Indirimbo ya Salomo
8 “Iyaba wari nka musaza wanjye+ twonse rimwe!+ Ndamutse ngusanze hanze nagusoma,+ kandi abantu ntibabingayira. 2 Nakujyana nkakugeza mu nzu ya mama+ wajyaga anyigisha. Naguha divayi ikaze,+ n’umutobe ufutse w’amakomamanga. 3 Ukuboko kwe kw’ibumoso kwansegura n’ukuboko kwe kw’iburyo kwamfumbata.+
4 “Mwa bakobwa b’i Yerusalemu mwe, narabarahije: muramenye ntimukangure urukundo rwanjye cyangwa ngo murubyutse kugeza igihe ruzumva rubyishakiye.”+
5 “Uriya mugore ni nde+ uzamuka aturuka mu butayu+ yegamiye umukunzi we?”+
“Nagukanguye uri munsi y’igiti cy’umutapuwa. Aho ni ho nyoko yagiriye ku gise igihe yari agutwite. Aho ni ho uwakubyaye yagiriye ku gise.+
6 “Nshyira ku mutima wawe mbe nk’ikashe,+ mbe nk’ikashe ku kuboko kwawe, kuko urukundo rukomeye nk’urupfu;+ urukundo ni nk’imva,* ntirwemera kugira ikindi rubangikanywa na cyo.+ Ikibatsi cyarwo ni nk’ikibatsi cy’umuriro, ikirimi cy’umuriro wa Yah.+ 7 Amazi menshi ntashobora kuzimya urukundo,+ n’inzuzi ntizishobora kurutembana.+ Umuntu aramutse atanze ibintu byose by’agaciro byo mu nzu ye kugira ngo agure urukundo, abantu ntibabyitaho.”
8 “Dufite mushiki wacu muto+ utaramera amabere. Tuzakorera iki uwo mushiki wacu umunsi baje kumusaba?”
9 “Namera nk’urukuta,+ tuzamwubakaho uruzitiro rw’ifeza; ariko namera nk’urugi,+ tuzamukingisha urubaho rw’isederi.”
10 “Ndi urukuta, n’amabere yanjye ameze nk’iminara.+ Ni yo mpamvu mu maso ye nabaye nk’ubonye amahoro.
11 “Salomo yari afite uruzabibu+ i Bayali-Hamoni. Urwo ruzabibu yaruhaye abarinzi,+ maze imbuto zakwera buri wese agatanga ibiceri igihumbi by’ifeza.
12 “Uruzabibu rwanjye ni urwanjye bwite, ndwigengaho. Salomo we, igihumbi ni icyawe, naho magana abiri ni ay’abarinda imbuto.”
13 “Yewe uba mu busitani,+ bagenzi banjye bateze amatwi ijwi ryawe. Reka ndyumve.”+
14 “Mukunzi wanjye banguka; nyaruka nk’ingeragere cyangwa impala ikiri nto mu misozi y’ibihumura.”+