buraganza?
Ni gute wogira uruhara muri ico gikorwa?
Ubu Ubwami bw’Imana buriko buraganza, kandi igihe c’uko buganza isi yose kiriko kiregereza. Nimusome Abaheburayo 10:24, 25, muce muganira kuri iki kibazo:
Ni igiki umwe wese muri twebwe yokora uko ‘tubona uwo musi wegereza’?
Hamwe womenya ikintu cofasha abandi kandi cobarokora, woca ukora iki?
HARI UWOBAZA ATI: “Ni kubera iki Ivyabona vya Yehova bavuga ko umwaka wa 1914 uhambaye?”
Wokwishura gute?
INCAMAKE
Ubuhanuzi n’ibihe bivugwa muri Bibiliya hamwe n’ukuntu ibintu vyifashe kw’isi muri iki gihe birerekana ko Ubwami bw’Imana buriko buraganza. Turerekana ko ivyo tuvyemera igihe twamamaza ivyerekeye ubwo Bwami kandi tukitaba amakoraniro.
Wize iki?
Ni ibiki vyabaye ku mpera ya vya bihe indwi bivugwa muri Bibiliya mu gitabu ca Daniyeli?
Ni igiki kikwemeza ko Ubwami bw’Imana bwatanguye kuganza mu 1914?
Wokwerekana gute yuko wemera ko Ubwami bw’Imana buriko buraganza?
RONDERA N’IBINDI
Nurabe ivyo abahinga mu vya kahise hamwe n’abandi bantu bavuga ku vyerekeye ivyahindutse kw’isi kuva mu 1914.
“Ni ryari ibintu vyarushirije kumera nabi?” (Be maso!, Ndamukiza 2007 mu gifaransa)
Nurabe ukuntu ubuhanuzi dusanga muri Matayo 24:14 bwahinduye ubuzima bw’umugabo umwe.
“Nta candutira urukino rwa base-ball!” (Umunara w’Inderetsi No. 3 2017)
Twemezwa n’iki ko ubuhanuzi buri muri Daniyeli ikigabane ca 4 bufitaniye isano n’Ubwami bw’Imana?
“Ubwami bw’Imana bwatanguye kuganza ryari? (Igice ca 1)” (Umunara w’Inderetsi, 1 Gitugutu 2014)
Ni igiki cerekana ko vya “bihe indwi” bivugwa muri Daniyeli ikigabane ca 4 vyarangiye mu 1914?
“Ubwami bw’Imana bwatanguye kuganza ryari? (Igice ca 2)” (Umunara w’Inderetsi, 1 Munyonyo 2014)
a Raba ibiganiro bibiri vya nyuma biri mu gice kivuga ngo “Rondera n’ibindi” co muri iki cigwa.
-
-
Ivyo Ubwami bw’Imana buzokoraUrashobora kwiberaho ibihe bidahera—Ivyigwa bishingiye kuri Bibiliya
-
-
ICIGWA CA 33
Ivyo Ubwami bw’Imana buzokora
Ubwami bw’Imana bwaratanguye kuganza. Vuba bugiye guhindura ibintu vyinshi kw’isi. Reka turabe ibintu vyiza bimwebimwe wokwitega ku ntwaro y’ubwo Bwami.
1. Ubwami bw’Imana buzogarukana gute amahoro n’ubutungane kw’isi?
Yezu we Mwami w’Ubwami bw’Imana azokuraho inkozi z’ikibi n’intwaro z’abantu ku ntambara ya Harumagedoni. (Ivyahishuwe 16:14, 16) Ico gihe, ubu buhanuzi bwo muri Bibiliya buvuga ngo: “Hasigaye akanya gatoyi, umubisha ntabe akiriho,” buzoba bwarangutse mu buryo bwuzuye. (Zaburi 37:10) Biciye kuri ubwo Bwami, Yezu azotuma kw’isi yose harangwa amahoro n’ubutungane.—Soma Yesaya 11:4.
2. Ubuzima buzoba bumeze gute igihe ivyo Imana igomba bizoba bikorwa kw’isi?
Ku ntwaro y’Ubwami bw’Imana, “abagororotsi bazokwigabira isi, kandi bazoyibako ibihe bidahera.” (Zaburi 37:29) Nuse n’uwubona mu bwenge wibera mw’isi irimwo abantu b’abagororotsi gusa, kandi bakunda Yehova bakongera bagakundana! Nta n’umwe azoba akirwara kandi abantu bose bazobaho ibihe bidahera.
3. Ni ibiki Ubwami bw’Imana buzokora bumaze gukuraho inkozi z’ikibi?
Inkozi z’ikibi zimaze gukurwaho, Yezu azoganza imyaka 1.000 ari Umwami. Ico gihe, Yezu hamwe n’abazofadikanya na we kuganza 144.000 bazotuma abantu baba kw’isi baba abatunganye. Ku mpera y’iyo myaka igihumbi, isi izoba yahindutse iparadizo irimwo abantu bahimbawe kubera ko bagamburuka amategeko ya Yehova. Mu nyuma, Yezu azoshikiriza Ubwami Se wiwe Yehova. Ico gihe, izina rya Yehova rizokwezwa kuruta ikindi gihe cose. (Matayo 6:9, 10) Bizoba vyagaragaye ko Yehova ari Umutware mwiza yitwararika abo atwara. Yehova azoca arandura Shetani n’amadayimoni yiwe. Vyongeye, azokuraho abantu bose bahisemwo kugarariza intwaro yiwe. (Ivyahishuwe 20:7-10) Ubwami bw’Imana buzotuma ibintu bimera neza gushika ibihe bidahera.
TWINJIRE MU MIZI
Reka turabe igituma twokwizigira ko Imana izokoresha Ubwami bwayo kugira ishitse ibintu vyose Bibiliya isezerana ko bizoba muri kazoza.
4. Ubwami bw’Imana buzokuraho intwaro z’abantu
“Umuntu yaganje uwundi mu kumugirira nabi.” (Umusiguzi 8:9) Yehova azokoresha Ubwami bwiwe mu gukuraho akarenganyo.
Nimusome Daniyeli 2:44 na 2 Abatesalonika 1:6-8, muce muganira kuri ibi bibazo:
Yehova n’Umwana wiwe Yezu bazokorera iki intwaro z’abantu hamwe n’abazishigikiye?
Ibintu wize ku vyerekeye Yehova na Yezu bigukura amazinda gute ko ivyo bazokora bizoba bigororotse kandi biranga ubutungane?
5. Yezu ni Umwami mwiza cane
Kubera ko Yezu ari Umwami w’Ubwami bw’Imana, azofasha abantu bazoba bari kw’isi mu buryo butandukanye. Nimurabe iyo VIDEWO kugira mubone ukuntu Yezu amaze kwerekana ko yipfuza gufasha abantu be n’uko Imana yamuhaye ububasha bwo kubikora.
Ibintu Yezu yakoze igihe yari kw’isi, yari imponjo y’ivyo Ubwami bw’Imana buzokora. Muri iyo mihango ikurikira, ni iyihe ushashaye kwibonera? Nimusome ivyanditswe vyatanzwe kugira mumenye vyinshi ku bijanye n’iyo mihango.
IGIHE YEZU YARI KW’ISI . . .
IGIHE AZOBA ARI MW’IJURU . . .
yarerekanye ko afise ububasha ku bidukikije.—Mariko 4:36-41.
azotorera umuti ingorane z’ibidukikije.—Yesaya 35:1, 2.
yaragaburiye abantu ibihumbi ku gitangaro.—Matayo 14:17-21.
azokuraho inzara kw’isi.—Zaburi 72:16.
yarakijije abarwayi benshi.—Luka 18:35-43.
azotuma abantu bose bagira amagara meza.—Yesaya 33:24.
yarazuye abantu.—Luka 8:49-55.
azokuraho ingaruka zose ziterwa n’urupfu.—Ivyahishuwe 21:3, 4.
6. Ubwami bw’Imana budusezeranira kazoza keza
Ubwami bw’Imana buzoshitsa umugambi Yehova yari afitiye abantu kuva mu ntango. Bazobaho ibihe bidahera mw’iparadizo ng’aha kw’isi. Nimurabe iyo VIDEWO kugira mubone ukuntu Yehova ariko arakoresha Umwana wiwe Yezu kugira ashitse umugambi wiwe.
Nimusome Zaburi 145:16, muce muganira kuri iki kibazo:
Kumenya ko Yehova “[azohaza] icipfuzo c’ikiri n’ubuzima cose,” bituma wiyumva gute?
HARI ABAVUGA BATI: “Tugize urunani, turashobora gutorera umuti ingorane zihanze isi.”
Ni ingorane izihe zananiye intwaro z’abantu Ubwami bw’Imana buzotorera umuti?
INCAMAKE
Ubwami bw’Imana buzoshitsa ivyo Imana yasezeranye. Buzohindura isi ibe iparadizo ibako abantu beza. Ico gihe bazosenga Yehova ibihe bidahera.
Wize iki?
Ubwami bw’Imana buzokweza gute izina rya Yehova?
Ni kubera iki twokwemera ko Ubwami bw’Imana buzoshitsa imihango ivugwa muri Bibiliya?
Mu bintu vyose Ubwami bw’Imana bugiye gukora, ni igiki wipfuza cane kubona?
RONDERA N’IBINDI
Raba Harumagedoni ico ari co.
“Intambara ya Harumagedoni ni iki?” (Ikiganiro co kuri jw.org)
Nurabe ibizoba mu kiringo Yezu yise «amakuba akomeye.»—Matayo 24:21.
Nurabe ukuntu abagize umuryango bozirikana bari kumwe imihango izozanwa n’Ubwami.
Mu kiganiro kivuga ngo “Hari ibibazo vyinshi vyamvuruga umutwe,” nurabe ukuntu uwahoze ari umugumutsi mu vya politike yaronse inyishu z’ibibazo yari amaze igihe yibaza.
“Bibiliya irahindura ubuzima bw’abantu” (Umunara w’Inderetsi, 1 Nzero 2012)
-